1 Corintios 3 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Arrpaꞌ all ama pathrrayeꞌ kothapeꞌcheno corintoꞌmarneshaꞌ

¹ Ñamha oꞌch notas masheñneshachaꞌ ñamha noxhaneshachaꞌ amaꞌt awañotheñ noteneñ oꞌch nokthapeꞌchatas eꞌñe kowen, ateth nokthapeꞌchateñ acheñ ñeñth eꞌñe chorrena Yompor Poekamkëñ. Tharraña amach errothenoth nokthapeꞌchataso tharroꞌmar sapaꞌ attha sokrrena ateth moenatenes sechets. Xha sottena ateth ñerraꞌm cheshatholl ñeñth ama eñotenaꞌ. Sapaꞌ ama eꞌñe xhennasaꞌ ñeñth kowentetsa Cristokop. Ñeñthoꞌmar themeꞌttsen attha nokthapeꞌchatenes ateth ñerraꞌm cheshatholleshasa.

² Ñeñthoꞌmarña awañotheñ attha neñotatenes ñeñth ama thorrapawoyaye Yomporekop. Ñeñthoꞌmarña amach errotheno nokthapeꞌchaterrserro ello ñeñth nanak echarr kothaphñats. Attha sottena ñerraꞌmrratheꞌ ematholl, napaꞌ atthach nemomatenes semomos ateth peñet ematholl, ñeñthara yoten kothaphñats Yomporekop ñeñth ama echarro. Ñamha ama echarroyeꞌ serrar napoenso, tharroꞌmar amatheꞌ errotheno setsoto, amaꞌt themeꞌttsenpaꞌ ama setsoteññañe Yompor pokthaphña ñeñth nanak echarr.

³ Tharroꞌmar themeꞌttsen attha sokrrena ateth moenatenes sechets. Poꞌñoxh ñerraꞌm esempo es yeyeꞌchapretannena, amapaꞌ ñerraꞌm xho yeꞌmoñeꞌtannena, ñeñthpaꞌ attha yokrrena ateth moenateney yechets. Ñeñthpaꞌ amaꞌtña atthera sorrteno ateth pena acheñ ñeñth ama ameꞌñenayo Cristo.

⁴ Tharroꞌmar ñerraꞌm xha yotyen: “Napaꞌ añchaꞌ nameꞌña Pablo”, poꞌpsheñeññapaꞌ ñatoꞌ oten: “Napaꞌ añchaꞌ nameꞌña Apolos.” Ñeñth ateth sepena xhachkaꞌye sottena ñerraꞌmrratheꞌ ñeñth ama Cristonaꞌtareyaye.

Poesheñaꞌttsoypaꞌ añ yethorraꞌyena Yomporekop ñeñth ateth yechyenya

⁵ Ñamha oꞌch notas, yapaꞌ ama esoyayye amaꞌt Apolos, amaꞌt na, añayakaꞌye ñeñthey thorretsa Yomporekop. Yapaꞌ amñaretheya atthoch oꞌch yameꞌñatasa. Poesheñaꞌttsoypaꞌ añ yethorraꞌyena Yomporekop ñeñth ateth yechyenya.

⁶ Ateth ñerraꞌm napaꞌ na ñanom sameꞌñateꞌ Yompor poꞌñoñ. Allothñapaꞌ awoꞌt wapa ñamha Apolos, ñapaꞌ ña seserrpareꞌtateꞌ atthoch alloꞌna sesen womenk phaꞌnmoeꞌ seyoxher. Oꞌch netmaꞌntacha ateth: Napaꞌ atthen ñerraꞌmrratheꞌ ñeñth nareꞌtets. Allothñapaꞌ oꞌch wapa poꞌpsheñeñ ñeñthchaꞌ sheꞌtamoꞌreꞌtosets, Yomporñapaꞌ ñach aꞌchpateꞌ narmets.

⁷ Ñeñthoꞌmar yeñoteñ ñeñth nareꞌtetspaꞌ ama esoyaye, amaꞌt ñamha ñeñth sheꞌtamoꞌreꞌtetspaꞌ ama esoyaye. Añña Yompor ñeñthña es aꞌchpatets ñaña sherbets.

⁸ Ñeñthoꞌmarña yeñoteñ ñeñthey nareꞌtets ñamha ñeñthey sheꞌtamoꞌreꞌtetspaꞌ eꞌñe parrokma yethorrena Yomporekop. Elloña Yomporpaꞌ apaꞌyerreychaꞌ poesheñaꞌttsoy kowen ñeñthchaꞌ atarr yokshaterreꞌ. Apaꞌyerreychaꞌ errothentheꞌ yethorraꞌyesnoma ñokop.

⁹ Yomporpaꞌ enteney ateth ñerraꞌmrratheꞌ parro yetarwasen ñokop. Sapaꞌ Yomporpaꞌ entenes ateth ñerraꞌm ña paꞌmres, allchaꞌ nanak thorrena ña. Ñamha Yomporpaꞌ entenes ateth ñerraꞌm pokoll oꞌch thomatey ña.

¹⁰ Ateth ñerraꞌm na, Yompor poemoereñothpaꞌ oꞌ yexhaten na oꞌch neñoch eꞌñe womenk, atthoch nanomchaꞌ ameꞌñaterraya acheñeneshaꞌ Jesucristo. Ñewa, oꞌch netmaꞌntacha ateth ñerraꞌm Yomporpaꞌ oꞌ yexhatenen atthoch oꞌch neñoch thomateꞌ pokoll eꞌñe womenk. Eꞌñe neñoteñoth oꞌch nathomat ñanom kellpach eꞌñe echarr. Allothñapaꞌ oꞌch wapa poꞌpsheñeñ ñeñthchaꞌ alloꞌna yexhkatnomoeꞌ. Tharraña ñeñthchaꞌ alloꞌna yexhkatnomoeꞌpaꞌ kothapeꞌchepaꞌ ñanom, pokteꞌtheꞌ ateth peñ, ñatoꞌ amatheꞌ.

¹¹ Ñewa, añ kellpach ñeñth anareth ñanompaꞌ ñeñth tomaꞌntenaya ateth ñerraꞌm ya ñanompaꞌ oꞌch yameꞌñera Jesucristo. Ñapthach Cristo yameꞌñerra. Ama eñalle poꞌpoñ ñeñthchaꞌ yameꞌñerra, tharroꞌmar amach errothenoth yameꞌñyo poꞌpoñ ñeñth ama Cristoyaye, añchaꞌña ñeñthara Cristo ñeñth oꞌ yotwanmas.

¹² Ñeñth oꞌ yameꞌñata Cristo, ñetpaꞌ alloꞌnach yeyxhatnenanet akopha atthoch womenk phaꞌnmoet poeyoxher. Ñewa, oꞌch netmaꞌntacha ateth: Ñerraꞌm xho yeyexhkaten pokoll ñanemchaꞌ kellpach yathomat. Oꞌchña echarr yathomatwa kellpachpaꞌ alloꞌnachña yesen yexhkatnomoeꞌ pokoll. Erraꞌtsenpaꞌ ñatoꞌ oꞌch yexhkatenan oropoꞌ pokoll ñeñth atarr nanak kowen, ñatoꞌ poꞌpsheñeñpaꞌ oꞌch yexhkatan asrepoꞌ ñeñth nanak kowen ñamha, poꞌpsheñeññapaꞌ oꞌch yexhkatan kowen mapyepoꞌ ñeñth nanak tsaꞌteꞌ. Tharraña ñatoꞌ poꞌpsheñeññapaꞌ oꞌch thomatan tablapoꞌ ñeñth ama tama kowenayaye, ñatoꞌ poꞌpsheñeñpaꞌ aspanapoꞌch, ñeñthpaꞌxhoꞌña amach tama kowenayaye, ñatoꞌ poꞌpsheñeñpaꞌ atthach yexhkatan ateth ñerraꞌmrratheꞌ poshoꞌllpoꞌ ñeñth ama kowenayaye amaꞌt mamesha.

^13-14 Esempowañenña allempoch werra Cristopaꞌ entatwaretheychaꞌ alloweney ñatoꞌ espoꞌtheꞌ yeyexhkatyes yepakëll, ñatoꞌ oropoꞌ, ñatoꞌ tablapoꞌ amapaꞌ ñatoꞌ ateth ñerraꞌm poshoꞌllpoꞌ. Ñewa, añchaꞌña yeñotateꞌ tsoꞌ. Yompor poyoroxhenñothpaꞌ oꞌch ethomampesyesonay yepakllaxhno. Ñewa, yeñoteñ ñeñth oropoꞌ amach poyo, asrepoꞌpaꞌxhoꞌña amach poyo, mapyepoꞌpaꞌxhoꞌña amach poyo. Tharroꞌmar ñeñthpaꞌ ama akrraño, ñeñthoꞌmarña nanak sherben. Tharraña tablapoꞌpaꞌ ñeñthpaꞌ poywach, aspanapoꞌpaꞌxhoꞌña poywach, poshoꞌllpoꞌpaꞌxhoꞌña poywach. Tharroꞌmar ñeñthpaꞌ ama es sherbeno, atthochña eñotwaretheychaꞌ eꞌñe poesheñaꞌttsoy errothentheꞌ yeyexhkatyes, ñatoꞌ kowentheꞌ ñatoꞌ amatheꞌ kowenayaye allempo es yethorraꞌyesnoma Cristokop. Ñerraꞌm esempoch ethomampesyesonay yeyexhkatar ñerraꞌm amach poyo yeyexhkatar, allempochña yeñoch attho es yethorraꞌyesnoma Cristokoppaꞌ ñeñthpaꞌ eꞌñe kowen. Ñeñthoꞌmarña allempopaꞌ apwerreychaꞌ eꞌñe poesheñaꞌttsoy ñeñthchaꞌ atarr yokshaterreꞌ.

¹⁵ Tharraña ñerraꞌm yeyexhkatarña xha poywapaꞌ oꞌch yeñoch attho yethorraꞌyesnoma Cristokoppaꞌ ama es sherbeno, xhach aꞌchenkatonay yeyexhkatar ñeñth Cristokpañ. Tharraña amaꞌtchaꞌ aꞌchenkatonay yeyexhkatar, yaña yekamkëñpaꞌ keshperrach. Tharraña eꞌñech yemoeroxhenñotha yekeshperra ateth ñerraꞌm xho poyen pokoll yañapaꞌ oꞌch yekeshpha.

¹⁶ Theꞌpaꞌ oꞌch notas poꞌpoñ: Sapaꞌ amaꞌt señoteñeña Paretspaꞌ oꞌ paꞌpakëll perres allowenes ñeñthes ameꞌñetsa. Yeparrokmatweñoth alloweneypaꞌ theꞌpaꞌ eꞌñe ateth enterrey ateth ñerraꞌm paꞌpakëll, allchaꞌ yexhena Poekamkëñ ña.

¹⁷ Tharraña ñerraꞌm eseshaꞌ alla sokthapeꞌchaterreꞌ ñeñth ama kowenayeꞌ enteno Yompor ñeñthña ateth petsa xhach ottena ñerraꞌmrratheꞌ xho aꞌmatenan Parets paꞌpakëll. Ñerraꞌm eseshaꞌña aꞌmateneꞌ Parets paꞌpakëll ñeñthña Yomporpaꞌ xhokmach aꞌchenkater. Tharroꞌmar Parets paꞌpakëllpaꞌ ñeñthpaꞌ Partsokpa, sakaꞌyeña oꞌ paꞌpakëll perresña Parets ñeñth eꞌñe ñokpa.

¹⁸ Oꞌch noterrserr poꞌpoñ: Eꞌñech señota sañeña. Ñerraꞌm eseshas otets, napaꞌ atarr es neñoten añe patsro, añ pokteꞌ oꞌwañepaꞌch es eñotatseꞌtyes eꞌñe patsoꞌmara. Añña pokteꞌ oꞌch orrta ateth ñerraꞌmrratheꞌ ama es eñoteno. Añepaꞌchña eñot ñeñth wetsa Yomporeshoth.

¹⁹ Tharroꞌmar ñerraꞌm esempo ñeñthey acheñey añe patsro ñerraꞌm xha yotenapañ yapaꞌ atarrtheꞌ es yeñoten, Yomporñapaꞌ ateth enteney ñerraꞌmrratheꞌ xha yotatseꞌtyen. Ñeñthpaꞌ anwareth ñamha awathotheñ Yompor poꞌñoño, ñeñthpaꞌ ateth oten: “Amaꞌt attho es eñotatseꞌtyenetpaꞌ Yomporñapaꞌ oꞌch eñotanet attha otatseꞌtyenet, amaꞌt ñetpaꞌ otenapoetañ nanaktheꞌ es eñotenet tharraña ñeñthpaꞌ shekëñtsa.”

²⁰ Añ ñoñetspaꞌxhoꞌña anwareth awathotheñ, ñeñthpaꞌ ateth oten: “Ñeñth xha otenapañ nanaktheꞌ es eñotenpaꞌ añña Yomporpaꞌ eñotenanet ñeñth ateth kothapeꞌchenet ñetpaꞌ eꞌñe orrena.”

²¹ Ñeñthoꞌmarña theꞌpaꞌ oꞌch alla noterrserr: Amach ellokma saꞌyeꞌchoxhtatannaꞌtyesatsto ateth yokthapeꞌchen ya ñeñthey arromñathey. Tharroꞌmar allowen ñeñth apoenes Yompor ñeñthchaꞌ sokthapeꞌchateꞌ kowen.

²² Amaꞌt na Pablonpaꞌ Yompor oꞌ naꞌn ñeñthen allowenakpas, ñamha amaꞌt masheñ Apolos, ñamha amaꞌt masheñ Pedro. Yomporpaꞌ apoeney allowen amaꞌt ñeñth yentyes añe patsro ñeñthchaꞌ yeyenpoeꞌ ñeñth alloch yoksheña Yompor. Yoksheñepaꞌch amaꞌt allempo yokrrena, ñamha amaꞌt allempoch yerroma, ñamha amaꞌt ora allpon ñeñth eñall theꞌ xhokmoepaꞌch koshateney. Ñamha ora allpon ñeñthchaꞌ eñalletatsa tsapathonethpaꞌ ñeñthpaꞌxhoꞌña koshatasepaꞌch. Amaꞌt allowen ñeñth paꞌnamen esoxhno ñeñthpaꞌ yokop ñeñthchaꞌ yeyenpoeꞌ.

²³ Elloña yapaꞌ eꞌñe poeyochreshaꞌ phoweney Cristo alloweney, Cristoñapaꞌ Parets Poechemer peneꞌ.