1 Tesalonicenses 1 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Pablopaꞌ kellkan carta añekop ñeñth ameꞌñetsa anetso Tesalónico epoet Silvano ñamha Timoteo

¹ Masheñneshachaꞌ ñamha noxhaneshachaꞌ ñeñthes allowenes apxhetsa all anetso Tesalónico eꞌñe seyemteñoth Yompor Parets epoet ñamha Poechemer Jesucristo ñeñth Yepartseshar yepen. Na Pablon sekellkëneꞌña añ carta epan masheñ Silvano ñamha masheñ Timoteo. Eꞌñe newomhchaꞌteñothes sa napaꞌ oꞌch notas: Yomporepaꞌch sebensareꞌtampeneꞌ ñeñthara Parets epoet Poechemer Jesúcristo ñeñth Yepartseshar yepen. Ñetepaꞌchña sokshateneꞌ eꞌñe sa seyoxhro allowenes.

Attho ameꞌñena ñeñth apxhetsa Tesalónico

² Yapaꞌ yemaꞌyochampeñothes sa xhokma yeparasyosoꞌteñ Yompor sokop allowenakpas.

³ Tharroꞌmar allempo yemaꞌyocheña Yompor xhokma yeyerpoensa attho sapaꞌ eꞌñe seyemteñoth Yompor atarr sethorraꞌyena ñokop ñamha eꞌñe semorrentannaꞌteñothpaꞌ atarr seyenpannena. Ñamha eꞌñe seyemteñoth Yepartseshar Jesucristo sapaꞌ oꞌ womenk sephaꞌnom seyoxher eꞌñe ñokop.

⁴ Masheñneshachaꞌ ñamha noxhaneshachaꞌ, Yomporpaꞌ atarr morrentensa. Eꞌñe yeñoteñ Yomporpaꞌ awathotheñ akrerres sa ñeñtheschaꞌ ameꞌñerraya.

⁵ Tharroꞌmar añ kowen ñoñets ñeñth yeserrpareꞌtatoses awaña, ñeñthpaꞌ ama ñoñtsenochayayo, yapaꞌ añña awamenkath yepeneꞌ Parets Poekamkëñ allochñapaꞌ attho sapaꞌ oꞌ xhaponasa seyoxhro ñeñth ñoñetspaꞌ eꞌñepaꞌt poꞌñoxh ñeñthpaꞌ ama shekëñtsoyaye. Sapaꞌ eꞌñe señoteney ñeñth ateth eꞌñe kowen yorrtatyesonas allempo alloꞌtseney sesho.

⁶ Eꞌñe ateth sentey ya ñeñth ateth yepena, sapaꞌxhoꞌña theꞌpaꞌ eꞌñech ateth sepena samha, ñamha eꞌñe ateth kowen orrtatyen Yepartseshar Jesucristo sapaꞌxhoꞌña theꞌpaꞌ ñeñthara sorrtatyen samha. Attho sagapoñ Yompor poꞌñoñ eꞌñe soksheñeshaꞌ Paretsña Poekamkëñ sokshateꞌña eꞌñe sa seyoxhro. Eꞌñe sameꞌñeñoth amaꞌt atarr saꞌmoeroxhtatarethetyena tharraña sapaꞌ xhokma atarr sokshena.

⁷ Ñeñthoꞌmarña allowen ñeñth ameꞌñetsa Macedonioꞌmar ñamha Acayoꞌmar, ñetñapaꞌ ateth eñotenset eꞌñe kowen sorrtatyen Yomporekop, ñetpaꞌxhoꞌña theꞌpaꞌ eꞌñe atthekma orrtatyenet ñamet Yomporekop.

⁸ Theꞌña eꞌñe seshoth oꞌ epaꞌwa Yompor poꞌñoñ all serrpareꞌtyeñet. Ama allayayo Macedonio ñamha Acayo, oraña oꞌ eꞌñe epaꞌwa errapharen allemeñ. Errapharen oꞌ eꞌmareꞌtwaset sapaꞌ atarr sameꞌñeña Yompor. Theꞌña ñet oꞌ eꞌmareꞌtwetpaꞌ ñokpoetpaꞌ ama pallteneto oꞌch alla yoterraneterr ya ello.

⁹ Ñetñapaꞌ serrpareꞌtyenyet attho sapaꞌ eꞌñe kowen sagapapoey. Ñamha serrpareꞌtatannaꞌtyenet attho sapaꞌ oꞌ sokthapeꞌcherr ello kowen Yomporekop oꞌ sekexhpaꞌwerr ñeñth semchatseꞌtyeseꞌth ayexhkatareth. Theꞌña ñeñthpaꞌ oꞌ sekexhpaꞌwer eꞌñe poktakma atthothña allempotheñ eꞌñe kowen sesherber Yompor ñeñth ama arromñatheshayaye ñeñth eꞌñe poꞌñoxh Yompor.

¹⁰ Ñamha serrpareꞌtyeñet attho sapaꞌ eꞌñe seyemteñoth atarr sekweññañ Yompor Poechemer esempowañenchaꞌ werra poeꞌntañoth ñeñthara Poechemer ñeñth tantaterr allempo rroma, ñeñthara Jesús ñeñthchaꞌ yaꞌkeshphaterreꞌ ñerraꞌm esempoch yoroxhtatwer Yompor.