Romanos 1 - Nuevo Testamento Tzeltal de Amatenango

Spajtil yoꞌtanik yuꞌun te jPabloe

¹ Joꞌon jPabloon, te yaj-aꞌtelon te Jesucristoe, ya jtsꞌibabeyex te karta to. Dios la yikꞌon sok spitojon te apostol ya xkꞌoon yuꞌune, yuꞌun ya kalbe skꞌoplal te kolele.

² Ta skuenta te jꞌalwanejetik yuꞌune, Dios yalojbeyix skꞌoplal te lekil achꞌ kꞌop to ta xchꞌul sjune.

³ Jaꞌ skꞌoplal te xnichꞌane te Kajwaltik Jesucristoe, te jachik tut winik a kꞌot, te stsꞌumbal rey Davide.

⁴ Pero te kꞌalal chaꞌkux tal te ba animaetike ta skuenta te Chꞌul Espíritu, jamal a akꞌot ta ilel te jaꞌ Xnichꞌan Dios te aꞌbot bayal spodere.

⁵ Ta skuenta te Jesucristoe, Dios la yaꞌbonix ta majtanil te ya xꞌochon ta apostol yuꞌune, yuꞌun ta spꞌejel balmilal ayuk machꞌa ya xchꞌuun te Jesucristoe.

⁶ Sok te jaꞌexe te ayex ta jtejklum Romae, Dios skanojex, y la yikꞌex te yuꞌun ya xkꞌoex te Jesucristoe.

⁷ Ya kalbeyex ta apisilik te ayex ta jtejklum Romae te kꞌux ya yaꞌiyex ta yoꞌtan te Diose, ichꞌbeyaik slekil yoꞌtan te jTatik Dios y sok te Kajwaltik Jesucristoe, y sok te bujtsꞌan kꞌinal ya yaꞌbeyexe.

Te jPabloe skꞌan xba yil te machꞌatik ayik ta Romae

⁸ Te primeroe, ta skuenta te Jesucristoe, ya kalbe kolayal te Dios kuꞌune ta juju-tul te jaꞌexe, porke ta bayuk ya xꞌalot te achꞌuunejikixe.

⁹ Te Dios te kakꞌoj jba ta abatinel ta spꞌejel koꞌtan ta yalel skꞌoplal te Xnichꞌane, jaꞌ testigo kuꞌun te sil tiempo ya jnaꞌex te kꞌalal ya jkꞌopone.

¹⁰ Jaꞌ ya jkꞌanulanbe Dios te jichuk ya skꞌan te ya xtal kilexe.

¹¹ Yuꞌun koꞌtanuk ya xtal kilex. Ya me kaꞌbeyex jilel te majtanil yuꞌun te Chꞌul Espiritue, yuꞌun jich me mas ben jun awoꞌtanik a.

¹² Jaꞌ ya kal te pajal me ya kaꞌbe jbajtik spuersa koꞌtantik te tutꞌil jun nax jchꞌuunejtike.

¹³ Ya jkꞌan ya anaꞌik, hermanoetik, te bayal buelta te kꞌan tal kilexe, pero asta ora to sil tiempo ay tut smakojon. Jaꞌ ya jkꞌan te ya xtalon ta tsobel te hermanoetik te ba ayexe, jich tutꞌil la yichꞌikix tsobel ta yanetik nasione.

¹⁴ Yuꞌun ay to me jbet yuꞌunik ya kaꞌi, teme griego o ma griegouk, me ay tut snaꞌ o maꞌyuk tut ya snaꞌe.

¹⁵ Ja yuꞌun koꞌtanuk te yauk kalbeyex te lek achꞌ kꞌop jaꞌex te ayex ta Romae.

Te spoder te lek achꞌ kꞌope

¹⁶ Makꞌ xkꞌexawon yuꞌun te lek achꞌ kꞌope. Porke jaꞌ spoder Dios yuꞌun ya staik te kolele spisil te machꞌatik ya xchꞌuune. Jaꞌ nail te juriyoetike, y sok te machꞌatik ma juriyouke.

¹⁷ Yuꞌun ta skuenta te lek achꞌ kꞌope ya jnaꞌtik te tutꞌil toj ya yilelotik te Diose ta skuenta nax te xchꞌuunel koꞌtantike. Jich ya yal te tutꞌil tsꞌibabil jilele: “Jaꞌ me ya xkuxuyin te machꞌa ya xꞌilot yuꞌun Dios te tutꞌil toj aye ta skuenta te xchꞌuunel yoꞌtane”, xchi me.

Te tut smulinejik te genteetike

¹⁸ Yuꞌun ya kiltik te tulan kastigo ya yakꞌ tal Dios kꞌalal chꞌulchan ta skuenta spisil te gente te ma tsaꞌamuk sok te ma tojikuke. Jaꞌ sok te ma tsaꞌamikuke skomojik a te tut batsꞌi jiche.

¹⁹ Te tut yuꞌun te Diose te ya xjuꞌ ta naꞌbeyel sbae, lom lek ya snaꞌik stukelik. Porke stukel mismo la yakꞌ sba ta ilel.

²⁰ Te tut ma chikanuk ta ilel yuꞌun te Diose ya to me xkꞌo chiknajuk. Ay ta naꞌbeyel sluwar ta skuenta te tut spasoj te Diose. Ta slijkibal to tal te balmilale klaro chikan ta ilel te jaꞌ stukel Dios te maꞌyuk slajibal te spodere. Jaꞌ yuꞌun te machꞌatik ma tsaꞌamuk yaꞌtelike ma xwejt tut ya yalikix a.

²¹ Manchuk me ya snaꞌbeyik sba te Diose, pero ma xyakꞌik ta jkuenta te tutꞌil Diose, ni ma xyalbeyik kolayal. Jip juꞌem yuꞌunik nopilanel te puru nax ma tsaꞌamuke. Te yoꞌtanike ay ta ijkꞌal kꞌinal.

²² Ya yalik te yuꞌun lom pꞌijike. Pero ma pꞌijikuk.

²³ Yuꞌun syanutesejikix te stsaꞌamul Dios te ma xlaj stukele. Spasojbeyik slokꞌol ta winik te ya xcham stukele. Y asta spasojbeyik slokꞌol ta mutetik sok ta chambalametik sok ta chanetik.

²⁴ Jaꞌ yuꞌun Dios a chꞌojtalanot jilel yuꞌun te tut jowil nax ya skꞌan spasike, y jich spasojik te tut kꞌexlaltik sba ta pasel sok te stiꞌbalulike.

²⁵ Ma xchꞌuunejikuk te batsꞌi jich yuꞌun te Diose; jaꞌ xchꞌuunejik te lotil kꞌope. Jaꞌ yakꞌojikix ta jkuenta y jaꞌ xchꞌuunejikix te tutik pasbil yuꞌun te Diose, y ma jaꞌuk xchꞌuunejik te Diose te jaꞌ spasoje, te sil tiempo ya skꞌan kꞌayojinel stukele. Jichuk.

²⁶ Jaꞌ yuꞌun, Dios a jileslanot yuꞌun ta spasel te tut kꞌexlaltik sba ta pasele. Asta te antstike syanutesejix te tut ayike. Jaꞌ ya spasikix te tut ma tsaꞌamuk ta stiꞌbalulike.

²⁷ Jich euk te winketike la sjilesikix te tutꞌil ay sok te yinamike. Jaꞌ ya xchikꞌ sba sok te tut ma tsꞌaaamuk ya spasik ta juju-tule. Winik sok winik ya spasik te tut kꞌexlaltik sbae. Y ya me yil swokolik sok te stiꞌbalulik te kastigo te chꞌayel ya xlaj bajt yuꞌune.

²⁸ Yuꞌun ma skꞌan snaꞌbeyik sba te Diose, jich a jileslanot yuꞌun te Diose, jaꞌ te puru chꞌayel te tut snopojike, yuꞌun aꞌ spas te tut ma lekuk ta pasele.

²⁹ Nojel ta yoꞌtanik spisil ta jkaj te tut ma tojuk ta pasele. Muliletik ta balmilal, y baem ta yoꞌtanik spasel spisil te tut ma tsaꞌamuke, y biktajem yoꞌtanik yuꞌun kꞌulejalil y sok laꞌoꞌtantawanejetik. Sok il-oꞌtantawanej, sok milaw, sok pletojel, sok lolawanej, sok ixlanwanej, sok tontol aꞌbiye.

³⁰ Sok ma tsaꞌamuk skꞌoplal ya yalbe te yane, sok skontrainejik te Diose. Bolkꞌoptawanejetik sok toyba-oꞌtanetik, sok toyba-kꞌopetik. Ma xlaj yoꞌtanik ta sleel te tut ma lekuke; ma xchꞌuunbe smantal te smeꞌ-statike.

³¹ Ma skꞌan xyaꞌiyik, sok ma xjichub yuꞌun te tut ya yalike. Maꞌyuk machꞌa kꞌux ya yaꞌiy ta yoꞌtanik, ma snaꞌik spasel perdon; ma snaꞌik kꞌuxutawanej.

³² Te machꞌatik jich yaꞌtelik ya snaꞌik te jich yaloj ta smantal te Diose teme jich ya spasik to ya me xꞌakꞌot bael ta lajel yuꞌun. Pero jich ya spasulanik ta sil tiempo asta ben tsaꞌam ya yil te jich ya spas te yane.