1 Timoteo 3 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Atthoch yeñoch erraꞌtsentheꞌ pokteꞌ ñeñthchaꞌ yenaꞌ amhchaꞌtareth poerawo

¹ Theꞌpaꞌ oꞌch notaph poꞌpoñ ñeñth eꞌñe poꞌñoxh ateth. Ñerraꞌm eseshaꞌ moenats oꞌch amhchaꞌtarethta allowenakop ñeñth ameꞌñetsa ñeñth atarr moeneneꞌ oꞌch thorrena Yomporekop ñeñthpaꞌ eꞌñe pokteñ ñeñth atarr moeneneñ tharraña eñochepaꞌchña atarr thorrapoꞌ atthoch eꞌñe kowen orrtatyesan ñeñth atarr sherbets.

² Tharroꞌmar ñeñth moenets oꞌch amhchaꞌtarethta allowenakop ñeñth ameꞌñetsapaꞌ añchaꞌ seꞌn ñeñth etsotweneꞌ añexhno. Ñeñthchaꞌ senaꞌ amhchaꞌtarethpaꞌ añchaꞌ seꞌn ñeñth eꞌñe kowenareꞌ es pets. Ñeñth amaꞌt awathapaꞌ amach eñalle atthoch thanmareꞌcha acheñeneshaꞌ amaꞌt mamesha. Ñamha ñeñthchaꞌ paꞌmhchaꞌtarether phaꞌyes allowen ñeñth ameꞌñetsapaꞌ añchaꞌ senaꞌyes erraꞌtsentheꞌ senten eꞌñe pathrra poethapor pen (ñerraꞌm athaporeth), ñamha ñeñth nanak maꞌyoxhrenaya ñeñth kowentetsa Yomporekop, ñamha ñeñth eꞌñe eñotweneꞌ ñeñth kowentetsa, ñamha ñeñth amhchaꞌnaꞌtpoꞌ entwen allowen acheñeneshaꞌ. Ñamha añ eꞌñe pokteꞌ oꞌch amhchaꞌtarethta ñeñth eꞌñe kowen agëneꞌ acheñeneshaꞌ paꞌpakllo, ñamha ñeñth eꞌñe kowen yexhateneꞌ acheñeneshaꞌ Yompor poꞌñoñ.

³ Ñamha añchaꞌ seꞌn ñeñth ama posaꞌtareꞌtetso, ñamha ñeñth amach orroñatheyaye. Ñamha añchaꞌña seꞌn ñeñth eꞌñe kowen moerenana pamoꞌts, ñamha ñeñth ama atsrreꞌmñatheyaye, ñamha ñeñth ama nanak yeꞌchapretetso kelle ñeñth apenkoxhenoth oꞌch gana.

⁴ Ñamha ñeñthchaꞌ amhchaꞌtarethtatsapaꞌ añchaꞌ seꞌn ñeñth eꞌñech kowen ameꞌñatwenana poechemereshaꞌ, ñamha ñeñth eꞌñech mechaꞌnaꞌtweñ allowen amaꞌt ñeñth parro yexhena.

⁵ Tharroꞌmar ñerraꞌm ama eñotenano atthoch eꞌñe kowen ameꞌñatwana ñeñth parro yexhenapaꞌ amachkaꞌye kowenayeꞌ amhchaꞌtarethtoña allowenakop ñeñth ameꞌñenaya Yompor.

⁶ Ñamha ñeñthchaꞌ amhchaꞌtarethtatsapaꞌ amach aña senatsto ñeñth errteꞌ ameꞌñetsa, tharroꞌmar ñerraꞌm aña senaꞌ amhchaꞌtareth ñeñth errteꞌ ameꞌñetsapaꞌ ñeñthpaꞌ amach eꞌñe eñotwenano ñeñth kowentetsa Yomporekop, allempopaꞌ eꞌñe ña paꞌmhchaꞌtarethteñothpaꞌ xhatheꞌ atarr ommoꞌcha. Tharroꞌmar ñerraꞌm xha yommoꞌchapaꞌ ñeñthpaꞌ ama pokteyeꞌ enteñe Yompor. Xhatheꞌ awaporeꞌtarethey ateth pet awath oneñeth eꞌñe pommoꞌcheñothpaꞌ awoꞌt waporeꞌchet.

⁷ Ñamha ñeñthchaꞌ amhchaꞌtarethtatsapaꞌ añchaꞌ senaꞌ ñeñth amaꞌt ñeñth ama ameꞌñetsopaꞌ eꞌñech kowen entweñet ñamet. Tharroꞌmar ñerraꞌm nanak sasareꞌteñ ñeñth ama ameꞌñetso, eꞌñe poesasareꞌteñothetpaꞌ ñatoꞌrraña xhatheꞌ oneñethpaꞌ nanak topachpaꞌ ellopaꞌ oꞌtheꞌ alla nanak athpareꞌterran Yompor.

Atthoch yeñoch ñamha erraꞌtsentheꞌ pokteꞌ ñeñthchaꞌ yenaꞌ diácono

⁸ Atthekmach pha ñamha ñeñthchaꞌ sherbets Yompor paꞌpakllo, ñeñth otenet diácono. Ñeñthchaꞌ sherbhatspaꞌ añchaꞌ seꞌn ñeñth amhchaꞌnaꞌtpoꞌ entwen allowen acheñeneshaꞌ, ñamha ñerraꞌm erroth otpaꞌ amach shekëno, ñamha ñeñth ama posaꞌtareꞌtetso, ñamha ñeñth ama nanak yeꞌchapretetso kelle ñeñth apenkoxhenoth oꞌch gana.

⁹ Ñamha ñeñthchaꞌ sherbhats Yompor paꞌpakllopaꞌ añchaꞌ seꞌn ñeñth eꞌñech poeñmañeshaꞌ maꞌyoxhrenaya ora ñeñth ateth yameꞌñera Cristo ñeñth eꞌñe poꞌñoxh kowen.

¹⁰ Ñeñthoꞌmarña añ pokteꞌ xhoch ñanom sekweꞌ ñeñthchaꞌ senaꞌ diácono. Ñerraꞌm ateththeꞌ pena ñeñth ateth oꞌ notwapaꞌ ñewa, pokteꞌ oꞌch seneꞌ ñeñthchaꞌ sherbhats Yompor paꞌpakllo.

¹¹ Atthekmach ñamha koyaneshaxhnopaꞌ amhchaꞌnaꞌtpoꞌch enteñ allowen acheñeneshaꞌ, ñamha amachña attha nanak poetomañenteneto, ñamha ñeñth nanak maꞌyoxhrenaya ñeñth kowentetsa Yomporekop, ñamha eꞌñech kowen kothapeꞌchenet Partsokop.

¹² Ñamha ñeñthchaꞌ senaꞌ diáconopaꞌ añchaꞌ senaꞌ erraꞌtsentheꞌ senten eꞌñe pathrra poethapor pen (ñerraꞌm athaporeth), ñamha erraꞌtsentheꞌ senten ñeñth eꞌñe kowen ameꞌñatwenaya poechemereshaꞌ ñamha ñeñth eꞌñe kowen ameꞌñatwenaya ñeñth parro yexhena paꞌpakllo.

¹³ Tharroꞌmar ñeñth eꞌñe kowen sherbets ateth ñerraꞌm diáconopaꞌ eꞌñech kowen entweñ allowen acheñeneshaꞌ, ñamha oꞌwañchaꞌ pomhchaꞌnañothayaya serrpareꞌt amaꞌt eꞌñe mamesha attho atarr ameꞌñenana Cristo Jesús.

Ñeñth ateth kothapeꞌchateney Yompor atthoch yameꞌñerapaꞌ ñeñthpaꞌ nanak koxhneshaꞌ amaꞌt awathotheñpaꞌ ama eseshayeꞌ eñotenaye

¹⁴ Theꞌpaꞌ oꞌch notaph poꞌpoñ. Napaꞌ nesechenañ oꞌch nabhcherrphaꞌ.

¹⁵ Tharraña ñerraꞌm ama newapopaꞌ amach sepallteno sapaꞌ oꞌch señoch ñeñthchaꞌ ateth sepha, tharroꞌmar oꞌ notwaph añ necartoth ñeñthchaꞌ ateth sepha ñeñthes parro sameꞌñeña Yompor, ñerraꞌm esempo sapxhena Yomporekop, ñeñthara Yompor ñeñth ama arromñatheshayaye. Ñamha ñeñthara Yompor ñeñth eꞌñe yameꞌñeñoth alloweneypaꞌ xhochña yorrtatyen ñeñth eꞌñe poꞌñoxh Yompor poꞌñoñ amachña xha yaꞌnasoteño.

¹⁶ Ñamha yapaꞌ yeñoteñ ñeñth ateth kothapeꞌchateney Yompor attho yameꞌñerapaꞌ ñeñthpaꞌ nanak koxhneshaꞌ amaꞌt awathotheñpaꞌ ama eseshayeꞌ eñotenaye. Añpaꞌ ñeñth ateth yaꞌxhoteñ Cristo: Amaꞌt Paretspaꞌ oꞌ acheñetos añe patsro, tharraña Yompor Poekamkëñothña nanak awamenkathtosa ñeñth eñotateneꞌña acheñeneshaꞌ ñapaꞌ eꞌñe poꞌñoxh kowen. Amaꞌt allowen mellañotheñnaneshaꞌpaꞌ eꞌñe entwoñeteꞌth ñeñth ateth phaꞌyeseꞌth añ patsro, ñamha ñeñth ameꞌñayeꞌthpaꞌ xhokma aꞌpothet Cristo errakmañen arr patsro amaꞌt all ama judioneshayaye. Ñamha shonteꞌ acheñ ameꞌñerraya Cristo, allothña Yompor poꞌkowenñothpaꞌ oꞌ alla agër poeꞌntaño.