1 Timoteo 5 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Añpaꞌ ñeñthchaꞌ ateth yephannena ñeñthey ameꞌñetsa

¹ Masheñe Timoteo, theꞌpaꞌ oꞌch noterrperr poꞌpoñ. Amach pecheꞌptareꞌtatsche ñeñth poꞌnareꞌ yakma ñerraꞌm esempo pantenet. Elloña xhochña phokthapeꞌchaterranet kowen eꞌñe akopha. Atethchaꞌ pentanet ñerraꞌmrratheꞌ eꞌñe phompor pepenanet. Añña allowen weparneshaxhnopaꞌ atethchaꞌ pentanet ñerraꞌmrratheꞌ eꞌñe pemoꞌnasheñ pepenanet poktakma.

² Ñamha koyaneshaxhno ñeñth poꞌnareꞌpaꞌ atethchaꞌ pentanet ñerraꞌmrratheꞌ eꞌñe phachor pepenanet poktakma. Añña ñeñth shopshareꞌpaꞌ atethchaꞌ pentanet ñerraꞌmrratheꞌ eꞌñe phoxh pepenanet poktakma. Amachña xha moeneꞌ phaꞌllokchameꞌtyenaneto amaꞌt mamesha.

³ Ñamha añ poktetsa xhokmach seyenpoeꞌ rrethorrnaneshaꞌ ñerraꞌm esempo ama eñalleto ñeñthchaꞌ yenpawet.

⁴ Tharraña ñerraꞌm erraꞌtsen rrethorrnaneshar echeneꞌ poechoyoreshaꞌ amapaꞌ poeꞌñareshaꞌ, ñeñthpaꞌ aña pokteꞌ ñetach kowamphset pachor. Tharroꞌmar añ pokteꞌ eꞌñe ñet oꞌch eñochet ñanomchaꞌ añ yekwampes yamoꞌts atthochña yesherber Yompor ñamha atthoch yesherbeñ yamoꞌmteꞌ attho ñetpaꞌ kowampesyet yamha awath. Tharroꞌmar ñerraꞌm ateth yephapaꞌ eꞌñech yokshateñ amaꞌt Yompor.

⁵ Añpaꞌ atthoch señoch erraꞌtsentheꞌ rrethorrnaneshar palltetsa oꞌch seyenpoeꞌ: Añchaꞌ seyenpaꞌ ñeñth rrathotetsa eꞌñe ñaptha ñeñth ama echenaye poechoyoreshaꞌ, ñamha ñeñth eꞌñe yemtenaya Yompor, ñamha ñeñth xhokma maꞌyochenaya Yompor patheꞌtets yeth, ñamha amaꞌt tsapo.

⁶ Tharraña erraꞌtsen rrethorrnaneshar ñeñth attha koshatseꞌtyetsapaꞌ xhach ottena ñerraꞌmrratheꞌ oꞌ rroma, amaꞌt allempo korrenmeñ.

⁷ Theꞌpaꞌ oꞌch photanet ñeñthchaꞌ ateth pet atthoch ama eñalle amaꞌt eseshapaꞌ oꞌch sasareꞌtanet.

⁸ Ñerraꞌm eseshaꞌ ama moenenaye oꞌch kowamphsan pamoꞌts amaꞌt ñeñth parro yexhena ñeñthña acheñ atethpaꞌ amakaꞌye poꞌñoxhayeꞌ ameꞌñenano ñeñth ateth oteney Yompor. Ñamha ñeñth ateth acheñpaꞌ amach pokteyeꞌ enteñe Yompor amaꞌt mamesha. Ñeñthpaꞌ elloch metaneñ amaꞌt ñeñth ama ameꞌñetso.

⁹ Ñamha poꞌpoñ atthoch señoch erraꞌtsentheꞌ rrethorrnaneshar ñeñth pokteꞌ ñeñthchaꞌ seyenpaꞌ, ñeñthpaꞌ erraꞌtsentheꞌ poꞌnmeneshar ñeñth echeneꞌ pechapoch xharraꞌ poꞌcharña, ñamha ñeñth pathrrach poerrollar peꞌth.

¹⁰ Ñamha erraꞌtsentheꞌ senten ñeñth eꞌñe kowenareꞌ es pets, ñeñth eꞌñe kowen kowampeneꞌ poechoyoreshaꞌ, ñamha ñeñth nanak amoeraña, ñamha ñeñth eꞌñe kowen agëneꞌ poemoꞌtoꞌ, ñamha ñeñth eꞌñe poeñmañeshaꞌ sherbeneꞌ allowen ñeñth ameꞌñetsa, ñamha ñeñth nanak yenpoeneꞌ amaꞌt ñeñth moeroxhtetsa, ñamha ñeñth nanak phaꞌyeneꞌ poꞌpoñexhno ñeñth kowentetsa.

¹¹ Tharraña ñeñth rrethorrnaneshar atthera shopsheshameñ ñeñth ama echenanaꞌ pechapoch xharraꞌ poꞌcharñapaꞌ amach sagapatsche, tharroꞌmar ñerraꞌm machaya moenmeꞌcherran sherbeꞌ Cristopaꞌ oꞌtheꞌ alla someꞌterra,

¹² xhatheꞌ thanmareꞌcha acheñeneshaꞌ tharroꞌmar amach etsotano ñeñth ateth otan Cristo awañmoꞌcha.

¹³ Ñamha ñatoꞌ oꞌch attha nanak kellaꞌ, ñatoꞌ poꞌkhllañothpaꞌ ñatoꞌ oꞌch attha taꞌyesa poꞌpoñ pokolloꞌmar serrpareꞌtatseꞌtyesets paꞌnamen ñoñets, ñamha ñatoꞌ oꞌch attha aꞌmethareꞌtyesan ñeñth ateth phaꞌyena poꞌpsheññexhno amaꞌt ñeñth ama otenayaye.

¹⁴ Ñeñthoꞌmarña napaꞌ eꞌñe pokteꞌ nenteñ ñeñth shopsheshameñpaꞌ someꞌterrepaꞌ ñamha cheyoreꞌterrepaꞌ atthoch añach maꞌyoxhrena ñeñth paꞌpakllakop. Ñerraꞌm ateth penetpaꞌ atthochña amach eñalle amaꞌt ñeñth yeꞌmoñeꞌteneꞌpaꞌ amach sasareꞌtye.

¹⁵ Tharroꞌmar poesheñaꞌtets rrethorrnaneshaꞌpaꞌ oꞌ alla poerrwerret oꞌ alla kotheret oneñeth.

¹⁶ Theꞌ ellopaꞌ oꞌch notaph poꞌpoñoneth. Ñerraꞌm eñall amaꞌt koyaneshaꞌ ñeñth ameꞌñetsa, ñamha ñerraꞌm ña pamoꞌts rrathotatsapaꞌ eꞌñe pokteꞌ ñañeñach kowamphseꞌ pamoꞌts. Allochñapaꞌ amach pallteno allowen ñeñth ameꞌñetsapaꞌ oꞌch apoeñet ñeñth palltaꞌyena. Allochñapaꞌ atthoch añchaꞌña yenpoenet poꞌpoñexhno rrethorrnaneshaꞌ ñeñth ama echenaye pamoꞌts ñeñthchaꞌ yenpoeneꞌ.

Añ poktetsa ñeñthchaꞌ ateth yepeñ ñeñth nanak thorretsa Yomporekop

¹⁷ Theꞌpaꞌ oꞌch notaph poꞌpoñ. Ñeñth pomporneshaꞌ pen ñeñth ameꞌñetsapaꞌ ñerraꞌm eꞌñe kowen amhchaꞌtarethtenetpaꞌ eꞌñe pokteꞌ acheñeneshaꞌpaꞌ kowenchaꞌ kosheñet, ñamha ellopaꞌ añ pokteꞌ oꞌch es apoeñet ñeñth palltena. Ñeñthpaꞌ ñeñthchaꞌ ateth sepeñ erraꞌtsenchaꞌ ñeñtha poꞌtarwas peꞌ attho serrpareꞌten, ñamha ñeñth eꞌñe maꞌyoxhrenaya yexhatets Yompor poꞌñoñ.

¹⁸ Tharroꞌmar amaꞌt Yompor poꞌñoñ ñeñth anwareth awathotheñpaꞌ ateth tomaꞌntateney, ñeñthpaꞌ ateth oten: “Ñerraꞌm esempo sathmamaꞌtateñ wakësh atthoch es serrokllomeꞌchach paꞌtkoth, allempopaꞌ amach sempanmaꞌtatsche. Eꞌñe pokteꞌ rranepaꞌ ñamha ñeñth serrokllomeꞌchateñ.” Ñamha ñeñth ateth oten poꞌpoñ Yompor poꞌñoñ: “Ñeñth atarwasañpaꞌ eꞌñe pokteꞌ xhokmach agapan poꞌtsaꞌ attho tarwasen.”

¹⁹ Ñamha ñerraꞌm eñall poesheñarr ñeñth aꞌmethareꞌtampeneꞌ ñeñth pompor pen ñeñth ameꞌñetsapaꞌ sapaꞌ amach sameꞌñatscho. Añña ñerraꞌm epsheña aꞌmethareꞌtampeneꞌ amapaꞌ maꞌpsheña, allempopaꞌ pokteꞌ oꞌch seꞌmhñoch, tharroꞌmar allempopaꞌ oꞌch señoch ñatoꞌ poꞌñoxhtheꞌ ateth.

²⁰ Attheña ñerraꞌm poꞌñoxhtheꞌ ateth pena, allempo alloꞌtsaꞌyen allowen acheñeneshaꞌpaꞌ añ poktetsa oꞌch soch ñeñth atethpaꞌ ama aphaꞌpawo. Allochñapaꞌ poꞌpotantañpaꞌxhoꞌña eshekchaꞌ mechaꞌnaꞌtenet.

²¹ Añpaꞌ xhokmach ateth pepha ñeñth ateth oꞌ notwaph amaꞌt errothentheꞌ oꞌ phowa ñeñth parro nanak peyemtena awaña. Tharroꞌmar Yomporpaꞌ enteneph epoet Poechemer Jesucristo ñeñthara Yepartseshar yepen, ñamha epoet poꞌmhllañotheñnaneshar ñeñth epoet yemtena ña. Allowenetpaꞌ eꞌñe entwenpet ñeñthoꞌmarña theꞌpaꞌ añ pokteꞌ oꞌch pepena ñeñth ateth oꞌ notwaph.

²² Theꞌpaꞌ oꞌch nokthapeꞌchaterrperr poꞌpoñ ñeñthchaꞌ ateth sepha. Ñerraꞌm esempo semneñ oꞌch senaꞌyes ñeñthchaꞌ amhchaꞌtarethterrtsa Yomporekop, amach awen senatstere ñeñthchaꞌ amhchaꞌtarethterrtsa, xhochña sekwaꞌyes erraꞌtsentheꞌ acheñer ñeñth eꞌñe kowen es phaꞌyets. Tharroꞌmar ñerraꞌm aña senaꞌyes ñeñth ama kowen es petsopaꞌ theꞌt eꞌñe ña poꞌchñarothpaꞌ ateth sepena samha. Ñeñthoꞌmarña theꞌpaꞌ xhokmach phaꞌypoꞌñampes ñeñth ama kowenayaye amaꞌt mamesha.

²³ Theꞌpaꞌ oꞌch notaph poꞌpoñ. Attho phapaꞌ xhokma phatsnaꞌtameꞌten, ñamha attho atserrphareꞌteneph phathopaꞌ añ pokteꞌ amach phorratsterrerro eꞌñe ñapoeth oñ, añchaꞌña epoet phorr koñeꞌth vino.

²⁴ Ñamha theꞌpaꞌ oꞌch notaph poꞌpoñ atthoch peñoch. Eñall poesheñaꞌtets acheñ ñerraꞌm esempo pena ñeñth ama kowenayaye Yomporekoppaꞌ yapaꞌxhoꞌña oꞌch yeñotanet allorokma. Allempoña yapaꞌ oꞌch yot, poꞌñoxh añpaꞌ ama pokteyaye. Tharraña eñall ñamha poꞌpoñexhno acheñ amaꞌt esempo pet ñeñth ama kowenayaye Yomporekoppaꞌ ñeñthpaꞌ amach eseshaꞌ eñotaye amaꞌt poesheñarrotha. Tharraña esempowañenpaꞌ orrtatwarethterrach.

²⁵ Atthekma pena ñamha ñerraꞌm esempo yepena eꞌñe kowen, acheñeneshaꞌpaꞌ oꞌch entwenyet eꞌñe kowen. Tharraña errothenopaꞌ amaꞌt eꞌñe kowen enteney Yomporpaꞌ acheñeneshaꞌpaꞌ amach eꞌñe kowenayeꞌ entenyeto. Tharraña esempowañenpaꞌ xherranetchaꞌ poeyoxhro.