1 Corintios 9 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho eꞌñe pokteñ ñeñth thorretsa Yomporekoppaꞌ oꞌch es yesherbeñ

¹ Theꞌpaꞌ oꞌch neñotatas poꞌpoñ ñeñth ateth nepena na. Napaꞌ eꞌñe pokteñ oꞌch nephaꞌyes eꞌñe erraꞌtsenchaꞌ nemnen na tharroꞌmar sapaꞌ señotenen attho napaꞌ ama eñalle ñeñth neyechareꞌtenaya na, tharroꞌmar napaꞌ allsensarethen Yomporeshoth. Ñamha señotenen napaꞌ oꞌ orrterrnana Yepartseshar Jesús, ñamha señotenen ña awamenkath nepeneꞌ tharroꞌmar eꞌñe na nethorreñoth ñokop atthoña sameꞌñerra samha.

² Ñewa, amaꞌt poꞌpotantañpaꞌ otyenetañ napaꞌ amoꞌ allsensaretheyayno tharraña sapaꞌ señotenen poꞌñoxh napaꞌ allsensarethenkaꞌye tharroꞌmar napaꞌ ñeñthen sameꞌñaterraya samha. Attho sapaꞌ eꞌñe kowen sameꞌñera Yompor, atthoña señotateñña allowen poꞌñoxh napaꞌ Yomporeshoth allsensarethen. Ñeñthoꞌmarña eꞌñe pokteñ oꞌch nephaꞌyes eꞌñe erraꞌtsenchaꞌ nemnen na ñeñthen allsensarethen, tharraña ñeñthpaꞌ ama attheyeꞌ nepeno tharroꞌmar napaꞌ ama nemno eꞌñe ateth nepeñoth oꞌch nepatareꞌt kowen ñoñets alloch Cristopaꞌ aꞌkeshphaterres.

³ Ñeñthoꞌmarña theꞌpaꞌ oꞌch notas ñeñthchaꞌ ateth nanapanet ñerraꞌm esempo aꞌphthoꞌtareꞌtnet, poktoꞌtheꞌ ñeñth ateth nephaꞌyena.

⁴ Poꞌñoxhpaꞌ eꞌñe pokteñ nokop oꞌch serratallmeꞌchennoñ allempo neserrpareꞌtatenes. Ñamha pokteñ sapaꞌ oꞌch sapnoñ ñeñthchaꞌ norryen.

⁵ Ñamha nokop eꞌñe pokteñ ñerraꞌm eñalleñ nethapor oꞌch nanemh ñeñth parro yameꞌñena all nechopeñeꞌchyen. Ateth pena poꞌpotantañ allsensarethneshaꞌ, ñamha ateth pena Yepartseshar paꞌmoꞌnasheñneshaꞌ, ñamha ñeñth ateth pena Pedro.

⁶ Ñamha sapaꞌ ñatoꞌ xhatheꞌ soten eꞌñe pokteꞌ eꞌñe epsheñoꞌmarey epan masheñ Bernabé yapthach yetarwasen atthoch yechen ñeñthchaꞌ yerren. Poꞌñoxhpaꞌ poꞌpotantañexhno ñeñth thorraꞌyetsa Yomporekoppaꞌ ñetñapaꞌ arratarethtenet eꞌñe attha.

⁷ Poꞌñoxhpaꞌ ñeñth ateth pena solltarneshaꞌpaꞌ ñetpaꞌ eꞌñe attha aparethtenet ñeñth palltenet, amach es tsaꞌteneto. Ñamha ateth pena ñeñth nareꞌteneꞌ narmets. Ñetpaꞌ eꞌñe poenareꞌteñothpaꞌ xhokmach tsomoeññañet poenaremh poeꞌmer. Ñamha ateth pena ñeñth poꞌtarwas peneꞌ oꞌch kowampenan carnero ñamha cabra. Ñetñapaꞌ xhokmach orreññañet poemomos.

⁸ Sapaꞌ xhatheꞌ sotenapañ ñeñth ateth notenes, ñeñthpaꞌ eꞌñetheꞌ nañeña nokthaphñoth ateth notyenes ñeñth ateth yokthapeꞌchyen ya alloweney ñeñthey arromñathey. Tharraña ñeñthpaꞌ amakaꞌye attheyaye tharroꞌmar ñeñthpaꞌ ñeñthara ñoñets ñeñth ateth anareth awathotheñ.

⁹ Tharroꞌmar Moisés poꞌñoñ ñeñth ateth anwareth awathotheñ, ñeñthpaꞌ ateth oten: “Ñerraꞌm esempo sathmamaꞌtateñ wakësh atthoch es serrokllomeꞌchach paꞌtkoth allempopaꞌ amach sempanmaꞌtatsche atthoch ñapaꞌxhoꞌ rranepaꞌña ñeñth serrokllomeꞌchateñ.” Ñewa, yapaꞌ yeñoteñ Yomporpaꞌ ama eꞌñe ñapthekpa wakshekop eñoseꞌthe.

¹⁰ Poꞌñoxhpaꞌ yokpaꞌnaña eñoseꞌth ñeñthey thorraꞌyetsa ñokop. Tharroꞌmar eꞌñe poemorrenteñothey yapaꞌ Yomporpaꞌ eꞌñe pokteꞌ enteñ arrataretheychaꞌ yamha all yethorraꞌyena ñokop. Oꞌch netmaꞌntacha ateth: Ñerraꞌm xho yetamoenpaꞌ xhokmach yeyemtena ñeñthchaꞌ yenareꞌt all, oꞌch choppaꞌ ñeñthchaꞌña yetsomoerr. Ñamha ñerraꞌm xho es yerrokllomeꞌchenpaꞌ xhokmach yeyemtena ñeñth yerrokllomeꞌchen, tharroꞌmar yapaꞌ yeñoteñ xhokmach apoerryet allpon.

¹¹ Ñewa, oꞌch alla netmaꞌntatererr poꞌpoñ. Allempo yeserrpareꞌtatenes Yompor poꞌñoñ ñeñthpaꞌ atthekma ñerraꞌm xho yenareꞌten narmets poeꞌllomer sesho. Ñeñth ateth nareꞌteñetspaꞌ sherben atthoch eꞌñe yokrra Yomporekop. Ñewa, ñerraꞌm yapaꞌ oꞌ yeñotatas ñeñth sherbets errponowañen yekamkëñekoppaꞌ amaꞌtña pokteꞌ senteñeña sapaꞌ oꞌch sapoenyeñ amaꞌt koñeꞌtha ñeñth yepalltena alloch yokrra añe patsro.

¹² Poꞌñoxhpaꞌ poꞌpotantañexhno ñeñth seserrpareꞌtateneꞌ, ñetpaꞌ enamoenset oꞌch sapanet ñeñth alloch korrenet. Ñewa, ñeñthpaꞌ eꞌñe pokteꞌ. Attho ñetpaꞌ es enamoensetpaꞌ elloña yokoppaꞌxhoꞌña eꞌñe pokteꞌ oꞌch es yenamas yamha. Tharraña amaꞌt eꞌñe pokteñ oꞌch es yenamaseñpaꞌ poꞌñoxhpaꞌ amaꞌt koñeꞌtha ama es yenamoenso. Xhokma yaꞌwanteñ ñeñth echarr yenten yokop. Amaꞌt eꞌñe pokteñ oꞌch es yenamoenespaꞌ tharraña amaña es yenamoenso tharroꞌmar ñerraꞌm ama pokteyeꞌ señchepaꞌ yeñoteñ amatheꞌ seꞌmhñoto Yompor poꞌñoñ ñeñth ateth yeserrpareꞌtatenes. Yapaꞌ ama yemno oꞌch yepatareꞌt kowen ñoñets alloch Cristopaꞌ aꞌkeshphaterres.

¹³ Elloña sapaꞌ señoteñ ñeñth thorretsa Parets paꞌpakllopaꞌ eꞌñe allara Parets paꞌpakllopaꞌ xhokmach entenet poerrar. Ñamha añ korneshaꞌ ñeñth moetseneꞌ wakësh amapaꞌ carnero Yomporekoppaꞌ ñetpaꞌxhoꞌña eꞌñe allothpaꞌ rrenet ñeñth amtsareth Yomporekop.

¹⁴ Atthekma ñamha Yepartsesharpaꞌ nan poꞌñoñ. Ñeñthpaꞌ ateth ot: Ñeñth serrpareꞌteneꞌ kowen ñoñets alloch sekeshphapaꞌ eꞌñe pokteꞌ poeserrpareꞌteñoth ñeñth eꞌmhñoteneꞌpaꞌ pokteꞌ oꞌch apoeñet ñeñth palltena alloch korra.

¹⁵ Ñewa, amaꞌt eꞌñe pokteñ oꞌch sapoennoñ ñeñth nepalltenapaꞌ tharraña napaꞌ amaꞌt awathapaꞌ ama es notaseꞌthe oꞌch es sapoen. Amaꞌt theꞌpaꞌ ama ñeñthekpayeꞌ nekellkënnaso ateth. Tharroꞌmar ama nemno oꞌch wañ attho neserrpareꞌtatenes eꞌñe attha. Eꞌñechña noksheñeshaꞌ neserrpareꞌtatenes eꞌñe attha. Ñerraꞌm oꞌch wañ attho neserrpareꞌtatenes eꞌñe atthapaꞌ añatheꞌ pokteꞌ nenten oꞌch nerroma. Tharroꞌmar napaꞌ ama nemno amaꞌt eseshapaꞌ oꞌch poerratamphsenña ñeñth allo eꞌñe nokshena.

¹⁶ Ñamha eꞌñe neserrpareꞌteñoth kowen ñoñets napaꞌ amatheꞌ errothenoth eꞌñe attha nommoꞌcho, tharroꞌmar napaꞌ eꞌñe ateth eyecharethen. Ñerraꞌm ama ateth nephopaꞌ napaꞌ nanaktheꞌ llekëñtsoꞌtsenen.

¹⁷ Ñerraꞌm eꞌñe na nemneññotha neserrpareꞌteneñpaꞌ ñewa, pokteñ oꞌch tsaꞌtenna Yompor atthoch koshaterren. Tharraña ñerraꞌm ateth otenen Yomporpaꞌ ñeñthpaꞌ ama nañeña nemneññotheyeꞌ neserrpareꞌteno. Poꞌñoxhpaꞌ allsensarethen ñeñthoꞌmarña neserrpareꞌtaterña acheñeneshaꞌ.

¹⁸ Ñeñth elloneth apoenen Yompor ñeñthchaꞌ atarr nokshateꞌ na, ñeñthpaꞌ atthoth neserrpareꞌtatenes kowen ñoñets eꞌñe attha. Amaꞌt eꞌñe pokteñ oꞌch setsaꞌtnapaꞌ tharraña napaꞌ ama nemnoña ateth.

¹⁹ Ñamha amaꞌt ama eñalle poesheñarr ñeñthchaꞌ neyechayapaꞌ poꞌñoxhpaꞌ añña nanak nethorratenaya allowen acheñeneshaꞌ tharroꞌmar na ateth moenets. Ñamha tharroꞌmar nethorrena ñokpoet atthoch nameꞌñacha shonteꞌ acheñeneshaꞌ.

²⁰ Ñamha allempo alloꞌtsenen parro epan namoꞌtseshaꞌ judioneshaꞌpaꞌ napaꞌ oꞌch nepena ateth yexhenet ñet. Allochñapaꞌ ñetpaꞌ oꞌch eꞌmhñoterrnet; eꞌñe poeꞌmhñoteñothetpaꞌ ñatoꞌrraña oꞌch nameꞌñatera namoꞌtseshaꞌ judioneshaꞌ. Ñerraꞌm esempo alloꞌtsenen parro epan ñeñth kotheneꞌ Moisés poꞌñoñ ñeñth ateth anarethpaꞌ napaꞌ amaꞌtchaꞌ ama noktheno ñeñth ateth kothapeꞌchenet ñetpaꞌ tharraña napaꞌ amach nachmhareꞌtaneto ñeñth ateth penet ñet, allochñapaꞌ ñatoꞌ atthothpaꞌ oꞌch nameꞌñatanet ñamet.

²¹ Ñamha ñerraꞌm allempo alloꞌtsenen parro epan ñeñth ama kothapeꞌchenaye ñoñets ñeñth ateth anareth Partsokop, napaꞌxhoꞌña oꞌch nepena ateth ñerraꞌmrratheꞌ ama noktheno ñoñets ñeñth ateth anareth Partsokop. Ñewa, poꞌñoxhpaꞌ noktheneñña ñeñth ñoñets ñeñth ateth anareth Partsokop tharroꞌmar añchaꞌña eꞌñe nokthen Cristo poꞌñoñ. Atethchaꞌ nepeñña ñeñth ama es kothapeꞌchetso Partsokop allochñapaꞌ atthothchaꞌ nameꞌñaterranet ñamet Cristo amaꞌt ñeñth ama es kothapeꞌcheno Partsokop amaꞌt mamesha.

²² Ñamha ñerraꞌm esempo alloꞌtsenen parro epan ñeñth ama womenk penaye poeyoxher Yomporekoppaꞌ napaꞌxhoꞌña oꞌch nepena ateth ñerraꞌmrratheꞌ ama womenkayaye namha neyoxher Yomporekop, allochñapaꞌ atthoch nokthapeꞌchach kowen ñeñth ama womenk penaye poeyoxher Yomporekop. Ñamha amaꞌt erraꞌtsena acheñ errothenxhoꞌ kothapeꞌchenpaꞌ napaꞌxhoꞌña allempo alloꞌtsenen parro epan atethchaꞌ nepena namha ateth pokteꞌ entenet ñet, allochñapaꞌ atthoch amaꞌt errothenettheꞌ atthochña naꞌkeshphaterranetchaꞌ amaꞌt patantaꞌttsa.

²³ Atethchaꞌ nepena atthoch nameꞌñatanet ñerraꞌm esempo neserrpareꞌtatanet kowen ñoñets attho Cristopaꞌ ñach yaꞌkeshphaterreꞌ. Atthoch napaꞌxhoꞌña eꞌñe nameꞌñeñoth Cristopaꞌ nokshapretanetchaꞌ ñerraꞌm ameꞌñeret ñamet Cristo.

²⁴ Theꞌpaꞌ oꞌch noterrserr poꞌpoñ, ñatoꞌ oꞌch netmaꞌntacha ateth. Ñewa, poꞌñoxh sapaꞌ señoteñ ñerraꞌm esempo oꞌch eñochet eseshaꞌtheꞌ nanak matetsapaꞌ shonteꞌch acheñ matatsa. Allowenetpaꞌ moeneñetchaꞌ oꞌch mesheꞌtwet poꞌpoñexhno acheñ atthoch ganet premio. Tharraña amaꞌtchaꞌ shonteꞌ matatsapaꞌ eñallachña poesheñarr ñeñthchaꞌ gananatwaya allowen ñeñth parro mataxhaꞌtet. Ñeñthoꞌmarña theꞌpaꞌ añ poktetsa oꞌch yethorrena yamha eꞌñe kowen Yomporekop atthoch yegana ñeñth oꞌpatatenya ña.

²⁵ Ñamha yeñoteñ allowen ñeñth poꞌtarwas peneꞌ joweñetspaꞌ ñetpaꞌ oꞌch phowanmoet ora ñeñth ateth poktetsa atthoch echet poꞌwamenk eshekchaꞌ ganet. Ñeñthoꞌmarña ñetpaꞌ oꞌch kexhpaꞌwet ñeñth ayoramphsañ yewamenk. Ñeñthpaꞌ añekop ateth penet atthoch ganet premio ateth ñerraꞌm kopa. Ñewa, ñeñth ateth penet ñet atthoch ganet kopa, amaꞌt ñeñth kopapaꞌ awañaña, ñeñthepñapaꞌ yapaꞌ oꞌch yethorra yamha Yomporekop atthoch yegana ñeñth oꞌpatatenya ñeñth ama awañaño.

²⁶ Ateth pena ñeñth matetsapaꞌ eꞌñech paxharr matena. Ñewa, napaꞌxhoꞌña eꞌñech pathrra nemaꞌyoxhra Yomporekop. Ateth ñamha ñerraꞌm esempo yexhotnaꞌtena, ñerraꞌm attha yaꞌmhtapechpaꞌ amach errothenoth yegano. Ñeñthepñapaꞌ napaꞌ amach attha naꞌmhtapechatsto ñeñth Yomporekop.

²⁷ Xhochña newnat nañeña nechets. Eꞌñe nach tarwasateꞌ nechets Yomporekop. Atethchaꞌ nepha tharroꞌmar amaꞌt na serrpareꞌtateꞌ poꞌpsheññexhnopaꞌ ñatoꞌrraña ellopaꞌ theꞌt alla awaporeꞌtarethen nañeña tharroꞌmar ama netsotoñe ñeñth moenen Yompor.