1 Corintios 5 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Pablopaꞌ ama pokteyeꞌ entano attho poesheñarr corintoꞌmarneshaꞌ orrtatan ñeñth ama pokteyaye tharraña pamoꞌtseshaꞌñapaꞌ ama errotheyeꞌ oteñeto

¹ Ñewa, theꞌpaꞌ oꞌch notas poꞌpoñ. Tharroꞌmar ateth otyenet, poꞌñoxh eñalloꞌ sesho poesheñarr yakma awoꞌ yorerran pachoretsoreꞌ. Ñeñthpaꞌ nanak ochñaꞌteñets ateth, tharroꞌmar amaꞌt ñeñth ama ameꞌñetsopaꞌ ama pokteyeꞌ entenetoña ateth.

² Tharraña sapaꞌ xhokmoꞌ kowen senteñ ñeñth ateth sepena. Esoꞌmareꞌtña ama xhoyeꞌña llekatenso. Tharroꞌmar ñeñth ochñaꞌtets atethpaꞌ amach alloꞌna senteñe atthoch oꞌch alloꞌna separrokmatnen epas.

^3-4 Amaꞌt napaꞌ ama alloꞌtsenno parro, tharraña eꞌñe neyerpoeñothespaꞌ alloꞌtseney parro. Amaꞌt ama alloꞌtsennopaꞌ napaꞌ oꞌch notas necartoth ñeñth pokteꞌ nenten na, atthekma ñerraꞌm alloꞌtseney parro. Napaꞌ oꞌ neñoch ñeñthchaꞌ ateth sepeꞌ ñeñth ochñaꞌtets ateth. Oꞌch notas ñeñthchaꞌ ateth sepeꞌ: Oꞌch sapxha allowenes eꞌñe sameꞌñeñoth Yepartseshar Jesús; napaꞌxhoꞌña eꞌñe neyerpoeñothespaꞌ alloꞌtseneychaꞌ parro. Allochñapaꞌ eꞌñe Yepartseshar Jesús poꞌwamenkothpaꞌ

⁵ oꞌch sepomh ñeñth yakmar oꞌch sapoer oneñeth atthoch aꞌkoñchatoñ poꞌchets. Allochñapaꞌ poekamkëñpaꞌ keshperrach esempowañenchaꞌ werra Yepartseshar Jesús.

⁶ Oꞌch alla noterrserr: Sapaꞌ amaꞌt sommoꞌchenañ attho eꞌñe kowenareꞌ es sepeneñpaꞌ tharraña ñeñthpaꞌ ama pokteyaye, tharroꞌmar attha eꞌñe semnateñ acheñ oꞌch alloꞌna ochñaꞌtnen. Amaꞌt señoteñe ñerraꞌm alloꞌna yemnatneñ oꞌch ochñaꞌt amaꞌt eꞌñe poesheñarrothapaꞌ tsapathonethpaꞌ oꞌch pet allowenet ateth. Ñatoꞌ oꞌch netmaꞌntacha ateth: “Ñerraꞌm yenaꞌ koñeꞌth chaseꞌ allempo yeyexhkaten pan, amaꞌt eꞌñe koñeꞌtha yenaꞌpaꞌ oꞌch epaꞌwa ora, atthoch eꞌñe rropaꞌptatwan ora pan.”

⁷ Ñeñthoꞌmarña oꞌ notas oꞌch saꞌypoꞌñerr ñeñth awath sokthaphña ñeñth nanak sosey. Añchaꞌña oꞌch setserrataterr sokthaphña. Tharroꞌmar poꞌñoxh etserra oꞌ yexhkaterres Yompor. Oꞌch netmaꞌntacha ateth peteꞌth awath allempo oꞌch xherr pascuapo xhokmach waporeꞌtwet allowen pan ñeñth aꞌchasareth. Oꞌch yexhkatet etserra pan ñeñth ama aꞌchasaretheyaye. Ñamha pascuapopaꞌ xhokmach moetseteꞌth carnerotholl, tharraña theꞌpaꞌ Cristoña oꞌ amtsarethta yokop.

⁸ Ñamha awath pascuapo añ koshataweteꞌth pan ñeñth ama aꞌchasaretheyaye tharraña theꞌpaꞌ añchaꞌña yokshaterreꞌ atthoch oꞌch yaꞌypoꞌñaꞌwerr ñeñth awath yokthaphña ñeñth allo yoꞌchñaꞌtareꞌteꞌth ñamha ñeñth nanak sosey Yomporekop. Añchaꞌña oꞌch yokthapeꞌcherr etserra ñeñth eꞌñe kowenareꞌ kothaphñats Yomporekop ñeñthara kothaphñats ñeñth eꞌñe poꞌñoxh kowen.

^9-10 Theꞌpaꞌ oꞌch notas poꞌpoñ. Awaña poꞌpoñ necartothpaꞌ ateth notwas: Amach seyemtatscho ñeñth chetaꞌyeneꞌ koyaneshaꞌ amach poethaporeyaye. Ñewa, allempo notas necartothpaꞌ añekop noten ñeñth ameꞌñetsa tharroꞌmar ñerraꞌm atthera chetaꞌyenan koyaneshaꞌ, amach seyemtatsche acheñ ñeñth ateth petsa. Tharraña ama añekpayeꞌ ateth noteno ñeñth ama ameꞌñetso ñeñth ateth petsapaꞌ amach seyemtatsche. Tharroꞌmar añe patsropaꞌ xhokmach yeyemcha amaꞌt ñeñth ama ameꞌñetso, ateth ñerraꞌm ñeñth chetaꞌyeneꞌ koyaneshaꞌ ñeñth ama poethaporeyaye, ñamha ateth ñerraꞌm ñeñth atarr es yeꞌchapretetsa, amapaꞌ ñamha eñeth, ñamha ñeñth maꞌyochenaya ayexhkatareth. Ñerraꞌm ama yeyemtanetopaꞌ amatheꞌ errotheno yokrroña añe patsro.

¹¹ Añña notenes amach seyemtatsche ñeñth otets ameꞌñenanoꞌ Cristo tharraña ñeñth atthera chetaꞌyeneꞌ koyaneshaꞌ ñeñth ama poethaporeyaye, amapaꞌ ñeñth atthera es yeꞌchapretyetsa, amapaꞌ ñeñth atthera maꞌyochenaya ayexhkatareth, amapaꞌ ñeñth atthera sasareꞌtets, amapaꞌ ñeñth atthera posaꞌtarets, amapaꞌ ñeñth atthera etyets. Ñeñth ateth phaꞌyetsapaꞌ amach seyemtatstero, ñamha amaꞌt atthapaꞌ amach serrallmeꞌcherro epas.

¹² Ñewa, añekop ateth oꞌ notwas, tharroꞌmar yokoppaꞌ ama pokteyaye oꞌch yotteñeꞌcheñ ñeñth ama ameꞌñetso. Yokoppaꞌ añña eꞌñe pokteꞌ oꞌch yotteñeꞌcheñ ñeñth pameꞌñeñothet attherach es pantenet.

¹³ Yomporpaꞌ ñachña otteñeꞌcherreꞌ ñeñth ama ameꞌñetso. Sapaꞌ aña poktetsa sokop sewaporeꞌch ñeñth attherach sosyaꞌtsañach orrtatyenet.