San Mateo 16 - Nuevo Testamento Tzeltal de Amatenango

Te fariseoetik sok te saduseoetik ya skꞌan yilik seña smilagro te Jesuse

¹ Ay fariseoetik sok saduseoetik ba yilik te Jesuse yuꞌun ya skꞌan yilbeyik yoꞌtan. La skꞌanbeyik te yauk spas junuk seña smilagro te ya yakꞌ ta ilel te talem ta stojol Diose.

² Pero la sjakꞌbe te Jesuse: —Te jaꞌexe te kꞌalal malix kꞌaal ya awalik: “Kꞌepel kꞌinal pajel”, xchaex, yuꞌun ya awilik tsaj te chꞌulchane.

³ Sok te kꞌalal sakubix a te kꞌinale ya awalik: “Ora to ya yakꞌ jaꞌal yuꞌun tsaj te chꞌulchane sok ay tokal”, xchaex yuꞌun. Te jaꞌexe cheb awoꞌtanik. Ya anaꞌik te tut yilel te tiempo yuꞌun te chꞌulchane, pero ¿tuꞌun te ma xꞌanaꞌik yilel te señaetik te yipal ta kꞌoel ta pasel te ora to?

⁴ Te genteetik to te ma tsaꞌamuk yoꞌtanik sok te ma junuk yoꞌtanik ta stojol te Diose, ya skꞌan yilik seña. Pero ma xꞌaꞌbot yilik. Jaꞌ seña ta stojolik kꞌoem te Jonas te antibo jꞌalwanej yuꞌun te Diose —xchi. Te Jesus la sjileslan y bajt.

Te tut a te levadura yuꞌun te fariseoetike

⁵ Te kꞌalal kꞌaxik bael ta jejch mar te jnopojeletike, ma snaꞌ a yichꞌ bael yotik.

⁶ Te Jesuse la yaltalanbe: —Ila me abaik yuꞌun te levadura yuꞌun te fariseoetike sok te saduseoetike —xchi.

⁷ Te jnopojeletike jicha lijk yalbe sbaik yuꞌun: —Jaꞌ yuꞌun te maꞌ jnaꞌtik tal kotike —xchiik.

⁸ Te Jesuse la snaꞌbe sluwaril te tuti lijk yalbe sbaike, y la yaltalanbe: —¿Tuꞌun ya awalbe abaik te maꞌyuk awichꞌoj awotike? Maꞌyuk lek xchꞌuunel awoꞌtanik te jaꞌexe.

⁹ Yuꞌun ma to kꞌoemuk ta awoꞌtanik. ¿Meꞌn makꞌ anaꞌikix te joꞌpejch waj aꞌ weꞌik a te joꞌmil ta jtul winketike? ¿Sok meꞌn chꞌayix ta awoꞌtanik te jayeb xan moch te la spas sobraile?

¹⁰ ¿Sok meꞌn chꞌayix ta awoꞌtanik te jukpejch waj te la yichꞌ makꞌlinel a te chanmil ta jtule, y jayeb xan moch anoj te sobraile?

¹¹ ¿Tuꞌun te ma xkꞌot ta awoꞌtanike te ma jaꞌuk waj te la kalbeyex skꞌoplale? Ila me abaik yuꞌun te slevadura te fariseoetike sok te saduseoetike —xchi te Jesuse.

¹² Jich a snaꞌik te jnopojeletik te ma jaꞌuk a yal te ya yil sbaik yuꞌun te levadura yuꞌun te pane. Jaꞌ a yal te ya skꞌan ya skanantay sbaik yuꞌun te tut ya yakꞌ ta nopel te fariseoetik sok te saduseoetike.

Te jPedroe la yal ta jamal te jaꞌ Cristo te Jesuse

¹³ Te kꞌalal kꞌot ta estado yuꞌun Cesarea Filipo sbiile, te Jesuse la sjojkꞌobey te jnopojeletik yuꞌune: —¿Tut ya yalik ya awaꞌiyik te genteetike? ¿Machꞌa ya skuyik a te Nichꞌanile? —xchi.

¹⁴ La yalik: —Ay ya yalik te jaꞌat Juanat te Akꞌichꞌjaꞌe; te yane ya yalik te jaꞌat te jꞌEliasate. Sok te yane ya yalik te jaꞌat te Jeremiasate o yan antibo jꞌalwanej yuꞌun te Diose —xchiik.

¹⁵ Te Jesuse la sjojkꞌobe: —Jal tsꞌin jaꞌexte, ¿machꞌa ya akuyikon a? —xchi.

¹⁶ La sjakꞌ te Simon Pedroe: —Jaꞌat Cristoat te Xnichꞌanat te kuxul Diose —xchi.

¹⁷ La yal te Jesuse: —Ben me tsaꞌam alekil jaꞌat Simon te xnichꞌanat te Jonase. Porke ni jtuluk winik te la yaꞌbeyat anaꞌbe sluwar. Jaꞌ a yaꞌbeyat anaꞌ sluwar te jTat te ay ta chꞌulchane.

¹⁸ Joꞌon ya kal te jaꞌat jPedroat, te pꞌej ton kꞌoemat te ya kakꞌ ipajuk a te jchꞌuuneletik kuꞌune. Te jchꞌuuneletik kuꞌune ma xjuꞌ te ya stsalot yuꞌun yip te lajele.

¹⁹ Joꞌon ya kaꞌbeyat te syaweul te ba ay ta mantal te jTatik Dios te ay ta chꞌulchane. Te tut ya akom ta pasel ta balmilale, jich albilix skꞌoplal ta chꞌulchan abi. Sok te tut ya awakꞌ ta pasel ta balmilale, jich albilix skꞌoplal te chꞌulchan abi —xchi te Jesuse.

²⁰ Sok la spas ta mantal te jnopojeletik yuꞌune te ma me machꞌa ya yalbe te jaꞌ te Cristoe.

Te Jesuse la yal te tut ya xchame

²¹ Jaꞌ yorail a te Jesuse lijk yalbe te jnopojeletik yuꞌune te ya xbajt ta Jerusalene, y te moletik sok te statal-saserdoteetik sok te maestroetik yuꞌun te mantaliletike ya me yaꞌbeyik xkꞌax bayal swokol. Sok la yal te tutꞌil ya xba mileke, pero ta yoxebal kꞌaal ya xchaꞌkusesot tal.

²² Jich te jPedroe la spit bael chꞌinuk te Jesuse, jicha ba yalbe: —Kajwal, manchuk jichuk ya skꞌan te Diose. Manchuk ya xkꞌot ta pasel ta akuenta —xyut.

²³ Te Jesuse la sujtes sba, la yalbe te Pedroe: —Kꞌeja aba ta jtojol, Satanas. Ma me xꞌamakon. Maꞌyuk ta awoꞌtan te tut ya skꞌan yoꞌtan te Diose. Jaꞌ nax ay ta awoꞌtan te tut ya skꞌan yoꞌtan te genteetike —xyut.

²⁴ Te Jesuse jich a yalbe te jnopojeletik yuꞌune: —Te machꞌa ya skꞌan yakꞌ sba ta jnopojel kuꞌune, aꞌ me skoltay sba ta yoꞌtan. Aꞌ me xkuch skrus kꞌoem. Aꞌ me stsꞌakliyon.

²⁵ Jich te machꞌa ya xkꞌuxutay sba sok te xkuxlejale ya me xchꞌay sok te xkuxlejale. Yan te machꞌa ya xchꞌay xkuxlejal teme joꞌon ta jkaje, ya me sta xkuxlejal stukel.

²⁶ ¿Tut ya xlokꞌ awuꞌun teme ya awuꞌunin spisil te balmilale teme ya xchꞌay te akuxlejale? ¿Jayeb ya xjuꞌ ya atoj a yuꞌun te akuxlejale?

²⁷ Jich te Nichꞌanile ya me xtal sok slekilal te jTate sok te xchꞌul angeletik yuꞌune. Ya me xtal kaꞌbe stojol juju-tul chikan te tut spasojike.

²⁸ Jamal ya kalbeyex ay machꞌatik te liꞌ ayik to te ma to xchamik ae jaꞌ to teme ya yilik ya xtal te Nichꞌanile jich tutꞌil rey —xchi te Jesuse.