1 Timoteo 1 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Pablopaꞌ kellkan carta Timoteokop

^1-2 Masheñe Timoteo ñeñtheph eꞌñe yameꞌñeñoth eꞌñe ateth nenteneph ñerraꞌmrratheꞌ eꞌñe nechemer nepeneph, na Pablon pekellkëneꞌña añ carta ñeñthen Jesucristo poellsensaren, tharroꞌmar ñeñthpaꞌ ateth llesenserren Yompor Parets epoet Poechemer Jesucristo ñeñthchaꞌ nanak yeyemterra. Ñeñthpaꞌ ñeñthara Yompor ñeñth Yaꞌkeshphatañer yepen, ñamha ñeñthara Poechemer Jesucristo ñeñth Yepartseshar yepen. Theꞌpaꞌ eꞌñe newomhchaꞌteñothephpaꞌ oꞌch notaph, Yomporepaꞌchña pebensareꞌtampeneꞌ ñeñth nanak Parets epoet Poechemer Cristo Jesús ñeñth Yepartseshar yepen. Ñetepaꞌchña pemoerenaya. Ñetepaꞌchña phokshateneꞌ eꞌñe pha peyoxhro.

Timoteopaꞌ ña kothapeꞌchaterrawet kowen all anetso Efeso all ayxhatarethtenet poꞌpoñ kothaphñats

³ Ñamha theꞌpaꞌ oꞌch notaph, awañmoꞌcha allempo nesechena oꞌch awen Macedoniopaꞌ ateth notnomoeph, phapaꞌ allach phaꞌpa Efeso atthoch phach kothapeꞌchatyeseꞌ ñeñth yexhatyets poꞌpoñ kothaphñats, atthoch ñetpaꞌ amach alloꞌna yexhatneneto ñet pokthaphñet ñeñth ama poꞌñoxhoyaye. Theꞌpaꞌ ñeñthekopña nekellkënnaph añ carta allochñapaꞌ oꞌch alla neyerpaterrperr.

⁴ Ñamha theꞌpaꞌ phach otyesawet atthoch amach alloꞌna kothapeꞌchatyesneneto eꞌñe ñet poeserrparñet ñeñth ama poꞌñoxhoyaye. Ñamha phach otyesawet atthoch amach alloꞌna kothapeꞌchatyesneneto ñeñth ateth serrpareꞌtatyesaneteꞌth paꞌtañneshañ. Tharroꞌmar ñeñth serrparñatspaꞌ attha nanak moññeꞌtateñet acheñeneshaꞌ. Ñeñthpaꞌ ama añekpayaye alloch eꞌñe yeñoter erraꞌtsentheꞌ eꞌñe poꞌñoxh alloch yesherber Parets ñeñth ateth moenen ña. Añña eꞌñe yameꞌñeñotha Cristopaꞌ oꞌch yeñoter.

⁵ Yomporpaꞌ añña moenen oꞌch yeyxhach acheñeneshaꞌ amorrentannaꞌtpawepaꞌch alloweney. Tharroꞌmar eꞌñe yameꞌñeñoth Cristo poktakma arrña yeyoxhropaꞌ eꞌñech kowenareꞌ yokthapeꞌchyen Yomporekop. Ñamha eꞌñech yeñmañeshaꞌ yokthapeꞌchen kowen.

⁶ Tharraña poesheñaꞌtets acheñeneshaꞌpaꞌ awoꞌt alla kexhpaꞌwerret ñeñth ateth moenen Yompor. Ñeñthña ateth serrpareꞌtatenet poꞌpoñ kothaphñats, ñeñthñapaꞌ ama es sherbeno amaꞌt mamesha Yomporekop.

⁷ Ñetpaꞌ aña moenenet awoꞌch orrtet ateth ñerraꞌmrratheꞌ nanak etsotenet añ ñoñets ñeñth ateth anareth judioneshakop awath. Tharraña amaꞌt ateth penetañpaꞌ amaña eñoteñeto estheꞌña yexhateneyña añ ñoñets ñeñth xhokma serrpareꞌtenet. Amaꞌtchaꞌ ñeñtha nanak thorrenetañpaꞌ amachña xhenaneto poeyoxhro ñeñth poꞌñoxh ateth yexhateney ñeñth ñoñets.

Atthoch yeñoch eseshakoptheꞌ sherben añ ñoñets ñeñth ateth anareth

⁸ Ñewa, alloweneypaꞌ eꞌñe yeñotweñ, amaꞌt erraꞌtsena ñoñets ñeñth ateth anareth ñeñthchaꞌ ateth yephapaꞌ xhokma sherben ñerraꞌm añekop yesherbhaten añ ñoñets ñeñth ateth moenen Yompor.

⁹ Ñamha alloweneypaꞌ eꞌñe yeñotweñ añ ñoñets ñeñth ateth anareth ñeñthchaꞌ ateth yephapaꞌ ama añekpayeꞌ anarethe acheñeneshakop ñeñth kowenareꞌ es phaꞌyets, tharroꞌmar ñetpaꞌ oꞌ yexhaꞌweñet eꞌñe poktakma. Ñeñthpaꞌ añekpa anareth añ acheñrekop ñeñth ama es otapespawo, ñamha ñeñth nanak athpareꞌtetsa, ñamha ñeñth ama es xhenoyo poeyoxhro ñeñth kowentetsa Yomporekop, ñamha ñeñth nanak ochñaꞌtareꞌtets, ñamha ñeñth ama amhchaꞌnaꞌtpoꞌ entenaye Yompor poꞌñoñ, ñamha ñeñth amaꞌt Paretspaꞌ achmhareꞌteñchaꞌ. Ñamha añekpa anareth añ ñoñets añ acheñrekop ñeñth amtsañtetsa, ñamha ñeñth moetseneꞌ pompor, amaꞌt ñamha pachor.

¹⁰ Ñamha añekpa anareth añ ñoñets añ acheñrekop ñeñth kañoreshaꞌtets, ñamha ñeñth agëneꞌ pakma, ñamha ñeñth aꞌyetyeneꞌ acheñ, ñamha ñeñth attha tomaꞌtyets, ñamha ñeñth shekareꞌtyets amaꞌtchaꞌ atarr womenk nenaneñña poꞌñoñ Yompor paꞌsoꞌchño, ñamha amaꞌt erraꞌtsentheꞌ acheñer ñeñth athpareꞌteneꞌ ñeñth ateth kowen yexhateney Yompor poꞌñoñ.

¹¹ Ñamha ñeñth ateth yexhateney Yompor poꞌñoñ ñeñthpaꞌ ñeñthara kowen ñoñets ñeñth alloch aꞌkeshphaterrey Yompor eꞌñe poꞌkowenño, ñeñthara Yompor ñeñth nellsenserreꞌ na oꞌch neserrpareꞌtoñ poꞌñoñ, ñamha ñeñthara Yompor ñeñth atarr yaꞌyeꞌchoxhtatyen alloweney.

Attho Pablopaꞌ atarr parasyosoꞌten attho atarr awamenkath per Yompor

¹² Tharraña amaꞌt ña nellsenserrayeñpaꞌ napaꞌ nanak neparasyosoꞌteñ Yepartseshar Jesucristo tharroꞌmar attho nanak awamenkath phaꞌn. Ñamha nanak neparasyosoꞌteñ Yompor, tharroꞌmar ñapaꞌ eꞌñe pokteꞌ enterren oꞌch nesherber

¹³ amaꞌt na awathpaꞌ nanak nachmhareꞌcheꞌth Cristo, ñamha nanak nokthareꞌcheꞌth ñeñth ameꞌñayeꞌth ña, ñamha nanak naꞌtserrphaꞌyesaneteꞌth. Tharraña amaꞌt ateth nepeꞌthpaꞌ Yomporpaꞌ ama koñeꞌtha morrenterrno tharroꞌmar allempopaꞌ ama es nexhenoyo neyoxhro, ñamha allempopaꞌ ama nameꞌñeꞌthe.

¹⁴ Tharraña Yomporpaꞌ ama koñeꞌtha morrenterrno, ñeñthoꞌmarña ameꞌñataterrna atthothña theꞌpaꞌ eꞌñe neyemteñoth ñapaꞌ nemorrentera allowen acheñeneshaꞌ.

¹⁵ Ñeñthoꞌmar theꞌpaꞌ oꞌ neñoter añepaꞌtña ñoñets ñeñth eꞌñe poꞌñoxh: Cristo Jesúspaꞌ añekopña wapa añ patso atthoch aꞌkeshphatosan allowen ochñatheneshaꞌ. Ñeñthoꞌmarña theꞌ napaꞌ neñotena, allowen ñeñth ochñatheneshaꞌpaꞌ na ello metanaꞌtwenawet poꞌchñaret. Ñeñthoꞌmar theꞌpaꞌ aña poktetsa oꞌch yameꞌñaꞌwerra ñeñthara añ ñoñets.

¹⁶ Ñeñthoꞌmar Yomporpaꞌ atthothña peretnerren na, amaꞌt napaꞌ nanak ochñathen, allochñapaꞌ atthoch eñochet amaꞌt erraꞌtsentheꞌ acheñer ñeñth nanak ochñathpaꞌ atthera nanak morrenteña Jesucristo. Allochñapaꞌ ñerraꞌm eseshaꞌña ameꞌñerrayapaꞌ ñetñapaꞌ korretsetach poksheñeshokmañen thayotheñ eꞌñe errponañowen.

¹⁷ Ñeñthoꞌmarña theꞌpaꞌ nanak noksheñoth noten, amorrentpawepaꞌch Yompor ñeñth partsotets eꞌñe ñapoeth awathotheñ errponowañen, ñeñthara ñeñth ama arromñatheshayaye amaꞌt awatha, ñeñth amaꞌt eseshapaꞌ ama poentare, ñeñthara ñeñth eꞌñe ñapoeth eñotañ. Ñeñthoꞌmarña yekowentatoñepaꞌch thayotheñ errponowañen. Ñeñthpaꞌ atthetepaꞌch Nompore.

Añpaꞌ ñeñth ateth otan Timoteo ñeñthchaꞌ ateth pha

^18-20 Theꞌ, masheñe Timoteo, ellopaꞌ oꞌch alla noterrperr poꞌpocheño ñeñthchaꞌ ateth pepha, tharroꞌmar ateth nenteneph ateth ñerraꞌmrratheꞌ eꞌñe nechemer nepeneph. Theꞌpaꞌ eꞌñech peyoxhrokmañen pethorra Yomporekop ateth ñerraꞌmrratheꞌ xho yekhllarena. Eꞌñe phameꞌñeñoth Cristo eꞌñech peñmañeshokmañen es phorrtatyen. Napaꞌ añ nokthapeꞌchen ñeñth ateth eños eꞌñe kowen phokop awañmoꞌcha ñeñth aꞌmhteneꞌ ñoñets Yomporeshoth. Amaꞌt phapaꞌ xhokmoepaꞌch peyerpa ñeñth ateth aꞌpoktat phokop, tharroꞌmar ñeñth ateth eños phokoppaꞌ ñeñthchaꞌ alloꞌna awamenkath pepeneꞌ. Ñamha xhokmach phameꞌñya Cristo eꞌñe kowen eꞌñe peñmañeshaꞌ, tharroꞌmar ñerraꞌm ama eꞌñe yeñmañeshaꞌ yoktheñe Cristopaꞌ ñatoꞌ akophonethpaꞌ oꞌwañchaꞌ yameꞌñera Cristo. Ñeñth ateth pha awaña epsheña yakma ñeñth paꞌsoꞌcheñ Himeneo ñamha Alejandro, ñamha poꞌpoñexhno acheñ ñeñth ateth petsa. Ñeñthoꞌmarña napaꞌ napoenanet oneñeth ñeñthara epsheña yakma atthoch ñapaꞌ oꞌch moeroxhtatanet allochñapaꞌ oꞌch eñochet ama achmhareꞌtpawo Yompor.