2 Corintios 4 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Pablopaꞌ atarr kowen yexhatenanet Yompor poꞌñoñ

¹ Yomporpaꞌ eꞌñe poemoereñoth moenatenen oꞌch nethorreññaña ñeñth nanak sherbets ñokop. Ñeñthoꞌmarña napaꞌ ama nellkëñotheyeꞌ neserrpareꞌteññañe poꞌñoñ.

² Ñeñth aꞌnawa es phaꞌyenet ñeñth apenkoxhen yenten yokop ya ñeñthey thorretsa Yomporekoppaꞌ ñeñthña napaꞌ oꞌ naꞌypoꞌñamper. Ñamha napaꞌ ama es neshkëñoth nephaꞌyeno masheñneshakop. Ñamha napaꞌ allempo neserrpareꞌtateñ acheñeneshaꞌ ama xhoyeꞌ naꞌpoꞌpoñeteññañe Yompor poꞌñoñ. Añchaꞌña eꞌñe naꞌpotheññañ Yompor poꞌñoñ eꞌñe poꞌñoxh ñeñth ateth oten poꞌñoñ. Yomporpaꞌ entenen ñeñth ateth notenes ñeñthpaꞌ eꞌñe poꞌñoxh ateth. Ñamha amaꞌt erraꞌtsena acheñer ñeñth eñoteneꞌ ñeñth eꞌñe pokteꞌ entenet ñet poeyoxhretopaꞌ ñetpaꞌxhoꞌña eꞌñech kowen entapretennet.

³ Attho yeserrpareꞌteññañ Yompor poꞌñoñ ñeñth poꞌñoxh alloch yekeshperra tharraña patantarr acheñeneshaꞌpaꞌ amach xhapaneto poeyoxhreto ñeñth alloch yekeshperra. Ñeñth ateth petsapaꞌ alloꞌna senet allchaꞌ chenkaꞌwerret.

⁴ Ñeñthara acheñeneshaꞌ ñeñth ama ameꞌñetso, ñetpaꞌ añña poꞌyomporer penet arr patsro ñeñth oneñeth, ñeñthña ama moenatenaneto oꞌch xhapanet poeyoxhreto Yompor poꞌñoñ; allochñapaꞌ atthothchaꞌ amach eshkayeꞌ kowen enteññañeto Cristo poꞌkowenña. Ñapaꞌ atthekma kowentena ñerraꞌmrratheꞌ Pompor Parets ñeñth ama entpawoyaye. Ñeñth poꞌkowenñapaꞌ ñeñthara yoten kowen ñoñets alloch yekeshperra. Ñatoꞌ oꞌch netmaꞌntacha attho oneñethpaꞌ aꞌnataklleꞌchenanet atthochña amach eshkayeꞌ kowen enteññañeto Cristo poꞌpoetarenña.

⁵ Tharroꞌmar ñeñthey eꞌñe yeñmañeshokmañen seserrpareꞌtateneꞌpaꞌ ñeñthpaꞌ ama añekpayeꞌ ateth yepeno atthoch senteney ya ñerraꞌmrratheꞌ samoꞌmteꞌ sepeney. Añchaꞌña yeserrpareꞌtatenes Jesucristo, ñachña Separtseshar sepen. Yapaꞌ añña atarr yethorrena sokop eꞌñe yemorrenteñoth Jesús.

⁶ Ñewa, yapaꞌ yeñoteñ ateth ot awath Yompor, ñeñthpaꞌ ateth ot: “Eñalletepaꞌch poetareꞌ allochñapaꞌ oꞌwañchaꞌ chekmet.” Ñeñthara Yompor theꞌñapaꞌ oꞌ aꞌpoetarsamperrnay yamha yeyoxher allochñapaꞌ atthoch yeñotater poꞌpotantañ acheñeneshaꞌ attho Cristopaꞌ ña orrtateneꞌ Pompor poꞌkowenña.

Amaꞌt ama esosheꞌmayayye eꞌñe yeyemteñoth Yomporpaꞌ ñapaꞌ xhokmach awamenkath peney

⁷ Ñeñthpaꞌ attho Yomporpaꞌ awoꞌt chorrerrya yeyoxhro poꞌkowenña, amaꞌt yapaꞌ arromñathaya, ama esosheꞌmayayye. Añekopña oꞌ chorrerrya ya amaꞌt ñeñthey ama esosheꞌmayayye, allochñapaꞌ atthoch eñochet ñeñth attho atarr awamenkath yentenapaꞌ ñeñthpaꞌ ama yoyaye yewomenk, ñeñthpaꞌ Yomporeshoth wena. Ñatoꞌ oꞌch netmaꞌntacha ateth ñerraꞌm awath poꞌpoñ acheñ ñerraꞌm esempo atarr es morrentenetpaꞌ oꞌch eshaꞌteñet patsrrogo amaꞌt ñeñth koyemhpaꞌ ama eꞌñe kowenayaye.

⁸ Ñewa, amaꞌt allemhatheñchaꞌ waponaya ñeñthchaꞌ atarr yaꞌllpatateꞌ, tharraña xhokmach eñall atthoch yeswanemh. Ñamha amaꞌtchaꞌ atarr yellkënañ nanakpaꞌ tharraña xhokmach eñall atthoch yeswanemh allowen ñeñth allkatañtetsa.

⁹ Ñewa, amaꞌtchaꞌ kothareꞌteney ñeñth yeꞌmoñeꞌteneꞌ tharraña Yomporpaꞌ amach aꞌypoꞌñenye amaꞌt mamesha. Amaꞌtchaꞌ oꞌshsheꞌmayet patsopaꞌ xhokmach alla yetanterra.

¹⁰ Xhokmach moeneꞌ yerromañ ateth peteꞌth Jesús. Tharraña attho Jesúspaꞌ oꞌ alla tanterra yapaꞌxhoꞌña atthoña oꞌ aꞌkeshphaterrey allempo es yewenoya. Atthochña yeñotach acheñeneshaꞌ attho Jesús theꞌpaꞌ oꞌ bethterra.

¹¹ Attho allponmat yokrrena añe patsro yapaꞌ xhokmach pomatatenyet yerromoepaꞌtoꞌ. Eꞌñe yemorrenteñoth Jesús ateth penyet. Tharraña attho Jesúspaꞌ oꞌ alla tanterra, yapaꞌxhoꞌña atthoña aꞌkeshphaterrey allempo es yewenoya amaꞌt yapaꞌ arromñatheneshaya. Atthochña yeñotach acheñeneshaꞌ attho Jesús theꞌpaꞌ oꞌ bethterra.

¹² Eꞌñe nethorreñoth Cristokop xhokmach nanak nemoeroxhetwanena awtsanchaꞌ rromoets. Tharraña ñeñthpaꞌ atarr kowen sokop tharroꞌmar ñeñthpaꞌ alloch eꞌñe sekeshphaꞌwerra samha.

¹³ Añmapaꞌ ñeñth ateth oten Yompor poꞌñoñ ñeñth ateth anwareth awathotheñ ñeñthpaꞌ ateth oten ñeñth kellkëꞌ libro Salmos, “Napaꞌ atarr neyemteña Yompor ñeñthoꞌmar ateth neꞌñorena ñokop.” Yapaꞌxhoꞌña eꞌñe atthekma yokthapeꞌchen yamha. Eꞌñe atthekma yeyemteña Yompor, ñeñthoꞌmar yapaꞌxhoꞌña atthekma yeꞌñorena yamha.

¹⁴ Yapaꞌ yeñoteñ Yomporpaꞌ awoꞌt tantaterran Poechemer ñeñthara Yepartseshar Jesús. Ñeñthoꞌmar yeñoteñ yapaꞌxhoꞌña tantatwerreychaꞌ Yompor eꞌñe ateth phan Poechemer Jesús, allochñapaꞌ amaꞌt sapaꞌ oꞌch xhapatwerres allowenes eꞌñe parro ñesho.

¹⁵ Ñeñthoꞌmarña napaꞌ Yomporña nemnateꞌ oꞌch nemoeroxhtameꞌta; ñeñthpaꞌ eꞌñe sokop, allochñapaꞌ atthothchaꞌ Yompor poemoereña xhapchaꞌ shonteꞌ acheñeneshesho, allochñapaꞌ shonteꞌch acheñeneshaꞌ alloꞌnach senet parasyosoꞌtnomoet Yompor, atthochña eꞌñe kowen yaꞌyeꞌchoxhtateññañ Yompor.

¹⁶ Ñeñthoꞌmarña napaꞌ ama nellkëñotheyeꞌ nethorreññañoña Yompor poꞌtarwas. Amaꞌt nechetspaꞌ alloꞌna sen wañwanmats attho nowmenknaꞌntena, tharraña nekamkëññapaꞌ alloꞌna sen womenkatnomoets eꞌñe patheꞌtets yeth.

¹⁷ Tharroꞌmar ñeñth attho allpon yemoeroxhtameꞌtyena añe patsro, ñeñthpaꞌ ama esoyaye, eꞌñe mamekpa. Ñeñthpaꞌ añekpaña wennaya allochñapaꞌ atthoch wapatwerrnay ñeñth atarr nanak kosheñets ñeñth ama awañaño amaꞌt errponaña, ñeñth ello nanak atarr koxhneshaꞌtetsa, ñeñth atarr nanak kowen.

¹⁸ Tharroꞌmar yapaꞌ ama añeyeꞌ yeyemteno ñeñth allpon koxhneshaꞌ yentyen arr patsro, tharroꞌmar añexhno ñeñth allpon yentyenpaꞌ wañerrchaꞌ. Yapaꞌ añña yeyemtena añexhno ñeñth kowentetsa Yomporekop ñeñthpaꞌ ama entpawoyaye ñamha ñeñthpaꞌ amach wañerro amaꞌt errponaña.