1 San Juan 5 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Eꞌñe yeyemteñoth Cristo xhokmach pomnaren yepen allowen ñeñth ama pokteyeꞌ enteno Yompor arr patsro

¹ Alloweney erraꞌtseneychaꞌ ameꞌñerraya Jesúspaꞌ ña Cristotats ñeñtheyña yapaꞌ oꞌ eꞌñe poechemer perrey Yompor. Ñewa, yeñoteñ arr patsro ñerraꞌm yemorrenteña poesheñarr acheñ ñeñth achemereshath, poechemereshaꞌnaña eꞌñe yemorrentwena.

² Ñeñthoꞌmarña yeñoteñ ñamha ñerraꞌm esempo yemorrenteña Yompor ñamha yameꞌñerrñaña poꞌñoñ ateth oteney, añeꞌnaña eꞌñe yemorrentwena ñeñth poechemereshaꞌ pen Yompor.

³ Attho yemorrenteña Yompor xhoch yameꞌñerrñaña poꞌñoñ ñeñth ateth oteney. Oꞌch eꞌñe yepena ñeñth ateth oteney, ñeñthpaꞌ ama thorrapawoyaye.

⁴ Tharroꞌmar alloweney ñeñthey poechemer pen Yompor, yañapaꞌ eꞌñe yeyemteñoth Jesús xhokma pomnaren yepen allowen ñeñth ama pokteyeꞌ entyeno Yompor arr patsro.

⁵ Allowen ñeñth ameꞌñenaya Jesús ñapaꞌ Yomporoꞌ Poechemer, ñetña eꞌñe ñapthet pomnaren penetña allowen ñeñth ama pokteyeꞌ entyeno Yompor arr patsro.

Allpon ñeñth yeñotaterreꞌ Jesucristopaꞌ eꞌñe poꞌñoxh Yomporeshoth wapa

⁶ Ñeñtha Jesucristo allempo wapa arr patsro eñall ñeñth yeñotaterreꞌña ñapaꞌ eꞌñe poꞌñoxh Yomporeshoth wapa. Ñeñth ñanompaꞌ allempo attho apatarethta Yomporekop oño. Tharraña ama eꞌñe ñaptha oña yeñotataye ñapaꞌ eꞌñe poꞌñoxh Yompor Poechemer. Poꞌrrasoꞌnaña yeñotateꞌña allempo akorsoꞌtamphsarethterra; ñapaꞌ eꞌñe poꞌñoxh Yompor Poechemer. Ñamha Parets Poekamkëñ ñeñthpaꞌxhoꞌña ña yeñotaterreꞌña Jesúspaꞌ eꞌñe poꞌñoxh Yompor Poechemer tharroꞌmar Parets Poekamkëñpaꞌ errothen es eñotateney ñeñthpaꞌ eꞌñe poꞌñoxh ateth.

⁷ Ñamha eñall maꞌpa ñeñth poeꞌntañoꞌtsen ñeñthña yeñotateneꞌña ya. Ñeñthpaꞌ Yompor Parets ñamha poꞌñoñ ñamha Poekamkëñ. Ñetpaꞌ amaꞌt maꞌpoꞌmaret eꞌñe pathrra ateth petsa.

⁸ Ñamha arr patsro eñall maꞌpa ñeñthña yeñotateneꞌ Jesúspaꞌ ña poꞌñoxh Yompor Poechemer. Ñeñthpaꞌ Parets Poekamkëñ, allothpaꞌ oñ allempo apatarethta Yomporekop allothpaꞌ ñamha poꞌrras attho akorsoꞌtamphsarethterra. Ñetpaꞌ amaꞌt maꞌpoꞌmaret eñotatenet, eꞌñe pathrra eñotatyenet ñeñth Jesús ñapaꞌ eꞌñe poꞌñoxh Yomporo Poechemer.

⁹ Ñewa, arr patsro xhokma eꞌñe pokteꞌ yenteñ ñeñth ateth eñotateney acheñ tharroꞌmar ñeñthpaꞌ xhokma sherbeney. Ñamha ñeñth ateth eñotateney Yompor elloña ñeñthpaꞌ atarr nanak sherbeney. Tharroꞌmar ñeñthpaꞌ eꞌñe ña Poechemerekop eñotateney Jesúspaꞌ Yomporo Poechemer.

¹⁰ Ñerraꞌm eseshaꞌch ameꞌñerraya Yompor Poechemer, ñeñthñapaꞌ echerranchaꞌ eꞌñe ña poeyoxhro ñeñthchaꞌ eñotaterreꞌ eꞌñe pokteꞌ oꞌch eꞌñe yemterrana Jesucristo ñeñth eꞌñe poꞌñoxh Yompor Poechemer. Ñeñthña ama ameꞌñenayo Yomporpaꞌ xha ottatateñ ñerraꞌmrratheꞌ ñapaꞌ atarr ashkañ tharroꞌmar ñeñth acheñerpaꞌ ama ameꞌñenano Yompor ñeñth ateth eñotateney Poechemerekop.

¹¹ Yomporpaꞌ ateth eñotateney attho yapaꞌ apoey Poechemer, eꞌñe ñeshothña yapaꞌ korretsayach yoksheñeshokmañen thayotheñ eꞌñe errponañowen.

¹² Ñeñthña agërreꞌ Yompor Poechemer añeꞌnaña oꞌ agërret atthochña ñetpaꞌ korretsetach thayotheñ eꞌñe errponañowen. Añña ñeñth ama agërraye Yompor Poechemer, ñetñapaꞌ amach eseshaꞌ agërraye alloch korrerret.

All paꞌnamen kothapeꞌchatnerranet eꞌñe allowanen allempo soꞌtnerranet poꞌcartoth

¹³ Ñeñth allpon oꞌ nekellkonas sa ñeñthes ameꞌñenaya Yompor Poechemer, sapaꞌ ñeñthchaꞌña señotaterreꞌ poꞌñoxh sapaꞌ korretsasach soksheñeshokmañen eꞌñe thayotheñ errponañowen.

¹⁴ Yapaꞌ eꞌñe yeyemteñoth Yompor ñeñthoꞌmarña yeñoteñ es yenamh ñeñth pokteꞌ enten ña, yapaꞌ xhokmach eꞌmhñoteney.

¹⁵ Ñamha attho yeñoteñ ñapaꞌ xhokma eꞌmhñoteney ñerraꞌm es yenamh ñeñthoꞌmarña yeñoteñ eꞌñe allorokma oꞌ yoꞌpatatarethta ñerraꞌm eschaꞌ yenamoeñ.

¹⁶ Ñerraꞌm eseshaschaꞌ eñoteꞌ samoꞌts ñeñth ateth peneꞌ ñeñth ama pokteyeꞌ enteno Yompor, ñeñthña poꞌchñarpaꞌ ñerraꞌm ama añekpayaye alloch rromoerr atthoch chenkërra eꞌñe poktakma, sañapaꞌ añchaꞌ senamoñ Yompor atthoch ñach aꞌkrraterreꞌ eꞌñe poekamkëñoth. Yomporpaꞌ oꞌch aꞌkrrater ñerraꞌm poꞌchñarpaꞌ ama añekpayaye alloch rromoerr atthoch chenkërra eꞌñe poktakma. Poꞌñoxhpaꞌ eñall yoꞌchñar alloch yerromoerr atthoch yechenkërra eꞌñe poktakma. Ñeñthoꞌmarña napaꞌ ama añekpayeꞌ notenso sapaꞌ xhokmach semaꞌyochampeña ñeñthchaꞌ chenkërrtsa eꞌñe ña pathpareꞌteñoth.

¹⁷ Ñewa, yeñoteñ allowen ñeñth ama pokteyeꞌ enteno Yompor ñeñthpaꞌ ochñaꞌteñets enteñ Yompor. Tharraña eñall ñamha ochñarets ñeñthpaꞌ ama añeyaye ñeñth alloch yerromoerr atthoch yechenkërra eꞌñe poktakma.

¹⁸ Yeñoteñ alloweney ñeñthey poꞌñoxh eñalleterrtsa Yomporothpaꞌ amach alloꞌna yephaꞌneno ñeñth ochñarets enten Yompor. Tharroꞌmar Yompor Poechemerpaꞌ xhokma kowampeney ñeñthoꞌmarña oneñethpaꞌ amaꞌt eꞌñe mameshapaꞌ amach alla erroth perryeꞌthe.

¹⁹ Theꞌña yapaꞌ yeñoteñ oꞌ yeyomporenaꞌtarterra ya. Poꞌpotantañña acheñeneshaꞌ arr patsro ñeñth ama ameꞌñetso, ñetñapaꞌ aña yochreshaꞌtenawet oneñeth.

²⁰ Yañapaꞌ yeñoteñ ñeñth Poechemer pen Yomporpaꞌ ñañapaꞌ oꞌ wapa. Ñaña yexhapaterreꞌña yeyoxhro atthochña yapaꞌ oꞌch yeñoter Yompor ñeñth eꞌñe poꞌñoxh Parets. Ñeñthoꞌmarña yeñoteñ oꞌ yeparrokmaterr epay ñeñth eꞌñe poꞌñoxh Yompor Poechemer ñeñthpaꞌ Jesucristo. Atthoña yapaꞌ oꞌ eꞌñe yeñoter Yompor ñeñth eꞌñe poꞌñoxh Parets, ñeñthña yapaꞌ allochña eꞌñe korretsayach yoksheñeshokmañen thayotheñ eꞌñe errponañowen.

²¹ Theꞌña, nechemerneshachaꞌ, sapaꞌ eꞌñech señotnoma, ñatoꞌtña seyomporer sepeñaꞌña poꞌpoñ ñeñth ama poꞌñoxh Partsoyaye. Theꞌpaꞌ ñeñthach notas, ñeñthpaꞌ atthetepaꞌch Nompore. Allowa. Juan