1 Tesalonicenses 5 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Theꞌña masheñneshachaꞌ ñamha noxhaneshachaꞌ sokoppaꞌ ama pallteno oꞌch alla noterrserr añ necartoth eꞌñech esempo etsoterra allempoch werraña Yepartseshar.

² Tharroꞌmar sapaꞌxhoꞌña oꞌ eꞌñe señoter xherrchaꞌ patherr yeth allempoch werra Yepartseshar Jesús. Allempopaꞌ eꞌñech machayotha werra eꞌñe ateth ñerraꞌm esempo wennaya eñeth tsapo eꞌñech machoyotha wapa.

³ Allempo amach xhenaꞌ ñeñth yether allempoch werra Yepartseshar acheñeneshaꞌña arr patsro ñetñapaꞌ atethchaꞌ otyerret allempo: “Theꞌña yapaꞌ eꞌñe kowen moecheth yeyxhena arr patsro. Yokoppaꞌ amaꞌt awathapaꞌ amach eñalleterroña ñeñthchaꞌ yeyoreꞌtameꞌterreꞌ.” Tharraña eꞌñech allorokma machayothach werranet ñeñthchaꞌ eꞌñe aꞌkllatwerrawet. Allempo amaꞌt poesheñarrapaꞌ amach eñalleña atthoch yeterret. Eꞌñech ateth xherranet ñerraꞌmrratheꞌ allempo atsotenana koyaneshaꞌ poeꞌmar amach eñalleña atthoch yetamphsana attho atserrpeñ poeꞌmar atthoch amach atserrpe.

⁴ Tharraña saña poꞌñoxh, masheñneshachaꞌ ñamha noxhaneshachaꞌ, sapaꞌ ama chekmetoꞌtsenayayso ñeñth ateth pena acheñeneshaꞌ ñeñth ama ameꞌñetso. Sapaꞌ eꞌñe señoteñ ñeñthoꞌmarña amaꞌtchaꞌ machayotha werra eꞌñe ateth machayotha wennaya eñeth, sañapaꞌ amach xha seyorenatsto.

⁵ Tharroꞌmar sapaꞌ eꞌñe sameꞌñeñoth Cristo eꞌñe señoteññañ poꞌkowenña ñeñthoꞌmarña napaꞌ oꞌch netmaꞌntatasa sapaꞌ poetarenanaꞌtarneshas ñamha yethenaꞌtarneshas. Poꞌñoxh yapaꞌ ama tsapoꞌmarneshayayye ñamha ama chekmetoꞌmarneshayayye tharroꞌmar yapaꞌ ama añeyeꞌ yephaꞌyeno ñeñth ateth phatseꞌtyen ñeñth ama ameꞌñetso.

⁶ Ñeñthoꞌmarña oꞌch notas: Yapaꞌ amach xha yekhllatsto Yomporekop, tharroꞌmar ñerraꞌm ateth yephapaꞌ xhach yottena ñerraꞌm xha yemoen Yomporekop ateth pena poꞌpotantañ ñeñth attha es poexhaꞌyetsa. Yapaꞌ amachña xha yemanrraꞌtatsto xhochña eꞌñe yeñotena atthochña yeñoseꞌreꞌtyeswena.

⁷ Ñewa, yeñoteñ ñeñth manrretspaꞌ tsapoch manrrenet ñamha ñeñth posaꞌtareꞌtyetspaꞌ tsapoch posaꞌtareꞌtyenet.

⁸ Tharraña yapaꞌ yethoꞌmarneshay ñeñthoꞌmar xhokmoepaꞌch eꞌñe yeñoteñoth yeñoseꞌreꞌtyeswena. Eꞌñe yameꞌñeñoth Yompor ñamha yemorrentannaꞌteñoth ñeñthña kowampeneꞌña yeyoxher Yomporekop atthoch amach aña yokthapeꞌchatsto ñeñth ama pokteyeꞌ enteno Yompor. Ñeñthpaꞌ añ tomaꞌntena asrom ateth ñerraꞌmrratheꞌ ñeñth chorrena solltar ñeñth aꞌnateneꞌ poesomap allempo kellarena atthoch ama etarethteneto. Ñamha yapaꞌ yeyemteñoth Cristo theꞌñapaꞌ eꞌñe aꞌkeshphatarethey ñeñthpaꞌxhoꞌña ñeñthña yemoñenaya. Ñeñthpaꞌ añ tomaꞌntena ateth pena solltar oꞌch naꞌnman asret poño atthoch ama ettoꞌtarethteto.

⁹ Tharroꞌmar Yompor poꞌñoxhpaꞌ ama añeyeꞌ oꞌpatatenyo atthoch koñchatwerrey; yapaꞌ añña oꞌpatatenya atthoch eꞌñe kowen aꞌkeshphatwerrey alloweney eꞌñe yameꞌñeñotha Yepartseshar Jesucristo

¹⁰ ñeñth rromats yokop, atthochña amaꞌtchaꞌ oꞌ yokllaꞌwenañ allempoch werra amapaꞌ ñatoꞌ orameñ yokrrenmeñ allempoch werra attherayach yañapaꞌ korretsayach epay ña eꞌñe parro.

¹¹ Ñeñthoꞌmarña theꞌpaꞌ notenes, sapaꞌ xhokmoepaꞌch sokshatannena Yomporekop. Xhokmoepaꞌchña womenk sephannaꞌta seyoxher Yomporekop eꞌñech ateth sepha thayotheñ.

Pablopaꞌ eꞌñe kowen kothapeꞌchatyesanet

¹² Oꞌch, masheñneshachaꞌ ñamha noxhaneshachaꞌ, notas poꞌpoñ, semhchaꞌnaꞌteñothpaꞌ eꞌñepaꞌch kowen semorrenteña allowen ñeñth thorraꞌyetsa Yomporekop sesho tharroꞌmar ñetpaꞌ eꞌñe Partsesheshoth anarethtenet ñeñthchaꞌ amhchaꞌtarethtatsa sokop, ñetchaꞌña sokthapeꞌchateneꞌña eꞌñe kowen.

¹³ Attho atarr thorrenet Yomporekop sañapaꞌ eꞌñepaꞌchña kowen sentenanet, atarrchaꞌ semorrentenanet. Ñamha amaꞌt allowenes eꞌñe sagattsapaꞌ eꞌñepaꞌchña kowen sentannena atthoch eꞌñe kowen seyxhena eꞌñe señmañeshaꞌ.

¹⁴ Ñamha oꞌch masheñneshachaꞌ alla noterrserr ñeñthchaꞌ ateth sepha: Ñeñth atarr kellañtsotyets sesho sachña kothapeꞌchaterrawet kowen atthoch amach alloꞌna kellañtsoteneto. Ñamha ñeñth ama koshetso sachña eꞌñe kowen koshaterrawet ñamha ñeñth ama womenkayeꞌ penaye poeyoxher Yomporekop, sachña eꞌñe kowen koshatyerrawet atthoch eꞌñe womenk perret ñamet poeyoxher Yomporekop. Eꞌñe allowenet saña eꞌñe semorrenteñothanet ñetpaꞌ xhokmoepaꞌchña eꞌñe kowen saꞌwantenanet.

¹⁵ Ñamha sapaꞌ xhokmoepaꞌch eꞌñe kowen señotena allochñapaꞌ ñerraꞌm poꞌpsheñeñ erroth phonaspaꞌ sapaꞌ amaꞌt eꞌñe poesheñarrothesa amach setsaꞌtatatsche amaꞌt koñeꞌtha. Añchaꞌña eꞌñechña kowen sepeñ samoꞌts amaꞌt ñamha allowen poꞌpotantañ acheñeneshaꞌ.

¹⁶ Ñamha sapaꞌ xhokmoepaꞌch eꞌñe kowen sokshena.

¹⁷ Ñamha xhokmoepaꞌchña semaꞌyochena.

¹⁸ Ñamha amaꞌt errothenoꞌtsensa xhokmoepaꞌch separasyosoꞌteñ Yompor tharroꞌmar ñeñthpaꞌ ateth moenen eꞌñe yokop allowenakpay ñeñthey yemtenoya Poechemer ñeñth Cristo Jesús.

¹⁹ Ñamha amach sathpareꞌtatsche ñeñth ateth kothapeꞌchatenes Parets Poekamkëñ eꞌñe seyoxhro, tharroꞌmar ñerraꞌm ateth sephapaꞌ xhatheꞌ saꞌwañaterrñañ ñeñth ateth eñotatyenes Yompor Poekamkëñoth. Ñeñthpaꞌ eꞌñe ateth ñerraꞌmrratheꞌ oꞌ semayerrñañ Yompor poꞌwrare.

²⁰ Ñamha amach ateth sentatsche ñeñth ateth eñoraten Parets Poekamkëñoth ñerraꞌm ama asherbenayeꞌ senteñe.

²¹ Allowen amaꞌt erraꞌtsena xhochña ñanom señoch ñatoꞌ eꞌñetheꞌ kowen ñatoꞌpaꞌ amatheꞌ kowenayaye. Ñeñth allowen erraꞌtsenchaꞌ eꞌñe kowen sentyes ñeñthñapaꞌ amach sekexhpatstere amaꞌt awatha.

²² Tharraña allowen erraꞌtsenchaꞌ ama kowenayeꞌ sentyeso ñeñthñapaꞌ xhosaña aꞌypoꞌñerreꞌ.

²³ Yompor ñeñth eꞌñe yokshateneꞌ yeyoxhro, ñepaꞌchña eꞌñe saꞌkowentaterreꞌ eꞌñe kowen Partsokop. Xhokmoepaꞌch alloꞌna sesen eꞌñe kowen allochñapaꞌ ñerraꞌm esempoch werra Yepartseshar Jesucristo, sokoppaꞌ amach eñalleña amaꞌt koñeꞌtha atthoch otteñeꞌchwerres amaꞌt sekamkëñowen, amaꞌt seyoxhrowen, amaꞌt ñamha sechtsowen.

²⁴ Tharroꞌmar Yompor ñeñth oꞌ xhoreꞌterres ñapaꞌ ña atarr ayemoetpotetsa, ñachña setsotatweꞌña eꞌñe ora allowen ñeñth eꞌñe kowentetsa ñokop.

Arrpaꞌ all soꞌterranet poꞌcartoth

²⁵ Oꞌch, masheñneshachaꞌ ñamha noxhaneshachaꞌ, notas, xhokmach semaꞌyochampesya yamha.

²⁶ Ñamha theꞌpaꞌ nemneñ oꞌch newomhchaꞌtas allowenes ñeñthes ameꞌñetsa.

²⁷ Ñamha theꞌpaꞌ oꞌch notas, eꞌñe yemhchaꞌnaꞌteñoth Yepartseshar Cristo añ cartapaꞌ oꞌch selleyach allowen masheñneshaxhno ñamha noxhaneshaxhno.

²⁸ Yepartsesharepaꞌchña Jesucristo saꞌnatenaya eꞌñe allowenes. Ñeñthach notas, ñeñthpaꞌ atthetepaꞌch Nompore. Allowa. Pablo