1 Corintios 2 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Arrpaꞌ all yerpaterranet ateth serrpareꞌtatenanetaꞌ awaña ñeñth attho Jesucristo rroma yokop korsocho

¹ Oꞌch notas masheñneshachaꞌ ñamha noxhaneshachaꞌ, awaña allempo nexhap seshopaꞌ neserrpareꞌtatoses kowen allempo naꞌpothonas Yompor pokthaphña. Allempopaꞌ ama koxhneshotheyeꞌ neñoñoth naꞌpothonaso Yompor poꞌñoñ ateth noñets koxhneshaꞌ entyen acheñeneshaꞌ. Ñamha ama koxhneshotheyeꞌ nokthaphñoth naꞌpothonaso Yompor pokthaphña ateth ñerraꞌmrratheꞌ acheñ ñeñth nanak eñotañ entweñ allowen acheñeneshaꞌ.

² Añña eꞌñe pathrra kothaphñats neserrpareꞌtatenes ñeñth attho Jesucristopaꞌ rroma yokop korsocho. Tharroꞌmar allempopaꞌ ateth noten neyoxhro ñeñthach patherr oꞌch neserrpareꞌtatanet.

³ Amaꞌt allempopaꞌ ama asherbenotheyeꞌ norrtoso sesho. Ñamha allempopaꞌ atarr nemhchaꞌten, xha neyorwos nellkëñoth.

⁴ Ñamha ama neꞌñoreñotheyeꞌ eꞌñe kowen neserrpareꞌtataso atthoch sameꞌñaꞌna eꞌñe neñoñotha ñeñth ateth pena ñeñth xhach otenapañ ñapaꞌ nanaktheꞌ es eñoten. Añña eꞌñe neserrpareꞌteñotha norrtatonas ñeñth ateth phonay Parets Poekamkëñ eꞌñe poꞌwamenkoth Yompor.

⁵ Ñamha ya acheñeypaꞌ amaꞌt koxhneshaꞌtatsta yokthaphñapaꞌ tharraña napaꞌ ama nemno eꞌñe na neñoteñothpaꞌ oꞌch nameꞌñatasa. Napaꞌ añña nemnen oꞌch nameꞌñatasa eꞌñe Yompor poꞌwamenkoth.

Yompor Poekamkëñpaꞌ ñeñthña es yeñotateneꞌ

⁶ Tharraña amaꞌt atethpaꞌ esempopaꞌ oꞌch neserrpareꞌtach ñeñth oꞌ ameꞌñerra womenk. Oꞌch neserrpareꞌtatanet eꞌñe koxhneshaꞌ kothaphñats, ñeñthara Yompor pokthaphña ñeñth atarr es eñotets. Tharraña añ kothaphñatspaꞌ amach patsoꞌmareyaye, ñamha amach añeyaye amhchaꞌtarethexhno pokthaphña ñeñth añe patsroꞌtsen. Tharroꞌmar ñetpaꞌxhoꞌña wañerretchaꞌ esempo.

⁷ Yomporepaꞌchña pokthaphña yaꞌpotha ñeñth atarr es eñotets, ñeñthara amaꞌt awathotheñpaꞌ ama eñotpawo pokthaphña. Tharraña amaꞌt allempo ama ayexhkatarethtenaꞌ patspaꞌ ñeñthñapaꞌ oꞌ anarethetwa atthoch kowenchaꞌ yaꞌkeshphatarethterra esempowañen.

⁸ Añña amhchaꞌtarethneshaꞌ ñeñth añe patsroꞌtsaꞌyenpaꞌ ama xhapaneto Yompor pokthaphña. Ñerraꞌm xhapanetañchaꞌ awaña poeyoxhretopaꞌ amatheꞌ korsoꞌtamperetañeña Yepartseshar ñeñth atarr nanak kowen.

⁹ Tharroꞌmar ateth anwarethta Yompor poꞌñoñ awath, ñeñthpaꞌ ateth oten: Amaꞌt awatha ya ñeñthey arromñatheypaꞌ ama yentare ñeñth oꞌpatatenya Yompor ñeñth koxhneshaꞌtetsa yokop, ñamha ama yeꞌmare, ñamha ama xhaponayeꞌthe yeyoxhro ñeñth oꞌpatatenya Yompor ñeñtheychaꞌ morrenterraya ña.

¹⁰ Tharraña ñeñtheyña ameꞌñerraya ñeñthey alloweneypaꞌ oꞌ eñotaterrey Yompor eꞌñe ña Poekamkëñoth ñeñth chorratenya. Poꞌñoxh yeñoteñ Yompor Poekamkëñpaꞌ ña eñotweneꞌ allowen Yompor pokthaphña ñamha amaꞌt ñeñth ama eñotpawoyaye.

¹¹ Atthekma yepena yamha ñeñthey acheñey. Amach errothenoth poꞌpsheñeñpaꞌ eñotonay ateth yokthapeꞌchen ya yeyoxhro, eꞌñech yaptha yeñoteñ. Atthekma pena ñamha poꞌpotantañ amach errothenoth eñotano Yompor pokthaphña, eꞌñech Yompora ñapoeth Poekamkëñ eñoteneꞌ.

¹² Yapaꞌ oꞌ yagapoñ Yompor Poekamkëñ, amaña acheña pokthaphña yagërro ñeñth patsoꞌmarekpa. Ñeñthara Yompor Poekamkëñ ñeñth xhapateneꞌ yeyoxhro ñamha ñeñth yeñotateneꞌ attho ña moerenya. Eꞌñe poemoereñothey shonteꞌ es apaꞌyeney.

¹³ Ñamha ñeñth ñoñets ñeñth yexhateney Yompor Poekamkëñpaꞌ ñeñthara ñoñets oꞌch yeserrpareꞌtatas samha amaꞌt ñamha poꞌpotantañexhno. Ñeñthpaꞌ ama añeyaye ñoñets ñeñth ateth yexhatyen acheñeneshaꞌ ñeñth eñotañetyetsa. Ñamha ñeñth ñoñets attho yexhateney Yompor Poekamkëñothpaꞌ ñeñth yeyxhatenes samha ñeñthes oꞌ chorrerrsa samha Yompor Poekamkëñ.

¹⁴ Tharraña acheñeneshaꞌ ñeñth ama chorreñaꞌ Yompor Poekamkëñpaꞌ amach errothenoth xhapaneto Yompor pokthaphña ñamha amach errothenoth agapoñeto ñeñthchaꞌ apanetañ Yompor Poekamkëñoth. Ñerraꞌm yeserrpareꞌtatanet attho es apoeney Yompor Poekamkëñothpaꞌ ñetpaꞌ xhach otyeset atthoꞌ yotatseꞌtyen. Tharroꞌmar ñaptha xhenana poeyoxhro ñeñth chorrena Yompor Poekamkëñ.

¹⁵ Tharraña añña ñeñth chorrena Yompor Poekamkëñpaꞌ ñetpaꞌ xhenanet poeyoxhreto ora ñeñth ateth pena Yompor. Tharraña ñeñth ama chorreno Yompor Poekamkëñ, ñetñapaꞌ amach errothenoth xhapaneto poeyoxhro esokoptheꞌ ateth penaña ñeñth chorrena Yompor Poekamkëñ.

¹⁶ Eꞌñe atthekma oteney Yompor poꞌñoñ ñeñth anwareth awathotheñ, ñeñthpaꞌ ateth oten: “Eseshaꞌwatheꞌkaꞌ eñoteꞌña ñeñth ateth kothapeꞌchen Yompor atthoch ñetpaꞌ oꞌch kothapeꞌchateret ñamet Yompor.” Tharraña theꞌña yapaꞌ atthekma yokthapeꞌchen ateth kothapeꞌchen Cristo.