1 San Juan 4 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Atthoch yeñoch erraꞌtsentheꞌña ñeñth eꞌñe poꞌñoxh eñoraten Yompor Poekamkëñ; atthoch yeñoch ñamha ñeñth epatareꞌteneꞌ Yompor pokthaphña

¹ Ñamha theꞌpaꞌ oꞌch, masheñneshachaꞌ ñamha noxhaneshachaꞌ, noterrserr: sapaꞌ ñatoꞌt sameꞌñenaꞌña allowen paꞌnamen kothaphñats tharroꞌmar ñetpaꞌ amaꞌt otenetañ Partsoꞌ Poekamkëñ eñoratenawet, sapaꞌ xhochña señotyesña ñeñth paꞌnamen kothaphñatser atthochña sapaꞌ eꞌñe señoch erraꞌtsentheꞌña ñeñth eꞌñe poꞌñoxh wetsa Yomporeshoth. Tharroꞌmar shonteñ ñeñth otetseñ ñetpaꞌ Yomporoꞌ poꞌñoñ aꞌmhtenet tharraña ñeñthpaꞌ ama Yomporeyaye poꞌñoñ. Ñeñthpaꞌ errapharen oꞌ orretyesa añ patsro.

² Arr sapaꞌ alloch señoch erraꞌtsentheꞌña eꞌñe poꞌñoxh eñoratenña Parets Poekamkëñ: Erraꞌtsenchaꞌ otats Jesucristopaꞌ ña poꞌñoxh partsoth acheñetos arr patsro, ñeñthña kothaphñatserpaꞌ eꞌñe poꞌñoxh Parets Poekamkëñ eñorateneꞌ.

³ Erraꞌtsenchaꞌ ñeñth amach attheyeꞌ otetso Jesúsokop, ñeñthña kothaphñatserpaꞌ ama poꞌñoxh Parets Poekamkëñ eñoratenaweto. Ñeñthpaꞌ ñeñthña poꞌñoxh eꞌmoñeꞌteneꞌña Cristo ñeñth ateth seꞌmareꞌtyeseꞌth oꞌch wapa. Theꞌñapaꞌ oꞌ orrtonaya añ patsro.

⁴ Saña poꞌñoxh nechemerneshachaꞌ eꞌñe poꞌñoxh Yomporenaꞌtares tharroꞌmar sapaꞌ ama aña seꞌmhñoteno attho paꞌnamenoth shekareꞌtyensetañ. Yompor Poekamkëñ ñeñth sechorrenayapaꞌ ñeñthña sapaꞌ atarr awamenkathtatenes. Ñeñthña chorrenaya añ patsoꞌmarneshaꞌpaꞌ ñapaꞌ ama eꞌñeyeꞌ awamenkathtatenaneto.

⁵ Ñeñthña shekareꞌtyets eꞌñe ñet pokthaphñothet poꞌñoxhpaꞌ patsoꞌmarnesheta. Ñeñthoꞌmarña ñerraꞌm eñosetpaꞌ añach serrpareꞌtyenet ñeñth patsoꞌmarekpa. Ñeñthoꞌmarña ñetpaꞌ patsoꞌmarneshach eꞌmhñotenawet.

⁶ Yaña poꞌñoxhpaꞌ Yomporenaꞌtarey. Ñeñth poꞌñoxh eñoteneꞌ Yompor, ñetñapaꞌ eꞌñech kowen eꞌmhñotenyet ya. Ñeñthña ama Yomporenaꞌtareyaye, ñetñapaꞌ amach eꞌmhñotenyeto. Yapaꞌ alloña yeñotenña kothaphñats ñeñth poꞌñoxh wetsa Yomporeshoth atthoña yeñotenña ñamha kothaphñats ñeñth shekëñets.

Attho Yomporpaꞌ ña atarr amorrentañtetsa

⁷ Masheñneshachaꞌ ñamha noxhaneshachaꞌ amoerannaꞌtpawepaꞌch alloweney tharroꞌmar ñeñthpaꞌ Yomporeshoth wena. Allowen amorrentñapaꞌ ñetpaꞌ oꞌ eñalleterret Yomporoth, poꞌñoxh oꞌ eñoteret ñeñth ateth pena Yompor.

⁸ Ñeñthña ama amorrentñopaꞌ ñokpoetpaꞌ ama eñoteñetoña ateth penaña Yompor, tharroꞌmar Yompor ñapaꞌ ña atarr amorrentañtetsa.

⁹ Añpaꞌ Yompor orrtateꞌ yokop allochñapaꞌ yapaꞌ oꞌch yeñoter Yomporpaꞌ atarr morrentenya. Atthoña moeñan Poechemer arr patsro ñeñth poꞌpathrror pen atthochña yapaꞌ korretsayach eꞌñe ñeshoth.

¹⁰ Arrpaꞌ all orrtatonay Yompor ñeñth eꞌñe poꞌñoxh morrenteñets: Allempo ya amaꞌt mameshapaꞌ ama yemorrentpeño Yompor, ñañapaꞌ allempotheñ atarr morrentenya ya. Ñeñthoꞌmarña ñapaꞌ moeñonay Poechemer ñeñthchaꞌ yetsaꞌterroya yoꞌchñar.

¹¹ Ñeñthoꞌmar masheñneshachaꞌ attho Yomporpaꞌ atarr nanak morrentenya, yapaꞌxhoꞌña eꞌñepaꞌchña yemorrentannaꞌtwena alloweney.

¹² Yomporpaꞌ ama eseshaꞌ poentare. Tharraña ñerraꞌm eꞌñe yemorrentannena alloweney, poꞌñoxhpaꞌ eꞌñe yeparrokmaten epay Yompor. Ña poemorrenteñapaꞌ eꞌñech chorrenya poktakma.

¹³ Ña attho apoerrey eꞌñe ña Poekamkëñ ñeñthña yeñotateneꞌña yapaꞌ eꞌñe yeparrokmaten epay Yompor.

¹⁴ Ñamha yapaꞌ eꞌñe yentwoñeꞌth Yompor Poechemer ñeñthoꞌmarña ya theꞌpaꞌ oꞌ yaꞌpothonas samha attho Yompor poꞌñoxhpaꞌ moeñonay Poechemer ñeñthchaꞌ yaꞌkeshphaterreꞌ ya ñeñthey yexhaꞌyetsa añ patsro.

¹⁵ Ñeñth ameꞌñenaya Jesús ñapaꞌ poꞌñoxh eꞌñe Yomporo Poechemer, ñetñapaꞌ eꞌñe parrokmatenet epoet Yompor.

¹⁶ Atthoña ya theꞌpaꞌ eꞌñe yeñoteñ ñamha yameꞌñeña attho Yomporpaꞌ atarr morrentenya. Yompor ñapaꞌ ña atarr amorrentañtetsa. Ñerraꞌm eꞌñe poꞌñoxh yemorrentannena poꞌñoxhpaꞌ oꞌ yeparrokmaterr epay Yompor.

¹⁷ Atthoña yapaꞌ eꞌñech kowen yemorrenteña Yompor eꞌñe poktakma, allochñapaꞌ yapaꞌ amach yemhchaꞌnañothayaya yeyemtero Yompor ñerraꞌm esempowañen eñotatyeswerrey eꞌñe errothenchaꞌ entyeswerrey. Tharroꞌmar eꞌñe ateth pena Jesucristo, yapaꞌxhoꞌña eꞌñech ateth yepena yamha arr patsro.

¹⁸ Ñerraꞌm poꞌñoxh yemorrenteña Yomporpaꞌ amachña xha yemhchaꞌteñe. Tharroꞌmar attho eꞌñe poktakma kowen yemorrentannena epay Yompor, ñeñthña poꞌñoxh yewaporeꞌtampeneꞌña yemhchañ. Ñerraꞌm esempo xha es yemhchaꞌtenpaꞌ atthoña eꞌñe yañeña koñchatetsa. Ñamha ñerraꞌm orameñ yemhchaꞌten amakaꞌye eꞌñe yeyxhenaꞌña atthoch eꞌñe kowen yemorrentannena eꞌñe poktakma.

¹⁹ Yomporpaꞌ oꞌ eꞌñe morrenterrya yanom, ñeñthoꞌmarña yapaꞌxhoꞌña theꞌpaꞌ oꞌch eꞌñe yemorrentera yamha.

²⁰ Ñerraꞌm eseshaꞌ otets, ñapaꞌxhoꞌña eꞌñoꞌ kowen morrentenana Yompor, tharraña ñerraꞌm xha eꞌmoñeꞌtyenan pamoꞌts, ñeñthña ateth otetspaꞌ atthakaꞌye shekën. Attho ama morrentenano pamoꞌts amaꞌt ñeñthpaꞌ eꞌñe enteñ, amach errothenoth morrentanoña ñamha Yomporñaꞌ tharroꞌmar ñeñthpaꞌ amakaꞌye xhoyeꞌ enteñe.

²¹ Yompor poꞌñoñ ñeñth yoteneꞌ: Ñerraꞌm poꞌñoxh yemorrenteña Yompor, yamoꞌtspaꞌxhoꞌña eꞌñepaꞌchña kowen yemorrentenanet.