1 Corintios 10 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Arrpaꞌ all yerpatanet ñeñth ateth phatseꞌtyeseꞌth awath israelenaꞌtarneshaꞌ

¹ Ñeñthoꞌmar theꞌpaꞌ masheñneshachaꞌ ñamha noxhaneshachaꞌ oꞌch noterrserr poꞌpoñ. Nemneñ oꞌch neñotatas ñeñth ateth peꞌth awath yatañneshañ. Allempo chopeñeꞌchyeseteꞌth amarathareroꞌmarpaꞌ añ anmaweteꞌth os ñeñth kowamphsataneteꞌth Yompor eꞌñe allowenet. Ñamha Yomporpaꞌ ellopaꞌtetstatan saꞌp atthoña orrtatanet thoñ allchaꞌ eꞌñe kowen oñmoet patso. Atthoña metanwet saꞌp ñeñth otenet Saꞌp Tsasasen.

² Ñamha awoꞌ naꞌnmet Moisés ñeñthchaꞌ paꞌmhchaꞌtarether pet. Ñamha eꞌñe pameꞌñeñothet Moisés allowenetpaꞌ awoꞌt aꞌnatenanet os. Ñatoꞌ oꞌch netmaꞌntacha ateth, ñetpaꞌ allowenet apatarethtet oñoth ñamha osoth eꞌñe poeyemteñothet Moisés.

³ Ñamha allowenet Paretspaꞌ apaneteꞌth poerrar ñeñth rreteꞌth allowenet ñeñth moeñaneteꞌth entoth.

⁴ Ñamha allowenetpaꞌ xhokmoꞌ apaneteꞌth Parets ñeñth orreteꞌth allowenet. Tharroꞌmar awath allempo potanet oñ eꞌñe mapoetoth alloth orretpaꞌ ñeñthña mapoeꞌpaꞌ tomaꞌntenana Cristo ñeñth Partsotets ñamha. Poꞌñoxh Cristo ñeñth onaweteꞌth ñamha ñeñthara ñapaꞌ ña kothaꞌnmaweteꞌth.

⁵ Amaꞌt Yomporpaꞌ nanakoꞌ aꞌnatanetañeꞌthpaꞌ tharraña ñapaꞌ amoꞌ pokteyeꞌ entaneꞌthe attho ñetpaꞌ athpareꞌtyeseteꞌth. Ñeñthoꞌmarña awoꞌ aꞌkllatatwanet eꞌñe alla amaratho. Poesheñaꞌttsoꞌ pokteꞌ enteꞌth Yompor ñeñth eꞌñe kowen kothapeꞌchyestseꞌth.

⁶ Ñamha ñeñth ateth phatseꞌth ñeñth ama pokteyayepaꞌ añ yexhateney yamha amach yeyeꞌchapretatsto yamha ateth.

⁷ Ñamha amach yeyomporer yephatsche ñeñth ayexhkatareth ñeñth maꞌyochyeseteꞌth ñet patantaꞌtets. Yapaꞌ yeñoteñ añekop ateth peteꞌth, tharroꞌmar ateth anwareth Yompor poꞌñoñ, ñeñthpaꞌ ateth oten: “Acheñeneshaꞌpaꞌ oꞌ anorrxhaꞌtet, oꞌña anorrxhaꞌtwetpaꞌ oꞌ rrallmeꞌchapretet. Allothpaꞌ orryeset ñamha. Allempoña oꞌ rrallmeꞌchapretwetpaꞌ oꞌ tantrraꞌterret oꞌxhoꞌ alla koshameꞌtamperret poeyexhkatar.”

⁸ Ñamha ama pokteyaye oꞌch yekañoreshaꞌten ateth peteꞌth ñet patantaꞌtets. Ñeñthoꞌmarña shonteꞌ acheñeneshaꞌ kollaꞌwatsa allempo, eꞌñe veintitrés mil acheñeneshaꞌ rromats eꞌñe pamtharrokma.

⁹ Ñamha ama pokteyaye eꞌñe poꞌtomñapaꞌ oꞌch yaꞌllokchameꞌch Yompor. Ñeñth ateth peꞌth patantaꞌtets acheñeneshaꞌpaꞌ ñeñthoꞌmaroꞌña shonteꞌ acheñeneshaꞌ ñeñth axhanatyes shechephpaꞌ eꞌñe kollaꞌwet.

¹⁰ Ñamha ama pokteyaye oꞌch yethanmareꞌcha Yompor. Ñeñth ateth peꞌth ñamha patantaꞌtets acheñeneshaꞌpaꞌ ñeñthoꞌmaroꞌña amñarethtet ñeñth amtsañpaꞌ oꞌ aꞌkllatwanet.

¹¹ Tharroꞌmar ñetpaꞌ ateth wapyesaneteꞌth paꞌnamen allochña yapaꞌxhoꞌña oꞌch yeñoch yamha ama pokteyaye oꞌch ateth yepha yamha. Ñeñthoꞌmarña amaꞌt awathpaꞌ ateth kellkët ateth peteꞌth allempo, ñeñthpaꞌ eꞌñe yokpaꞌnaña ñeñthey theꞌpaꞌxhoꞌña waponayach allempoch mellapoterra. Añpaꞌ ñeñth ateth yexhateney yamha amach yephatsto ateth peteꞌth ñet.

¹² Ñeñthoꞌmarña theꞌpaꞌ oꞌch notas, eꞌñech señota. Amach sotaphsaꞌtatsto, napaꞌ amach nepho ñeñth ateth peteꞌth awath. Tharroꞌmar ñerraꞌm esempo yot atethpaꞌ ñatoꞌrraña machayotha alla ateth yeperra yamha ñeñth ama pokteyaye.

¹³ Tharroꞌmar alloweneypaꞌ xhokmach waponaya topateñets, ñeñthara topateñets ñeñth yexhenoya alloweney ñeñthey arromñathey. Tharraña Yomporpaꞌ xhokmach yeyomcha tharroꞌmar ñapaꞌ ama moenatenye oꞌch topatey atthoch metanonay yewamenk. Tharraña ñerraꞌm esempoch xhaponaya topateñetspaꞌ ñapaꞌ xhokmach orrtatonay atthoch yaꞌwanteꞌ atthoch amach metanonaye yewamenk.

¹⁴ Ñeñthoꞌmarña, masheñneshachaꞌ ñamha noxhaneshachaꞌ, notenes, eꞌñe pokteꞌ oꞌch saꞌypoꞌñaꞌwerr ñeñth ayexhkatarethexhno ñeñth poꞌyomporer penet ñet.

¹⁵ Sapaꞌ señotweñ ñeñth kowentetsa Yomporekop. Ñeñthoꞌmarña oꞌch notas, ¿amaꞌt pokteꞌ senteñe ñeñth oꞌ notwas?

¹⁶ Ñeñthoꞌmarña allempo yorreññañ ñeñth tomaꞌntenaya Cristo poꞌrras ñeñth ateth anareth Yomporekoppaꞌ, xhoch ñanom yemaꞌyochampesya atthoch yeparasyosoꞌch Yompor. Allempo yorreñ alloweneypaꞌ eꞌñech yeyemteñoth Cristo ñeñth rromats yokop poꞌñoxhpaꞌ oꞌch yeparrokmatwa alloweney amaꞌt ñamha Cristo. Ñamha atthekmach yepena ñerraꞌm esempo yerren pan ñeñth tomaꞌntenaya Cristo poꞌchets. Allempo yeshotaꞌten pan, oꞌch yerreñ parro alloweneypaꞌ eꞌñech yeyemteñoth Cristo ñeñth aꞌrroyeꞌ poꞌchets yokop poꞌñoxh allempopaꞌ eꞌñe yeparrokmatwen alloweney amaꞌt ñamha Cristo.

¹⁷ Ñamha amaꞌtchaꞌ shonteypaꞌ eꞌñech pathrra pan yeshotaꞌt ñeñthchaꞌ yerraꞌyes amaꞌt alloweney. Ñeñthoꞌmarña yeñoteñ amaꞌt shonteypaꞌ eꞌñe yeparrokmateñoth Cristopaꞌ eꞌñe pathrra enteney alloweney, ñamha ñeñthara eꞌñech poꞌchets peney.

¹⁸ Ñewa, oꞌch yokthapeꞌch ñamha ñeñth ateth peꞌth israelenaꞌtarneshaꞌ. Ñetpaꞌ oꞌch moetset wakësh amapaꞌ carnero Yomporekop. Allothñapaꞌ oꞌch rrenet ñeñth poechaꞌyetsa. Allempo rreñetpaꞌ poꞌñoxh eꞌñech poeyemteñothet Yomporpaꞌ oꞌch parrokmatet epoet Parets.

^19-20 Ñewa, poꞌñoxhpaꞌ ama notenso ñerraꞌm esempo serren poꞌchets ñeñth amtsareth ayexhkatarethekoppaꞌ oꞌch separrokmat epas, tharroꞌmar amaꞌt tomaꞌntateñetañ Paretspaꞌ ama Partsoyaye. Añña notenes ñerraꞌm esempo ñeñth ama ameꞌñenayo Cristopaꞌ oꞌch es moetset ayexhkatarethekop, tharraña poꞌñoxhpaꞌ añekpa moetseñet oneñethekop, ama añekpayeꞌ moetseñeto Yomporekop. Ñeñthoꞌmarña napaꞌ notenes ñatoꞌ amach serratsche tharroꞌmar ama nemno eꞌñe serreñothpaꞌ theꞌt separrokmaten epas oneñeth.

²¹ Poꞌñoxhpaꞌ amatheꞌ errothenoth yeparrokmatoña epay Yepartseshar Cristo ñerraꞌm xha yeparrokmaten epay oneñeth. Ñeñthoꞌmarña notenes amatheꞌ errothenoth eꞌñe yeyemteñoth Cristopaꞌ oꞌch yorr ñeñth ñokop, ñamha ñerraꞌm aña yetsoten ñeñth oneñethekop. Ñamha amatheꞌ errotheno yerroña parro ñeñth anareth Yepartsesharekop, ñamha ñerraꞌm aña yetsoten ñeñth oneñethekop.

²² Ñerraꞌm ateth yephapaꞌ xhatheꞌ yaꞌllokchameꞌch Yompor ñamha eꞌñe poempaꞌteñotheypaꞌ xhatheꞌ yaꞌtsrreꞌmach. Xhatheꞌ yotta ñerraꞌm yapaꞌ nanak awamenkathey, ñañapaꞌ amatheꞌ awamenkatheyeꞌ yenteñe.

Attho amaꞌt eꞌñe pokteñ oꞌch es yephaꞌyeseñpaꞌ tharraña amach yephatsto

²³ Ñeñthoꞌmar theꞌpaꞌ oꞌch alla noterrserr, eꞌñe pokteñ oꞌch yerreneñ poꞌchets ñeñth amtsareth ayexhkatarethekop, tharroꞌmar Yompor poꞌñoñpaꞌ ama otenñe amach yephatsto ateth. Tharraña amaꞌt eñalleñ paꞌnamen ñeñth eꞌñe pokteñ oꞌch yephapaꞌ tharraña ñerraꞌm ñeñthpaꞌ ama añekpayaye alloch womenk yephaꞌ yeyoxher Yomporekoppaꞌ ñewa, ñeñthepñapaꞌ amach ateth yephatsto. Amaꞌt eñalleñ paꞌnamen ñeñth eꞌñe pokteñ oꞌch yephapaꞌ tharraña ñerraꞌm ñeñthpaꞌ ama añekpayaye alloch yeyenpoeꞌ poꞌpsheñeñ atthoch womenk phan poeyoxher Yomporekoppaꞌ ñewa, ñeñthepñapaꞌ amach ateth yephatsto.

²⁴ Añchaꞌña oꞌch yepena atthoch yeyenpoeꞌ yamoꞌts atthoch oꞌch womenk pet poeyoxher. Amachña aña yellkatsto ñeñth eꞌñe yokpa.

²⁵ Ñamha oꞌch notas ñeñthchaꞌ ateth sepha: Ñerraꞌm esempo seta allekma vendenet poꞌchetspaꞌ amach saꞌphthoꞌtatsche ñeñth vendets, amach sotatsche ateth: “Añ poꞌchetspaꞌ ¿añeꞌt ñeñth amtsareth ayexhkatarethekop?” Amach saꞌphthoꞌtatsto allochñapaꞌ eshekchaꞌ serreꞌ eꞌñe kowen.

²⁶ Eꞌñe pokteꞌ oꞌch yerren amaꞌt erraꞌtsentheꞌ poꞌchets tharroꞌmar allowen es yentyen arr patsro ñeñthpaꞌ Yomporo poeyexhkatwar. Ñamha amaꞌt ora patspaꞌ eꞌñe ñokma.

²⁷ Theꞌpaꞌ oꞌch notas poꞌpoñ ñeñthchaꞌ ateth sepha. Ñerraꞌm esempo ñeñth ama ameꞌñenaye Cristopaꞌ oꞌch waꞌñas oꞌch serrallmeꞌchapreteñaꞌ ñamha ñerraꞌm sapaꞌ sesechapaꞌ, eꞌñe pokteꞌ oꞌch awes ñamha oꞌch serraꞌ amaꞌt erraꞌtsenchaꞌ poꞌchets apaset. Poꞌtomña amach sotatsto ateth: “Taꞌ, ¿pokteꞌtheꞌ oꞌch yerren añ poꞌchets? Ñatoꞌ ñeñthara añ poꞌchets ñeñththeꞌ amtsareth ayexhkatarethekop.”

^28-29 Tharraña oꞌch notas poꞌpoñoneth: Ñerraꞌm alloꞌtsen poesheñarr ñeñth ama pokteyeꞌ entenaye oꞌch yerren poꞌchets ñeñth amtsareth ayexhkatarethekoppaꞌ ñerraꞌm ñapaꞌ oꞌch otas: “Añ poꞌchetspaꞌ ñeñth amtsareth ayexhkatarethekop”, ñewa, allempopaꞌ añ pokteꞌ amach serratsche. Amach yerratsche tharroꞌmar añ pokteꞌ amach yephatsto ñeñth ama pokteyeꞌ enteno poꞌpsheñeñ, ñatoꞌ amaꞌt yapaꞌ eꞌñe pokteꞌ yenteñeñ oꞌch yerreꞌ. Ñewa, ñatoꞌ sapaꞌ oꞌch sot: “Taꞌ, ¿esoꞌmartheꞌ pokteꞌ yapaꞌ oꞌch yepha ñeñth ateth pokteꞌ enten poꞌpsheñeñ? ¿Esoꞌmartheꞌña ama pokteyaye oꞌch yepha ñeñth ateth pokteꞌ yenten ya?”

³⁰ Ñamha ñatoꞌ oꞌch sot ateth: “Ñerraꞌm poꞌñoxh neparasyosoꞌteñothpaꞌ nerren nerrarpaꞌ ¿esoꞌmartheꞌña otenet ama pokteyaye oꞌch nerraꞌ ñeñth oꞌ neparasyosoꞌtampeswa?”

³¹ Ñeñthoꞌmar theꞌpaꞌ oꞌch notas: Amaꞌt erraꞌtsena es yephaꞌyenpaꞌ añ pokteꞌ oꞌch yorrtena eꞌñe kowen, atthoch acheñeneshaꞌ oꞌch ayeꞌchoxhtateññañet ñamet Yompor. Amaꞌt allempo es yerraꞌyen, ñamha amaꞌt allempo es yorryenpaꞌ añ pokteꞌ oꞌch yorrtaten eꞌñe kowen Yomporekop.

³² Añ pokteꞌ amach yephatsto ñeñth ama pokteyeꞌ enteno judioneshaꞌ. Ñamha añ pokteꞌ amach yephatsto ñeñth ama pokteyeꞌ enteno ñeñth ama judioneshayaye. Ñamha amach yephatsto ñeñth ama pokteyeꞌ enteno allowen acheñeneshaꞌ ñeñth ameꞌñenaya Yompor. Tharroꞌmar ñerraꞌm ateth yepha ñeñth ama pokteyeꞌ entenetopaꞌ xhatheꞌ yaꞌpsataterranet Yompor.

³³ Ñeñthoꞌmarña napaꞌ amaꞌt erraꞌtsena nephaꞌyenpaꞌ añña nemneñ oꞌch nokshach allowen acheñ ñeñth ateth pokteꞌ entenet ñet. Tharroꞌmar napaꞌ ama neꞌneno ñeñth eꞌñe nokpa, añña neꞌnen ñeñth sherbets allowen acheñeneshakop. Tharroꞌmarña napaꞌ xhokma neꞌnen ateth, allochñapaꞌ atthoch naꞌkeshphaterranet.