2 Corintios 10 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Pablopaꞌ eñotatan corintoꞌmarneshaꞌ ñapaꞌ eꞌñe poꞌñoxh allsensareth Yomporeshoth

^1-2 Ñewa, theꞌpaꞌ na Pablon oꞌch alla nokthapeꞌchaterrserr eꞌñe nemoereñothes atthen ñerraꞌm Cristo ñeñth nanak amoerañtostsa. Poemoereñothey ya ñapaꞌ eꞌñe pokteꞌ eñcheꞌth oꞌch ateth enteñet ñerraꞌm ñapaꞌ ama esosheꞌmayaye. Ñewa, sapaꞌ patantaꞌttsospaꞌ atthach sentenen ama erroth notenso atsrreꞌmoxhen ñerraꞌm esempo alloꞌtsenen sesho. Tharraña ñerraꞌm esempo allapharoꞌtsenen, allempo nekellkënnas cartapaꞌ allempoña sapaꞌ ateth sentenen ñerraꞌmrratheꞌ ama xhoyeꞌ nemhchaꞌtenso amaꞌt eꞌñe mamesha, eꞌñech echeꞌxharr notenes necartoth. Tharraña ñeñthpaꞌ ama attheyaye. Amaꞌt allempo alloꞌtsenen sesho, ñerraꞌm nemneñeñ ateth neꞌñoronasapaꞌ eꞌñetheꞌ echeꞌxharr neꞌñorennasa. Ñeñthoꞌmarña theꞌpaꞌ eꞌñe neyoxhrokmañen oꞌch notas, sokthapeꞌcherr kowen eꞌñe thayekma allochñapaꞌ ñerraꞌm esempoch nexherr seshopaꞌ amach xha seꞌñoratno echeꞌxharr. Tharroꞌmar ñerraꞌm ama sokthapeꞌcherro kowen, poꞌñoxh ñerraꞌm esempo nexherr seshopaꞌ xhach seꞌñoraten echeꞌxharr, ñeñthes noteneꞌ napaꞌ eꞌñoꞌ nañeña nokthaphñoth ateth es nephatseꞌtyen ñeñth ateth phaꞌyena acheñeneshaꞌ arr patsro, ñeñthpaꞌ eꞌñe ñokpoeta sherben. Tharraña napaꞌ ama attheyeꞌ nepeno.

³ Ñewa, amaꞌt napaꞌ nokrrena arr patsro ateth yokrrena alloweney acheñey tharraña ñeñth ateth nemaꞌyoxhrena Yomporekop, ñeñthpaꞌ ama attheyaye ñeñth ateth maꞌyoxhrena acheñeneshaꞌ arr patsro.

⁴ Tharroꞌmar ñeñth ateth yemaꞌyoxhrena Yomporekoppaꞌ ñeñthpaꞌ ama añeyaye ñeñth ateth yokthapeꞌchen ya acheñey arr patsro. Añña attho yemaꞌyoxhrena ñokop, eꞌñe ña poꞌwamenkoth ateth yepena. Atthochña yewaporeꞌtoñ allowen ñeñth epatareꞌteneꞌ Yompor pokthaphña.

⁵ Ñamha allowen serrparñatsoxhno ñeñthña epatareꞌteneꞌ Yompor poꞌñoñ ñeñthchaꞌña yewaporeꞌtwa. Ñamha allowen kothaphñatsoxhno attho nanak ommoꞌchenet, ñeñthña ama moenatenaweto atthoch enteret Yompor, ñeñthpaꞌxhoꞌña Yomporchaꞌña poꞌwamenkoth oꞌch yewaporeꞌtwe. Ñamha ñeñth allpon yokthapeꞌchyen arr patsro ñeñthña athpareꞌtateneꞌ Yompor pokthaphña, ñeñthchaꞌña yaꞌmethaꞌwerr Cristesho, allochñapaꞌ atthochña Cristopaꞌ oꞌch ameꞌñatera.

⁶ Ñamha ñerraꞌm oꞌ alla nameꞌñatwerrsa eꞌñe kowen, tharraña ñerraꞌm eseshaꞌ ora athpareꞌtetsa, napaꞌ eꞌñe pokteꞌ nenteñ oꞌch yekoñchach ñeñth ateth athpareꞌtetsa.

⁷ Sapaꞌ aña kowen senten ñeñth allpon sentyen seklloyoth. Ñerraꞌm eseshaꞌ entetsa ateth ñapaꞌ Cristo moeñeneꞌ, ñeñth acheñerpaꞌ eñochepaꞌ napaꞌxhoꞌña Cristoña nemñeneꞌ.

⁸ Amaꞌt atarr natontaten neñoñ attho alla noterrserr napaꞌ Cristo poellsensaren, tharraña napaꞌ ama xhoyeꞌ neyllateno neñoñ atthoch nepenka. Tharroꞌmar attho llesensaꞌn Yepartseshar Cristopaꞌ ñeñthpaꞌ añekopña atthoch neyenpas atthoch alloꞌna sesen womenk phaꞌnmoeꞌ seyoxher Yomporekop. Ñeñthpaꞌ ama añekpayaye alloch naꞌpoerrataterres ñeñth attho sameꞌñena.

⁹ Napaꞌ ama nemno oꞌch amhchaꞌnoxhen sentenen eꞌñe necartotha.

¹⁰ Tharroꞌmar patantaꞌttsos ateth sentennan necarta ñerraꞌmrratheꞌ atarr echeꞌxharroth es notenes ñeñth atarr echarr senten. Ñamha ñerraꞌm esempo alloꞌtsenen sesho sapaꞌ ama awamenkathoyenayeꞌ sentenno amaꞌt mamesha, ñamha attho neserrpareꞌtatenespaꞌ amaꞌt eꞌñe mameshapaꞌ ama asherbenayeꞌ senteñe.

¹¹ Tharraña acheñeneshaꞌ ñeñth ateth otetspaꞌ eñochetepaꞌch ñerraꞌm erroth notas necartoth amaꞌt atarr allapharoꞌtsenen atethchaꞌxhoꞌ poꞌñoxh nepennas ñerraꞌm esempoch nexherr sesho.

Attho Yomporpaꞌ ama pokteyeꞌ entenano acheñeneshaꞌ oꞌch kowen entenet eꞌñe ñañeñeta

¹² Napaꞌ amaꞌt mameshapaꞌ ama nemno oꞌch sentenen napaꞌxhoꞌña ñatoꞌ atthentheꞌ ñeñth ateth pena poꞌpotantañ ñeñth atarr kowen eñosyets eꞌñe ñokpoeta. Napaꞌ ama nemno oꞌch not napaꞌ eꞌñe atthekma nepena ateth penet ñet. Tharroꞌmar ñeñth ateth penet ñetpaꞌ ama kowenayaye. Ñetpaꞌ eꞌñe ñañeñeta pokthaphñetpaꞌ koshapretannenet eꞌñe ñagattseta. Eꞌñe ñañeñeta pokthaphñetpaꞌ kowen entapretannaꞌtyenet, ñeñthpaꞌ attha otatseꞌtyenet.

¹³ Tharroꞌmar yapaꞌ ama yoyaye yokthaphña ñeñth atarr yokshapretannena. Añña Yompor pokthaphña ñeñthpaꞌ allowa onañchareth yokop ñeñthchaꞌ eꞌñe kowen yokshapretannena. Ñamha Yompor pokthaphña ñeñth ateth onañchennaypaꞌ ñeñthpaꞌ añekpaꞌnaña sherben atthoch yexhapatonas Yompor poꞌñoñ eꞌñe seshowen ñeñthes corintoꞌmarneshas.

¹⁴ Ñeñthoꞌmarña yapaꞌ ama xho yatontateññañe Yompor pokthaphña tharroꞌmar ñeñth allpon onañchennay, ñeñthpaꞌ eꞌñech allowa yethorrena ñokop. Ñeñthpaꞌ añekpaꞌnaña sherben atthoch yexhapat Yompor poꞌñoñ amaꞌt seshowen. Ñeñthoꞌmarña ya awathpaꞌ yanom xhapateꞌ Yompor poꞌñoñ sesho ñeñthara añ kowen ñoñets alloch yekeshperra eꞌñe yameꞌñeñotha Cristo.

¹⁵ Ñamha ya eꞌñe yokoppaꞌ ama yemno oꞌch yommoꞌchoña poꞌpsheñeñ poꞌtarwas ñeñth ñanom thorratsa all Yomporekop. Tharraña yapaꞌ yekwenes ñerraꞌm esempo sa oꞌch alloꞌna sesen ameꞌñetsa kowenpaꞌ allempoña napaꞌ nokthapeꞌchen elloneth oꞌch alla nethorrerra sesho.

¹⁶ Atthochña amaꞌt allpon anetsoxhno ñeñth allemeñ alloꞌtsaꞌyen elloneth seshothpaꞌ allña nesechena ñamha allchaꞌña neserrpareꞌtatyesosanet Yompor poꞌñoñ, ñeñthara kowen ñoñets alloch yekeshperra. Nemneñ oꞌch naꞌpothoñ Yompor poꞌñoñ all ama aserrpareꞌtatarethtenetaꞌ allochñapaꞌ amach xha nommoꞌchoñe poꞌpsheñeñ poꞌtarwas ñeñth ñanom serrpareꞌtats all.

¹⁷ Ñerraꞌm eseshaꞌ moenetseñ oꞌch eꞌñe kowen eños poesheñarrokop tharraña ñeñthpaꞌ Yomporekopchaꞌña eꞌñe kowen eñen.

¹⁸ Tharroꞌmar añ acheñer ñeñth eñoretsa eꞌñe kowen ñokpapaꞌ ñeñthpaꞌ ama pokteyeꞌ enteñe Yompor. Tharraña amaꞌt erraꞌtsena acheñer Yomporchaꞌ eñosets kowen ñokop, ñeñthña eꞌñe pokteꞌ enten ña.