2 Corintios 7 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Ñewa, eꞌñe nemorrenteñothes, masheñneshachaꞌ ñamha noxhaneshachaꞌ oꞌ notwas ateth oteney Yompor ñeñthchaꞌ ateth perrnay. Ñeñthoꞌmarña theꞌpaꞌ añ poktetsa yokop yapaꞌ oꞌch yeswanem ora allowen ñeñth xhokma aꞌsosyateneꞌ yechets ñamha ñeñth xhokma aꞌsosyateneꞌ amaꞌt yekamkëñ. Añña eꞌñe yemhchaꞌnaꞌteñoth Yomporpaꞌ añchaꞌña yemaꞌyoxhrena ñeñth pokteꞌ enten ña.

Attho Pablopaꞌ oꞌ alla atarr koshater corintoꞌmarneshaꞌ tharroꞌmar oꞌ kothapeꞌcherret kowen eꞌñe etserra

² Napaꞌ atarr nemneñ, masheñneshachaꞌ oꞌch alla semorrenterrna eꞌñe seyoxhrokmañen. Napaꞌ amaꞌt poesheñarrothesapaꞌ ama xho erroth nephaso, ñamha amaꞌt poesheñarrothesa ama añeyeꞌ neyxhataso ñeñth ama kowenayaye, ñamha amaꞌt poesheñarrothesapaꞌ ama xhoyeꞌ neshkareꞌtaso amaꞌt eꞌñe mamesha.

³ Ñeñthpaꞌ ama añekpayeꞌ notenso oꞌch neyowareꞌtasa. Añekopña oꞌ alla noterrserr eꞌñe nemorrenteñothes ñeñth ateth oꞌ notwanmas. Poꞌñoxhpaꞌ atarr nemorrentensa eꞌñe neyoxhrokmañen. Ñeñthoꞌmarña napaꞌ eꞌñe pokteꞌ nenteñ eꞌñech parrokma yokrrena amaꞌt ñamha eꞌñech parrokma yerroma.

⁴ Napaꞌ neñotenes sapaꞌ xhokmach sephaꞌyen ñeñth kowentetsa Yomporekop. Ñeñthoꞌmarña napaꞌ atarr nokshapretensa. Amaꞌt nellkënañ nemoeroxhteñothpaꞌ elloña oꞌ alla nanak sokshaterren.

⁵ Amaꞌt allempo nexherr Macedoniopaꞌ xhokma atarr nellkaꞌwerrerr alla. Allpaꞌxhoꞌña xhokma es newapoya paꞌnamen ñeñthña amaꞌt mameshapaꞌ ama eshkayeꞌ neñmatataye neyoxhro atthoch eꞌñe kowen nellaphsos moecheth.

⁶ Attheñapaꞌ oꞌ xherr masheñ Tito. Attho xherr masheñ Titopaꞌ allempoña Yomporpaꞌ alla koshaterren neyoxhro, ñeñthara Yompor ñeñth xhokma yokshateneꞌ allempo es yellkateneꞌ.

⁷ Ama eꞌñe aña nokshataye attho xherr Tito, añña atarr nokshateneꞌ ñeñth attho eꞌñe kowen entapretensaꞌ, ñapaꞌxhoꞌña atarr sokshater. Ñewa, ñapaꞌ eñotatwerren attho sapaꞌ atarr oꞌ seyerpoenna, ñamha oꞌ eñotatwerren attho sellkëñoth sapaꞌ oꞌ alla sameꞌñerra eꞌñe kowen, ñamha oꞌ eñotatwerren attho oꞌ alla sellkapreterrna ñeñth attho sellkatenen na. Ñeñth allpon serrpareꞌtatwerren, napaꞌ ñeñthña ello atarr nanak nokshaterreꞌ.

⁸ Carta ñeñth nekellkonas awaña, ñeñthpaꞌ xha llekatas. Ñeñthoꞌmarña allempo napaꞌxhoꞌña xha moeneꞌ llekatna namha tharroꞌmar oꞌ nemñonas ateth carta. Amaꞌt theꞌpaꞌ neñoteñ añ necarta xha llekatenes tharraña ñeñthpaꞌ eꞌñe mamekpa, ñeñth eꞌñe pokteꞌ nenteñ.

⁹ Atthoña theꞌ napaꞌ eꞌñe kowen nokshena. Ñeñthpaꞌ ama añekpayeꞌ noksheno attho sapaꞌ nellkatas. Theꞌ napaꞌ añekopña nokshena attho sapaꞌ eꞌñe sellkëñoth oꞌ alla sameꞌñerra eꞌñe kowen. Tharraña attho sellkëna sapaꞌ ñeñthpaꞌ ateth senteñ ñerraꞌm Yompor sellkateneꞌ ñeñthchaꞌña sameꞌñaterraya eꞌñe kowen ñokop. Ñeñthoꞌmarña ñeñth ateth nephonas, ñeñthpaꞌ eꞌñe kowen sokop, ñeñth allopaꞌ ama xhoyeꞌ errothen nepenso ñeñth ama pokteyaye amaꞌt mamesha.

¹⁰ Tharroꞌmar ñerraꞌm esempo ateth yenteñ Yomporña ateth yellkateneꞌ ñeñthpaꞌ eꞌñech pokteꞌ yenteñ tharroꞌmar ñeñthpaꞌ alloch yokthapeꞌcherr kowen ñokop, allochñapaꞌ atthochña yekeshperra. Tharraña attho yellkëna arr patsro, ama Yomporekpayeꞌ yellkëno ñeñthpaꞌ ñeñthña alloꞌna aneney rromoeñtso, allchaꞌ yechenkërra poktakma.

¹¹ Sa sellkëñapaꞌ eꞌñe ateth senteñ ñerraꞌm Yompor eꞌñe sellkateneꞌ. Ñeñthoꞌmarña allempotheñ yoroxhen senten sa soꞌchñar ñeñthoꞌmarña sapaꞌ semneñ oꞌch alla kowen nentapreterres. Ñamha ñeñthpaꞌ apenkoxhen senteñ ñeñth atarr athparñath. Ñeñthoꞌmarña semhchañothpaꞌ atarr semneñ oꞌch alla senterren, atthoch eꞌñe kowen naꞌpoktatonas. Ñamha allempotheñña eꞌñe pokteꞌ senteñ oꞌch sekoñchach ñeñth athparñathtetsa. Ñeñthoꞌmarña theꞌpaꞌ ateth oꞌ sephowerra ñeñth eꞌñe pokteꞌ nenten, allochñapaꞌ amach alloꞌna saꞌyowarethteno.

¹² Ñamha oꞌch notas, awaña allempo nekellkërrnaserr añ necartapaꞌ ama athparñathekpayeꞌ nekellkërrnaserro ñamha ama nokpayeꞌ nekellkërrnaserro ñeñthen atarr athpareꞌtenet. Añekpaꞌnaña nekellkërrnaserr carta allochñapaꞌ atthoch xhaponasa seyoxhro poꞌñoxh sapaꞌ atarr semorrentenna. Amaꞌt Yomporpaꞌ eñotenes.

¹³ Ñeñthoꞌmarña atthoña oꞌ alla atarr sokshaterrey. Elloña napaꞌ añ atarr nokshaterreꞌ attho nenter masheñ Tito attho ña awoꞌt alla atarr sokshater, eꞌñe poeyoxhrokmañen oꞌ atarr kosherra.

¹⁴ Ñewa, awaña allempoch awoꞌ masheñ Tito sesho, napaꞌ ateth noch sapaꞌ atarrchaꞌ kowen sameꞌñya. Allempoña xhap seshopaꞌ eꞌñe ateth sameꞌñya ñeñth ateth noch. Ñeñthoꞌmarña napaꞌ amaꞌt mameshapaꞌ amach errothenoth sepenkatno, ama attha nommoꞌchenso. Eꞌñe poꞌñoxh ateth sephowena ñeñth ateth noch Tito. Ñamha ñeñth ora allpon ateth notas, ñeñthpaꞌ eꞌñe poꞌñoxh ateth.

¹⁵ Ñamha eꞌñe semhchaꞌnaꞌteñothpaꞌ awoꞌt sagaph Tito eꞌñe kowen. Ñamha ñeñth ora allpon kothapeꞌchatas Tito sapaꞌ awoꞌt eꞌñe kowen ameꞌñaterrsa. Ñeñthoꞌmarña theꞌ Titopaꞌ eꞌñe poeyerpoeñothes, ñapaꞌ atarr morrentensa nanak.

¹⁶ Ñeñthoꞌmarña napaꞌ atarr nokshena tharroꞌmar neñotenes sapaꞌ oꞌ sameꞌñaꞌwerra eꞌñe kowen.