2 Corintios 8 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho macedonioꞌmarneshaꞌpaꞌ eꞌñe poksheñeshokmañen es apaꞌyenet Yomporekop

¹ Ñewa, theꞌ masheñneshachaꞌ ñamha noxhaneshachaꞌ oꞌch neñotaterrserr attho Yomporpaꞌ orrtaterranet poemoereña allowenakop ñeñth pameꞌñeñothet xhokma apxhaꞌyenet all anetso Macedonioꞌmar.

² Ñewa, macedonioꞌmarneshaꞌpaꞌ amaꞌt shonteꞌ paꞌnamen wenanet ñeñth atarr topatenawet, tharraña ñetpaꞌ xhokma atarr koshenet. Ñamha amaꞌt atarr wokchañetyenet, tharraña ñetpaꞌ xhokma apaꞌyeñet poꞌpotantañ ñeñth atarr es nanak palltetsa. Apaꞌyeñet eꞌñe poksheñeshokmañen ateth ñerraꞌmrratheꞌ ñetpaꞌ shonteꞌ esokmañen echenet poꞌchekom.

³ Napaꞌ neñotenanet ñetpaꞌ awoꞌt pomyenet ñeñth allpon moenaꞌyenet ñet poesheñaꞌttset. Amaꞌt ñokpoetpaꞌ palltenetañ tharraña ellonethñapaꞌ oꞌ alla apaꞌyereterr poꞌpsheñeñ poꞌpocheño, amaꞌt ñokpoetpaꞌ palltenetañ. Ñet eꞌñe poemnenñothet ateth penet.

⁴ Ñetpaꞌ xhokma aꞌphthoꞌtennet pokteꞌtheꞌ oꞌch notanet atthoch yenpoet ñamet ñeñth masheñneshaxhno wokchañneshaxhno.

⁵ Napaꞌ eꞌñe allpona notanet ñetña ellonethpaꞌ atarr shonteꞌ pomyeset, tharraña amaꞌt allempo ama pomoenetaꞌ poꞌkhllayor Yomporekop, ñetñapaꞌ ñanmakmoet oꞌ eꞌñe pomwerret Yomporekop, allothpaꞌ ñamha yokop ñeñth ateth moenateney Yompor alloweney.

⁶ Ateth nenteñ macedonioꞌmarneshaꞌ atarr es pomoenet Yomporekop, ñeñthoꞌmarña theꞌpaꞌ oꞌ alla notererr masheñ Tito oꞌch alla awerrerr sesho, allochñapaꞌ atthoch alloꞌnach señotnen eꞌñe kowen pomoeneꞌ Yomporekop, ñeñth allpon yexhatensaꞌ awaña Tito.

⁷ Ñamha sapaꞌ atarr setsoteññañ allowen ñeñth kowen enten Yompor. Ñanompaꞌ atarr seyemteña Yompor, ñamha atarr kowen seserrpareꞌteññañ poꞌñoñ, paꞌnamen esokmañen es señotyen, ñamha eꞌñe soksheñeshaꞌ es sephaꞌyen Yomporekop, ñamha eꞌñe kowen semorrentenya. Ñamha eꞌñe setsotwen ñeñth ateth kowentetsa Yomporekop. Ñeñthoꞌmarña theꞌpaꞌ aña sepalltena patherr atthoch oꞌch setsota eñoteꞌ apaꞌyeseꞌ poꞌpotantañ ñeñth es palltaꞌyetsa.

⁸ Napaꞌ ama neyechareꞌteñotheyeꞌ notenso ateth, añña nemnen oꞌch neñotatas ñeñth ateth pena poꞌpotantañ ñeñth eꞌñe poksheñeshokmañen es apaꞌyeñet ñeñth es palltaꞌyetsa. Allochña ñerraꞌm ñeñth señot, napaꞌ neñotenes atethchaꞌ sephowerra samha. Atthoña neñotenes eꞌñe poꞌñoxh semoerannaꞌtwena allowenes.

⁹ Ñewa, sapaꞌ oꞌ señoter ñeñth ateth pha Yepartseshar Jesucristo. Ñapaꞌ atarr amoerañtosa, ñapaꞌ esokmañen echeneñ Pomporesho, tharraña eꞌñe poemorrenteñothey ya, ñañapaꞌ attha wokchañetos. Allochña eꞌñe poewokchañeteñoth yokop, yañapaꞌ shonteꞌch esokmañen yecherr Yomporeshoth.

^10-12 Ñewa, sa awaña charopaꞌ atarr semneñ oꞌch es sapaꞌyeñ acheñeneshaꞌ ñeñth es palltaꞌyetsa. Eꞌñe soksheñeshaꞌ sapaꞌ awoꞌt samothech es apaꞌyeseꞌ poꞌpotantañ. Ñeñthoꞌmarña theꞌpaꞌ añ eꞌñe pokteꞌ nenteñ sokop. Theꞌpaꞌ alloꞌnach sesen soksheñeshokmañen es apaꞌyesawet, eꞌñe allpon semnaꞌyen poesheñaꞌttsos, eꞌñech allpon sapaꞌyesanet. Tharroꞌmar ñerraꞌm eꞌñe yemneññoth es yap Yomporekop, ñapaꞌ eꞌñech pokteꞌ enteñ amaꞌt eꞌñe errpona yemneñ oꞌch yap. Tharroꞌmar ñapaꞌ amach enamye aton ñerraꞌm ama yecheñe. Allochñapaꞌ oꞌch senwe eꞌñe poktakma. Atthothchaꞌña setsotwa allowen ñeñth ateth poktetsa Yomporekop.

¹³ Napaꞌ ama notenso tharrekopchaꞌ es sapaꞌyen allochñapaꞌ oꞌch attha atarr es sepalltena sa.

¹⁴ Añekopña notenes oꞌch satthekmatwa. Ateth ñerraꞌm theꞌpaꞌ shonteꞌ sechen, sokoppaꞌ añ poktetsa oꞌch sapaꞌyeñ ñeñth es palltaꞌyetsa theꞌ. Allochñapaꞌ ñerraꞌm esempo es sepalltena samhapaꞌ añ poktetsa oꞌch apoerrset ñamet, allochñapaꞌ atthochña eꞌñech satthekmaten.

¹⁵ Ñeñthpaꞌ ateth oteney Yompor poꞌñoñ ñeñth ateth anwareth awathotheñ, ñeñthpaꞌ ateth oten: “Ñeñth echeneꞌ shonteꞌpaꞌ amach es aꞌpchateno. Amaꞌt ñamha ñeñth echeneꞌ koñeꞌthpaꞌ amach es pallteno.”

Attho Titopaꞌ alla awerrerr poꞌpocheño Corinto

¹⁶ Napaꞌ xhokma neparasyosoꞌteñ Yompor tharroꞌmar añ nenan masheñ Tito poeyoxhro attho ñapaꞌxhoꞌña xhokma llekapretensa ateth ñerraꞌm na.

¹⁷ Ñeñthoꞌmarña allempo noteñ oꞌch awerr sesho, ñapaꞌ eꞌñe pokteꞌ enteñ. Elloña ñapaꞌ eꞌñe poemneññoth atarr sechena oꞌch alla awerrerr oꞌch abhcherrsaꞌ.

¹⁸ Ñamha yapaꞌ oꞌch yemñererr masheñ Tito epoet ñamha poꞌpsheñeñ masheñ. Ñewa, añ masheñerpaꞌ allowen ñeñth apxhaꞌyetsa pameꞌñeñothetpaꞌ atarr kowen enteñet attho serrpareꞌtatenanet añ kowen ñoñets ñeñth alloch yekeshperra.

¹⁹ Elloña ñeñth masheñerpaꞌ allowen ñeñth apxhaꞌyetsa pameꞌñeñothetpaꞌ oꞌ net oꞌch yechopeñeꞌch parro atthoch ñach yeyenpoeneꞌ ñeñth attho yethorrena oꞌch yeyenpoeñ poꞌpotantañ. Ñeñthpaꞌ añekop sherben atthoch ayeꞌchoxhtateññañet Yompor, ñamha añekop sherben atthoch eñoteñet eꞌñech yoksheñeshaꞌ yemneñ oꞌch yeyenpannena eꞌñe kowen.

²⁰ Ñeñthoꞌmarña oꞌ net ñamha poꞌpsheñeñ masheñ allochñapaꞌ attho yapxhaten kellepaꞌ amach xha sasareꞌtenyeto kellayoꞌmara.

²¹ Tharroꞌmar yapaꞌ añña yemaꞌyoxhrena oꞌch yorrtat ñeñth eꞌñe kowen enten Yompor, amaꞌt ñamha ñeñth kowen enten acheñeneshaꞌ.

²² Ñewa, theꞌpaꞌ oꞌch yemñonas poꞌpoñ masheñ ñeñthchaꞌ tatsa, maꞌpsheña. Ñeñth poꞌpsheñeñ masheñpaꞌ napaꞌ neñoteñ ñapaꞌ eꞌñe poksheñeshokmañen atarr kowen es maꞌyoxhraꞌyena ñeñth kowentetsa Yomporekop. Ñamha amaꞌt theꞌ attho eꞌmareꞌtenes sa eꞌñoꞌ kowen sameꞌñeña Yompor, elloña theꞌ ñapaꞌ atarr moeneñ oꞌch alloꞌna sen thorraꞌnmatsa eꞌñe kowen Yomporekop.

²³ Ñamha ñerraꞌm eseshaꞌ saꞌphthoꞌteneꞌ oꞌch otaset, “¿amaꞌt seꞌmareꞌteñe masheñ Tito, erroꞌtsentheꞌ?” sañapaꞌ oꞌch soch “ñapaꞌ añ epoet thorrena masheñ Pablo tarwasats Yomporekop atthoña eꞌñe sherbeney yamha.” Amapaꞌ ñerraꞌm aꞌphthoꞌtaset ñamha añ poꞌpsheñeñ masheñekop, sañapaꞌ oꞌch señotatanet ñetpaꞌ arroth amñarethtenet all apxhena allowen masheñneshaxhno ñeñth ameꞌñetsa all Macedonio. Ñetpaꞌ eꞌñe kowen orrtatenet Cristo poꞌkowenña.

²⁴ Ñeñthoꞌmarña theꞌpaꞌ oꞌch notas eꞌñech kowen sagaph añ masheñneshaꞌ, allochña ñetpaꞌ eshekchaꞌ eñotaset sapaꞌ poꞌñoxh atarr semoerenanet, atthochña eñotas ñamha allowen masheñneshaꞌ ñeñth pameꞌñeñothet apxhaꞌyetsa alloth amñarethtenet. Allochñapaꞌ oꞌch eñotaset poꞌñoxh eꞌñe kowen sameꞌñena ñeñth ateth notenanet sokop.