San Mateo 13 - Nuevo Testamento Tzeltal de Amatenango

Seña-kꞌop te machꞌa bajt ta awale

¹ Mismo kꞌaal a te lokꞌ bael ta na te Jesuse kꞌo snajkan sba ta tiꞌmar.

² Bayal genteetik la stsob sbaik tal ta stojol te ba aye. Te Jesuse mo ta barko, kꞌo snajkan sba. Yan te genteetike tekꞌatik ta tiꞌmar stukelik.

³ Te Jesuse bayal tuti lijk yaltalanbe ta seña-kꞌop. Jich a yal: —Ay jtul winik lokꞌ bael ta tsꞌunbajel.

⁴ Te kꞌalal lijk ta yawel te stsꞌunube ay pꞌekajtik kꞌoel ta be. Tal te teꞌtikil mutetike, la sweꞌik bael te tsꞌunubile.

⁵ Ay a kꞌot ta yolil tonetik te ba maꞌyuk lek slumile. Te tsꞌunubile chꞌij tal ta ora yuꞌun ma pimuk lek te slumile.

⁶ Te kꞌalal kꞌuxub tal te kꞌajkꞌale, chikꞌot yuꞌun, porke ma ismajemuk lek. Jicha takej.

⁷ Sok ay a kꞌot ta yolil chꞌixetik te tsꞌunubile. Chꞌi moel te chꞌixetike, la stenik te tsꞌunubile.

⁸ Pero ay a kꞌot ta lekil lum. Lek a kꞌot te yijkatse. Te pꞌej nax tsꞌunubil ay a yakꞌ ta sien ta pꞌej te sbakꞌe, ye yane la yakꞌ sesenta ta pꞌej, y te yane treinta ta pꞌej.

⁹ Te machꞌa ay xchikine a me yaꞌibe sluwar —xchi te Jesuse.

Te tut sluwar te seña-kꞌopetike

¹⁰ Te jnopojeletike tijilajik tal ochel te ba ay te Jesuse. La sjojkꞌobeyik: —¿Tut yuꞌun te ya akꞌopon ta seña-kꞌop te genteetike? —xchiik.

¹¹ Te Jesuse la yaltalanbe: —Te jaꞌexe Dios me ya yaꞌbeyex anaꞌik sluwar te tutꞌil ay ta ajwalinel te Diose, te maꞌyuk ta naꞌel ta nail toe. Yan te yanetike ma xꞌaꞌbot snaꞌbeyik sluwaril stukel.

¹² Jich te machꞌa ay tut ay yuꞌune, ya xꞌaꞌbot xan soy, jich me bayal tut ay yuꞌun ya xkꞌot. Yan te machꞌa maꞌyuk tut ay yuꞌune, ya xpojbot te tut ay yichꞌoj chꞌinuke.

¹³ Jaꞌ sluwar te ya jkꞌopon ta seña-kꞌope. Yuꞌun ya yilik ta sitik, pero ma snaꞌbeyik sluwaril te tut ya yilike. Sok ya yaꞌiyik ta xchikinik, pero ma xkꞌot ta yoꞌtanik.

¹⁴ Te tutꞌil jich ayike, teꞌ kꞌot ta pasel a te tuti tsꞌibabil yuꞌun te antibo jꞌalwanej Isaiase: “Ya yaꞌiyik sluwar kꞌop ta xchikinik, pero maꞌyuk sluwaril ya xkꞌot ta yoꞌtanik. Ya yilik ta sitik, pero maꞌyuk skꞌoplal ya xkꞌot yuꞌunik.

¹⁵ Yuꞌun kꞌax tulanix yoꞌtanik te gente to. Wokol ya xkꞌot ta xchikinik te kꞌope. Smutsꞌoj sitik yuꞌun ma skꞌan yilik ta sitik, sok ma skꞌan yaꞌibeyik sluwar kꞌop ta xchikinik, sok ma xkꞌot ta yoꞌtanik. Sok ma skꞌan sujtes yoꞌtanik ta jtojol, yuꞌun ma skꞌanik koltayel kuꞌun”, xchi te Diose.

¹⁶ “Yan te jaꞌexe ben me tsaꞌam alekilik, porke ya awilik kꞌinal ta asitik sok ya awaꞌiyik sluwar kꞌop ta achikinik.

¹⁷ Jamal ya kalbeyex, bayal jꞌalwanejetik yuꞌun Dios sok bayal genteetik te lek yoꞌtanik ta stojole yoꞌtanuk la yilik te tut yipalex ta yilel te jaꞌexe, pero maꞌ yilik. Yoꞌtanuk lauk yaꞌibeyik sluwaril te tut ya awaꞌiyik sluwar te jaꞌexe, pero maꞌ yaꞌibeyik sluwar stukel.

Te Jesus la yalbe sluwar te seña-kꞌop te machꞌa bajt ta awale

¹⁸ “Aꞌibeya awaꞌiyik sluwar te tut sluwar te seña-kꞌop la kalbeyexe te machꞌa bajt ta awale.

¹⁹ Te machꞌatik ya yaꞌiybe sluwaril te tutꞌil ay ta ajwalinel te Diose sok te ma xkꞌot ta yoꞌtanike, jich kꞌoemik te tutꞌil tsꞌunubil te kꞌot ta bee. Ya xtal te pukuje, ya slokꞌesbey ta yoꞌtanik te skꞌop Dios te tsꞌunbot ta yoꞌtanike.

²⁰ Te tsꞌunubil te kꞌot ta yolil tonetik pajal kꞌoem sok te machꞌatik ya yaꞌiyik te skꞌop Dios y ben gusto ya skꞌanik.

²¹ Pero komo ma bayaluk ismajem ta yoꞌtanik te skꞌop Diose, jich ma xjalajik. Jaꞌ yuꞌun teme ya xkꞌax swokolik o teme ya xtal ilbajinel ta skꞌaj te skꞌop Diose, ora ya xchꞌay te xchꞌuuunel yoꞌtanik yuꞌun.

²² Te tsꞌunubil te kꞌot ta yolil chꞌixetik pajal kꞌoem sok te machꞌatik ya yaꞌiyik te skꞌop Diose, pero te tutik skuenta balmilal jaꞌ ya smak sbaik a. Te slekil te kꞌulejalile jaꞌ ya xloꞌlaylanot yuꞌun. Spisil to ya xkꞌot ta skuentaik ya smuk te skꞌop Diose, jich ma xyakꞌ sitinuk.

²³ Pero ay machꞌatik ya yaꞌiybe sluwaril sok te ya xkꞌot ta yoꞌtanike, jich kꞌoemik te tutꞌil tsꞌunubil te kꞌot ta lekil lume. Jich me lek ya yakꞌ sit stukel. Ay machꞌa jich a kꞌot tutꞌil mitsꞌojel te pꞌej nax tsꞌunubil ya yakꞌ sien ta pꞌej te site, sok ay ya yakꞌ ta sesenta, sok ay ya yakꞌ ta treinta —xchi te Jesuse.

Te seña-kꞌop te triwue sok te ak te ma tsaꞌamuke

²⁴ Te Jesuse lijk yalbe yaꞌiyik yan seña kꞌop. Jich a yal: —Te tutꞌil ya xkꞌot ta ajwalinel te Diose, jachik tutꞌil jtul winik te la stsꞌun lekil stsꞌunubil ta slume.

²⁵ Pero te kꞌalal wayajtikix ae, tal te skontrae. Och stsꞌun te ak te ma tsaꞌamuke te ta yolil triwue. Yo bajt.

²⁶ Kꞌalal chꞌi te triwue y lijk yakꞌ sjol, teꞌ chiknaj a te akꞌ te ma tsaꞌamuke.

²⁷ Te jꞌaꞌteletike ba yalbeyik te yajwale: “Kajwal, ¿me lekil tsꞌunubil te ba awakꞌ ta awel ta alume? ¿Tutꞌil a chiknaj te ak te ma tsaꞌamuke?” xchiik.

²⁸ Te yajwale la yal: “Jaꞌ a spasꞌbon te jkontrae”, xchi. La yalik te jꞌaꞌteletike: “¿Me ya akꞌan te ya xba jbultik lokꞌele? —xchiik.

²⁹ La yal te yajwale: “Ma xjuꞌ. Teme ya abul lokꞌel te ak te ma tsaꞌamuke, ya me xbul lokꞌel ekꞌa te triwue.

³⁰ Teꞌ yijubuk a jaꞌ to teme la sta yorail te ya xtuy lokꞌele. Te kꞌalal ya sta skꞌaalele, ya me kalbe te jꞌaꞌteletike te jaꞌ nail ya stsob lokꞌel te ak te ma tsaꞌamuke, aꞌ xchukik ta jujuyom, aꞌ ba xchikꞌik ta kꞌakꞌ. Yan te triwue, ya me stsobikon ochel ta yawil kuꞌun”, xchi me —xchi te Jesuse.

Seña-kꞌop te sbakꞌ mostesiae

³¹ Te Jesuse la yaltalanbe yaꞌiy yan seña-kꞌop. Jich a yal: —Te tutꞌil ya xkꞌot ta ajwalinel te Diose, jaꞌ pajal kꞌoem sok jun sbakꞌ mostesiae te la stsꞌun ta slum te jtul winike.

³² Aunke stukel jaꞌ mas chꞌin ta spisil te tsꞌunubiletike, te kꞌalal ya xchꞌie mas mukꞌ ya xkꞌot yuꞌun te yan boketike. Jich mukꞌ ya xkꞌot jich tutꞌil wol teꞌ. Te teꞌtikil mutetike ya xtal spas xpechechik te ba skꞌabkꞌabe —xchi te Jesuse.

Seña-kꞌop te levadurae

³³ Ay yan seña-kꞌop te la yal te Jesuse: —Te tutꞌil ya xkꞌot ta ajwalinel te Diose, ja pajal sok te levadurae te la skap sok oxpꞌis jarina te antse, jaꞌ to te sijtꞌ ta swolol te matsꞌe —xchi te Jesuse.

Te Jesuse la yal bayal seña-kꞌop

³⁴ Spisil to te Jesuse la yaltalanbe ta seña-kꞌop te bayal genteetike. Maꞌyuk tuti yaltalanbe teme ma ta seña-kꞌopuke.

³⁵ Te tutꞌil jich a yal te Jesuse, jaꞌ akꞌot ta pasel te tut yaloj te antibo jꞌalwanej yuꞌun te Diose te jich a yale: “Ya me kal ta seña-kꞌopetik te tut ma naꞌbot sluwaril jaꞌ to te la spas balmilal te Diose”, xchi me.

Te Jesuse la yalbe sluwaril te ak te ma tsaꞌamuke sok te triwue

³⁶ Jich te Jesuse la stikon bael te genteetike y och ta na. Te jnopojeletik yuꞌune tijilajik tal ta stojol y la yalbeyik: —Albotik kaꞌitik xan sluwar te seña-kꞌop te la awale te ak te maꞌ tsaꞌamuke te awot ta yolil te triwualtike —xchiik.

³⁷ Te Jesuse la yaltalanbe: —Te machꞌa la stsꞌun te lekil tsꞌunubile, jaꞌ te Nichꞌanile.

³⁸ Te triwualtike jaꞌ te genteetik ta balmilale. Te lekil tsꞌunubile jaꞌ te machꞌatik yajwalinejik te Diose. Te ak te ma tsaꞌamuke jaꞌ te machꞌa yajwalinejik te pukuje.

³⁹ Te jkontra te la stsꞌun te ak te maꞌ tsaꞌamuke, jaꞌ te pukuje. Te yorail kꞌajoje jaꞌ te slajibal kꞌaale. Te jkꞌajojetike jaꞌ te chꞌul angeletik yuꞌun te Diose.

⁴⁰ Te ak te ma tsaꞌamuk te la kal te ya yichꞌ tsobele sok te ya yichꞌ chikꞌel ta kꞌakꞌe, jich me ya xkꞌot ta pasel ta slajibal kꞌaal.

⁴¹ Te Nichꞌanile ya me stikon te chꞌul angeletik yuꞌune, ya xtal stsobik lokel ta balmilal te machꞌatik ya syaleswanik ta mulile sok te machꞌatik ma tsaꞌamuk yatꞌelike.

⁴² Ya me xchꞌojik ochel te ba yawil kꞌakꞌ te tileme. Teꞌ me ya xkꞌo yokꞌetay sbaik a sok teꞌ me ya xkꞌo skꞌuxilan yeꞌik a.

⁴³ Te machꞌatik lek yoꞌtanik ta stojol te Diose ya me xchiknaj stsaꞌamulik te ba ay ta ajwalil te jTatike, jich me tutꞌil ya xtil xojobil te kꞌajkꞌale. Te machꞌatik ay xchikine, a me yaꞌibe sluwaril ta lek.

Te seña-kꞌop te oro te mukul ta lume

⁴⁴ “Te tutꞌil ya xkꞌot ta ajwalinel te Diose, jich kꞌoem te tutꞌil bayal oro te mukul ta jlom chꞌin luware. Ay jtul winik te la stae sok la xchaꞌmuk xan jilel teꞌa. Ben jun yoꞌtan a sujt bael yuꞌun. Jicha ba xchon spisil te tut ay yuꞌune y ba sman a te luwar te ba ay mukul te oroe.

Te seña-kꞌop te perla te ben toyole

⁴⁵ “Te tutꞌil ya xkꞌot ta ajwalinel te Diose, jich kꞌoem te tutꞌil ay jtul jchonbajel te yipal ta sleel tsaꞌam perlaetik.

⁴⁶ Te kꞌalal ya sta junuk perla te ben toyole, ba xchon spisil te tut ay yuꞌune. Jicha ba sman a te perlae.

Te seña-kꞌop te stsajkil-chaye

⁴⁷ “Te tutꞌil ya xkꞌot ta ajwalinel te Diose, jaꞌ pajal kꞌoem sok te stsajkil-chay te ya xchꞌojot ochel ta mare yuꞌun ya stsak lokꞌel spisil ta kaj te chaye.

⁴⁸ Teme noj ta chay te stsajkil-xchayike, te jꞌtsak-chayetike ya snitik lokꞌel ta tiꞌmar. Teꞌ ya snajkan sbaik ta tsael a te chayetike. Te lekil chaye ya skꞌejik ta moch. Yan te ma lekuke, ya xchꞌojik bael.

⁴⁹ Jich me ya xkꞌot ta pasel ta slajibal kꞌaal. Ya me xtal te chꞌul angeletike, ya me stꞌujik lokꞌel te machꞌatik ma lekuk ta yolil te machꞌa lek yoꞌtanik ta stojol te Diose.

⁵⁰ Te machꞌatik ma lekuke ya me xchꞌojot ochel ta yawil kꞌakꞌ te tileme. Teꞌ me xkꞌo yokꞌetay sbaik a sok teꞌ me ya skꞌuxilan yeꞌik a —xchi te Jesuse.

Achꞌ kꞌulejalil sok kꞌaꞌ kꞌulejalil

⁵¹ Te Jesuse la sjojkꞌoy: —¿Me kꞌot ta awoꞌtanik spisil te tut la kalixe? —xchi. La yalik: —Jich Kajwal, kꞌot ta koꞌtantik —xchiik.

⁵² La yal te Jesuse: —Te maestroetik yuꞌun te mantaliletike te snaꞌojbe sluwaril te tutꞌil ay ta ajwalinel te Diose jaꞌ pajal kꞌoem sok te tutꞌil ay te jtul yajwal nae. Te tutik skꞌejoje ya snaꞌ slokꞌesel tal te achꞌ toe sok te tuuntesbilixe —xchi.

Kꞌot ta jtejklum Nazaret te Jesuse

⁵³ Te kꞌalal laj yoꞌtan ta yalel spisil te seña-kꞌopetik te Jesuse, lokꞌ bael

⁵⁴ y kꞌot ta slumal. Lijk ta pꞌijuteswanej te ba sinagoga yuꞌunike. Te genteetike bayal a aꞌabiyan yoꞌtanik yuꞌun. Jicha lijk yalbe sbaik: —¿Ba snop tal to te spisil ya snaꞌe? ¿Sok tutꞌil ya xjuꞌ yuꞌun spasel te milagroetike?

⁵⁵ ¿Me ma wan jaꞌuk te xnichꞌan karpinteroe sok ma wan jaꞌ smeꞌ te xMariae? ¿Me ma wan jaꞌuk yijtsꞌinab te Jacoboe sok te Josee sok te Simone sok te Judase?

⁵⁶ ¿Sok ma wan jaꞌuk yijtsꞌinab euk te antstik te liꞌ ay ta koliltike? ¿Ba snopix tal spisil tsꞌin to? —xchiik.

⁵⁷ Jich a ilin yoꞌtanik ta stojol. Pero te Jesuse jich a lijk yaltalanbe: —Spisil genteetik ya yakꞌik ta jkuenta te jꞌalwanej yuꞌun te Diose. Jaꞌ nax ma xꞌakꞌot ta jkuenta yuꞌun te slumale sok te machꞌatik ay yuꞌun ta snae —xchi te Jesuse.

⁵⁸ Ma bayaluk milagroetik a spas teꞌa te Jesuse, yuꞌun ma xchꞌuunik te genteetike.