1 Tesalonicenses 3 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Allempoña na oꞌwañ naꞌwantaꞌ ñeñth attho nellkënsa ñatoꞌ errothenoꞌtsenestheꞌ, ñeñthoꞌmarña napaꞌ eꞌñe pokteꞌ neñch oꞌch alla naꞌpa napoeth Atenso

² atthoch nemñonas masheñ Timoteo ñach semoꞌterrayaꞌ, ñach seserrpareꞌtatoseꞌ atthoch eꞌñe womenk sephaꞌ seyoxher ñeñth attho sameꞌñena. Ñach sokshaterreꞌ ello ñeñth attho sameꞌñena. Tharroꞌmar masheñ Timoteo ñapaꞌxhoꞌña atarr kowen yethorrena parro Yomporekop. Atarr serrpareꞌtatyenanet kowen ñoñets attho Cristopaꞌ ña aꞌkeshphatañtetsa.

³ Ñach sokthapeꞌchaterreꞌ eꞌñe kowen Yomporekop allochñapaꞌ amaꞌt attho atarr amoeroxhtatarethes, amachña ñeñthotha sepoerratsterro amaꞌt poesheñarrothesa. Ñewa, sapaꞌ eꞌñe señoteñ xhokmach waponaya ñeñth amoeroxhtatañ yenten.

⁴ Allempo eꞌñe alloꞌtsaꞌyenakmay alloweney eꞌñe parro allempo yapaꞌ ateth oꞌ yotwas xhokmach waponaya moeroxhteñets. Ñeñthña theꞌpaꞌ atethxhoꞌ oꞌ phonasa, theꞌpaꞌ eꞌñetheꞌ señoteñ eꞌñe poꞌñoxh ateth.

⁵ Ñeñthoꞌmarña awaña allempo oꞌwañ naꞌwantaꞌ ñeñth attho nellkënsa naña allempo nemñe masheñ Timoteo atthoch neñotas sapaꞌ errothenestheꞌña sa, ñatoꞌ attheratheꞌ sesen ameꞌñaya Yompor. Napaꞌ nellkëñothpaꞌ ateth noten ñatoꞌrraña oneñeth poetpateñothes oꞌtheꞌ xha kexhpaterres Yompor. Ñerraꞌm ateth seperra napaꞌ ateth noten ñeñth attho nethorrena eꞌñe sokoppaꞌ ñatoꞌrraña ñeñthpaꞌ eꞌñetheꞌ orrena.

⁶ Tharraña allempo werra masheñ Timoteo seshoth, ñapaꞌ serrpareꞌtatwerrey kowen ñoñets, sapaꞌ atthera eꞌñe kowen sameꞌñena, eꞌñe kowen atthera semorrentannena. Ñamha serrpareꞌtatwerrey attho sapaꞌ xhokma seyerpoenya soksheñeshaꞌ ñamha atarr semneñ oꞌch yabhchannerra parro. Yapaꞌxhoꞌña eꞌñe atthekma atarr yemneñ yamha.

⁷ Ñeñthoꞌmarña masheñneshachaꞌ ñamha noxhaneshachaꞌ yapaꞌ amaꞌt allowen es yewenoya ñamha amaꞌtchaꞌ atarr yemoeroxhetwanena, theꞌñapaꞌ oꞌ alla sokshaterrey. Attho yeñoterres sapaꞌ atthera kowen sameꞌñena ñeñthña atarr yokshaterreꞌ.

⁸ Attho sapaꞌ eꞌñe kowen womenk sepen seyoxher Yepartsesharekop, napaꞌ ñeñthña eꞌñe kowen nokshateneꞌ attho nokrrena arr patsro.

⁹ Ñeñthoꞌmarña atarr nanak yeparasyosoꞌteñ Yompor sokop. Eꞌñe yeyoxhropaꞌ xhokma yokshensa Yomporesho ñeñthoꞌmarña xhokma yeparasyosoꞌteñ Yompor sokop.

¹⁰ Xhokma yenamoeñ Yompor yetho amaꞌt ñamha tsapo atthoch yabhchannerra. Atarr yemneñ oꞌch yokthapeꞌchaterrsaꞌ erraꞌtsentheꞌña sepalltena atthoch sameꞌñera eꞌñe poktakma.

¹¹ Yompor Parets ñamha Yepartseshar Jesús ñetepaꞌchña yexhapaterreꞌña sesho.

¹² Yepartsesharepaꞌchña atontaterreꞌña semorrenteña allochñapaꞌ alloꞌnach nanak sesen morrentannaꞌttsa eꞌñe sagattsa atthochña alloꞌnach sesen morrentenaya allowen acheñeneshaꞌ, eꞌñe ateth yepena ya sapaꞌ nanak yemorrentensa.

¹³ Eꞌñe semorrentannaꞌteñoth seyoxherñapaꞌ eꞌñech womenk pennas Yepartseshar Cristo. Ñerraꞌm atethchaꞌ sepha allempopaꞌ amach errothenoth otteñeꞌchwerrsoña Yompor tharroꞌmar sapaꞌ eꞌñech kowen es sorrtatyen Partsokop eꞌñe thayotheñ. Atthepaꞌchña entwerresña Yompor Parets ñerraꞌm allempoch werra Yepartseshar Jesús. Esempo poꞌñoxhpaꞌ werrach epoet allowen ñeñth poeyochreshaxhno pen ñeñth eꞌñe pokteꞌ enten Parets.