1 Corintios 6 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho ama pokteyaye oꞌch yetmantannaꞌta

¹ Theꞌpaꞌ oꞌch noterrserr poꞌpoñ. Ñamha oꞌ neꞌmareꞌtas attho sapaꞌ xhokmoꞌ setmantannena ñerraꞌm esempo erroth sephannena, ñamha amaꞌt ñeñthesoꞌ poeyochreshaꞌ oꞌ perrsoñ Parets. Esoꞌmareꞌt xhokma soteñña amhchaꞌtareth ñeñth ama ameꞌñetso oꞌch aꞌpoktatonas ñeñth attho seꞌmoñeꞌtannena. Sokoppaꞌ añña pokteꞌ oꞌch soch poesheñarr ñeñth eꞌñe parrokma sameꞌñena ñetchaꞌña aꞌpoktateꞌ ñeñth ateth sephannena.

² Amaꞌt señoteñe ya ñeñthey oꞌ poeyochreshaꞌ perrey Paretspaꞌ yach amhchaꞌtarethterrtsa allowen acheñeneshakop arr patsro esempowañen. Ñewa, ñerraꞌm poꞌñoxh yeñoteñ oꞌch yaꞌmhchaꞌtarethterra allowen acheñeneshakop arr patsro esempowañenpaꞌ esoꞌmareꞌtña ama señoteñe oꞌch saꞌpoktat ñoñets eꞌñe sañeña ñeñth ama thorrapawoyaye.

³ Ñamha amaꞌt señoteñe esempowañenpaꞌ yach amhchaꞌtarethterrtsa amaꞌt Yompor poꞌmhllañotheñnanesharekop. Ñeñthoꞌmarña theꞌpaꞌ notenes eꞌñe pokteꞌ oꞌch yaꞌpoktatannaꞌta ya yeñoñ ñeñth ateth yeyxhena theꞌ arr.

⁴ Ñerraꞌm esempo esokop setmantannenapaꞌ esoꞌmareꞌtña oꞌch seneꞌ poesheñarr ñeñth ama kowenayeꞌ enteno ñeñth ameꞌñetsa, ñach aꞌpoktateꞌ señoñ sokop.

⁵ Eꞌñe nepenknaꞌntateñothes sapaꞌ ñeñthoꞌmarña ateth notenes: Seshopaꞌ ¿amaꞌtña eñalleña amaꞌt poesheñarra ñeñth ameꞌñetsa ñeñth eñoteneꞌ oꞌch aꞌpoktatan ñoñets? Ñeñth eñoteneꞌpaꞌ eꞌñe pokteꞌ ñach aꞌpoktateneꞌ señoñ ñeñthes parro sameꞌñena.

⁶ Tharraña theꞌpaꞌ ama attheyeꞌ sepeno. Xhokmoꞌ setmantannena amaꞌt ñeñthesoꞌ parro sameꞌñenañ. Sapaꞌ awoꞌchxhoꞌ awes tomantannaꞌttsa aꞌyo alloꞌtsen acheñ ñeñth ama ameꞌñetso, ñapaꞌ awoꞌchxhoꞌ aꞌpoktatonas señoñ sokop.

⁷ Tharraña ñeñthpaꞌ ama pokteyaye amaꞌt mamesha oꞌch setmantannena. Tharroꞌmar ñerraꞌm xhokma yetmantannenapaꞌ ñeñthpaꞌ ama añeyeꞌ yepeno ateth moenen Yompor. Añña ñerraꞌm esempo erroth phonas poꞌpsheñeñpaꞌ esoꞌmareꞌtña amaña alla saꞌwantannenoña ñeñth attho erroth es sephannaꞌtyena. Ñamha ñerraꞌm esempo es poerratampensetpaꞌ esoꞌmareꞌtña amaña alla saꞌwantenaneto. Añ poktetsa oꞌch alla yaꞌwantenanet alla.

⁸ Tharraña sañapaꞌ ama attheyeꞌña sepeno. Añña sapaꞌ xhokmoꞌ erroth sephannena, ñamha xhokmoꞌ es seprratamphsannena amaꞌt eꞌñe sagattsa ñeñthes ameꞌñetsañ.

⁹ Amaꞌt señoteñeña ñeñth ama kowen es petsopaꞌ amach es oꞌpaterroña all amhchaꞌtarethtena Yompor. Amach semnatatsche poꞌpsheñeñ oꞌch attha shekareꞌtas. Poꞌñoxh ateth notenes, ñeñth kañoreshaꞌtetspaꞌ amach es oꞌpaterro all amhchaꞌtarethtena Yompor. Ñamha ñeñth poꞌyomporer phaꞌyeneꞌ ayexhkaterethpaꞌ ñetpaꞌxhoꞌña amach es oꞌpatatarethterretoña all amhchaꞌtarethtena Yompor, ñamha amaꞌt ñeñth apretets thaporets, ñamha yakmaneshaꞌ ñeñth agapannetsa eꞌñe ñagattset.

¹⁰ Allothpaꞌ ñamha ñeñth etyets ñamha ñeñth atarr es yeꞌchapretyetsa, ñamha ñeñth posaꞌtareꞌtyets, ñeñth ateth phaꞌyetsapaꞌ amach es oꞌpatatarethterreto all amhchaꞌtarethtena Yompor. Allothpaꞌ ñamha ñeñth achmhareꞌtets ñamha ñeñth poerratampesyets ñetpaꞌxhoꞌña amach es oꞌpatatarethterreto all amhchaꞌtarethtena Yompor.

¹¹ Sapaꞌxhoꞌña poesheñaꞌttsos atthekma sepeꞌth samha awaña. Tharraña theꞌpaꞌ oꞌ eꞌshowarethterra soꞌchñar, atthoña oꞌ saꞌkowentatarethterra Partsokop. Eꞌñe seyemteñoth Yepartseshar Jesucristo theꞌña Pomporpaꞌ oꞌ pokteꞌ enterres. Ñamha eꞌñe poechorreñothes Yompor Poekamkëñpaꞌ oꞌ pokteꞌ enterres Yompor.

Añ pokteꞌ oꞌch eꞌñe yekwen kowen yechets tharroꞌmar ñeñthara yechetspaꞌ poꞌchets peñ ñamha Cristo

¹² Theꞌpaꞌ oꞌch noterrserr poꞌpoñ. Ñewa, napaꞌ neñotenes poesheñaꞌttsospaꞌ ateth sotatseꞌtyen, “eꞌñoꞌ pokteꞌ yephaꞌyes amaꞌt erraꞌtsentheꞌ yemnen.” Ñewa, yapaꞌ yeñoteñ Yompor poꞌñoñpaꞌ amaꞌt ama ateth otenyeñe amach es yephaꞌyesatsto, ñeñthoꞌmarña “eꞌñe pokteñ allowenpaꞌ oꞌch es yephaꞌyeneñ.” Tharraña amaꞌt eꞌñe pokteñ oꞌch ateth es yephaꞌyeneñ allowenpaꞌ tharraña ñerraꞌm ñeñthpaꞌ ama añekpayaye alloch yeyenpoeñ yamoꞌts atthoch eꞌñe womenk yephannena yeyoxher Yomporekoppaꞌ ñewa, ñeñthepñapaꞌ amach ateth yephatsto. Ñamha amaꞌt pokteñ allowenpaꞌ oꞌch es yephaꞌyespaꞌ, tharraña ama pokteyaye oꞌch nanak es yayomhatseꞌtyesa tharroꞌmar ñerraꞌm es nanak yayomenapaꞌ ñeñthaña pomnaren peneꞌña yechets.

¹³ Ñamha neñotenes poesheñaꞌttsospaꞌ ateth sotatseꞌtyen, eꞌñoꞌ pokteꞌ senteñ oꞌch señmatat sechets eꞌñe sa sekañoreshaꞌteñoth tharroꞌmar ñeñthekpoꞌ yexhkënaña sechets oꞌch ateth sephateñ. Ñeñthoꞌmarña ateth setmaꞌntatenaña sechets ñerraꞌmrratheꞌ allempo sachporrena xhoch serraꞌ serrar atthochña eꞌñe señmatat sath eꞌñe ora sechtsowen tharroꞌmar sathpaꞌ ñeñthekpoꞌ yexhkëna. Tharraña theꞌ napaꞌ oꞌch notas, amaꞌt pokteñ oꞌch yeñmatateneñ yath arr patsropaꞌ xhapchaꞌ esempowañen allempopaꞌ oꞌwañchaꞌ yemnaꞌ yath ñamha yerrar, tharroꞌmar ateth neꞌ Yompor. Tharraña amaꞌt pokteñ oꞌch yeñmatateneñ yathpaꞌ tharraña ama pokteyaye oꞌch eꞌñe yeñmataten yechets yekañoreshaꞌteñoth tharroꞌmar ama añekpayeꞌ ayexhkataretheña yechets atthoch yekañoreshaꞌten. Yechetspaꞌ añekopña ayexhkatareth atthoch yethorraꞌyesa Yepartsesharekop. Ñamha ñapaꞌ ñach yekwampeneꞌña yechets.

¹⁴ Ñeñthoꞌmar Yomporpaꞌ oꞌ tantaterran Poechemer ñeñth Yepartseshar yepen ya. Ñeñthoꞌmarña yeñoteñ yapaꞌxhoꞌña esempowañenpaꞌ tantaterrnaychaꞌ yamha yechets. Eꞌñe poꞌwamenkothpaꞌ tantatwerreychaꞌ.

¹⁵ Amaꞌt señoteñeña eꞌñe yeparrokmateñoth Cristopaꞌ ñeñth ya yechetspaꞌ poꞌñoxhpaꞌ ñeñthara poꞌchets pen ñamha Cristo. Ñeñthoꞌmarña notenes, attho ñeñth poꞌchets pen Cristo ñeñthara ya yechetspaꞌ esoꞌmareꞌtña eꞌñe pokteꞌ sentenña eꞌñe ya yechtsothpaꞌ oꞌch yekañoreshaꞌtach Cristo. Amakaꞌye pokteyaye oꞌch yetsetach Cristo poꞌchets epoet yekañoreshaꞌ.

¹⁶ Ñewa, amaꞌt señoteñeña ñerraꞌm esempo yoꞌchñaꞌt epay ottatsñathpaꞌ epsheñoꞌmarey oꞌch eꞌñe yeparrokmatach yechtso. Poꞌñoxh ateth enteney Yompor ateth oteney poꞌñoñoth ñeñth anwareth awathotheñ, añmapaꞌ ñeñth ateth oten: “ñeñth epsheñoꞌmaretpaꞌ eꞌñech pathrra poꞌchets penet.”

¹⁷ Tharroꞌmar eꞌñe yeparrokmateñoth Yepartsesharpaꞌ epsheñoꞌmareypaꞌ eꞌñech pathrra yokthapeꞌchen yeyoxhro ñeñth yekamkëñekop.

¹⁸ Ñeñthoꞌmarña notenes añ pokteꞌ oꞌch saꞌypoꞌñer kañoreshaꞌteñets. Poꞌpoñexhno ñeñth yephaꞌyen soseypaꞌ ñeñthpaꞌ ama yechtsoyeꞌ yaꞌsosyateno. Tharraña añña kañoreshaꞌteñetspaꞌ ñeñthpaꞌ eꞌñe ya yechets yaꞌsosyaten.

¹⁹ Amaꞌt señoteñeña yeꞌnarpaꞌ ñeñthara paꞌpakëll pen Parets Poekamkëñ ñeñth chorratenya Yompor. Ñeñthoꞌmar yeñoteñ yechetspaꞌ ama yoyaye, ñeñthpaꞌ Yomporo tharroꞌmar

²⁰ ñapaꞌ awoꞌt rañtherrya. Attho rañtherryapaꞌ nanak moeroxhta Poechemer atthoch tsaꞌtwerrnaya yoꞌchñar. Ñeñthoꞌmarña notenes, amaꞌt attho yokrrena yechtsothpaꞌ Yomporepaꞌchña yekowentaten eꞌñe yekamkëñowen tharroꞌmar ñeñth epoꞌmarpaꞌ Yomporo.