1 San Pedro 2 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Theꞌñapaꞌ añ poktetsa oꞌch seswanem allowen ñeñth ama kowenayeꞌ enteno Yompor. Attho ora allpon allo seshkannaꞌtenapaꞌ oꞌch sekexhpaꞌwer. Añ shekanneñets ñeñth atthoch entenes poꞌpsheñeñ eꞌñe kowenpaꞌ ñeñthpaꞌxhoꞌña añ palltetsa theꞌpaꞌ oꞌch sekexhpaꞌwer. Attho seyeꞌchapretannenapaꞌxhoꞌña oꞌch sepoeswer ñamha. Sasareꞌteñetspaꞌxhoꞌña oꞌch sepoeswer.

² Añña poktetsa atarrchaꞌ yeyeꞌcheññaña Yompor poꞌñoñ eꞌñe ateth pena emathollpaꞌ nanakchaꞌ yeꞌchenana poemomos. Yapaꞌxhoꞌña añ poktetsa oꞌch yeyeꞌchya ateth ñerraꞌm ñeñth yemomos yepen, tharraña ñeñthpaꞌ ñeñthara Yompor poꞌñoñ. Yompor poꞌñoñpaꞌ nanak kowenareꞌ alloch yokshaten yekamkëñ, atthothchaꞌ alloꞌna yesen eñotnomoeꞌ ñeñth poktetsa Yomporekop atthochña aꞌkeshphataretheychaꞌ.

³ Sapaꞌ oꞌ señotwerrñañ Yompor poemoereña attho ñapaꞌ nanak moerensa. Ñeñthoꞌmarña añ poktetsa sapaꞌxhoꞌña oꞌch seyeꞌchoña poꞌñoñ.

Attho Cristo atmaꞌntatarethta mapoeꞌ; elloña ñapaꞌ nanak sherben alloch eꞌñe yokrrerra

⁴ Añ poktetsa oꞌch separrokmaterr epas Cristo. Cristo ñeñth atarr sherbets ateth ñerraꞌm mapoeꞌ ñeñth nenet kellpach paꞌrrphoth allo orratenet pokoll ñeñth nanak echarr. Tharraña mapoeꞌ amaꞌt nanak sherbenpaꞌ ama añeyaye alloch eꞌñe yokrra. Añña Cristo attho sherbenpaꞌ allochña eꞌñe yokrra poꞌñoxh. Amaꞌt acheñeneshaꞌ amaꞌt ama kowenayeꞌ enteñeto Cristopaꞌ Pomporñapaꞌ eꞌñe pokteꞌ enteñ. Pomporñapaꞌ ña akreꞌ ñeñthchaꞌ nanak sherbhats ñokop ateth ñerraꞌm mapoeꞌ ñeñth nanak kowen allochña thomatenan paꞌpakëll.

⁵ Yomporpaꞌ paꞌpakëll penan allowen ñeñth ameꞌñenaya ña. Yapaꞌxhoꞌña atthey ñerraꞌmrratheꞌ mapoeꞌ alloch thomatenan paꞌpakëll. Tharraña yapaꞌ attheyeñ ñerraꞌmrratheꞌ mapoeꞌpaꞌ tharraña yapaꞌ ñeñthey oꞌrrerrñathoth yokrrena. Yapaꞌxhoꞌña añ poktetsa oꞌch yatthekmatwerr ñerraꞌmrratheꞌ Parets paꞌpakëll. Allñapaꞌ yesherberrchaꞌ Partsokop. Yekamkëñothpaꞌ oꞌch yepomwerra eꞌñe yeyoxhrowen yepomoerra atthoch Paretspaꞌ koshena. Yameꞌñeñoth Jesucristopaꞌ oꞌch yesherber errothenchaꞌ moenateney Parets.

⁶ Tharroꞌmar ateth oteney Yompor poꞌñoñ ñeñth anwareth awathotheñ, ñeñthpaꞌ ateth oten Yompor Cristokop: All anetso Sión ñeñthara Jerusaléñ oꞌch nemñanet poesheñarr ñeñth atarr sherbets ñeñth ateth ñerraꞌmrratheꞌ mapoeꞌ ñeñth akrareth ñeñth nanak sherbets ñeñth alloch nathomat nepakëll. Ñerraꞌm eseshaꞌ ameꞌñenaya ñapaꞌ, ñetñapaꞌ amach alla eꞌnerreteꞌthe poꞌpsheñeñ.

⁷ Ñeñthey ameꞌñenaya Cristopaꞌ eꞌñech yoksheñeshokmañen yenteñ. Añña ñeñth athpareꞌteneꞌ Yomporpaꞌ atethchaꞌ enteñet Cristo ñerraꞌmrratheꞌ mapoeꞌ ñeñth waporeꞌten ñeñth thomateneꞌ pokoll tharroꞌmar ateth enteñet Cristo ñerraꞌmrratheꞌ ama es sherbeno. Ñeñthoꞌmarña Yompor poꞌñoñpaꞌ ateth oterryerr: Añ mapoeꞌ ñeñth waporeꞌten ñeñth thomateneꞌ pokoll, ñeñthña mapoeꞌpaꞌ Yompor neneꞌ ñeñthchaꞌ nanak sherbets.

⁸ Añ ñeñthara Cristo ñeñth tomaꞌntenaya Mapoeꞌ allchaꞌ epothoꞌtena ñeñth ama ameꞌñetso ñeñthchaꞌña aꞌshoratawet chenkëñtso. Añ epothoꞌteñetspaꞌ añ tomaꞌntena attho athpareꞌteññañet Cristo poꞌñoñ. Ñeñthoꞌmarña ateth anareth, ñerraꞌm ama yameꞌñyopaꞌ eꞌñech yechenkaꞌwerra.

Ya awathpaꞌ ama esonaꞌtareyayye, theꞌñapaꞌ eꞌñe Yomporenaꞌtarey

⁹ Tharraña sapaꞌ ama añeyayso ñeñth athpareꞌteneꞌ Yompor. Ya ñeñthey ameꞌñenaya Yomporpaꞌ atethchaꞌ enteney ñeñthey akrarethterrtsa ñokop. Ñamha atethchaꞌ enteney ñeñtheychaꞌ sherberrets Partsokop, ñeñtheychaꞌ anarethterrtsa ñokop. Ñamha eꞌñech Yomporenaꞌtar enteney. Ñeñthoꞌmarña yokoppaꞌ añ poktetsa oꞌch yorrtatyesoñ poꞌkowenña. Oꞌch yeserrpareꞌtoñ attho ñapaꞌ cheterrey chekmetoth all sosyaꞌtsañoth, theꞌñapaꞌ oꞌ xhapaterrey eꞌñe ña poꞌpoetarenño all eꞌñe kowentena ña.

¹⁰ Awathpaꞌ ama esonaꞌtareyayye, theꞌñapaꞌ Yomporenaꞌtarey. Awathpaꞌ ama amoeraretheyayye, theꞌñapaꞌ oꞌ yaꞌmoerarethterra.

Attho kowen es yepen atthochña eꞌñe kowen yesherbeñ Yompor

¹¹ Oꞌch, masheñneshachaꞌ ñamha noxhaneshachaꞌ, eꞌñe nemorrenteñothes oꞌch notas: Sapaꞌ amaꞌt seyxhenañ añe patsro ñeñthpaꞌ ama saꞌnetsreyaye. Ñeñthoꞌmarña añ poktetsa oꞌch saꞌypoꞌñampes ñeñth moenatseꞌtyeseꞌth sechets. Ateth moenaꞌyen yechetspaꞌ ñeñthña kellareneꞌña yekamkëñ; moeneñ oꞌch aꞌchenkatonay yekamkëñ.

¹² Ñeñth ama ameꞌñetso seshopaꞌ añ poktetsa oꞌch sorrtatoñ ñeñth ateth eꞌñe kowenareꞌ es sepen. Allochñapaꞌ ñerraꞌm moeneñet oꞌch sasareꞌtasetpaꞌ oꞌch entonaset attho eꞌñe kowenareꞌ es sepen. Allochñapaꞌ ñerraꞌm esempo werra Cristo atthoch eñotatwerrey ñeñth ateth yephaꞌyena, ñetpaꞌxhoꞌña oꞌch ayeꞌchoxhtaterrñañet Yompor.

¹³ Theꞌpaꞌ oꞌch notas ñamha, allpon ñoñets ñeñth nen amhchaꞌtareth añ patsropaꞌ añ poktetsa oꞌch sameꞌñya. Yameꞌñeñoth Yepartseshar Cristopaꞌ añ palltetsa oꞌch yameꞌñera ñamha allpon ñoñets ñeñth nen ñeñth atarr amhchaꞌtarethtetsa arr patsro.

¹⁴ Oꞌch sameꞌñera ñamha ñeñth moeñen amhchaꞌtareth ñeñthchaꞌ aꞌkoñchatweneꞌ allowen ñeñth ama pokteyeꞌ es petso, ñamha ñeñthara ñeñthchaꞌ koshapreteneꞌ allowen ñeñth eꞌñe kowenareꞌ es pets.

¹⁵ Tharroꞌmar ateth moenen Yompor: xhokmach yorrtaten ateth eꞌñe kowenareꞌ es yepen. Ñatoꞌ yorrtateñoth eꞌñe kowenpaꞌ oꞌch kexhpaꞌwerret attho eñosatseꞌtyenet. Ñetpaꞌ pathpareꞌteñothet eñosatseꞌtyenet tharroꞌmar ama es eñoteneto. Ñatoꞌ yorrtateñoth eꞌñe kowenpaꞌ oꞌch yekexhpatwerranet attho eñosatseꞌtyenet.

¹⁶ Ñamha eꞌñech sameꞌña kowen amaꞌt Yompor poꞌñoñpaꞌ ama amhchaꞌnoxhenayeꞌ senteñe sokop. Tharraña amaꞌt ama amhchaꞌnoxhteno poꞌñoñ yokoppaꞌ amach alloꞌna yephaꞌyesneno ñeñth sosyaꞌtsañ. Añchaꞌña oꞌch ateth yameꞌña attho poeyochreshaꞌ perrey Yompor.

¹⁷ Añ poktetsa oꞌch semhchaꞌnaꞌch allowen acheñ. Oꞌch semorrentannaꞌta allowenes ñeñthes ameꞌñetsa. Oꞌch semhchaꞌnaꞌch ñamha Yompor. Oꞌch sameꞌñya ñamha ñeñth amhchaꞌtarethetyetsa arr patsro.

Añ poktetsa oꞌch yemoeroxhtaprecha Cristo

¹⁸ Ñeñthes atarwasatarethespaꞌ oꞌch notas, añ poktetsa sokop. Semhchaꞌnaꞌteñothpaꞌ oꞌch sameꞌñya samoꞌmteꞌ. Oꞌch sameꞌñya samoꞌmteꞌ ñeñth amoeraña. Allothpaꞌ oꞌch sameꞌñya ñamha ñeñth amaꞌt ama amoeraño.

¹⁹ Ñamha amaꞌt poꞌpsheñeñ moeroxhtateney amaꞌt allempo yepen ñeñth kowenareꞌ, eꞌñe yameꞌñeñoth Yomporpaꞌ amach yaꞌtsrreꞌmatsto, ñeñthpaꞌ eꞌñech pokteꞌ enteney Yompor.

²⁰ Ñerraꞌm esempo xho erroth yepeñ poꞌpsheñeñ ñerraꞌm koñchatwerrey, ñeñthpaꞌ eꞌñe pokteꞌ yekoñchepaꞌ. Amaꞌt ama yaꞌtsrreꞌmo allempo, tharraña amach kowenayeꞌ entenye Yompor, tharroꞌmar ñeñthpaꞌ xhokma moeneñ oꞌch yekoñcha. Tharraña ñerraꞌm esempo amaꞌt yepena ñeñth kowenareꞌ ñatoꞌ amaꞌt moeroxhtatey poꞌpsheñeñpaꞌ ñerraꞌm ama yaꞌtsrreꞌmopaꞌ ñeñthpaꞌ eꞌñech pokteꞌ enteney Yompor.

²¹ Ñeñthoꞌmarña theꞌpaꞌ yapaꞌ oꞌ waꞌñerrey Cristo atthoch yameꞌñaꞌwera, allochñapaꞌ oꞌch yemoeroxhtaprecha ña. Ñapaꞌ ña ñanom moeroxhtatsa, tharraña ñapaꞌ yexhatnerrey atthoch añ poktetsa oꞌch yemoeroxhtapretera ña.

²² Ñapaꞌ ama eñalletataneꞌthe poꞌchñar amaꞌt koñeꞌtha. Ñapaꞌ ama shekaꞌyeꞌthe amaꞌt parrocha.

²³ Amaꞌt allempo sasareꞌcheteꞌthpaꞌ ñapaꞌ amach ellopaꞌ sasareꞌterraneto ñamha. Amaꞌt allempo moeroxhtacheteꞌthpaꞌ ñapaꞌ amach ellopaꞌ oterraneto oꞌch nemoeroxhtaterres samha. Ñapaꞌ aña eꞌñe yemteꞌth Pompor, tharroꞌmar eñoteñ Pomporpaꞌ aꞌpoktaterrñañchaꞌ, tharroꞌmar ñapaꞌ ña eꞌñe pokteꞌ es pets.

²⁴ Ñapaꞌ ña yekoñchaterr eꞌñe ya yoꞌchñaroth allempo moeroxhta all korsocho. Allempoña rroma eꞌñe ña poꞌchtsothpaꞌ oꞌ awanmamperrey yoꞌchñar. Theꞌña yokoppaꞌ añ poktetsa oꞌch yaꞌypoꞌñaꞌwerr ora yoꞌchñar oꞌch yeperra ñeñth ateth poktetsa Partsokop. Attho atarr atserrpharethterra awath ñeñthpaꞌ atthoña aꞌkeshphaterrey ya.

²⁵ “Yapaꞌ awathpaꞌ atthey ñerraꞌm carnero. Yaꞌypoꞌñaꞌwyeꞌth ñeñth yekwampeneꞌ.” Tharraña theꞌñapaꞌ oꞌ alla yokthapeꞌcherr eꞌñe kowen, oꞌ yeyemtera Cristo ñeñth yekwampeneꞌ, ñeñthara ñeñth Pamoꞌmteꞌ pen ñamha yekamkëñ.