2 Corintios 11 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho ommoñatheneshaꞌpaꞌ awoꞌt shekënan corintoꞌmarneshaꞌ ñetpaꞌ allsensarethetoꞌ

¹ Napaꞌ atarr nemneñ oꞌch seꞌmhñoton attho xha moeneꞌ attha es notatseꞌtyen. Poꞌñoxh oꞌch notas, seꞌmhñoton ñeñth ateth es notatseꞌtyen, allochñapaꞌ atthoch neñotatas ñeñth ateth nokthapeꞌchen.

² Tharroꞌmar napaꞌ atarr nekwenes ateth ñerraꞌm Yompor ña sekweneꞌ. Tharroꞌmar napaꞌ añ noꞌpatatensa Cristo atthoch allowenes oꞌch eꞌñe napwas poktakma. Attho oꞌpatatarethes, napaꞌ oꞌch nekwenes atthoch amach yoratstaso poꞌpsheñeñ. Ñewa, oꞌch netmaꞌntatasa ateth ñerraꞌmrratheꞌ poesheñarr yakma ñeñth esñeth. Poꞌseññapaꞌ oꞌch oꞌpatacha poesheñarr yakma ñeñthchaꞌ poerrollar phaꞌ. Ñapaꞌ oꞌch kowampenan poꞌseñ eꞌñe kowen tharrempowach esempoch wapa ñeñth oꞌpatenaya allempochña pomanña poꞌseñ ñeñth ama aꞌphllaretheyaye. Ñeñthoꞌmarña napaꞌ eꞌñe ateth nentenes ñerraꞌmrratheꞌ nesñeneshaꞌ nepenes atthoch napwas Cristo ñeñth ateth ñerraꞌmrratheꞌ ñeñthchaꞌ eꞌñe serrollar sephaꞌ ñapoeth.

³ Tharraña napaꞌ xha sellkatenen. Napaꞌ noten sapaꞌ oꞌtheꞌ xha semnatena oꞌch shekaset samha, ateth pha awath shecheph allempo shekan Eva tharroꞌmar ñeñth shechephpaꞌ atarr etsotenan shekëñets. Ñerraꞌm sapaꞌxhoꞌña poeshkëñothetaspaꞌ añach yexhatenset ñeñth ama kowenayaye kothaphñats, ñeñthoꞌmarña oꞌwañchaꞌ alloꞌna sesen ameꞌñenaya Cristo ñapoeth ñeñth eꞌñe kowen.

⁴ Tharroꞌmar sapaꞌ ñerraꞌm esempo wena poꞌpotantañ sesho, amaꞌt serrpareꞌtatensetañ ñeñth ateth peꞌth Jesús tharraña ñeñthpaꞌ ama attheyaye ñeñth ateth yeyxhatwas ya awañmoꞌcha, sañapaꞌ esoꞌmareꞌtña allorokma eꞌñe soksheñeshaꞌ sameꞌñeña. Amaꞌt serrpareꞌtatenset poꞌpoñ kothaphñats ñeñthpaꞌ ama añeyaye Yompor pokthaphña, sañapaꞌ allorokmaꞌtña eꞌñe pokteꞌ senteñ oꞌch sameꞌñya. Amaꞌt serrpareꞌtatensetañ poꞌpoñ ñoñets alloch sekeshperrañ, ñeñthpaꞌ ama añeyaye ñeñth eꞌñe kowen ñoñets ñeñth sameꞌñaꞌwa awañmoꞌcha, tharraña sañapaꞌ eꞌñeꞌt pokteꞌ senteñ oꞌch ameꞌñataset poꞌpoñ ñoñets.

⁵ Ñamha ñetpaꞌ attha ommoꞌchenet allsensarethetoꞌ Yomporeshoth, ñetpaꞌ atarroꞌ sherbenet. Tharraña napaꞌ elloña atarr asherben nentena.

⁶ Amaꞌt napaꞌ ama ayxhataretheno atthoch neserrpareꞌt koxhneshareꞌ ñoñets tharraña napaꞌ eꞌñe neñotweññañ Yompor poꞌñoñ. Sapaꞌ señotenen ñeñth ateth notenes ñeñthpaꞌ eꞌñe poꞌñoxh ateth tharroꞌmar shonteꞌ paꞌnamen norrtatyen errakmañen ñeñthña eꞌñe señotateneꞌ.

⁷ Ñewa, sapaꞌ amatheꞌ pokteyeꞌ sentenno tharroꞌmar amaꞌt awañmoꞌchapaꞌ ama xhoyeꞌ necobraso attho neserrpareꞌtatensaꞌ Yompor poꞌñoñ ñeñth alloch yekeshperra. Ñatoꞌ amatheꞌ asherbenayeꞌ sentenno attho ama necobraso. Tharraña ñeñthpaꞌ añekop sherben atthoch sapaꞌ oꞌch tantaterres Yompor sosyaꞌtsañoth allochñapaꞌ oꞌch poechemer perres samha.

⁸ Ñewa, poꞌpoñ anetso all apxhaꞌyenet pameꞌñeñothet Yompor, na errothenopaꞌ xhokma nagënanet ñeñth allpon moenenet oꞌch tsaꞌtnet eꞌñe ñet pokthaphñothet. Ñeñthoꞌmarña ama pallteno oꞌch setsaꞌtna samha attho neserrpareꞌtatenes. Ñeñth napaꞌ ateth nenteñ ñerraꞌmrratheꞌ poꞌpoñ anetso all apxhaꞌyenet pameꞌñeñothet Yompor, napaꞌ awoꞌt neprratamphsanet ñet atthoch nesherbhas sa.

⁹ Awañmoꞌcha allempo naꞌposa seshopaꞌ ñerraꞌm esempo nanak es nepalltena, sapaꞌ amaꞌt poesheñarrothesapaꞌ ama naꞌtsrreꞌmoxhtanaꞌtaso es senamareꞌteꞌ ñeñth nepalltena. Tharraña allempo atarr es nepalltenapaꞌ oꞌ waxhaꞌta masheñneshaꞌ Macedonioth, ñetñapaꞌ oꞌ aposnet allpon ñeñth atarr nepalltena. Atthoña allponmat naꞌpoena sesho awañmoꞌcha, napaꞌ amaꞌt mameshapaꞌ ama nemno oꞌch naꞌtsrreꞌmoxhtanaꞌtasa amaꞌt eꞌñe poesheñarrothesa. Ñamha napaꞌ xhokmach ateth nepena.

¹⁰ Napaꞌ neñotena Cristopaꞌ entenen eꞌñe poꞌñoxh kowen ñeñth ateth nepena, ñeñthoꞌmarña napaꞌ amaꞌt eseshapaꞌ amatheꞌ errothenoth kexhpatatnetoña attho eꞌñe kowen neserrpareꞌteññañ Yompor poꞌñoñ eꞌñe attha ñeñth allo atarr nokshena, amaꞌt errapharen nesen Acayoꞌmar.

¹¹ ¿Esoꞌmartheꞌña ateth notenes? ¿Amaꞌt señoteñe? Xhatheꞌ sotenapañ amatheꞌ nemorrentenso. Tharraña ñeñthpaꞌ ama attheyaye. Yomporña nenteneꞌ atarrkaꞌye nemorrentensa.

¹² Napaꞌ xhokmach ateth nepena amach necobrenso ñeñth ateth pena poꞌpotantañ ñeñth pommoꞌcheñotheta serrpareꞌtatyenset. Allochña ñetpaꞌ amach errothenoth otneto napaꞌxhoꞌña awoꞌ naꞌtsrreꞌmoxhtanaꞌch namha acheñeneshaꞌ ateth penet ñet. Tharroꞌmar napaꞌ ama pokteyeꞌ nenteñe oꞌch otet eꞌñoꞌ atthekma yethorrena Yomporekop.

¹³ Tharroꞌmar ñeñth ateth acheñpaꞌ ama Yomporeyeꞌ llesensenaye, ñetpaꞌ aña poꞌtarwas penet shekëñets atthoch ganenet eꞌñe attha. Attha moeneñet oꞌch poꞌpoñetet awoꞌch orrtet ateth ñerraꞌm Cristo poellsensar.

^14-15 Ñewa, yapaꞌ yeñoteñ oneñethpaꞌ xhokma ateth pena ñamha oꞌch poꞌpoñet atthothchaꞌ shekëney. Oneñethpaꞌ xhokma orrtatennay ñeñthchaꞌ kowen yenten ya, oꞌch orrtatennay ateth ñerraꞌmrratheꞌ ñapaꞌ Yompor poꞌpoetarenñoth amñareth ñeñth atarr kowen. Ñeñthoꞌmarña yeñoteñ oneñeth poeyochreshaꞌ ñeñth thorretsa ñokoppaꞌ ñetpaꞌxhoꞌña atarrchaꞌ ashkañareret, moeneñet oꞌch poꞌpoñetet atthothchaꞌ orrtenet ateth ñerraꞌm añ acheñer ñeñth eꞌñe poꞌñoxh thorretsa Yomporekop. Tharraña ñeñth ateth petsapaꞌ añ oꞌpatenawet koñcheñets ñeñth poktetsa añekop ñeñth ateth phatseꞌtyetsa.

Attho Pablopaꞌ paꞌnamenoth moeroxhtateñet eꞌñe pameꞌñeñoth Cristo

¹⁶ Ñewa, theꞌpaꞌ oꞌch alla noterrserr. Amach sentatsetno napaꞌ atthatheꞌ notatseꞌtyen. Ñewa, amaꞌt sentenen ateth ñerraꞌm otatsñathenpaꞌ notatseꞌteñothñapaꞌ seꞌmhñoten. Tharroꞌmar napaꞌxhoꞌña oꞌch eꞌñe kowen neños ñeñth eꞌñe nokpa ateth ñerraꞌmrratheꞌ xho nommoꞌchena mameꞌ.

¹⁷ Ñewa, ñeñth ateth notenes theꞌpaꞌ ama kowenayaye tharroꞌmar ama añekpayeꞌ llesensaꞌnoña Yepartseshar oꞌch eꞌñe kowen neñen ñeñth eꞌñe nokpa. Theꞌpaꞌ eꞌñe na notatseꞌteñoth eꞌñe kowen neñen ñeñth eꞌñe nokpa ateth ñerraꞌmrratheꞌ xho nommoꞌchena. Tharraña ñeñth ateth notenes neñoteñ ñeñthpaꞌ eꞌñe poꞌnoxh netsotweñ.

¹⁸ Attho shonteꞌ poꞌpotantañ ommoꞌchyenet ñeñth ateth etsotenet ñet arr patsro, napaꞌxhoꞌña oꞌch neñosatseꞌtapretyesanet ateth ñerraꞌmrratheꞌ xho nommoꞌchapretyenanet.

¹⁹ Sapaꞌ eꞌñe ateth sentena sañeña atarroꞌ es señoten ñeñthoꞌmarña eꞌñe pokteꞌ senteñ oꞌch seꞌmhñoteññañ amaꞌt otatsñath ñeñth attho ommoꞌchena.

²⁰ Amaꞌt ñet attho pomnaren penset, sañapaꞌ eꞌñech pokteꞌ senteñ. Amaꞌt es poerratamphsaset ñeñth allpon sechyen, sañapaꞌ eꞌñech pokteꞌ senteñ. Amaꞌt paꞌnamenoth shekareꞌtenset, sañapaꞌ eꞌñech pokteꞌ senteñ. Amaꞌt atarr poetsenaꞌteñothetaspaꞌ sañapaꞌ eꞌñech pomnaren sephatena. Ñerraꞌm esempo amaꞌt xho takllapechenset, sañapaꞌ eꞌñech pokteꞌ senteñ attho atarr penknaꞌntatenset.

²¹ Napaꞌ ama nepenkëñotheyeꞌ notenso, napaꞌ ama nemno newamenkothpaꞌ oꞌch pomnaren nepenes, ateth penes poꞌpotantañ. Ñewa, tharraña amaꞌt errothenotheꞌ ommoꞌchyenetpaꞌ napaꞌxhoꞌña oꞌch ateth neñosatseꞌtapretyesanet. Notatseꞌteñothpaꞌ xhach nottena ateth ñerraꞌmrratheꞌ xho nommoꞌchapreteña ommoñatheneshaꞌ.

²² Ñetpaꞌ pommoꞌcheñothetpaꞌ otenet ñetpaꞌ hebreoneshetoꞌ. Ñewa, napaꞌxhoꞌña oꞌch notas, hebreoneshan namha. Ñetpaꞌ pommoꞌcheñothet otenet israelenaꞌtaretoꞌ. Ñewa, napaꞌxhoꞌña oꞌch notas israelenaꞌtaren namha. Ñamha ñetpaꞌ otenet poꞌmhrenñanetoꞌ yatañ Abraham. Ñewa, napaꞌxhoꞌña poꞌmhrenñen yatañ Abraham.

²³ Ñetpaꞌ pommoꞌcheñothet otenet ñetpaꞌ atarroꞌ thorrenet Cristokop. Ñewa, napaꞌxhoꞌña elloña atarr nanak nethorrena Cristokop. Amaꞌt eꞌñe notatseꞌteñotha noten, ñeñthpaꞌ eꞌñe poꞌñoxh ateth. Amaꞌt allpon thorrenet ñet, elloña napaꞌ atarr nanak nethorrena na. Ñamha amaꞌt allpon amoeroxhtatarethetyenet ñet elloña napaꞌ atarr nanak amoeroxhtatarethen. Allpon ayottamphsarethen all koñchatennet, ñeñthpaꞌxhoꞌña nanak atonocheꞌtats. Ñamha allpon ashtennetpaꞌ ñeñthpaꞌxhoꞌña atarr nanak atonocheꞌtats. Ñamha ñeñth allpon awtsanchaꞌ rromoetseñ, ñeñthpaꞌxhoꞌña atarr nanak atonocheꞌtats.

²⁴ Ñamha judioneshaꞌ eꞌñe poeꞌmoñeꞌteñothetan napaꞌ ateth ashtennet eꞌñe amnarocheꞌtats. Allempoña ashtennetpaꞌ maꞌpoch xharraꞌ poechena eskon ñeñth attho pakapakatspennet.

²⁵ Ñamha ellonethpaꞌ oꞌchxhoꞌ alla nallerrneterr ñamha tsachpho, eꞌñe maꞌpocheꞌttsokma nallennet. Poꞌpocheñopaꞌxhoꞌña parrochpaꞌ oꞌxhoꞌ alla rrolleꞌterrneterr. Poꞌpocheñopaꞌxhoꞌña allempo nesen noñtho sapoꞌmarpaꞌ alla nepotamperrerr maꞌpocheꞌttsokma. Allempopaꞌ alla narepen alla nellapen oño enopaꞌrrtatsa.

²⁶ Napaꞌ xhokma nechopeñeꞌchyen ellaphar alloꞌtsaꞌyen paꞌnamen ñeñth atarr amhchaꞌnoxhenareꞌ, ateth ñerraꞌm allempo netampena noñtho oñoꞌmar, ñamha allempo nexhap all amhchaꞌnoxhtena eñethexhno, ñamha allempo amhchaꞌnoxhtanaꞌtenen namoꞌtseshaꞌ ñamha poꞌpoñ acheñ ñeñth ama judioneshayaye. Ñamha ñeñth amhchaꞌnoxhetyetsa all anetsoꞌmar, ñamha ñeñth amhchaꞌnoxhetyetsa all poetsathoꞌmar, ñamha ñeñth amhchaꞌnoxhetyetsa all oñoꞌmar. Ñamha ñeñth attho amhchaꞌnoxhtena poꞌpotantañ amaꞌt otenetañ masheñpaꞌ tharraña ama masheñeyayeto, ñetpaꞌ ama ameꞌñeñeto Yompor.

²⁷ Elloña xhokma atarr netarwasen, ñamha shonteꞌ ñeñth atarr echarr nentyen. Ñamha atonocheꞌtats atarr nanak naꞌwanten nemoñ thorratsa Yomporekop. Ñamha epayeꞌ nemoeroxhtena nachporrñoth, ñamha noꞌñpañoth tharroꞌmar ama eñalle ñeñthchaꞌ nerren ñamha ñeñthchaꞌ norren. Ñamha epayeꞌ moeroxhtatenen seneth tharroꞌmar ama eñalle neshtam ñeñthchaꞌ nechorra, oꞌ eꞌñe neptsapeswa.

²⁸ Ñamha elloneth napaꞌ xhokma nellkëña ñeñth pameꞌñeñothet allemeñ apxhaꞌyetsa. Napaꞌ añeꞌnaña xhokma nellkateneꞌ ñeñth atarr thorrapoꞌ nentyen paꞌnamen.

²⁹ Amaꞌt erraꞌtsena acheñer ñerraꞌm ama womenkayeꞌ penano poeyoxher Yomporekop, nañapaꞌ atarrchaꞌ nellkapreteña. Ñeñthña ateth nellkapreteña nañapaꞌ oꞌch ateth neꞌmoen neyoxhro ñerraꞌmrratheꞌ oꞌwañ womenk nephaꞌ neyoxher Yomporekop. Ñamha amaꞌt erraꞌtsena acheñer ñerraꞌm oꞌch aꞌpoerratateret oꞌch ateth perran ñeñth ama pokteyeꞌ enteno Yompor, naña nepenkapreteñothpaꞌ amaꞌt mameshapaꞌ amach pokteyeꞌ nenteñe.

³⁰ Ñatoꞌ theꞌpaꞌ oꞌch noterrserr poꞌpoñoneth kothaphñats. Sapaꞌ poꞌñoxh señosatseꞌtatyenen kowen ñeñth eꞌñe nokpa. Añña kowen nenten atthoch neños kowen ñeñth eꞌñe nokpa, ñeñthpaꞌ attho ama awamenkathoyenayeꞌ entenno acheñeneshaꞌ.

³¹ Yomporpaꞌ eñotenen ñeñth ateth notenes, ñeñthpaꞌ ama shekëñtsoyaye. Ñeñthara Yompor ñeñth Pompor pen ñamha Yepartseshar Jesucristo ñeñthchaꞌña yaꞌyeꞌchoxhtaterr thayotheñ errponowañen.

³² Ñewa, napaꞌ oꞌch neyerpatasa ateth apharethen awañmoꞌcha allempo Damascoꞌtsenen. Ñewa, ñeñth amhchaꞌtarethtatseꞌth all Damasco, ñeñthpaꞌ ñeñthara amhchaꞌtareth Aretas poeyochreshaꞌ. Ñeñthña neneꞌña guardianeshaꞌ ñeñth kamretsa allemeñ yetarroth. Ñetpaꞌ añekop kamrenet atthoch rromaꞌnetañpaꞌ oꞌch yottampesnetañ allchaꞌ koñchatnetañ.

³³ Tharraña napaꞌ arr eshaꞌtnet kañthro atthoña xhaꞌnmaterrnet ventanoth allothña aꞌswatamperrnet konxhtoth. Atthothña eꞌñe kowen nekeshperra, ñeñthoꞌmarña ama eshkayeꞌ rromaꞌnoña guardia.