San Mateo 15 - Nuevo Testamento Tzeltal de Amatenango

Te tut ma tsaꞌamuk ya xkꞌootik ta stojol Dios yuꞌune

¹ Ay fariseoetik sok maestroetik yuꞌun te mantaliletike te talemik ta Jerusalen jul skꞌoponik te Jesuse. La sjojkꞌobeyik:

² —¿Tuꞌun te jnopojeletik awuꞌune te ya xkꞌaxintaybeyik te skostumbre antibo meꞌil-tatiletike? Yuꞌun te kꞌalal ya xweꞌike makꞌ spok skꞌabik nailuk ya kil, jich tutꞌil albil skꞌoplale —xchiik.

³ Te Jesuse la sjojkꞌolanbe: —¿Y tuꞌun tsꞌin jaꞌexte te ya akꞌaxintaybeyik smantal Dios a te kostumbre awuꞌunike?

⁴ Porke jich yaloj te Diose: “Chꞌuunbeya smantal te ameꞌ-atatike”, xchi me. Sok yaloj xan: “Te machꞌa ya yixta-kꞌoptay te smeꞌ-state aꞌ chamuk”, xchi me.

⁵ Yan te jaꞌexe jich ya awalik: “Teme ay jtul winik te jich ya yalbe te smeꞌ-state: ‘Ma xjuꞌ ya jkoltayat yuꞌun spisil te tut ay kuꞌune la kakꞌix ta smajtan Dios,’ te ya yute,

⁶ te machꞌa jich ya yale ma puersauk ya skꞌuxtayix te smeꞌ-state”, te xchaexe. Jich ta skuenta te kostumbre awuꞌunike maꞌyukix skꞌoplal ya xkꞌot ta chꞌuunel a te tut yaloj ta smantal te Diose.

⁷ ¡Cheb awoꞌtanik te jaꞌexe! Jich a yalbeyex akꞌoplalik te antibo jꞌalwaneje yuꞌun Dios te jꞌIsaiase:

⁸ “Te jtejkꞌum to ta skꞌop nax te yakꞌojikon ta jkuentae, yan te yoꞌtanike jakal ay ta jtojol.

⁹ Jowil nax te ya yal te ya xchꞌuunikone. Te tut ya yakꞌ ta nopele smantal nax winik stukel”, xchi me —xchi te Jesuse.

¹⁰ Te Jesuse la yikꞌtalan tal te genteetike y la yalbe: —Aꞌiyaik me sluwaril sok aꞌ me kꞌotuk ta awoꞌtanik te tut ya kalbeyexe:

¹¹ Te tut ya xꞌoch ta stiꞌ te winike ma jaꞌuk ma tsaꞌamuk ya xkꞌot ta stojol Dios yuꞌun. Jaꞌ ma tsaꞌamuk ya xkꞌoex ta stojol Dios yuꞌun te tut ya xlokꞌ ta atiꞌike —xchi te Jesuse.

¹² Te jnopojeletik yuꞌun te Jesuse tijilajik tal ta stojol y la sjojkꞌobeyik: —¿Me la awil te fariseoetik te ilin yuꞌun te tut la awale? —xchiik.

¹³ La yal te Jesuse: —Spisil te awaltsꞌunubil teme ma jaꞌuk la stsꞌun te jTat te ay ta chꞌulchane ya me xbulot lokꞌel.

¹⁴ Teꞌ yil sbaik a, te ya stojutesik ta be te choketike, pero pajal chok kꞌoem sok. Teme jtul chok ya stojutes ta be te jtul xan choke, pajal me ya xchꞌay sok koel ta chꞌen —xchi te Jesuse.

¹⁵ Te jPedroe tal skꞌanbe: —Albotik kaꞌitik te tutꞌil ay te seña te la awale —xchi.

¹⁶ La yal te Jesuse: —¿Me yuꞌun wan ma to xkꞌot ta awoꞌtanik euk te jaꞌexe?

¹⁷ ¿Meꞌn ma xꞌanaꞌbeyik sluwar te tut ya xꞌoch ta atiꞌike te ya xkꞌot ta achꞌujtike? Patil ya xba awakꞌik jilel ta letrina.

¹⁸ Yan te tut ya xlokꞌ ta atiꞌike, ta awoꞌtanik ya xlijk tal stukel. Jaꞌ ma tsaꞌamuk ya xkꞌoex ta stojol Dios yuꞌun.

¹⁹ Porke ta awoꞌtanik ya xlijk anopik te tut ma tsaꞌamuk ta pasele: jaꞌ te milawe, sok te antsiwejele, sok te lokoubele, sok te elekꞌe, sok te le-kꞌope, sok te aꞌabiyanwaneje.

²⁰ Spisil to jaꞌ ma tsaꞌamuk ya xkꞌoex ta stojol Dios yuꞌun. Yan te kꞌalal ya xweꞌexe, ma jauk ma tsaꞌamuk ya xkꞌoex yuꞌun teme ma nailuk ya apok akꞌabike jich tutꞌil albil skꞌoplale —xchi te Jesuse.

Yanlum ants tal skꞌanbe pawor te Jesuse

²¹ Lokꞌ bael teꞌa te Jesuse, bajt ta slum Tiro sok Sidon.

²² Ay jtul cananea-ants teꞌey sna a, tulan a kꞌopoj ta skꞌanel pawor: —Kajwal, stsꞌumbalat jDavid, kꞌuxtayaon sok te kachꞌixe, yuꞌun ay pukuj ta yoꞌtan. Ben xꞌilbajinot yuꞌun —xchi.

²³ Pero te Jesuse maꞌ sjakꞌbe te skꞌope. Y te jnopojeletik yuꞌune tijilajik tal y la yalbeyik te Jesuse: —Albeya te antse aꞌ bajtuk, porke ben xꞌawetal ta jpatik —xchiik.

²⁴ Te Jesuse la yalbe te antse: —Jaꞌ nax stikonejon Dios ta skoltayel te jꞌisraeletik te jich kꞌoemik tutꞌil karneraetik te chꞌayemike —xchi.

²⁵ Pero te antse ba skejan sba ta stojol. Jich a yal: —Kajwal, koltayaon —xchi.

²⁶ La sjakꞌ te Jesuse: —Ma lek te ya jpojbetik yot te untike te ya kaꞌbeyik sweꞌ te tsꞌiꞌetike —xchi.

²⁷ La yal te antse: —Jich Kajwal, pero te tsꞌiꞌetike ya sweꞌik te stsꞌubil yot te ya xchꞌay koel ta yanil xmexa te yajwale —xchi.

²⁸ La yal te Jesuse: —Ants, bayal tut xchꞌuunej awoꞌtan. Jich me ya xkꞌot ta pasel te tut ya skꞌan awoꞌtane —xchi. Y mismo tiempo a kol te yachꞌixe.

Jesus la slekutes bayal jchameletik

²⁹ Lokꞌ bael teꞌa te Jesuse, kꞌot ta tiꞌtiꞌmar yuꞌun Galilea. Mo bael ta jun wits, teꞌ kꞌo snajkan sba a.

³⁰ Bayal gente la stsob sbaik tal te ba aye. Yikꞌojik kꞌoel koxoetik, sok choketik, sok umaꞌetik, sok machꞌatik mochꞌol skꞌab, sok bayal xan chameletik. La yakꞌik ta yok te Jesuse, spisil a slekuteslan.

³¹ Te genteetike bayal a aꞌabiyan yoꞌtanik yuꞌun la yilik te ya xkꞌopojix te umaꞌetike y lekubenix te machꞌatik mochꞌol skꞌabike, ya xbeenix te koxoetike, y te choketike spas ya yilikix kꞌinal. Lijk yalbeyik kola yal te Dios yuꞌunik te jꞌisraeletike.

Jesus la smakꞌlin chanmil ta jtul winketik

³² Te Jesuse la yikꞌ tal te jnopojeletik yuꞌune y la yaltalanbe: —Ya jnaꞌbe yoꞌolil sbaik te genteetik to, yuꞌun yoxebalix kꞌaal te soyinejikone y maꞌyuk tut ya sweꞌik. Ma jkꞌan ya jtikon bael ta snaik te ma weꞌemikuke, porke tam chojpuk yipik ta be —xchi te Jesuse.

³³ Te jnopojeletik yuꞌune la yalik: —¿Ba ya xba jtabetik sweꞌel te bayal genteetike, te tutꞌil maꞌyuk machꞌa ay sna liye? —xchiik.

³⁴ Te Jesuse la sjojkꞌolanbe: —¿Jaypejch waj ay awuꞌunik? —xchi. La yalik: —Jukpejch, sok chaꞌoxkojt chꞌin chayetik —xchiik.

³⁵ Te Jesuse la yalbe te genteetike te ya snajkan sbaik ta lume.

³⁶ La stsak ta skꞌab te jukpejch waje sok te chayetike, la yalbe kola yal Dios yuꞌun. La xeꞌtalan, la yaꞌbe te jnopojeletik yuꞌune y ba spukbeyik te genteetike.

³⁷ Spisilik a weꞌik asta noj te xchꞌujtike. Y noj to xan jukeb moch te xejtꞌemik sobraile.

³⁸ Te machꞌatik weꞌike ay chanmil ta jtul winketik. Ma ajtabiluk te antstike sok te untike.

³⁹ Te kꞌalal la skꞌoponlan jilel te genteetik, te Jesuse mo bael ta barko, y bajt ta slum Magdala.