Tito 2 - Nuevo Testamento Tzeltal de Amatenango

Te lekil nojpesele

¹ Pero te jaꞌate, jaꞌ nax me xꞌawal sil tiempo te lekil nojpesele.

² Te ansianoetike ya skꞌan te kuidado ayike, y te lek te skuxlejalike, sok te ya snaꞌik stsael te tut leke. Ya skꞌan te ayuk lek te xchꞌuunel yoꞌtanike, y sok te xkꞌuxul yoꞌtanike, sok te ay yip yoꞌtanik yuꞌun ya xkujch te wokole.

³ Jich mismo euk te meꞌ-meꞌeletike ya skꞌan te lek ya xꞌakꞌawanik ta jkuentae. Ma me tojoluk aꞌbiye, ni yakubel. Sok ya skꞌan te lekuk te tut ya yakꞌ ta ilele.

⁴ Jich me ya snopeslan te bikꞌtal antstike te ya xkꞌuxutay te smamlalike y sok te yuntikilike.

⁵ Sok te ya snaꞌik stsael te tut leke, sok te ma xmulawike, sok te ya skanantayik te snaike, sok te ay slekil yoꞌtanik y ya xchꞌuunbe smantal te smamlalike, yuꞌun ma me ayuk machꞌa ya yal te ma lekuk te skꞌoplal Diose.

⁶ Jich mismo ya atsits te bikꞌtal kermetike te ayuk spꞌijilik euk yuꞌun stsael te tut leke.

⁷ Y jaꞌat mismo lekuk te tut ya awaꞌbe yil ta skuenta spisil te tut ya apase. Ayuk me bayal slekil te ya anojpeslane, y tulanuk skꞌoplal ta awoꞌtan te ya apase.

⁸ Jaꞌ me xꞌawal te lekil kꞌop te maꞌyuk machꞌa ya xjuꞌ ya skome. Jich me ya sta kꞌexlal machꞌauk a te ya xlijk skontrainate, yuꞌun ma spas ay tut ma lek ya yalbeyate.

⁹ Tsitsa te machꞌatik aj-aꞌtelil te yauk xchꞌuunbe spisil smantal te yajwalike. Lekuk ya xꞌiltalanot y ma me to xakꞌxunuk ta kꞌop.

¹⁰ Ma me yauk yelkꞌanik sino ke tsꞌakaluk me ya yakꞌik ta jkuenta, yuꞌun jich me ya yilik ta spisilik te ben tsaꞌam te nojpesel ta skuenta te Dios te jKoltawanej kuꞌuntike.

¹¹ Yuꞌun Dios a yaꞌbotik kiltik te slekil yoꞌtane, te jaꞌ yichꞌoj tal te kolel yuꞌun ta spisil te genteetike.

¹² Te slekil yoꞌtane, Dios ya snojpesotik ta sjilesel te tut ma lekuke y sok te tutik Kꞌupinbil ta skuenta balmilale. Y jaꞌ ya yaꞌbotik kichꞌtik ta balmilal te jun kuxlejal te ya jnaꞌbetik sluwar sok te ben toj aye. Sok jich ya xchiknaj te jaꞌ ay ta koꞌtantik te Diose.

¹³ Jaꞌ ya jmalitik te ben tsaꞌam ya sta skꞌalel te tut sjapojbotik jilele, jaꞌ te ben tsaꞌam te ya sujt tal te mukꞌul Dios kuꞌuntik, jaꞌ te jKoltawanej Jesucristoe.

¹⁴ Jaꞌ stukel a yakꞌ sba entregal ta milel te joꞌotik ta jkajtike. La skoltayotik yuꞌun ta spisil te tut ma lekuke, y tsꞌakal ya sakutesotik, yuꞌun stukel yuꞌunotik a, sok jaꞌuk ya koꞌtanintik ta pasel te tut leke.

¹⁵ Jaꞌ to jaꞌ te ya skꞌan ya awakꞌ ta nopele. Tsitsa y komatalana te tutꞌil ay awaꞌtele. Ma me ayuk machꞌa ya spꞌajat.