San Mateo 7 - Nuevo Testamento Tzeltal de Amatenango

Ma me xꞌawichꞌbe jkuenta yaꞌtel te yane

¹ “Ma me xꞌawichꞌbe jkuenta yaꞌtel te yane. Jich me makꞌ stabeyex ta alel awaꞌtelik ekꞌa te Diose.

² Jich te tutꞌil ya atabeyik ta alel yaꞌtel te yane, jaꞌ me jich ya stabeyex ta alel awaꞌtelik euk. Te jich yipal ya atabeyik ta alel yaꞌtel te yane, jich me yipal ya stabeyex ta alel awaꞌtelik euk te Diose.

³ ¿Tuꞌun jaꞌ ya awil te chꞌin kꞌapal te ay ta sit te awermanoe? Yan te mukꞌul trozo te ay ta asite makꞌ awil stukel.

⁴ ¿Tutꞌil ya akꞌan ya awalbe te awermanoe: “Aꞌbon jlokꞌesbeyat te chꞌin kꞌapal te ay ta asite”, teme ya awute, y jaꞌat ay to mukꞌul trozo ta asit atukel?

⁵ Jaꞌex te chaꞌlam awoꞌtanike, lokꞌesa nailuk te mukꞌul trozo te ay ta asite. Jich ya xjuꞌ awuꞌun yilel slokꞌesel te chꞌin kꞌapal te ay ta sit te awermanoe.

⁶ “Ma me xꞌawaꞌbe yixlan genteetik te tutik ben tsaꞌam yuꞌun te Diose. Porke ay me pajal yoꞌtanik tut tsꞌiꞌetik te ya xeꞌtalan ta weꞌel te tut ya xꞌaꞌbote sok ya xjuꞌ somex ta tiꞌel euk. Jich te tutik yuꞌun te Diose pajal sok perlaetik te ben tsaꞌam ta ilele. Jaꞌ yuꞌun maꞌyuk machꞌa ya yakꞌ ta ixtalanel ta tekꞌulanel yuꞌun chitametik te perlaetike.

Kꞌopojanik ta stojol Dios

⁷ “Kꞌanbeya te Diose jich me ya yaꞌbeyat. Lea te tut ya akꞌane, jich me ya ata ta leel. Kꞌopojan ta tiꞌpuerta, jich me ya sjeꞌbeyat te Diose.

⁸ Porke te machꞌa ay tut ya skꞌanbe te Diose, jich ya xꞌaꞌbot yuꞌun, sok te machꞌa ya sle te tut ya skꞌane, jich me ya sta ta leel, sok te machꞌa ya xkꞌopoj ta tiꞌpuertae, jich me ya xjeꞌbot.

⁹ “¿Me ay wan te jich ya apasik te jaꞌexe, teme ya skꞌanbeyat yot te anichꞌane, me ton wan ya awaꞌbe?

¹⁰ ¿O chan ya awaꞌbe sweꞌ teme chay ya skꞌanbeyate?

¹¹ Jich te jaꞌexe te ma tsaꞌamuk awoꞌtanike, pero ya anaꞌik yakꞌel te tut lek ta stojol te awuntikilike. Jaꞌuk to xan a te jTatik te ay ta chꞌulchane ya me yaꞌbeyex te tut lek ya akꞌanike.

¹² “Jaꞌ yuꞌun spisil te tut ya skꞌan awoꞌtanik ya spasbelex yuꞌun te yane, jich me xꞌapasbey euk. Yuꞌun jich ay te tut ya yal te mantaliletik yuꞌun Moises sok te tut yaloj jilel te jꞌalwanejetik yuꞌun te Diose.

Te puerta te yub naxe

¹³ “Ochanik te ba puerta te yub naxe. Yan te puerta te sbeelel te ya xbajt ta chꞌayele jamal stukel y mukꞌ te sbelele. Bayal genteetik ya xꞌochik bael teꞌa.

¹⁴ Pero te puerta yuꞌun kuxuyinele yub nax te stiꞌile y wokol te sbelele. Ajtabil nax te machꞌatik ya xꞌochik teꞌae.

Te teꞌe ya xnaꞌbot sba yuꞌun te site

¹⁵ “Ila me abaik yuꞌun te machꞌatik lotil jꞌalwanejetike. Skuyoj sbaik ta karneraetik yilel, pero pajal yoꞌtanik sok te weꞌawal teꞌtikil tsꞌiꞌ.

¹⁶ Jich me ya anaꞌbeyik sba a yuꞌun te yaꞌtele, jich tutꞌil ya anaꞌbeyik sba te teꞌe yuꞌun te site. Jich te chꞌixetike ma xjuꞌ ya sitintay te tsꞌusube, sok ma jtatik ta kꞌokel ikux ta jpejt chꞌixteꞌe.

¹⁷ Jaꞌ yuꞌun spisil te lekil teꞌe lek sit ya yakꞌ; yan te teꞌ te ma tsaꞌamuke ma lekuk sit ya yakꞌ.

¹⁸ Te lekil teꞌe ma xjuꞌ ya yakꞌ sit te ma tsaꞌamuke. Jich euk te teꞌ te ma tsaꞌamuke, ma xjuꞌ te lek ya yakꞌ site.

¹⁹ Spisil te teꞌ te ma tsaꞌamuk site, ya yichꞌ tsꞌetel y ya yichꞌ chikꞌel ta kꞌakꞌ.

²⁰ Jich me ya anaꞌbeyik sba te yaꞌtel te ya spasik te machꞌatik lotil jꞌalwanejetike.

Ma spisiluk ya xꞌochik ta ba ay ta mantal te Diose

²¹ “Te machꞌatik “Kajwal, Kajwal”, ya yutikone, ma spisiluk ya xꞌochik te ba ay ta mantal te jTatik Diose. Jaꞌ nax ya xꞌochik teꞌa te machꞌatik ya spasbey te tut ya skꞌan yoꞌtan te jTat te ay ta chꞌulchane.

²² Ta slajibal kꞌaal ay me bayal ya yalbikon: “Kajwal, Kajwal, ¿me yuꞌun wan maꞌyuk a kaltik akꞌop te joꞌotike? Sok la jlokꞌestik pukujetik ta akuenta. Sok ta akuenta la jpastik bayal ta kaj milagroetik”, xchiik me ta jtojol.

²³ Jich me ya kalbey ta jamal: “Ni maꞌ jnaꞌbeyex abaik. Kꞌeja abaik ta jtojol jaꞌex te ma tsaꞌamuk te tut la apasike”, ya me kut.

Ay cheb yiptajib te nae

²⁴ “Jaꞌ yuꞌun te machꞌa ya yaꞌiybon sluwaril te jkꞌope sok teme ya spas te tut kaloje, jachik tutꞌil jtul winik te ay spꞌijile. Te kꞌalal la spas sna, la sle pꞌej mukꞌul ton la slijkes a te snae.

²⁵ Tal bayal jaꞌal ta patil. Kꞌax nojel-jaꞌ te ba ay slijkꞌesej te snae, sok tal bayal ikꞌ. Pe maꞌ butkꞌej te nae, yuꞌun ipajem ta jpꞌej mukꞌul ton.

²⁶ Yan te machꞌa ya yaꞌiybon sluwaril te jkꞌope sok teme ma jichuk ya spas te tut kaloje, jich kꞌoem te tutꞌil jtul winik te ma pꞌijuke la spas sna ta jiꞌileltike.

²⁷ Tal te jaꞌale ta patil, kꞌax nojel-jaꞌ a te ba ay te snae, sok tal bayal ikꞌ. Jmel a boskꞌej jilel te snae —xchi te Jesuse.

²⁸ “Te kꞌalal laj yoꞌtan ta kꞌop te Jesuse, te genteetike bayal aꞌabiyan yoꞌtanik yuꞌun te tut la yakꞌ ta nopele.

²⁹ Yuꞌun jich a pꞌijuteswan ta stojolik te tutꞌil machꞌa yichꞌoj tulan yaꞌtele. Yan te maestroetik yuꞌun te mantaliletike ma jichuk ya spꞌijuteswanik stukel.