1 Timoteo 4 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho esempowañenpaꞌ poerrwerrach patantarr amaꞌt ñeñth ameꞌñetsa theꞌ

¹ Theꞌpaꞌ oꞌch notaph poꞌpoñ. Eꞌñe poꞌñoxh ateth eñotateney Parets Poekamkëñoth. Oꞌch mellapoterrmochapaꞌ poerrwerrach patantarr acheñ amaꞌt ñeñth ameꞌñetsa theꞌ. Allempopaꞌ oꞌch alla ameꞌñeret ñeñth ashkañtetsa, ñamha oꞌch aña maꞌyoxhrerret oneñeth pokthaphña.

² Tharroꞌmar oꞌch alla ameꞌñeret acheñ ñeñth ashkañtetsa, ñeñthara acheñ ñeñth ama es xhenoyo poeyoxhro amaꞌt mamesha amaꞌt allempo oꞌ achmhareꞌtwan Yompor.

³ Ñamha ñeñthara añ acheñpaꞌ oꞌch otyenan acheñeneshaꞌ, ama pokteyaye oꞌch sesnaꞌta. Ñamha ama pokteyaye oꞌch es serratseꞌtyes. Tharraña allowen ñeñth yerrenpaꞌ eꞌñe pokteꞌ oꞌch yerreñ, ñeñthoꞌmar yexhkach Yompor ñeñthchaꞌ yerren. Tharroꞌmar ñeñthey oꞌ yeñoterr ñeñth eꞌñe poꞌñoxh Yompor poꞌñoñ, ñamha ñeñthey ameꞌñetsapaꞌ eꞌñe pokteꞌ oꞌch yerren eꞌñe yemaꞌyocheñoth Yompor.

⁴ Tharroꞌmar allowen ñeñth yexhkatwa Yompor ñeñthchaꞌ yerrenpaꞌ eꞌñe kowenakma, ñeñthoꞌmarña amach errothenoth yoto ama pokteyaye oꞌch yerreꞌ. Añña pokteꞌ xhokmach es yerren eꞌñe yeparasyosoꞌteñoth Yompor.

⁵ Yemaꞌyochampeñoth yerrarpaꞌ eꞌñe pokteꞌ Partsokop oꞌch yerreñ, tharroꞌmar ñeñthpaꞌ ateth oteney Yompor.

Attho Timoteo atarr kowen sherbenan Jesucristo

⁶ Theꞌpaꞌ oꞌch, masheñe Timoteo, notaph poꞌpoñ. Ñerraꞌm atethchaꞌ peyxhatyes acheñeneshaꞌ ñeñth ameꞌñetsa ñeñth ateth oꞌ notwaphpaꞌ allempoña poꞌñoxhpaꞌ eꞌñech kowen pesherbeñ Yepartseshar Jesucristo. Tharroꞌmar attho phokthapeꞌcheññan Yompor poꞌñoñpaꞌ ñeñthchaꞌña alloꞌna awamenkath pepeneꞌ. Ñamha attho phokthapeꞌchen eꞌñe kowen Yomporekoppaꞌ ñeñthchaꞌña alloꞌna awamenkath pepeneꞌ.

⁷ Ñamha amach peꞌmhñotatsto serrparñats ñeñth ama añeyaye ñeñth ateth yexhateney Yompor poꞌñoñ atthoth yameꞌñera Cristo, tharroꞌmar ñeñthpaꞌ ama es sherbeno. Añchaꞌña pemaꞌyoxhra ñeñth ateth yexhateney Yompor poꞌñoñ.

⁸ Ñamha añchaꞌña oꞌch pemaꞌyoxhra atthoch womenk pephaꞌ peyoxher Yomporekop. Ateth pena poꞌpotantañ acheñeneshaꞌ maꞌyoxhraya atthoch womenktatet eꞌñe ñañeñeta poꞌchets, amaꞌt ñeñthpaꞌ ama tama es sherbeno. Tharraña phapaꞌ añchaꞌña pemaꞌyoxhra atthoch womenk pephaꞌ peyoxher Yomporekop, tharroꞌmar ñeñthpaꞌ ello nanak sherben atthoch yokrra kowen añe patsro, ñamha sherben atthoch ello yokrraꞌwerra kowen esempowañen.

⁹ Ñeñth ateth notenephpaꞌ eꞌñe poꞌñoxh ateth, ñeñthoꞌmarña añ pokteꞌ oꞌch ameꞌñyet allowenet.

¹⁰ Ñeñthoꞌmarña theꞌpaꞌ amaꞌt eꞌñe yemoeroxhteñothpaꞌ xhokma yethorrena Yomporekop, tharroꞌmar ñapaꞌ ñach yeyemterra eꞌñe poktakma, ñeñth Yompor ñeñth ama arromñatheshayaye, ñamha ñeñthara Yompor ñeñth Yaꞌkeshphatañer yepen alloweney añekop ñeñthey ameꞌñenaya.

¹¹ Theꞌpaꞌ ñeñth ateth oꞌ notwaphpaꞌ ñeñthchaꞌ ateth photyes acheñeneshaꞌ ñeñthchaꞌ ateth pet, ñamha eꞌñech kowenakma peyxhatyesanet.

¹² Ñamha xhokmach phorrta eꞌñe kowen acheñeneshakop, atthoch ñetpaꞌ eꞌmhñotapet amaꞌt phapaꞌ nanak wepoeshaph. Ñamha xhokmach phorrta kowen amaꞌt ateth peꞌñorena, ñamha amaꞌt allempo es pephaꞌyen. Ñamha xhokmach pemoereña acheñeneshaꞌ, ñamha xhokmach phameꞌñya eꞌñe kowen Yompor, ñamha amaꞌt peyoxhropaꞌ xhokmach phokthapeꞌch eꞌñe kowen ñeñth ateth pena ñeñth eꞌñe poꞌñoxh Cristonaꞌtartetsa. Allochñapaꞌ eꞌñe peshoth añña acheñeneshaꞌ ñeñth ameꞌñetsapaꞌ oꞌch xhapanet poeyoxhreto ñeñth ateth kowentetsa Yomporekop.

¹³ Ñamha theꞌpaꞌ amaꞌt ama nexhenaꞌ napaꞌ, xhokmach pelleyatanet Yompor poꞌñoñ allempo xhokma sapxhena allowenes. Ñamha xhokmach peserrpareꞌtatanet, ñamha eꞌñech kowen peyxhatenanet.

¹⁴ Ñamha xhokmach peyerpa attho awañmoꞌcha Yomporpaꞌ awamenkath phaph allempo ñeñth pomporneshaꞌ pen ñeñth ameꞌñetsapaꞌ ñetpaꞌ net pot pesho. Ñamha attho eñoratanet Yompor ñetña allempopaꞌ eꞌñe kowen eñosyeset phokop. Ñeñthoꞌmarña theꞌpaꞌ añ poktetsa xhokmach pethorra Yomporekop.

¹⁵ Xhokmach pemaꞌyoxhra ñeñth kowentetsa Yomporekop, ñamha xhoch phayomhya, atthoch acheñeneshaꞌpaꞌ entonapet ñeñth ateth petsoten Yomporekop.

¹⁶ Ñamha xhokmach peñota phañeña, ñatoꞌ kowentheꞌ phokthapeꞌchen, ñatoꞌ amatheꞌ. Ñamha xhokmach peñota phañeña ñatoꞌ eꞌñetheꞌ ateth peyxhaten. Ñamha xhokmach peyxhat kowen eꞌñe ateth oteney Yompor poꞌñoñ atthoch pekeshperra pha, ñamha allowen ñeñth peꞌmhñoteneꞌ.