1 Corintios 4 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Ateth pena ñeñth thorretsa Cristokop

¹ Ñeñthoꞌmarña theꞌpaꞌ notenes, epsheñoꞌmarey na epan masheñ Apolos, añ pokteꞌ oꞌch senteney ateth ñerraꞌm ñeñthey thorretsa Cristokop. Ñamha añ pokteꞌ oꞌch senteney ateth ñerraꞌm yapaꞌ eyecharethey oꞌch yaꞌpothoñ Yompor poꞌkowenña.

² Ñewa, yeñoteñ ñerraꞌm erraꞌtseney eyecharetheypaꞌ añchaꞌña ateth yepena ateth yechenyet.

³ Ñatoꞌ sapaꞌ sentenentheꞌ napaꞌ nepena ateth eyecharethen ñatoꞌ amatheꞌ, ñeñthpaꞌ ama añekpayaye ñeñth ateth nellkëna na. Amaꞌt acheñeneshaꞌ ñeñth amhchaꞌtarethetyetsa, ñerraꞌm errothentheꞌ entennet ñeñth ateth nepenapaꞌ ñeñthpaꞌxhoꞌña ama añeyaye ñeñth ateth nellkëna na. Amaꞌt napaꞌxhoꞌña ama neyemteno ñeñth ateth nentena eꞌñe nañeña.

⁴ Ñewa, eꞌñe kowenareꞌ nenteñeñ allowen ñeñth ateth es nephaꞌyen, tharraña ñeñthpaꞌ ama añeyaye alloch yeñoch eꞌñetheꞌ kowenareꞌ es yephaꞌyen. Añña eꞌñe pokteꞌ nenten Yepartsesharchaꞌña otats eꞌñetheꞌ pokteꞌ entenen, amapaꞌ ñatoꞌ amatheꞌ.

⁵ Ñeñthoꞌmarña notenes, amach sotatsto ateth: añ acheñer nanak kowen, poꞌpsheñeñpaꞌ ama kowenayaye. Theꞌpaꞌ amach sotatsto ateth, tharroꞌmar esempowañenchaꞌ werra Yepartseshar. Allempopaꞌ ñachña eñotatwerrets ñeñth yaꞌnasotyena theꞌ. Ñamha ñachña eñotatwerrets amaꞌt ñeñth ateth yemnaꞌyen yeyoxhro. Errponeychaꞌ ñeñthey kowen entwerr Yomporpaꞌ allponeychaꞌxhoꞌ ayeꞌchoxhtatwerr.

⁶ Oꞌ notwas ñeñth poktetsa ñeñthchaꞌ ateth sentey ya epan masheñ Apolos. Masheñneshachaꞌ ñamha noxhaneshachaꞌ tharroꞌmar ateth notenes, allochñapaꞌ atthoch señoch añ pokteꞌ eꞌñech atthekma senteñ amaꞌt allowen acheñ, eꞌñe ateth oteney Yompor poꞌñoñ ñeñth ateth anwareth awathotheñ. Allochñapaꞌ amach yommoꞌchatsche acheñ ñeñth kowen yenten eꞌñe yañeña.

⁷ Sapaꞌ atarr kowen sentena sañeña tharraña amaña poꞌpsheññeyeꞌ atarr eñotañ sentenaye amaꞌt poesheñarra. Amaꞌt allpon señotyenpaꞌ amakaꞌye eꞌñe sothayeꞌ es señotyeno; Yomporkaꞌye señotateneꞌ. Poꞌñoxhpaꞌ attho Yompor es eñotatenespaꞌ esoꞌmareꞌtña sommoꞌchyenaña ateth ñerraꞌm eꞌñe sotha es señotyen.

⁸ Xhaꞌt sotenapañ oꞌtheꞌ nanak setsotoñ Yompor pokthaphña. Xha sottena ateth ñerraꞌm ama es sepallteno amaꞌt koñeꞌtha Yomporeshoth. Yañapaꞌ oꞌwañ akwaꞌphsenayeꞌ senterrey. Sañapaꞌ oꞌ xha amhchaꞌtarethoyen sorrtena. Ñewa, eꞌñe pokteꞌ saꞌmhchaꞌtarethtepaꞌ tharroꞌmar ñerraꞌm poꞌñoxh oꞌch saꞌmhchaꞌtarethterrapaꞌ ñatoꞌ atthothpaꞌ oꞌch semnatey yamha oꞌch yaꞌmhchaꞌtarethtapreterrsa.

⁹ Tharraña napaꞌ nokthapeꞌchen ñatoꞌ ya ñeñthey allsensaretheypaꞌ Yomporpaꞌ ñatoꞌ oꞌch moenatan acheñeneshaꞌ yapaꞌ oꞌch aꞌypoꞌñerryet. Acheñeneshaꞌñapaꞌ xhach amtsen entenyet. Atthach kowanaꞌtyeney allowen acheñeneshaꞌ arr patsro, amaꞌt ñamha ñeñth Yompor poꞌmhllañotheñnaneshar oꞌch kowanaꞌtyet ñamet.

¹⁰ Eꞌñe yameꞌñeñoth Cristopaꞌ añña acheñeneshaꞌpaꞌ xhach otenet yapaꞌ amoꞌ es yeñoteno, tharraña sapaꞌ xhaña ateth sentena ñerraꞌmrratheꞌ atarr nanak eñotañes. Ñamha yapaꞌ xhach otenyet amoꞌ esosheꞌmayayye, tharraña sañapaꞌ atthaña awamenkathoyen sentena. Ñamha sapaꞌ nanak amhchaꞌnaꞌtpoꞌ entenset, yañapaꞌ amach akwaꞌphsenayeꞌ entyenyeto.

¹¹ Yañapaꞌ themeꞌttsen yemoeroxhtena amaꞌt yachporrñoth, yoꞌñpañotheꞌna yemoeroxhtena ñamha yemoelleñotheꞌna. Attha epayeꞌ atserrpenyet, ñamha ama yecheno allchaꞌ yeyxha.

¹² Eꞌñe yethorreñoth nanak yetarwasen eꞌñe ya yototh. Ñamha ñerraꞌm esempo sasareꞌtenyetpaꞌ yañapaꞌ oꞌch yenamatenanet Yompor paꞌnateña ñokpoet. Ñamha ñerraꞌm esempo poeꞌmoñeꞌteñothet kothareꞌtenyetpaꞌ yañapaꞌ atthach yaꞌwantenanet.

¹³ Ñamha ñerraꞌm esempo sochatseꞌtenyetpaꞌ yañapaꞌ xhach yamoꞌtstanet kowen. Ñamha amaꞌt themeꞌttsen entenyet ateth ñerraꞌmrratheꞌ es awaporeꞌtareth, ñeñth ama es sherbetso amaꞌt mamesha arr patsro.

¹⁴ Napaꞌ ama añekpayeꞌ nekellkënnaso añ ñoñets atthoch oꞌch nepenkatas, añekopña nekellkënnas atthoch nokthapeꞌchaterres eꞌñe kowen ateth ñerraꞌm eꞌñe nechemeres ñeñth nanak nemoerara.

¹⁵ Na poꞌñoxhpaꞌ ateth nentenes ñerraꞌmrratheꞌ eꞌñe nechemereshas. Tharroꞌmar awaña allempo neserrpareꞌtatoses kowen ñoñets ñeñth Yomporeshothpaꞌ oꞌ nameꞌñatasa Cristo Jesús, ñeñthpaꞌ ateth ñerraꞌm xho nechemereꞌtensa Cristokop. Ñeñthoꞌmarña theꞌpaꞌ notenes, amaꞌt eñall shonteꞌ acheñ ñeñthchaꞌ sokthapeꞌchaterreꞌ ñeñth kowentetsa Cristokop, tharraña eꞌñe pathrra sompor sepen ñeñth ñanom sameꞌñateꞌ, ñeñthpaꞌ ateth ñerraꞌm na.

¹⁶ Ñeñthoꞌmarña napaꞌ notenes: Ateth sentenen ateth nepena na eꞌñe kowen, sapaꞌxhoꞌña atethchaꞌ sepha samha.

¹⁷ Ñeñthoꞌmarña nemñonas masheñ Timoteo; ñapaꞌxhoꞌña nechemer nepeñ. Ñapaꞌ nanak nemorrenteña, ñapaꞌ xhokma ameꞌñenana Yepartseshar. Ñapaꞌ ñach seyerpateꞌ Cristo pokthaphña ñeñthara kothaphñats neyxhatyes errakmañen erratheꞌ pameꞌñeñothet apxhenet Yomporekop.

¹⁸ Patantaꞌttsospaꞌ nanak sommoꞌchena attho es señotyen. Sapaꞌ xhaꞌt sotenapañ ñatoꞌ napaꞌ amach nexhapoña sesho.

¹⁹ Tharraña poꞌñoxhchaꞌ nexhap sesho ñerraꞌm Yomporchaꞌ moenats. Amaꞌt thayekmapaꞌ pokteꞌ oꞌch awen ñerraꞌm ña moenats. Esempoch nexherrerrpaꞌ allempochña neñotos ñeñth ommoꞌchetsa, ñatoꞌ poꞌñoxhtheꞌ awamenkathet Yomporekop, amapaꞌ ñatoꞌ atthatheꞌ ommoꞌchenet.

²⁰ Amaña eꞌñe ñaptha yeserrpareꞌteñoth yorrtateññañeña Yompor poꞌkowenña atthoch atarr ayochreshathtena ña; poꞌwamenkotheꞌnachña yorrtateññañ poꞌkowenña.

²¹ Ñewa, theꞌpaꞌ oꞌch naꞌphthoꞌtas: ¿Errothenaꞌt semnen ñeñthchaꞌ ateth nephoses allempoch nexhap sesho? Ñatoꞌ oꞌch nekoñchatoses, ñatoꞌ oꞌch sokthapeꞌcherr kowen thayekma atthoch esempoch nexhappaꞌ amach eñalle atthoch oꞌch nekoñchatoses. Allempopaꞌ ñatoꞌ ellochña xhach nemoerossa eꞌñe kowen.