1 San Pedro 5 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho kothapeꞌchatan allowen ñeñth pomporneshaꞌ pen ñeñth ameꞌñetsa

¹ Theꞌpaꞌ oꞌch notas samha ñeñthes pompor pen ñeñth ameꞌñetsa sesho. Napaꞌxhoꞌña nach pompor pen ñeñth ameꞌñetsa nesho. Napaꞌ neñcheꞌth ateth moeroxhteꞌth Cristo. Tharraña ñerraꞌm esempo werra poꞌkowenñopaꞌ yapaꞌ oꞌch yekowentapretera yamha.

² Napaꞌ theꞌpaꞌ oꞌch notas sa ñeñthes pompor pen ñeñth ameꞌñetsa. Ateth pena ñeñth kowampeneꞌ poꞌcarneror, sapaꞌxhoꞌña sekwampeschaꞌ eꞌñe kowen ñeñth ameꞌñetsa sesho, tharroꞌmar ñetpaꞌxhoꞌ poꞌcarneror penanet Yompor. Amachña sekhllañotha sekwamphsatstaneto ateth sepeñ ñeñth ama tama kowenayeꞌ senteno. Eꞌñechña soksheñeshaꞌ sekwampenanet ateth moenen Yompor. Tharraña amach sagapoeñotha kelle sekwamphsatstaneto. Ñerraꞌm kellayekop yekwampeñpaꞌ oꞌch yepenka. Añchaꞌña eꞌñech yoksheñeshaꞌ yekwamphsanet.

³ Amach xha saꞌmhchaꞌnoxhteñotheyeꞌ sekwampenaneto, ñeñthes ateth anarethes sach kowampenawet. Añchaꞌña xhokmach yentatanet ateth eꞌñe kowen es yepen. Eꞌñe yokthapeꞌchateñoth kowenpaꞌ oꞌch yeyxhatenanet allowen ñeñth eꞌñe poꞌcarneror pen Yompor.

⁴ Cristoñapaꞌ ñeñth yekwampeneꞌ alloweney ateth ñerraꞌm poꞌcarnerorey. Ñerraꞌm esempo werra, allempopaꞌ yapaꞌxhoꞌ atsaꞌtaretheychaꞌ. Atsaꞌtaretheychaꞌ poꞌkowenño ñeñthchaꞌ atarr nanak yokshaterreꞌ ñeñthpaꞌ ama awañaño amaꞌt errponaña.

⁵ Ñeñthes wepaneshas, theꞌpaꞌ napaꞌ oꞌch notas samha. Añ poktetsa oꞌch sameꞌñeña ñeñth poꞌn yakma ñeñth sompor sepen. Poꞌñoxh oꞌch notas allowenes, eꞌñech kowen sameꞌñannena amach sañeña eꞌñe kowen entatstatso tharroꞌmar: Yomporpaꞌ ama pokteyeꞌ entenano ñeñth ateth ommoꞌchetsa. Añña ñeñth ama esoyeꞌ entetso ñeñthña atarr moerenaña Yompor.

⁶ Yapaꞌ yeñoteñ Yomporpaꞌ nanak awamenkath. Yapaꞌ ama ya yewamenkotheyeꞌ yommoꞌcheno. Ñeñthoꞌmarña yeñoteñ Yomporpaꞌ ama kowenayeꞌ entenano ommoꞌcheñets. Amach yeyemtatsto eꞌñe yañeña, tharroꞌmar yapaꞌ ama es yesherbeno. Añchaꞌña eꞌñe kowen yeyemtena Yompor, allochñapaꞌ ñerraꞌm esempo ña moenats, ñachña yokshatwerreꞌña eꞌñe kowen.

⁷ Ora allpon ñeñth yellkateneꞌ añ poktetsa oꞌch yotwe Yompor. Tharroꞌmar ñapaꞌ poꞌñoxh xhokma llekapretenya ñeñth yellkateneꞌ. Allochñapaꞌ ñachña yaꞌmetwerreꞌ yellkëña atthoch yokshaꞌwerra eꞌñe kowen.

⁸ Eꞌñe señotateñothpaꞌ señotaꞌthach, tharroꞌmar oneñeth ñeñth seꞌmoñeꞌteneꞌpaꞌ xhokma chopeñeꞌchen errapharen ateth ñerraꞌm maꞌyarr, xhach amhchaꞌnoxhetnena eꞌnyeseꞌ ñeñthchaꞌ aꞌchenkat.

⁹ Añchaꞌña sathpareꞌt oneñeth. Eꞌñe yameꞌñeñoth Cristo oꞌch womenk yephaꞌ yeyoxher. Oꞌch señoch atthekmach moeroxhtatwan allowen masheñneshaꞌ amaꞌt ñeñth oꞌ ameꞌñaꞌwerra ora errapharen añe patsro.

¹⁰ Amaꞌt moeroxhtatyesasetchaꞌ mameꞌ tharraña Yomporpaꞌ nanak amoeraña. Ñapaꞌ ñachña aꞌpoktatwerreꞌña sokop, atthoch womenk perrnas seyoxher. Allochñapaꞌ amach alla sepoeswere. Atethchaꞌ phatonay Yompor, ñeñthey moeneneꞌ oꞌch yekowentaprecha poꞌkowenño. Eꞌñe yameꞌñeñoth Cristo yekowentapreterach poꞌkowenña ñeñthchaꞌ ama awañañathterrtso.

¹¹ Yomporepaꞌchña ayeꞌchoxhtatwapoꞌ alloweney. Amhchaꞌnaꞌtpawepaꞌch poꞌpartsoña thayotheñ errponowañen. Ñeñthpaꞌ atthetepaꞌchña Nompore.

Arrpaꞌ all soꞌtnerranet poꞌcartoth

¹² Theꞌñapaꞌ ñeñthach eꞌñe notas necartoth. Theꞌpaꞌ oꞌ notwas oꞌch sameꞌñaꞌwera eꞌñe poꞌñoxhokmañen. Ñamha oꞌ notwas añpaꞌ ñeñthña eꞌñe poꞌñoxh Yompor poemoereña alloch atarr bensareꞌtampeney. Theꞌñapaꞌ oꞌch alla noterrserr, poꞌñoxhpaꞌ oꞌch seyemtoña Yompor poemoereña. Ñeñth masheñ Silvanopaꞌ ña nekellkaten atthoch neserrpareꞌtatas mameꞌ añ necartoth. Ateth nenteñ masheñ Silvano, ñapaꞌ nanak kowen ameꞌñenana Yompor.

¹³ Ñamha ñeñth ameꞌñetsa arr Babilonia moeneñet oꞌch womhchaꞌtaset ñamet añ necartoth. Ñetpaꞌxhoꞌña oꞌ akrerranet Yompor eꞌñe ateth ñerraꞌm sa. Ñamha neyocher Marcospaꞌxhoꞌña moeneñ oꞌch womhchaꞌtas ñamha necartoth.

¹⁴ Eꞌñe semorrentannaꞌteñoth oꞌch sewomhchaꞌtannaꞌta. Eꞌñe seyemteñoth Jesucristo, Yomporepaꞌchña sokshateneꞌña eꞌñe kowen seyoxhro. Theꞌpaꞌ ñeñthach notas, ñeñthpaꞌ atthetepaꞌchña Nompore. Allowa. Pedro