San Mateo 17 - Nuevo Testamento Tzeltal de Amatenango

Yanej a yilik te Jesuse

¹ Wakeꞌ kꞌaal ta patil a te Jesuse la yikꞌ bael te jPedro, te Jacoboe sok te yijtsꞌine, jaꞌ te Juane. Parte ikꞌtalanot bael yuꞌun te Jesuse ta jun mukꞌul wits te ben toyole.

² Yanej ta sitik teꞌa te Jesuse. Te yelawe xlemet a sujt jich tutꞌil te kꞌajkꞌale y ben sak a sujt te skꞌuꞌ-spakꞌe jich tutꞌil te luse.

³ Teꞌ chiknaj a te jMoisese sok te jꞌEliase yipalik ta kꞌop sok te Jesuse.

⁴ Te jPedroe la yalbe te Jesuse: —Kajwal, ben tsaꞌam te liꞌ ayotike. Tem ya akꞌane, ya jpastik oxwol yaxna, jun awuꞌun te jaꞌate jun yuꞌun te jMoisese sok jun yuꞌun te jꞌEliase —xchi.

⁵ Te kꞌalal yipal to ta kꞌop a te jPedroe ora mukot ta tokal te xlemet nax xojobile. Ta yolil te tokale ay machꞌa kꞌopoj teꞌa, jich a yal: —Jaꞌ to jaꞌ te jNichꞌan te ben kꞌux ta koꞌtane. Ben jun koꞌtan yuꞌun. Aꞌiybeyaik sluwar te skꞌope —xchi.

⁶ Te kꞌalal la yaꞌibeyik sluwar te skꞌope, te jnopojeletike toj cham a yaꞌiyik y la skejan sbaik ta lum y la stsꞌinan sbaik.

⁷ Tijilaj tal teꞌa te Jesuse, la spik y la yaltalanbe: —Jajchanik, ma me xiꞌanik —xyut.

⁸ Te kꞌalal la xjach te sitike maꞌyuk machꞌa yilik teꞌa. Jaꞌ nax stukel te Jesuse.

⁹ Te kꞌalal yipalik tal ta koel te ba witse te Jesuse la stsitstalan te jnopojeletik yuꞌune. Jich a yal: —Ma me machꞌa xꞌawalbeyik te tuti akꞌot awilike jaꞌ to teme chaꞌkux tal Nichꞌanile —xchi.

¹⁰ Te jnopojeletike lijk sjojkꞌobeyik te Jesuse: —¿Tut yuꞌun te ya yal te maestroetik yuꞌun te mantaliletike te jaꞌ puersa jaꞌ nail ya xtal te jꞌEliase? —xchiik.

¹¹ La sjakꞌ te Jesuse: —Jich a nix a te nail ya xtal te jꞌEliase, sok stukel ya xchap spisil.

¹² Pero ya kalbeyex te xtalukix te jꞌEliase. Maꞌ snaꞌbeyik sba te genteetike. Jicha kꞌax swokol yuꞌunik chikan te tuti skꞌan a spasbeyike. Jich euk te Nichꞌanile ya me xkꞌax swokol ta skꞌabik euk —xchi te Jesuse.

¹³ Jicha kꞌot ta yoꞌtanik te jnopojeletik te jaꞌ a yalbe skꞌoplal te Juan Akꞌichꞌjaꞌe.

Jesus la slekutes jtul kerem

¹⁴ Te kꞌalal kꞌotik ta ba ay te genteetike, tijilaj tal jtul winik ta stojol te Jesuse. Tal skejan sba ta sit sok jich a yalbe:

¹⁵ —Kajwal, awokoluk, kꞌuxtaybon te jnichꞌane, yuꞌun sil tiempo ya xtupꞌ yikꞌ. Toj oꞌol sba yuꞌun. Ben ya xchꞌay ta kꞌakꞌ sok ta jaꞌ.

¹⁶ La kikꞌix tal ta stojol te jnopojeletik awuꞌune, pero ma lekub yuꞌunik —xchi.

¹⁷ La sjakꞌ te Jesuse: —¿Tuꞌun tut ayex, genteetik te maꞌyuk tut xchꞌuunej awoꞌtanik ta stojol te Diose sok te ma lekuk awoꞌtanike? ¿Jayeb me xan kꞌaal te joyinejexe? ¿Jayeb me xan kꞌaal te ya jtsꞌikbeyex te tutꞌil ayexe? Ikꞌbikon tal te kereme —xchi.

¹⁸ Te Jesuse la yalbe mantal te pukuje. Jich a lokꞌ ta yoꞌtan te kereme. Tsꞌin a lekub yuꞌun.

¹⁹ Patil te jnopojeletik yuꞌune la skꞌoponik ta stukel nax te Jesuse, la sjojkꞌobeyik: —¿Tut yuꞌun te maꞌ juꞌ kuꞌuntik slokꞌesel joꞌotik te pukuje? —xchiik.

²⁰ La yal te Jesuse: —Yuꞌun maꞌyuk lek xchꞌuunel awoꞌtanik. Jamal ya kalbeyex te ayuk xchꞌuunel awoꞌtanik chꞌinuk jich tutꞌil te sbakꞌ mostesiae te lom chꞌine, ya xjuꞌ ya awalbeyik te wits to: “Lokꞌan ba liye, baan ta yan luwar”, tem ya awute, jich ya xlokꞌ bael te witse. Maꞌyuk tut a te ma xjuꞌ awuꞌunik spasel te jichuke.

²¹ Pero ma xjuꞌ ta lokꞌesel pukujetik tem pajal sok tutꞌil to jaꞌ to teme ya akom aweꞌelik ta skꞌoponel Dios yuꞌune —xchi te Jesuse.

Te Jesuse xchaꞌmelal ya yal a te ya xchame

²² Te kꞌalal soyinej sbaik kꞌael ta beel ta estado yuꞌun Galilea, te Jesuse jich a yalbe te jnopojeletike: —Te Nichꞌanile ya me xꞌakꞌot ta skꞌab te winketike.

²³ Ya me xmilot, pero ta yoxebal kꞌaal ya me xchaꞌkux tal —xchi. Te jnopojeletike lom triste sujtik yuꞌun te tuti yaꞌiyike.

Jesus la yakꞌ stojemal yuꞌun te temploe

²⁴ Te kꞌalal kꞌotik ta Capernaum te Jesuse sok te jnopojeletik yuꞌune, te machꞌatik ya skꞌanik tojemal jujun jaꞌbil yuꞌun te mukꞌul templo ta Jerusalen, tal skꞌopon te jPedroe, y la sjojkꞌoyik: —Te maestro awuꞌunike ¿me ya yakꞌ te stojemal yuꞌun te temploe? —xchiik.

²⁵ —Yak, ya stoj —xchi te jPedroe. Te kꞌal och tal ta na te jPedroe, jaꞌ nail a kꞌopoj te Jesuse: —¿Tut xchat yuꞌun, Simon? ¿Machꞌa a te ya xkꞌanbot stojemale sok te skontribusione te ya skꞌan te reyetik ta balmilale? ¿Me jaꞌ ya skꞌanbey te yal-xnichꞌanike, o jaꞌ ya skanbey te yan genteetike? —xchi.

²⁶ La yal te jPedroe: —Jaꞌ te yan genteetike —xchi. Te Jesuse la yalbe: —Jaꞌ yuꞌun te yal-xnichꞌanike libre ay teme jich abi.

²⁷ Pero yuꞌun ma me machꞌa ma lekuk ya yaꞌiy, baan ta tiꞌmar, chꞌoja ochel te awansueloe. Nita lokꞌel te chay te nail ya atsake. Jachꞌbeya te stiꞌe. Teꞌ me ya ata a te sejp takꞌin te ya xlokꞌ a te kuꞌune sok te awuꞌune. Ichꞌa bael, baan toja jilel —xchi te Jesuse.