2 Tesalonicenses 1 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Pablopaꞌ kellkërranerr carta añekop ñeñth ameꞌñetsa anetso Tesalónico epoet Silvano ñamha Timoteo

¹ Masheñneshachaꞌ ñamha noxhaneshachaꞌ ñeñthes allowenes apxhetsa all anetso Tesalónico eꞌñe seyemteñoth Yompor Parets epoet ñamha Poechemer Jesucristo ñeñth Yepartseshar yepen. Na Pablon oꞌch alla nekellkërrnaserr poꞌpoñ carta epan masheñ Silvano ñamha masheñ Timoteo.

² Eꞌñe newomhchaꞌteñothes sa napaꞌ oꞌch notas: Yomporepaꞌchña sebensareꞌtampeneꞌ ñeñthara Parets epoet Poechemer Jesucristo ñeñth Yepartseshar yepen. Ñetepaꞌchña sokshateneꞌ eꞌñe sa seyoxhro allowenes.

Allempoch werra Cristopaꞌ aꞌkoñchatarethterrach allowen ñeñth ama eñotayeꞌthe Yompor

³ Oꞌch masheñneshachaꞌ ñamha noxhaneshachaꞌ notas, eꞌñe pokteꞌ xhokmach yeparasyosoꞌteñ Yompor sokop tharroꞌmar sapaꞌ poꞌñoxh alloꞌna sesen ameꞌñaꞌnmaya Yompor ñamha allowenes eꞌñe poesheñaꞌttsospaꞌ alloꞌna sesen morrentannaꞌtyesnomtsa.

⁴ Ñeñthoꞌmarña yañapaꞌ atarr yokshensa. Eꞌñe yoksheñothpaꞌ atarr kowen yeñosyen sokop all allampañoꞌmar all apxhaꞌyenet Yomporekop. Ñetpaꞌ xhokma yeñotatyenanet ateth sepena sa, amaꞌt ñeñth seꞌmoñeꞌteneꞌ ñeñth xhokma sokthareꞌteneꞌ attho moeroxhtatenset, tharraña sañapaꞌ xhokma atarr saꞌwantenanet eꞌñe sameꞌñeñoth Yompor.

⁵ Ñewa, yapaꞌ yeñoteñ Yomporpaꞌ eꞌñe pokteꞌ es phaꞌyen. Ñeñthoꞌmarña yeñoteñ sapaꞌ eꞌñe sameꞌñeñoth ña, ñañapaꞌ eꞌñekaꞌye pokteꞌ entenes allochñapaꞌ atthoch sexherr all amhchaꞌtarethtena ña, sapaꞌ ñeñthekopña atarr saꞌmoeroxhtatarethtenaña theꞌ.

⁶ Tharraña Yomporpaꞌ eꞌñe pokteꞌ enteñ ñach tsaꞌtaterraya moeroxhteñtso allowen ñeñth semoeroxhtateneꞌ sa theꞌ.

⁷ Ñeñth attho atarr semoeroxhtena theꞌ eꞌñe ñokop, Yomporñapaꞌ eꞌñe pokteꞌ enteñ sokop, ñachña ello sokshaterreꞌña sa eꞌñe ateth atarr koshateney ya. Yapaꞌ ñeñthchaꞌña atarr yokshaterreꞌ ñerraꞌm esempoch orretwerra Yepartseshar Jesús allempoch werra poeꞌntañoth. Ña poꞌñoxhpaꞌ orretwerrach epoet poꞌmhllañotheñnaneshar ñeñth atarr awamenkatheshaꞌ phaꞌyen. Ñapaꞌ eꞌñech poꞌyoroxhenñoth werra ateth ñerraꞌmrratheꞌ tsoꞌ woretnets.

⁸ Allempoch werrapaꞌ koñchatwerranchaꞌ allowen ñeñth ama eñotayeꞌthe Yompor ñeñth ama ameꞌñaꞌpoyeꞌ entayeꞌthe kowen ñoñets ñeñth Yepartsesharekop Jesucristo.

⁹ Ñetñapaꞌ atthoch aꞌkoñchatarethterretpaꞌ chenkaꞌwerretchaꞌ errponañowen. Atthoch ñetpaꞌ oꞌch ellopaꞌtetstatarethterret amach entereto Yepartseshar, amach enterrñañeto poꞌkowenña all nanak partsotena.

¹⁰ Ñapaꞌ tharroꞌmarchaꞌ werra atthoch alloweney ñeñthey poeyochreshaꞌ pen Parets, yañapaꞌ yekowentatapoerrñañchaꞌ. Alloweney ñeñthey ameꞌñayeꞌth atarrchaꞌ yekwanrrortapoer. Saꞌnachña kowentatapoerreꞌ tharroꞌmar sapaꞌxhoꞌña sameꞌñena kowen ñoñets ñeñth yeñotatenes.

¹¹ Ñeñthoꞌmarña yapaꞌ xhokma yemaꞌyochampensa allochñapaꞌ atthoch Yomporpaꞌ eꞌñe pokteꞌ entenes attho ñapaꞌ oꞌ xhoreꞌterres oꞌch poeyochreshaꞌ perres samha. Ñamha yapaꞌ añ yenamoennas Yompor eꞌñepaꞌchña poꞌwamenkoth etsotatonasña allowen ñeñth ateth sokthapeꞌchyen kowen ñokop ñamha ora ñeñth allpon sethorraꞌyena eꞌñe sameꞌñeñoth ña.

¹² Atthochña sapaꞌ eꞌñech kowen sekowentaterrñañ Yepartseshar Jesús, ñañapaꞌ kowentaterreschaꞌ samha. Ñeñthpaꞌ eꞌñe Yompor poemoereñothey ñamha Yepartseshar Jesucristo.