1 Timoteo 2 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho eꞌñe pokteꞌ oꞌch yemaꞌyochampesya ñamha amaꞌt amhchaꞌtarethexhno

¹ Theꞌpaꞌ oꞌch notaph poꞌpoñ ñeñthchaꞌ ateth phokthapeꞌchatyes acheñeneshaꞌ ñeñthchaꞌ ateth pet. Ñanompaꞌ maꞌyochampesyetepaꞌch allowen acheñeneshaꞌ, ñamha enamatoñetepaꞌch acheñeneshaꞌ Yompor, ñamha parasyosoꞌchetepaꞌch Yompor.

² Ñamha maꞌyochampesyetepaꞌch allowen amhchaꞌtarethexhno amaꞌt ñamha gobiernoꞌ. Allochñapaꞌ atthoch Yomporpaꞌ kothapeꞌchatanet eꞌñe kowen atthoch amhchaꞌtarethtet eꞌñe kowen, allochñapaꞌ atthoch yokrrena yamha eꞌñe kowen moecheth. Ñerraꞌm ateth penetpaꞌ atthochña eñall ñamha yokop atthoch yemaꞌyoxhrena eꞌñe kowen Yomporekop, ñamha atthoch eꞌñe kowen yentannena.

³ Ñerraꞌm atethña yepenapaꞌ eꞌñech kowen enteney Yompor ñeñth Yaꞌkeshphatañer yepen.

⁴ Tharroꞌmar ñapaꞌ moeneñ allowen acheñeneshaꞌpaꞌ oꞌch aꞌkeshphaterranet, ñamha moeneñ oꞌch eñotatwerranet añ ñoñets ñeñth eꞌñe poꞌñoxh Yompor poꞌñoñ.

⁵ Tharroꞌmar yapaꞌ yeñoteñ Yomporpaꞌ eꞌñe pathrra. Ñamha yeñoteñ eꞌñe poesheñarra ñeñth xhokma eñets yokop Yomporesho, ñeñthara Yompor Poechemer ñeñth Jesucristo ñeñth acheñetosets arr patsro.

⁶ Ñamha ñeñthara ñeñth aꞌrroyatsa eꞌñe ñañeña atthoch poerromoeñoth ñapaꞌ oꞌch tsaꞌtwonaya yoꞌchñar eꞌñe alloweney ñeñthey acheñey. Ñeñthpaꞌ, ateth orrtatonay Pompor allochñapaꞌ atthoch yeñoch ñeñth ateth kothapeꞌchen ña. Allempoña xhap allempo eꞌñe pokteꞌ enteñ Pompor oꞌch xhap añ patsropaꞌ allempoña eꞌñe eñotatey ñeñthepaꞌt ateth kothapeꞌchen Pompor.

⁷ Ñeñthoꞌmarña napaꞌ na allsensareth attho nach chopeñeꞌchats errakmañen attho eꞌñe na neserrpareꞌtateñothpaꞌ oꞌch nameꞌñatyesanet ñeñth eꞌñe poꞌñoxh Yompor poꞌñoñ, amaꞌt ñeñth ama judioneshayaye. Ñeñth ateth noten eꞌñe nameꞌñeñoth Cristo ñeñthpaꞌ eꞌñe poꞌñoxh tharroꞌmar ñeñthpaꞌ ama shekëñtsoyaye.

Añ poktetsa eꞌñech yeñmañeshaꞌ yemaꞌyochena

⁸ Ñamha napaꞌ nemneñ ora amaꞌt erratheꞌ apxhaꞌyenet Yomporekoppaꞌ añ yakmaneshaꞌ allempo echantenet pot poemaꞌyocheñothetpaꞌ eꞌñepaꞌch poeñmañeshaꞌ maꞌyochenet, amachña xha poꞌpoñ entweneto poeyoxhro, ñamha amach xha atsrreꞌmoxhen entweneto.

^9-10 Ateth ñamha koyaneshaxhnopaꞌ chorretepaꞌ ateth chorraꞌyena poꞌpotantañ pakmaneshaꞌ ñeñth poꞌnaneshaꞌ. Amachña aña chorraꞌyesatsteto atthoch ayeꞌcharethtenet eꞌñe ñet poꞌllchapotha. Ñamha poeꞌchetpaꞌ eꞌshorretepaꞌ ateth eꞌshorraꞌyena poꞌpotantañ. Añña ama pokteyaye oꞌch aña maꞌyoxhret atthoch aññoꞌtet eꞌñe kowen poeꞌch. Añothepaꞌchña orrtet eꞌñe kowen attho amoerañtenet, ñamha attho kowenareꞌ es phaꞌyenet. Amachña aña kowen orrtatenaweto attho naꞌyenet oro, amapaꞌ seretsmaꞌth ñeñth nanak tsaꞌteꞌ, ñamha attho es chorraꞌyenet ñeñth nanak koxhneshaꞌ ñeñth nanakchaꞌ tsaꞌteꞌ. Añepaꞌchña ateth penet ñeñth eꞌñe kowentetsa Yomporekop, ñeñth poktetsa koyaneshakop ñeñth otets ñapaꞌ oꞌ ameꞌñerrana Yompor.

¹¹ Ñamha allempo sapxhena Yomporekoppaꞌ añ koyaneshaxhnopaꞌ eꞌmhñotetepaꞌ eꞌñe moetsoññen atthoch es eñotet. Amachña xha athpareꞌteneto amaꞌt mamesha.

¹² Ñamha allempo sapxhena Yomporekoppaꞌ napaꞌ ama pokteyeꞌ nenteñe koyaneshaꞌpaꞌ oꞌch yexhaten all chorren allowen yakmaneshaꞌ, ñamha amach pomnaren phatstano yakma. Eꞌñepaꞌchña mamthetenet allempo sapxhena Yomporekop.

¹³ Tharroꞌmar Adánpaꞌ ñanom ayexhkatareth acheñ, allothpaꞌ ñamha Eva ñeñthchaꞌ poethapor phaꞌ Adán.

¹⁴ Ñamha Adánpaꞌ ama eseshaꞌ shekaye. Aña shekoñet poethapor Eva, alloth orrta athparñats Yomporekop.

¹⁵ Ñeñthoꞌmarña theꞌ allempo cheyoreꞌten koyaneshaꞌpaꞌ eꞌñech paꞌllpoepñotha cheyoreꞌten. Tharraña amaꞌt attheñpaꞌ Yomporñapaꞌ xhokmach yenpoeñ atthoch xhokma keshpenet eꞌñe kowen, ñerraꞌm poꞌñoxh xhokma ameꞌñenet, ñamha ñerraꞌm xhokma amoerañtenet, ñamha ñerraꞌm eꞌñe kowen es orrtatyenet Partsokop, ñamha ñerraꞌm eꞌñe kowen yexhenet.