1 Corintios 7 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Atethchaꞌ yepha ñerraꞌm yemneñ oꞌch yesnaꞌta

¹ Theꞌpaꞌ oꞌch neserrpareꞌtatas ñeñth ateth saꞌphthoꞌten awaña secartoth. Awoꞌt saꞌphthoꞌten pokteꞌtheꞌ oꞌch yesnaꞌta. Ñewa, ñanom oꞌch notas ateth, eꞌñe pokteñ amatheꞌ yeyoratsche koyaneshaꞌ ñeñthchaꞌ yethapor yephaꞌ.

² Tharraña ellopaꞌ añ pokteꞌ ñamha alloweney yakmaneshay oꞌch yeyore poesheñarr koyaneshaꞌ ñeñthchaꞌ yethapor yephaꞌ. Koyaneshaꞌpaꞌxhoꞌña pokteꞌ ñamha echanepaꞌ eꞌñe ña poerrollar. Oꞌ notas ateth tharroꞌmar ñerraꞌm ama xho seyoro poesheñarr ñeñthchaꞌ sethapor sephaꞌpaꞌ atthatheꞌ alloꞌna sekañoreshaꞌtnen.

³ Eꞌñe pokteꞌ epas sethaporpaꞌ sagapannaꞌtepaꞌch.

⁴ Tharroꞌmar koyaneshaꞌ ñeñth arrollarethpaꞌ ama eꞌñe ñapthayaye poꞌchets, ñeñthpaꞌ poerrollaroꞌnach. Ñamha yakmapaꞌxhoꞌña amach ñapthayaye poꞌchets, ñeñthpaꞌ poethaporoꞌnach.

⁵ Eꞌñe pokteꞌ xhokmach sagapannena. Tharraña ñerraꞌm errotheno esempo pokteꞌ senteñ epsheñoꞌmares oꞌch saꞌpoktat ñoñets eꞌñe sañeña amach sagapannaꞌterro allponmat atthoch añach semaꞌyoxhra maꞌyochatsa. Tharraña ñerraꞌm oꞌ met allponmat allempo oꞌ saꞌpoktatwepaꞌ pokteꞌ oꞌch alla sagapannerra. Tharroꞌmar ñerraꞌm ama awen sagapannerropaꞌ xhatheꞌ oneñethpaꞌ topatas amatheꞌ saꞌwanto.

⁶ Tharraña ama notenso ñeñthach patherr poktetsa oꞌch yesnaꞌta, añpaꞌ attha notenes ñerraꞌm semneñ oꞌch sesnaꞌtapaꞌ pokteꞌ senaꞌtepaꞌ.

⁷ Tharraña napaꞌ eꞌñe pokteꞌ nenteñ ñerraꞌm allowenes attheseñ ñerraꞌm na. (Tharroꞌmar Yomporpaꞌ awoꞌt apoen atthoch amach nemno koyaneshaꞌ.) Tharraña alloweneypaꞌ ama atthekmayayye. Tharroꞌmar Yomporpaꞌ awoꞌt apaꞌyesey ellokma atethchaꞌ yesherbeꞌ eꞌñe kowen.

⁸ Ñamha oꞌch notas, ñeñthes ama athaporethesopaꞌ eꞌñe pokteñ amatheꞌ sesnaꞌtatsto. Ñamha ñeñthes rrethorrnaneshaspaꞌ eꞌñe pokteñ ñamha amatheꞌ sesomeꞌterro. Eꞌñe pokteñ oꞌtheꞌ sokrrañ eꞌñe attha ateth nepena na.

⁹ Tharraña amaꞌt notensoñ atethpaꞌ ñerraꞌm ama errotheno saꞌwantopaꞌ eꞌñe pokteꞌ sesnaꞌtepaꞌ. Ama pokteyaye oꞌch attha nanak yemneñ koyaneshaꞌ. Añña pokteꞌ yesnaꞌtepaꞌ. Tharraña añña nanak kowen ñamha amach yesnaꞌto.

¹⁰ Theꞌpaꞌ oꞌch notas ñeñthes arrollarethes ñeñthchaꞌ ateth sepha. Ñewa, poꞌñoxh ama nayeꞌ otetso, añña Yepartsesharña otets. Añ pokteꞌ amach sesatstere serrollar.

¹¹ Tharraña ñerraꞌm eseshas serreꞌ serrollarpaꞌ añ pokteꞌ amach sesomeꞌtatsterro ello, amapaꞌ oꞌch alla samoꞌtstera serrollaresheꞌmañ. Ñamha oꞌch notas samha ñeñthes athaporethes, amach sesatstere sethapor.

¹² Theꞌpaꞌ oꞌch notas ñeñth ateth pokteꞌ nenten na. Amaꞌt Yepartsesharpaꞌ ama otenñe ñeñth poktetsa añekop, tharraña napaꞌ oꞌch neñotatas ñeñth pokteꞌ nenten na. Ñerraꞌm poesheñarr yakma ñeñth oꞌ ameꞌñerra ñeñth athaporeꞌtañ, tharraña ñerraꞌm poethaporpaꞌ ama ameꞌñeno, añ pokteꞌ amach satsterrano poethapor ñerraꞌm poethaporpaꞌ ama moeno oꞌch awerr.

¹³ Atthekma ñamha poesheñarr koyaneshaꞌ ñeñth oꞌ ameꞌñerra ñeñth arrollareꞌtañ, tharraña ñerraꞌm poerrollarpaꞌ ama ameꞌñeno, añña pokteꞌ amach satsterrano poerrollar ñerraꞌm poerrollarpaꞌ ama moeno oꞌch ser.

¹⁴ Tharroꞌmar ñerraꞌm poethaporpaꞌ ameꞌñena, xhokma eñall atthoch oꞌch ameꞌñatana poerrollar. Atthekma ñamha ñerraꞌm poesheñarr yakma ñeñth ameꞌñetsa, xhokma eñall atthoch ameꞌñatana ñamha poethapor. Ñamha ñerraꞌm sesannenapaꞌ ñatoꞌ sechemereshaꞌpaꞌ amach es eñoterro Partsokop. Tharraña ñerraꞌm ama sesannerropaꞌ sakñetharneshaꞌñapaꞌ oꞌch soꞌpatacha ñamha Parets.

¹⁵ Tharraña ñerraꞌm poesheñarr yakma ñeñth ama ameꞌñetso, ñerraꞌm moeneñ oꞌch serran poethapor ñeñth ameꞌñetsa, ñewa, pokteꞌ serepaꞌ. Tharroꞌmar poethapor ñeñth ameꞌñetsapaꞌ ama es palltetso poerrollarekop. Ñamha Yomporpaꞌ ama moeno ellopaꞌ oꞌch alloꞌna yeꞌmoñeꞌtannaꞌtnena yerrollarekop. Atthekma ñerraꞌm poesheñarr koyaneshaꞌ ñeñth ama ameꞌñetso, ñerraꞌm moeneñ oꞌch serran poerrollar ñeñth ameꞌñetsa, ñewa, pokteꞌ serepaꞌ.

¹⁶ Ateth notenes sesannerrepaꞌ tharroꞌmar ñeñthes arrollarethespaꞌ poꞌñoxhpaꞌ amach errotheno señoche ñatoꞌ saꞌkeshphachchaꞌ serrollar, ñatoꞌ amatheꞌ. Ñamha ñeñthes athaporethespaꞌ amach errotheno señoche ñatoꞌ saꞌkeshphachchaꞌ sethapor, ñatoꞌ amatheꞌ.

¹⁷ Ñeñthoꞌmar theꞌpaꞌ oꞌch noterrserr, errothenoꞌtsenestheꞌ amaꞌt allempo errteꞌ sameꞌñera Yepartsesharpaꞌ attherasepaꞌch. Ñamha ateth moenatyeney Yomporpaꞌ atthepaꞌch yepena poesheñaꞌttsoy. Ñeñthpaꞌ atthekmach neyxhatyes amaꞌt ñamha ora allowen ñeñth pameꞌñeñothet apxhaꞌyetsa allemeñ anetsoꞌmar.

¹⁸ Ateth ñamha ñerraꞌm poesheñarr yakma allempo errteꞌ ameꞌñerrtset, ñerraꞌm allempopaꞌ oꞌ atsorrarethetwet ateth yexheꞌth judioneshaꞌpaꞌ theꞌpaꞌ ama pallteno oꞌch aꞌwañerran all tsorret awath. Atthekma ñamha poꞌpsheñeñ allempo errteꞌ ameꞌñerrtset, ñerraꞌm ñetpaꞌ ama atsorraretheto, theꞌpaꞌ ama pallteno oꞌch atsorrarethtet ateth yexhena judioneshaꞌ.

¹⁹ Amaꞌt yaꞌtsorrarethtatstapaꞌ ñeñthpaꞌ ama es sherbeno. Ñamha amaꞌt ama yaꞌtsorrarethtatstopaꞌ ñeñthpaꞌxhoꞌña ama es sherbeno. Añña nanak sherbets oꞌch yepha ñeñth ateth oteney Yompor.

²⁰ Ñeñthpaꞌ oꞌch alla noterrserr, añ pokteꞌ, amaꞌt errothenoꞌtsenestheꞌ allempo errteꞌ sameꞌñerrapaꞌ attherasepaꞌch.

²¹ Amaꞌt allempo errteꞌ phameꞌñerra, amaꞌt añephtheꞌ ñeñth atarwasatareth eꞌñe atthapaꞌ eꞌñe pokteꞌ, amach pellkatsto. Attherach petarwasen pepatronarekop, tharraña ñerraꞌm errothenoth oꞌch phaꞌrroyaterra pepatronareshothpaꞌ eꞌñech pokteꞌ aꞌrroyerrpetepaꞌ alloth tarwasatenpet eꞌñe attha.

²² Ñatoꞌ oꞌch netmaꞌntacha ateth: Eñall poesheñarr yakma ñeñth atarwasatareth eꞌñe attha, tharraña oꞌ xhap allempo agapan Yepartseshar ñeñthchaꞌ Pamoꞌmteꞌ perr. Allempopaꞌ amaꞌt atthera tarwasateñeñ ñeñth poꞌpatronar pen arr patsopaꞌ tharraña theꞌña Cristopaꞌ aꞌrroyatamper poꞌchñar ñeñth nanak tarwasatayeꞌth awaña. Theꞌpaꞌ añchaꞌña tarwasaterreꞌ Cristo ñeñth Yepartseshar yepen. Ñamha eñall poesheñarr yakma ñeñthñapaꞌ kowenoꞌtsen ñeñth ama atarwasataretheyaye. Ñapaꞌxhoꞌña oꞌ xhap allempoch agërran Yepartseshar Cristo ñeñthchaꞌ Pamoꞌmteꞌ perr. Theꞌña Pamoꞌmteꞌ Cristopaꞌ ñachña tarwasaterreꞌ eꞌñe kowen ñeñth awañapaꞌ ama atarwasatarethe eꞌñe attha.

²³ Cristopaꞌ oꞌ rañtherrya. Attho rañtherryapaꞌ nanak moeroxhta atthoch tsaꞌtwerrnaya yoꞌchñar. Ñeñthoꞌmarña notenes, amach acheña ñapoeth samoꞌmteꞌ sephatsto, añña eꞌñe poꞌñoxh Yamoꞌmteꞌ yepen Cristo.

²⁴ Ñeñthoꞌmarña masheñneshachaꞌ ñamha noxhaneshachaꞌ oꞌch noterrserr alla, amaꞌt errothenoꞌtsenestheꞌ allempo errteꞌ sameꞌñera Cristopaꞌ pokteꞌ attherasepaꞌch. Tharraña Yomporepaꞌchña seyenpoeꞌ.

²⁵ Theꞌpaꞌ oꞌch noterrserr poꞌpoñ. Añpaꞌ ñeñth ateth saꞌphthoꞌten awaña ñatoꞌ poktoꞌtheꞌ awoꞌch someꞌta ñeñth shopsheshareꞌ. Ñewa, napaꞌ oꞌch notas, Yepartsesharpaꞌ ama otenyeñe ñeñthchaꞌ ateth yepeꞌ shopshesharekop, tharraña napaꞌ oꞌch neñotatas ñeñth pokteꞌ nenten eꞌñe na, tharroꞌmar Yepartseshar poemoereñothpaꞌ awoꞌt eñotañ phaꞌn atthoch sapaꞌ seyemoetna.

²⁶ Ñewa, ñanompaꞌ oꞌch notas: Amaꞌt theꞌpaꞌ xhokma wennaya shonteꞌ esokmañen ñeñth echarr yentyen ñeñthoꞌmarña pokteꞌ nenteñ amatheꞌ sesomeꞌto, ñamha amatheꞌ sesnaꞌto. Añña poktetsa atthatheꞌ yokrra.

²⁷ Tharraña ñerraꞌm oꞌ seyore koyaneshaꞌpaꞌ eꞌñe pokteꞌ; theꞌpaꞌ amach sesatstere. Attheña ñerraꞌm ama seyoreñaꞌ koyaneshaꞌpaꞌ pokteꞌ ñamha; theꞌpaꞌ amach seyoratsche.

²⁸ Tharraña ñerraꞌm esempo semneꞌ oꞌch sesnaꞌtapaꞌ eꞌñe pokteꞌ. Ñamha ñerraꞌm esempo koyaneshaꞌpaꞌ moeneñ oꞌch someꞌta, ñeñthpaꞌxhoꞌña eꞌñe pokteꞌ, tharroꞌmar ñeñthpaꞌ ama ochñaꞌteñtsoyaye Yomporekop. Tharraña ñerraꞌm yakmapaꞌ oꞌch senaꞌta, ñamha ñerraꞌm koyaneshaꞌpaꞌ oꞌch someꞌta ñamha, allempopaꞌ oꞌch echan shonteꞌ ñeñthchaꞌ llekatyeseꞌ atthoch korret arr patsro. Ñeñthoꞌmarña notenes amach sesnaꞌtatsto, koyaneshaꞌpaꞌxhoꞌña amach someꞌtatsto, tharroꞌmar napaꞌ ama nemno oꞌch sechen shonteꞌ ñeñthchaꞌ sellkatyeneꞌ.

²⁹ Ñeñthoꞌmarña masheñneshachaꞌ ñamha noxhaneshachaꞌ nemneñ oꞌch alla noterrserr. Theꞌpaꞌ ama atonayeꞌ pallteno char atthoch yethorrena Yomporekop. Ñeñthoꞌmarña oꞌch notas ñeñthes oꞌ sethaporeꞌt, amaꞌt oꞌ sethaporeꞌtpaꞌ añña poktetsa eꞌñe thayotheñ amach pathrra sellkatsto ñeñth sethaporekpa. Añekpaꞌnachña sethorrena Yomporekop.

³⁰ Ñamha ñerraꞌm esempo waponasa llekëñetspaꞌ amach ñeñthotha yekexhpatsterro attho yethorrena Yomporekop. Ñamha amaꞌt esempo es nanak yokshateneꞌpaꞌ amach ñeñthotha yepsatstere Yompor. Ñamha ñerraꞌm esempo yapaꞌ esokmañen yechenpaꞌ tharraña amach ñeñthotha yepsatstere Yompor.

³¹ Ñamha ñerraꞌm esempo es yephaꞌyen ñeñth patsoꞌmarekpapaꞌ amach eꞌñe ñeñtha yokshatsto ñeñth patsoꞌmarekpa. Tharroꞌmar ñeñth ateth yeyxhen añ patsoꞌmarpaꞌ ñeñthpaꞌ wañerrchaꞌ esempo.

³² Ñeñthoꞌmarña notenes añexhno, tharroꞌmar nemneñ sapaꞌ amach eñalletatsto poꞌpoñ ñeñthchaꞌ nanak sellkateꞌ. Ateth pena yakma ñeñth ama athaporethepaꞌ añach eꞌñe llekëna ñeñth Yomporekop. Eꞌñech maꞌyoxhrenana atthoch koshatenan Yepartseshar.

³³ Tharraña yakmaña ñeñth athaporethpaꞌ añach eꞌñe llekëna ñeñth attho yokrrena añe patsro. Ñamha añach maꞌyoxhrena atthoch koshatenan poethapor.

³⁴ Ñeñthoꞌmarña amach errothenoth pathrra maꞌyoxhreno ñeñth Yomporekop. Atthekma pena ñamha koyaneshaꞌ ñeñth ama arrollarethe. Añach maꞌyoxhrena ñeñth Yomporekop. Eꞌñe poꞌchtsowenpaꞌ moeneñchaꞌ oꞌch aꞌrroya Partsokop. Ñamha amaꞌt ora pokthaphñowenpaꞌ oꞌch maꞌyoxhrena Partsokop. Tharraña koyaneshaꞌ ñeñth arrollarethpaꞌ añach lleka ñeñth attho yokrrena añe patsro, ñamha añach lleka atthoch koshatan poerrollar.

³⁵ Ñeñth notenespaꞌ ama añekpayaye atthoch oꞌch nompaꞌtas amach sesnaꞌtatsto. Añekopña ateth notenes atthoch napaꞌ neyenpas, atthoch xhokma kowenareꞌ es sorrtatyen. Ñamha xhokmach soksheñeshaꞌpaꞌ oꞌch semaꞌyoxhrena Yomporekop, amach eñalletatsto ñeñthchaꞌ sepateneꞌ.

³⁶ Theꞌpaꞌ oꞌch noterrserr poꞌpoñ: Ñerraꞌm eseshas echeneꞌ seseñ ñeñth oꞌ poꞌnatwena, ñamha ñerraꞌm pokteꞌ senteñ oꞌch someꞌtapaꞌ ñewa, pokteꞌ someꞌtepaꞌ. Eꞌñe pokteꞌ oꞌch semnach someꞌtepaꞌ tharroꞌmar ñeñthpaꞌ ama ochñaꞌteñtsoyaye Yomporekop.

³⁷ Tharraña ñerraꞌm erraꞌtsenothespaꞌ sechen seseñ, ñamha ñerraꞌm ama semno oꞌch someꞌta, ñamha ñerraꞌm seseñpaꞌ eꞌñe pokteꞌ enteñ amach someꞌtatstopaꞌ ñewa, pokteꞌ ñamha amach sesomeꞌtatatsche. Ñerraꞌm poꞌñoxh señoteñ seyoxhro añpaꞌ eꞌñe pokteꞌ ateth, ñewa, amach sesomeꞌtatatsche. Elloña ñeñthpaꞌ nanak kowen.

³⁸ Ñeñthoꞌmarña theꞌpaꞌ oꞌ notas: Ñerraꞌm erraꞌtsenothes moenateꞌ seseñ oꞌch someꞌtapaꞌ ñeñthpaꞌ pokteꞌ. Tharraña ñerraꞌm erraꞌtsenothes ama someꞌtataye seseñpaꞌ elloña ñeñthpaꞌ nanak kowen.

³⁹ Theꞌpaꞌ oꞌch noterrserr poꞌpoñ. Amaꞌt esempapaꞌ ama pokteyaye koyaneshaꞌpaꞌ oꞌch serran poerrollar. Amaꞌt errponmatchaꞌ korrena poerrollarpaꞌ amach satstere. Tharraña ñerraꞌm esempo rroma poerrollar, allempopaꞌ eꞌñe pokteꞌ oꞌch someꞌterra ello, tharraña ñerraꞌm erraꞌtsenchaꞌ moenerr ñeñthchaꞌ yorerreꞌ ñeñthpaꞌ ameꞌñenach ñamha.

⁴⁰ Tharraña amaꞌt oꞌ notwaseñ eꞌñe pokteꞌ oꞌch someꞌterra rrethorrnaneshaꞌ, elloña napaꞌ nokthapeꞌcheñ ñerraꞌm oꞌch someꞌterra, ñatoꞌ allempopaꞌ kosherrañchaꞌ mameꞌ. Tharraña ñerraꞌm amach someꞌterro, napaꞌ nokthapeꞌcheñ ñatoꞌ allempopaꞌ ellochña nanakchaꞌ kosherra ñapoeth. Napaꞌ noten Yompor Poekamkëñoth neñoten ateth.