Tito 1 - Nuevo Testamento Tzeltal de Amatenango

Spajtil-oꞌtanil

¹ Joꞌon jPabloon, yaj-aꞌtelon te Diose sok apostolon yuꞌun te Jesucristoe. Tikonbilon ta yaꞌbeyel xchꞌuun Dios te machꞌatik tꞌujbilik yuꞌun te Diose, sok yuꞌun ya me snaꞌik ta batsꞌi jich te tut jchꞌuunejtike,

² te jaꞌ ya jmalitik yuꞌun te kuxlejal sbajtel kꞌinale. Ma to xchiknaj a te balmilale, te Dios, te makꞌ xloꞌlawane, la yal tutꞌil ay te kuxlejal to.

³ Y te ora to, te la staix stiempoale, la yaꞌbotikix jnaꞌtik te skꞌoplal te tutꞌil ay ta alel, te jaꞌ la yaꞌbon kal ta skuenta smantal Dios te jkoltawanej kuꞌuntike.

⁴ Ya jtsꞌibabeyat te karta to, Tito, te batsꞌi jnichꞌanat kꞌoeme, sok te jun nax te xchꞌuunel koꞌtantik ta jchebaltike. A me yaꞌbeyat slekil yoꞌtan te Jtatik Dios y sok te Kajwaltik Jesucristo te jKoltawanej kuꞌuntike y sok te bujtsꞌan kꞌinal ta atojole.

Te tut aꞌtelil ya spas ta Creta te jTitoe

⁵ Te kꞌalal la jilesat ta Cretae, jich a jpas yuꞌun ya alajin xchapel te tut kechel jilel ta chapele, sok yuꞌun ay me machꞌatik ya awaꞌbe yichꞌ yaꞌtel ta ansianoil ta stojol Dios ta jujun jtejklume, jich tutꞌil te la kalbeyat jilele.

⁶ Te machꞌa ya jxuꞌ ya yichꞌ yaꞌtel ta ansianoe, jaꞌ te maꞌyuk tut kechel ta skuentae. Ya skꞌan te jtul nax ants nujpunem soke, y ya skꞌan te puru xchꞌuunej Dios te yuntikile, y ma me jaꞌuk ya xmulawik o te ma xꞌakꞌawanik ta jkuentae.

⁷ Yuꞌun te machꞌa yichꞌoj yaꞌtel ta statalil yuꞌun te hermanoetike, jaꞌ ay yaꞌtel yuꞌun ta skanantayel te tutik yuꞌun te Diose. Jaꞌ yuꞌun ya skꞌan te tojuk ay bael te xkuxlejale. Ma me toybauk, ma me orauk ya xꞌilin, sok ma me wakꞌ yakubuk, ni ma me tojoluk pleto, sok ma me xbikꞌtaj yoꞌtan yuꞌun sloꞌlayel takꞌin.

⁸ Ya skꞌan te jun yoꞌtan ya xꞌotseswan ta snae, sok te jun yoꞌtan yuꞌun te tut leke, sok te ay lek spꞌijile, sok te toj aye, sok te ben lek ta stojol Diose, sok te stukel ya snaꞌ tut ya skom sbae.

⁹ Ya skꞌan te yakꞌoj ta yoꞌtan te skꞌoplal te batsꞌi jich a aꞌbot snope, yuꞌun jich me ya xjuꞌ ya yaꞌbe spuersa yoꞌtan ekꞌa te yanetik sok te lekil nojpesele, y jich me ya xjuꞌ yuꞌun skomel te machꞌatik ya xkontrainwan ta kꞌope.

¹⁰ Porke ay bayal te ma xꞌakꞌawanik ta jkuenta, jaꞌ nix te machꞌatik yichꞌoj sirkunsisione, yuꞌun ya yalik jowil nax kꞌop sok ya xloꞌlawanike.

¹¹ Te machꞌatik jich ya yalike, ya skꞌan kombeyel te stiꞌike. Yuꞌun ya yixlanbe yoꞌtanik spꞌejel te machꞌatik jun nax ay snaike. Ya snojpeswanik te tut ma jichuk ya skꞌane, skuenta jich ya staik sloꞌlayel takꞌine.

¹² Jich tutꞌil la yalbe skꞌoplal te slumale te jtul jꞌalwanej ta Creta: “Te jcretaetike, sil tiempo jloꞌlawanejetik, pajal sok chambalametik, ben okꞌilik, y ben chꞌajik”, xchi skꞌoplalik yuꞌune.

¹³ Y la yal te tut batsꞌi jiche. Jaꞌ yuꞌun tulan me xꞌakom, yuꞌun jich me lek ya xkꞌotik a sok te xchꞌuunel yoꞌtanike.

¹⁴ Jich me makꞌ ya yakꞌik ta jkuenta a te kuentoetik te jich nax nopbil yuꞌun te juriyoetike, ni te tut ya yalik ta mantal te machꞌatik yakꞌoj ta spat te tut batsꞌi jiche.

¹⁵ Yuꞌun te machꞌatik lek ay spensarike, lek skꞌoplal yuꞌunik spisil tutik ay. Pero te machꞌatik ma xchꞌuunike, ni ma lekuk te spensarike, sok maꞌyuk tutꞌil lek skꞌoplalik yuꞌunik. Yuꞌun lom ijkꞌubenik te spensarike y te tut ya snaꞌike.

¹⁶ Ya yalik te snaꞌojbe sba te Diose. Pero ta skuenta te tut ya spasike, ya xchiknaj te ma snaꞌbe sbae. Jpꞌajawetik sok jkꞌaxintawanejetik. Ni ma xjuꞌ yuꞌun spasel te tut lek ta pasele.