Tito 3 - Nuevo Testamento Tzeltal de Amatenango

Te tut ya skꞌan ya spas te hermanoetike

¹ Akꞌtalanbeya snaꞌik te ya yakꞌik ta jkuenta te gobiernoe y sok te juꞌeletike. Yauk me xchꞌuunik mantal, y siluk me tiempo chapal ta spasel te tut leke.

² Ma me ayuk machꞌa ma lek ya yalbe skꞌoplal. Ma me yauk slijkesik kꞌop. Ayuk slekil yoꞌtanik. A me yakꞌik ta ilel te kꞌun yoꞌtanik te tut ya spasik sok te genteetike.

³ Porke te nail toe jich ma pꞌijukotik ekꞌa, y ma jchꞌuunbeytik smantal te Diose. Chꞌayel ayotik, sok ayotik ta mosoinel yuꞌun spisil ta jkaj te tutik kꞌupinbil ta skuenta balmilale. Ma lekuk ayotik, sok la kilbey jba koꞌtantik, y la jpꞌaj jbajtik ta jujutul.

⁴ Pero te Diose, te jKoltawanej kuꞌuntike, la yakꞌ ta ilel te slekil yoꞌtan sok xkꞌuxul yoꞌtan ta stojol te genteetike.

⁵ La skoltayotik, ma yuꞌunuk lek te tut ya jpastik te joꞌotike, sino ke la yakꞌ slekil yoꞌtan ta jtojoltik. Pokbilotik kꞌootik kꞌalal la xchaꞌ yayintesotik ta achꞌe. Jaꞌ ta skuenta te Chꞌul Espiritue te la yaꞌbotik te achꞌ kuxlejale.

⁶ Y sok ta skuenta te Jesucristo, te jKoltawanej kuꞌuntike, la yaꞌbotik te Chꞌul Espíritu te ma xatꞌbiluke,

⁷ yuꞌun la me skoltayotik yuꞌun jmultik ta skuenta te slekil yoꞌtane. Jich ya me kichꞌtik te kuxlejal sbajtel kꞌinal te ya jmalitike.

⁸ Jaꞌ to batsꞌi lom jich. Sok ya jkꞌan te jaꞌ ya awaꞌtelin yalel sil tiempo, skuenta yuꞌun jich ya me yoꞌtanin spasel te tut lek te machꞌatik ya xchꞌuunik te Diose. Lek ta spasel spisil to, sok jaꞌ ya xlekub yuꞌun ta spisilik.

⁹ Pero koma te kꞌopetik te jowil naxe, te skuentoal nax te antiboetike, sok te tsaltomba pleto kꞌopetik yuꞌun te tutꞌil ay te mantaliletik yuꞌun te jMoisese. Jaꞌ te tutik ma xtuun y te maꞌyuk sluwarile.

¹⁰ Teme ay machꞌa ya yakꞌ dibision te ba ay hermanoetike, koma jmel o chaꞌmeluk. Pero teme ma xyakꞌat ta jkuentae, chꞌoja lokꞌel.

¹¹ Yuꞌun ya skꞌan ya anaꞌ te machꞌa jich aye yanejemix ta sjol te kꞌope. Ta skuenta te smule, kechel te kastigo ta stojole.

Albot te jTito te ya xbajt ta Nicópolis

¹² Kꞌalal te joꞌon ya jtikon ta ba ayat te Artemas o te Tiquicoe, pasa me ta ora te ya xba awilon ta Nicópolis. Porke la jnop te tey ya xkꞌax kuꞌun a te skomil kꞌaale.

¹³ Sok ya me awaꞌbe bael te tut ya xtuun yuꞌun ta beel te Zenas te lisensiadoe y sok te jꞌApolose. Yuꞌun jich me maꞌyuk swokolik a te ya xlokꞌik ta beele.

¹⁴ Te machꞌatik joy jbajtik soke ya skꞌan ya snopik euk ta spasel te tut leke, sok ya me skoltay te machꞌa maꞌyuk tut ay yuꞌune, yuꞌun lek me ya xtuun te xkuxlejalike.

Spajtil-oꞌtanil sok bendision ta slajibal

¹⁵ Spisil te machꞌatik te joyinej jba soke ya stikon spajtil awoꞌtanik. Albon xkoltanuk te machꞌatik kꞌux ya kaꞌiy jbatik sok ta skuenta te jchꞌuunejtik te Diose. Te Diose ya me yaꞌbeyex te slekilal ta apisilik te jaꞌexe. Jichuk.