1 Corintios 13 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Eñall patherr ñeñth nanak sherbets, ñeñthpaꞌ añ: attho amorrentannaꞌtpawepaꞌch alloweney

¹ Amaꞌt yeñosyesatset eꞌñe kowen paꞌnamen acheñ poꞌñoñetoñaꞌ ñerraꞌm ama yemorreñcho yamoꞌtspaꞌ eꞌñe yeñosyeñothpaꞌ añña Yomporpaꞌ atthach enteney ateth ñerraꞌmrratheꞌ kon ñeñth attha amaꞌtoxhtetsa. Tharroꞌmar ama yemorrenteñotheyeꞌ yeñosyeno paꞌnamen ñoñets. Ñatoꞌ amaꞌt yapaꞌ yeñosatsetyes eꞌñe kowen ateth ñerraꞌm Yompor poꞌmhllañotheñnanesharñaꞌ ñerraꞌmña ama yamoꞌts yemorrentenopaꞌ eꞌñe yeñosyeñoth Yomporpaꞌ atthach enteney ateth ñerraꞌmrratheꞌ patashtalla challachallatspenet. Tharroꞌmar ama yemorrenteñotheyeꞌ yeñeno.

² Ñamha amaꞌt yapaꞌ yeñotatset aꞌmhteꞌ Yompor poꞌñoñ, tharraña ñerraꞌm ama yemorreñcho yamoꞌts, atethpaꞌ amach esoyeꞌ entenye. Ñamha amaꞌt yeñotatset oꞌch yaꞌpotha ñeñth ñaptha eñoten Yompor tharraña ñerraꞌm ama yemorreñcho yamoꞌtspaꞌ ñeñthpaꞌxhoꞌña amach esoyeꞌ entenye Yompor. Ñamha amaꞌt yeñotatset ora allpon ñeñth eñall, tharraña ñerraꞌm ama yemorreñcho yamoꞌts, ñeñthpaꞌxhoꞌña amach esoyeꞌ entenye Yompor. Ñamha ñatoꞌ nanak yeyemteñoth Yomporpaꞌ apweney allowen ñeñth yenamoeñ, amaꞌt ñeñth echarr yentyen. Ñatoꞌ oꞌch netmaꞌntacha ateth: Ñatoꞌ oꞌch yoch Yompor, añ aspenethpaꞌ chenkëpaꞌ. Ñatoꞌ eꞌñe yeyemteñoth Yomporpaꞌ oꞌchxhoꞌ chenka. Tharraña amaꞌt yeyemteñoth Yomporpaꞌ oꞌ yephowa ateth, tharraña ñerraꞌm ama yemorreñcho yamoꞌtspaꞌ atthekma enteney Yompor, ama esoyayye.

³ Ñamha amaꞌt es yapaꞌyesatsech wokchañneshaꞌ ora allowen ñeñth yechyenñaꞌ, ñerraꞌm ama yemorrenteñotheyeꞌ es yapaꞌyenanetopaꞌ amaꞌt ateth yephatstapaꞌ Yomporpaꞌ amach kowenayeꞌ entenye. Ñamha amaꞌt eꞌñe yameꞌñeñoth pokteꞌ yentatsech poeꞌmoñeꞌteñothetay oꞌch chamayet ora bethnathotheypaꞌ tharraña ñerraꞌm ama yemorrenteño yamoꞌts, amaꞌt ateth yephatstapaꞌ Yomporpaꞌ attherach amach kowenayeꞌ entenye.

⁴ Tharraña ñerraꞌm esempo poꞌñoxh xho yemorrenteña yamoꞌtspaꞌ eꞌñech akopha es yephaꞌyenanet, atthach yaꞌwantenanet ñamha xhochña yaꞌmoerañtena. Ñamha amach xha es yeyeꞌchapretyenaneto, ñamha amach xha yommoꞌchanaꞌtatstaneto.

⁵ Ñamha amach yañeña entatstatso eꞌñe koweney. Ñamha ñerraꞌm esempo poꞌñoxh xho yemorrenteña yamoꞌtspaꞌ eꞌñechña pokteꞌ es yephaꞌyenanet, ñamha amach aña yeꞌnatsto ñeñth eꞌñe ateth yemnen ya. Añchaꞌña yeꞌnen ñeñth ateth moenen poꞌpsheñeñ. Ñamha ñerraꞌm esempo poꞌñoxh xho yemorrenteña yamoꞌtspaꞌ amach xha yeꞌmoñeꞌtyenaneto, ñamha amach xha atsrreꞌmoxhen yentwenaneto.

⁶ Ñamha ñerraꞌm esempo es phowa poꞌpsheñeñ ñeñth ama pokteyeꞌ enteno Yomporpaꞌ ñerraꞌm poꞌñoxh amoerañaypaꞌ yapaꞌ amach xha yokshatsto. Añchaꞌña yokshapretena ñerraꞌm esempo eꞌñe kowenareꞌ es penet.

⁷ Ñerraꞌm poꞌñoxh xho yemorrenteña yamoꞌtspaꞌ amaꞌt xho erroth phonaypaꞌ yapaꞌ xhokmach yaꞌwantoñ. Ñamha ñerraꞌm poꞌñoxh xho yemorrenteña yamoꞌtspaꞌ xhokmach yeyemcha ñeñth ateth pena amapaꞌ ñeñth ateth oten. Ñamha ñerraꞌm poꞌñoxh xho yemorrenteña yamoꞌtspaꞌ eꞌñe yeyemteñothanet xhokmach yeyenpoenanet atthoch womenk pet poeyoxher ñamet Yomporekop. Ñamha ñerraꞌm poꞌñoxh xho yemorrenteña yamoꞌtspaꞌ xhokmach yaꞌwantaꞌwanom paꞌnamen topateñtsoxhno.

⁸ Attho yemorrentannenapaꞌ ñeñthpaꞌ amach awañañathto amaꞌt errponaña. Ñamha theꞌpaꞌ amaꞌt yaꞌpotheññañeñ Yompor poꞌñoñ tharraña esempowañenpaꞌ wañchaꞌ attho yaꞌpotheñ theꞌ. Ñamha amaꞌt attho theꞌpaꞌ yeñosyen poꞌpoñ ñoñtsopaꞌ ñeñthpaꞌxhoꞌña esempowañenpaꞌ wañchaꞌ. Ñamha amaꞌt attho yeñotañtena theꞌpaꞌ ñeñthpaꞌxhoꞌña esempowañenpaꞌ wañerrchaꞌ.

⁹ Tharroꞌmar amaꞌt allpon es yeñotyen theꞌpaꞌ ama eꞌñe yeñotweñe poktakma. Ñamha amaꞌt theꞌpaꞌ yaꞌpotheññañ Yompor poꞌñoñ ñeñthpaꞌxhoꞌña ama eꞌñe yeñotweñe poktakma.

¹⁰ Tharraña ñerraꞌm esempoch werra Cristo ñeñth eꞌñe eñotañtetsa poktakmapaꞌ allempoña yapaꞌ oꞌch eꞌñe es yeñotwawa yamha.

¹¹ Ñewa, ñatoꞌ oꞌch netmaꞌntacha ateth: Napaꞌ allempo cheshennaꞌpaꞌ attha neñosatseꞌtyeseꞌth ateth eñen cheshatholleshaꞌ. Ñamha allempopaꞌ attha nokthapeꞌchatseꞌtyeseꞌth ateth kothapeꞌchyen cheshaneshaꞌ. Ñamha añach kowen nentapretyeseꞌth ateth kowen entyen cheshatholleshaꞌ. Tharraña theꞌpaꞌ oꞌ nepoꞌnpaꞌ oꞌwañ nokthapeꞌchatseꞌtyes ateth pena cheshatholleshaꞌ.

¹² Ñamha yapaꞌ ama yeñotweno eꞌñe ora ateth pena Parets. Ñewa, ñatoꞌ oꞌch netmaꞌntatererr ateth: Yapaꞌ xha yottena ateth ñerraꞌmrratheꞌ rerpatotha yekweñ Yompor, amach tama yechmeꞌteñe. Tharraña esempowañenpaꞌ yenterchaꞌ eꞌñe allameꞌtets. Ñamha theꞌpaꞌ attho es yeñotyen mameshaꞌtets, tharraña esempowañenpaꞌ yeñotwerrchaꞌ ñeñth eꞌñe ateth pena Parets, eꞌñech yeñotañetwerra ateth pena theꞌ Yomporpaꞌ eꞌñe eñotweney ñeñth ateth yepena.

¹³ Ñeñthoꞌmar theꞌpaꞌ yeñoteñ eñall maꞌpa ñeñthchaꞌ ama awañañathtatso ñeñthpaꞌ añ: attho yeyemteña Yompor, ñamha attho yeyemteñoth yekwameꞌteñ ñeñth oꞌpatatenya, ñamha attho yemorrentannena. Tharraña añ maꞌpoꞌmarpaꞌ añña nanak sherbets Yomporekop attho yemorrenteña allowen acheñeneshaꞌ.