San Mateo 11 - Nuevo Testamento Tzeltal de Amatenango

La stikon tal yaj-mantal te Juan Akꞌichꞌjaꞌe

¹ Te kꞌalal laj yoꞌtan te Jesuse ta spasel mantal te lajchaytul jnopojeletik yuꞌune, jajch bael teꞌa. Ba pꞌijuteswanuk sok ba yal skꞌop Dios te ba jtejklumetik teꞌa.

² Te Juane, te ayix ta prexo ae, la yaꞌibe sluwaril te tut yipal ta spasel te Cristoe. Jich a stikon bael jnopojeletik yuꞌun ba sjojkꞌobe tal sluwaril te Jesuse.

³ Jicha kꞌo sjojkꞌobe ta stojol: —¿Me jaꞌat te Cristoat te ya xtale? ¿O ay to yan te ya jmalitik xtale? —xchiik.

⁴ Te Jesus la yaltalanbe: —Baanik, baan albeyaik te Juane te tut la awilike sok te tut la awaꞌibeyik sluwarile.

⁵ Albeyaik te yipal ta jamel sit te choketike sok te yipal ta lekubel te koxoetike, sok yipal ta lekubel stiꞌbalulik te kꞌaꞌel-chameletike, sok yipal ta jamel xchikin te machꞌatik ma xyaꞌiy kꞌope, sok yipal ta chaꞌkuxel te machꞌatik chamenikixe, sok yipalix ta albeyel sluwaril te meꞌbaꞌetik te tutꞌil ayix skolelike.

⁶ Ben tsaꞌam slekil te machꞌa makꞌ xcheꞌbaj yoꞌtan kuꞌune —xyut bael te Jesuse.

⁷ Te kꞌalal bajtikix ae, te Jesuse lijk yalbe yaꞌiyik te genteetike te tutꞌil ay te Juane. Jich a yal: —¿Tut xkꞌo awilik tal te ba tꞌantꞌan luware? ¿Me jaꞌ xkꞌo awilik tal te jalal te ya xtijulanot yuꞌun te ikꞌe?

⁸ Teme ma jaꞌuke, ¿tut xkꞌo awilik tal tem jichte? ¿O jaꞌ xkꞌo awilik tal te jtul winik te ben tsaꞌam skꞌuꞌ-spakꞌ slapoje? Ya anaꞌik te jaꞌexe te machꞌa ben tsaꞌam skꞌuꞌ-spakꞌ ya slape ay ta sna rey stukelik.

⁹ ¿Tut a te xkꞌo awilik tal? ¿Meꞌn jaꞌ wan xkꞌo awilik tul jꞌalwanej yuꞌun Dios? Jicha nix a. Sok ya kalbeyex te mas tulan yaꞌtel te tutꞌil jꞌalwanej yuꞌun te Diose.

¹⁰ Yuꞌun jaꞌa nix a te Juan te tsꞌibabil jilel skꞌoplal ta Sjun te Diose: “Ya me jnalates bael ta atojol jtul jꞌalwanej kuꞌun, yuꞌun ya me xchapbeyat abe, xchi me.

¹¹ Jamal ya kalbeyex: Ta spisilik te winketike te kꞌaxix ta balmilale maꞌyuk jtuluk te pajal yaꞌtel sok te Juan Akꞌichꞌjaꞌe. Pero te machꞌa chꞌin ay teꞌa te ba ay ta mantal te Diose, jaꞌ me mukꞌ ay yuꞌun te Juane.

¹² “Jaꞌ to te kꞌalal tal te Juan Akꞌichꞌjaꞌe asta ora to, sok sfuersa lijkix ta pasaw ta mantal te Diose. Te genteetik sok yipik ya sten sbaik ochel.

¹³ Spisil te jꞌalwanejetik yuꞌun te Diose sok te mantaliletik yuꞌun te jMoises la yalik te tutꞌil ya xtal te machꞌa ya xmantalaje, jaꞌ to kꞌalal tal te Juane.

¹⁴ Sok te yauk xchꞌuun awoꞌtanik te jaꞌexe, te jꞌElias te jtul jꞌalwanej yuꞌun Dios te ya amaliyik xtale, jaꞌix te Juane.

¹⁵ Te machꞌa ay xchikine, aꞌ me yaꞌibeyik sluwaril ta lek.

¹⁶ “¿Tut ya jpajtik a te genteetik te kuxulik ta ora to? Jaꞌ pajalik sok te untik te ya snajkan sbaik ta tajmal ta parke. Jich ya yawutayik te sjoꞌtake:

¹⁷ “La kokꞌesintik kamaytik, maꞌ ajkꞌotajex yuꞌun. La jkꞌayojintik te ben triste kꞌayojetik, maꞌ okꞌex yuꞌun”, te xchiike.

¹⁸ “Jich te kꞌalal tal te Juane ma weꞌ-uchꞌa ta lek. “Ay pukuj ta yoꞌtan”, xaꞌex yuꞌun.

¹⁹ Teꞌ nax a tal te Nichꞌanile te ya xweꞌ-xꞌuchꞌae. Jich ya awalik te toj ip xweꞌ-xꞌuchꞌa, sok te ya sjoyin jmulawiletik sok jkꞌan-tojemaletik. Yan te spꞌijil yoꞌtan te Diose jaꞌ ya xchiknaj ta skuenta te tut ya yakꞌ kꞌotuk ta pasele —xchi te Jesuse.

Te jtejklumetik te ma xchꞌuunik mantale

²⁰ Te Jesuse lijk yalbe skꞌoplal te jtejklumetik te ba spasoj bayal smilagroe, pero te gentee ma sujtes yoꞌtanik yuꞌun te smulike. Jich a yal:

²¹ —Te jaꞌat jtejklum Corazin, oꞌol me abaik. Sok te jaꞌat jtejkꞌum Betsaida, oꞌol me abaik euk. Te teꞌuk a yichꞌ pasel a te milagroetik te ba jtejklum Sidon jich tutꞌil te la yichꞌ pasel ta akuentaike, ora me la sujtes yoꞌtanik yuꞌun smulik te jichuke. La me slapik pakꞌ te ya xchꞌixtawane sok la me snajkꞌan sbaik ta tan yuꞌun yajtal yoꞌtanik yuꞌun smulik.

²² Pero ya kalbeyex: Tulan me kastigo ya yichꞌ te jtejklum Corazin sok te jtejklum Betsaida te tut ora ya xꞌilbot yaꞌtelik yuꞌun Dios te genteetike. Yan te jtejklum Tiro sok Sidon ma sta jich kastigo ya yichꞌ stukelik.

²³ Y jaꞌat jtejklum Capernaum, akuyojik te aꞌbilex ta jkuenta ya kꞌoex ta chꞌulchane. Jaꞌ tsꞌin to ya me awichꞌik chꞌojel ochel kꞌalal ta infierno. Te teꞌuk la yichꞌ pasel a te milagroetike te ba ay jtejklum Sodomae jich tutꞌil te la yichꞌ pasel ta awolilike, chikan to ta balmilal ta ora to te jichuke.

²⁴ Ya kalbeyex te tulan me kastigo ya yichꞌ te jtejklum Capernaum te tut ora Dios ya yilbe yaꞌtelik spisil genteetike. Yan te jtejklum Sodoma ma sta jich kastigo ya yichꞌ stukel —xchi te Jesuse.

Ikꞌel yuꞌun te Jesuse

²⁵ Jich yorail a te la yal te Jesuse: —Tat te yajwalat te chꞌulchan sok te balmilale, ben bayal slekil awoꞌtan te jaꞌ la awaꞌbe snaꞌik sluwaril spisil te machꞌatik chꞌin ayike, te ma jaꞌuk la awakꞌbe snaꞌik sluwaril te machꞌatik ay spꞌijilike sok te ya snaꞌik kꞌinale.

²⁶ Jich Tat te jich a skꞌan awoꞌtan atukele —xchi.

²⁷ Sok la yal xan: —Te jTate yakꞌojbon ta jkꞌab spisil te tutik aye. Maꞌyuk machꞌa ya snaꞌbon jba joꞌon te Nichꞌanilone, jaꞌ nax ya snaꞌbon jba te jTate. Sok maꞌyuk machꞌa ya snaꞌbe sba te jTate, joꞌon nax jtukel te ya jnaꞌbe sbae, sok euk te machꞌa jayeb ya kaꞌbe snaꞌbeyik sbae.

²⁸ Laꞌik me ta jtojol ta apisilik jaꞌex te lubenex yuꞌun te tulan aꞌtele sok te ijkatsejele. Joꞌon ya kaꞌbeyex akux awoꞌtanik.

²⁹ Akꞌa ta anukꞌik te jyukue y nopbikon koꞌtan, joꞌon te lek koꞌtan sok te chꞌin kakꞌoj jbae. Jich me ya xkux te awoꞌtanike.

³⁰ Jich te yuku kuꞌune ma wokoluk ta kuchel stukel. Sok ma aluk ta kuchel ta ijkatsil kuꞌune —xchi te Jesuse.