2 Corintios 9 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Yomporpaꞌ añ atarr morrentena ñeñth eꞌñe poksheñeshokmañen es apaꞌyets ñokop

¹ Ñamha ñeñthchaꞌ sapxhen alloch seyenpoeꞌ masheñneshaꞌ ñeñth atarr es palltaꞌyetsa Jerusaléño, napaꞌ neñotenes ama sepallteno oꞌch alla nokthapeꞌchaterrserr necartoth ñeñthchaꞌ ateth sepha.

² Tharroꞌmar napaꞌ neñotenes ñeñthpaꞌ ateth atarr semnen sa. Ñeñthoꞌmarña arr Macedonio xhokma noteñ macedonioꞌmarneshaꞌ sapaꞌ xhokma semneñ oꞌch es sapaꞌyes añekop ñeñth atarr es palltaꞌyetsa. Ñeñthoꞌmarña napaꞌ eꞌñe noksheñeshokmañen neñotateñ macedonioꞌmarneshaꞌ ñeñth ateth sepena sa ñeñthes acayoꞌmarneshas ñeñtharasa corintoꞌmarneshas. Ñewa, napaꞌ oꞌ neñotatanet attho awaña charo sapaꞌ semneñeñ oꞌch eꞌñe saꞌpoktat atthoch es sapaꞌyes ñeñth atarr es palltaꞌyetsa. Attho sapaꞌ atarr semneñ oꞌch seyenpoeꞌ ñeñth atarr es palltaꞌyetsa, ñeñthoꞌmarña all Macedoniothpaꞌxhoꞌña theꞌpaꞌ eñall shonteꞌ ñeñth moenets oꞌch es apaꞌyenet ñamet.

³ Tharraña amaꞌt napaꞌ neñotenes atarr semneñeñ oꞌch seyenpoeꞌ ñeñth atarr es palltaꞌyetsa, ñeñthoꞌmarña napaꞌ oꞌch nemñonas añ masheñneshaꞌ ñeñthchaꞌ otatsa. Ñetpaꞌ oꞌch yenposset atthoch sapxhaꞌ añekop ñeñth es palltaꞌyetsa. Allochñapaꞌ ñerraꞌm eꞌñe kowen saññoꞌtwe, atthochña eñotaset ñeñth eꞌñe kowen notenanet sokop, ñeñthpaꞌ eꞌñe poꞌñoxh ateth sephowena.

⁴ Allochñapaꞌ ñerraꞌm esempo nexhap namha sesho epan ñamha masheñneshaxhno macedonioꞌmarneshaꞌ ñerraꞌm yentoses ama sapxhatweñaꞌ, allempoña yapaꞌ xhatheꞌ parrokma yepenknaꞌntatannaꞌta. Allempoña eꞌñetheꞌ orrena neyemtensa.

⁵ Ñeñthoꞌmarña napaꞌ añ pokteꞌ nenten oꞌch noch poꞌpsheñeñ masheñneshaꞌ ñetpaꞌ otetepaꞌ ñanmakmoet, ñeñthchaꞌ sabhcherrayaꞌ atthoch ñetpaꞌ oꞌch yenposset atthoch eꞌñe sapxhaꞌwa ñeñth semnen sa oꞌch eꞌñe sapwe ñeñth es palltaꞌyetsa Jerusaléño, ñeñth ateth sot awathotheñ. Tharroꞌmar napaꞌ eꞌñe pokteꞌ nenteñ sa eꞌñe semneññoth eꞌñech señmañeshaꞌ es sapaꞌyes ñeñth atarr es palltaꞌyetsa. Amachña xha es enamareꞌtyenseto atthoch es sapoenanet.

⁶ Xhokmach seyerpoena añ ñoñets, ñeñthpaꞌ ateth oten: Ñerraꞌm ya atarr koñeꞌth es yapaꞌyen Yomporekop, yapaꞌxhoꞌña oꞌch alla yagërr ñeñth atarr koñeꞌth. Ñerraꞌm atarr aton es yapaꞌyen Yomporekop, yapaꞌxhoꞌña oꞌch alla yagërr ñeñth atarr aton. Ñewa, ñatoꞌ oꞌch netmaꞌntacha ateth ñerraꞌmrratheꞌ xho yenareꞌtatseꞌten yaꞌmro. Ñerraꞌm atarr koñeꞌth yenareꞌtatseꞌtpaꞌ atarrchaꞌ koñeꞌth yaꞌyapaxherr ñerraꞌm esempo poꞌnen. Ñerraꞌm atarr aton yenareꞌtatseꞌtpaꞌ atarrchaꞌ aton yaꞌyapaxherr ñerraꞌm esempo poꞌnen.

⁷ Ñamha añ poktetsa eꞌñe poesheñaꞌttsoy oꞌch yapaꞌyen eꞌñe allpon ñeñth pokteꞌ yentyen eꞌñe ya yeyoxhro. Amachña yempañotha es yapaꞌyeno ñamha amachña poenamareꞌteñotheta es yapoenaneto. Tharroꞌmar Yomporpaꞌ añña atarr morrentena ñeñth eꞌñe poksheñeshokmañen es apaꞌyets.

⁸ Ñamha Yomporpaꞌ shonteꞌ esokmañen echen ñeñthchaꞌ apoerres allochñapaꞌ atthoch xhokma sechenchaꞌ shonteꞌ ñeñth atarr kowen sokop, ñamha sechenchaꞌ shonteꞌ atthoch seyenpoen paꞌnamenoth ñeñth kowentetsa Yomporekop.

⁹ Añpaꞌ ñeñth ateth oten Yompor poꞌñoñ ñeñth anwareth awathotheñ, ñeñthpaꞌ ateth oten: Ñeñth atarr es apoeneꞌ wokchañneshaꞌ amaꞌt awathapaꞌ amach apsarethterro ñeñth attho eꞌñe kowen es pen.

¹⁰ Yomporpaꞌ apoeneschaꞌ shonteꞌ esokmañen allochñapaꞌ atthoch xhokma sechenchaꞌ shonteꞌ atthoch seyenpoenanet paꞌnamenoth ñeñth kowentetsa Yomporekop. Ñamha ñapaꞌ alloꞌnach sen es sapoeneꞌ paꞌnamen allochñapaꞌ alloꞌnach sesen yenpoeneꞌ paꞌnamenoth ñeñth kowentetsa Yomporekop. Ñeñthpaꞌ ñerraꞌm netmaꞌntacha ñatoꞌ oꞌch not: Ñeñthara Yompor ñeñth yapoeneꞌ poerets ñeñthchaꞌ yenareꞌten oꞌch xhap allempo poꞌnenpaꞌ allempochña yeyoren ñeñthchaꞌ yerrar yepen, ñeñthpaꞌ Yomporña aꞌthoreneꞌ atthoch yaꞌyapaxheñ oꞌch yeshonteñ.

¹¹ Atthochña sapaꞌ sechenchaꞌ allowen shonteꞌ esokmañen allochñapaꞌ atthochña shonteꞌch esokmañen sapaꞌyeñ ñeñth es paꞌnamen palltaꞌyetsa. Ñerraꞌmña ateth sephapaꞌ yañapaꞌ yach apwerrawet atthochña ñetpaꞌ xhoreꞌteñet Yompor oꞌch ochet “Parasyos, Nompore, pha yapoeneꞌ ora allowen.”

¹² Ñerraꞌm atethchaꞌ sepena es apaꞌyeseꞌ masheñneshaꞌ ñeñth ameꞌñetsa, ama eꞌñe añekpa sherbeno atthoch es sapoenanet ñeñth palltenet. Añekpaꞌnaña sherben atthoch ñetpaꞌxhoꞌña atarrchaꞌ xhoreꞌchet Yompor oꞌch ochet: “Parasyos, Nompore, pha yapateneꞌ ñeñth allpon yepalltena.”

¹³ Ñamha atthoña ñetpaꞌ ayeꞌchoxhtateññañetchaꞌ Yompor, tharroꞌmar oꞌch eñotenset sapaꞌ poꞌñoxh atthera sameꞌñeññaña Cristo poꞌñoñ. Tharroꞌmareꞌnaña ñetpaꞌ ayeꞌchoxhtateññañetchaꞌ Yompor, attho sapaꞌ sapoenanet paꞌnamen ñeñth allpon palltenet ñet, ñamha poꞌpotantañekop.

¹⁴ Eꞌñech poeyerpoeñothetas sapaꞌ ñetpaꞌ atarrchaꞌ nanak xhoreꞌtatonaset Yompor, tharroꞌmar sapaꞌ oꞌch sorrtatanet Yompor poemoereña allo atarr moerenya.

¹⁵ Yeparasyosoꞌchepaꞌch Yompor tharroꞌmar ña yapoeneꞌ Poechemer, ñeshothña wena ora moereñets ñeñth atarr koxhneshareꞌ. Amaꞌt yemneñeñ oꞌch yaꞌyeꞌchoxhtatwe eꞌñe poktakma, tharraña ya arromñatheypaꞌ amach erroth yepe, ñamha ama yeno yeñoñ atthoch yaꞌyeꞌchoxhtatwoñ eꞌñe poktakma ñeñth ateth yokshena yeyoxhro.