1 Corintios 8 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Arrpaꞌ all kothapeꞌchatan corintoꞌmarneshaꞌ añekop ñeñth amtsareth ayexhkatarethekop

¹ Theꞌpaꞌ oꞌch neserrpareꞌtatas poꞌpoñ ñeñth ateth saꞌphthoꞌtenen awaña, ñeñthpaꞌ ateth sotenen: Ñeñthey ameꞌñenaya Cristopaꞌ ñatoꞌ ¿poktoꞌtheꞌ oꞌch serraꞌ poꞌchets ñeñth moetsenet ayexhkatarethekop? Napaꞌ neñotenes poesheñaꞌttsospaꞌ sotyen sapaꞌ señotenoꞌ ñeñth kowentetsa Yomporekop. Ñewa, poꞌñoxh alloweneypaꞌ yeñoteñ ñeñth kowentetsa Yomporekop. Tharraña ñerraꞌm esempo yoten: “Napaꞌ eꞌñe neñotwen ñeñth kowentetsa Yomporekop”, ñerraꞌm eꞌñe yommoꞌcheñotha yotenpaꞌ ñeñthpaꞌ eꞌñech orrena ateth yoten. Yommoꞌcheñothpaꞌ amach xhoyeꞌ yeyenpanneno atthoch womenk yephaꞌ yeyoxher Yomporekop. Yemorrentannaꞌteñothpaꞌ xhochña yeyenpannaꞌta.

² Tharroꞌmar ñerraꞌm esempopaꞌ xhach yotenapañ oꞌtheꞌ eꞌñe es yeñotwa poktakma, tharraña yeñoteñ poꞌñoxhpaꞌ xhokma yepalltena oꞌch eꞌñe yeñotwa poktakma ñeñth kowentetsa.

³ Tharraña eꞌñe yemorrenteñoth Yomporpaꞌ ñapaꞌ eñoteney yapaꞌxhoꞌña yeñoteñ ñeñth kowentetsa ñokop.

⁴ Theꞌpaꞌ oꞌ notwas ateth theꞌñapaꞌ oꞌch neserrpareꞌtatas ñeñth kowentetsa Yomporekop. Ñeñthey ameꞌñenaya Cristopaꞌ pokteꞌtheꞌ oꞌch yerren poꞌchets ñeñth amtsareth ayexhkatarethekop, ñatoꞌ amatheꞌ pokteyaye. Ñewa, yeñoteñ ñeñth ayexhkatareth ñeñth tomaꞌntatenet ñetpaꞌ poꞌñoxhpaꞌ ama eñalle Yompor ñeñth ateth. Yapaꞌ yeñoteñ Yomporpaꞌ eꞌñe pathrra.

⁵ Poꞌñoxhpaꞌ ñetpaꞌ paꞌnamen poꞌyomporer phaꞌyenet amaꞌt ateth ñerraꞌm ñeñth entoꞌtsaꞌyen, ñamha amaꞌt ñeñth añe patsroꞌtsaꞌyen. Ñetpaꞌ paꞌnamen poꞌyomporer phaꞌyenet, ñamha paꞌnamen poꞌpartseshar phaꞌyenet.

⁶ Tharraña ya yokoppaꞌ yeñoteñ Yompor Apapaꞌ eꞌñe pathrra, ñeñth Yompor ñeñth yexhkatweꞌ allowen ñeñth yentyen, ñamha yapaꞌ awoꞌt yexhkatey eꞌñe ñokop. Ñamha yeñoteñ Yepartsesharpaꞌ eꞌñe pathrra ñeñthara Jesucristo ñeñth yexhkateꞌ allowen ñeñth yentyen. Theꞌ yapaꞌxhoꞌña apoeney attho yokrrena.

⁷ Tharraña acheñeneshaꞌpaꞌ ama allowenakmayeꞌ yokthapeꞌchweno ateth. Ñeñthoꞌmarña poesheñaꞌtetspaꞌ awathotheñ yexheteꞌth oꞌch nenet es poꞌchets ayexhkatarethekop. Ñeñthoꞌmarña ñerraꞌm esempo rrenet ñeñth poꞌchets ñeñth moetsenet ayexhkatarethekoppaꞌ eꞌñech attha rreñet poꞌtomña. Eꞌñe poꞌtomñapaꞌ otenet ñatoꞌ ama pokteyaye oꞌch yerren poꞌchets ñeñth nenet ayexhkatarethekop. Ñetpaꞌ attha enteñet ama arrapawoyaye ñeñth Yomporekop. Tharroꞌmar ama xhenaneto poeyoxhro attho ñeñth eꞌñe poktetsa Yomporekop.

⁸ Ñewa, yapaꞌ yeñoteñ ñeñth yerrenpaꞌ ama añekpayaye atthoch eꞌñe kowen entey Yompor. Amaꞌt yerreñ, ñamha amaꞌt ama yerreñe ñewa, eꞌñe atthekma enteney Yompor.

⁹ Tharraña eꞌñech señota: Eꞌñech akopha es sephaꞌyes. Amaꞌt yapaꞌ yeñoteñ Yomporpaꞌ eꞌñe pokteꞌ enteñeñ oꞌch yerren poꞌchets ñeñth anareth ayexhkatarethekoppaꞌ tharraña ñatoꞌ yerreñoth añexhnopaꞌ xhatheꞌ alla yaꞌpoerratatwer ñeñth ama tama womenk penaye poeyoxher Yomporekop.

¹⁰ Tharroꞌmar ñatoꞌ sapaꞌ ateththeꞌ sepena. Ñatoꞌ oꞌch awenes poerawo alloꞌtsen ayexhkatareth, allñapaꞌ ñatoꞌ oꞌchxhoꞌ serros poꞌchets ñeñth amtsareth ayexhkatarethekop. Ñamha ñatoꞌ sapaꞌ eꞌñech soksheñeshaꞌ serreñ tharroꞌmar sapaꞌ señoteñ ñeñthpaꞌ ama esoyeꞌ enteñe Yompor. Tharraña ñatoꞌ eꞌñe allempoña serreñpaꞌ ñatoꞌ oꞌch entas poꞌpsheñeñ ñeñth parro sameꞌñena. Tharraña ñapaꞌ ñatoꞌ ama pokteyeꞌ enteñe oꞌch yerren poꞌchets ñeñth amtsareth ayexhkatarethekop. Ñatoꞌ oꞌch peyeꞌchateña ñamha pemoꞌnasheñ oꞌch rreñ ñamha ñatoꞌ amaꞌt ñapaꞌ ama pokteyeꞌ enteñe.

¹¹ Tharraña ñerraꞌm ñapaꞌ oꞌch rrenan poꞌchets ñeñth anareth ayexhkatarethekoppaꞌ ñapaꞌ oꞌch enteñ atethpaꞌ ochñaꞌteñets Yomporekop. Attheñapaꞌ ñatoꞌ oꞌch alla poeswerran Yompor. Ñeñthoꞌmarña notenes, ñatoꞌ eꞌñe yeñoteñoth ñeñth kowentetsa Yomporekoppaꞌ oꞌtheꞌ yaꞌchenkatach yemoꞌnasheñ ñeñthekop Jesúspaꞌ rroma ñamha.

¹² Ñerraꞌm esempo ateth yephapaꞌ xhatheꞌ yeyora yoꞌchñar yemoꞌnasheñekop tharroꞌmar oꞌ yeyeꞌchatera oꞌch perra ñeñth ama pokteyeꞌ enteno ña. Ñewa, ñerraꞌm esempo yeyora yoꞌchñar yemoꞌnasheñekoppaꞌ eꞌñe ñothpaꞌ oꞌch yoꞌchñaꞌt ñamha Cristokop.

¹³ Ñeñthoꞌmarña theꞌpaꞌ oꞌch notas ateth, ñerraꞌm esempo yerren poꞌchets ñeñth anareth ayexhkatarethekop, ñerraꞌm yerreñothpaꞌ ñatoꞌ yaꞌpoerratater yemoꞌnasheñpaꞌ eꞌñe pokteñ amach yerratsto ñeñth poꞌchets. Ñeñthoꞌmarña napaꞌ amaꞌt esempapaꞌ amach nerratsto ñeñth poꞌchets theꞌtaꞌ neyoren noꞌchñar nemoꞌnasheñekop atthothchaꞌ naꞌpoerratater.