San Marcos 9 - Nuevo Testamento Tzeltal de Amatenango

¹ Jesus la yalbe xan: —Jamal ya kalbeyex, ay jtul cheb te liꞌ ayike te ma to xchamik a jaꞌ to te ya yilik te ya xtal sok spoder a te Kajwaltik Diose —xchi te Jesuse.

Yanej a yilik te Jesuse

² Wakeb kꞌaal ta patil te Jesuse bajt ta jol wits. La yikꞌ bael te Pedroe, te Jacoboe y te Juane. Teꞌ yanej a yilik a te Jesuse.

³ Te skꞌuꞌ spakꞌe xlemet a sut, ben sak a kꞌot jich tutꞌil maꞌyuk machꞌa jich ta balmilal te ya xjuꞌ yuꞌun sakꞌutesele.

⁴ Y la yilik Elias sok Moises te yipalik ta aꞌabiyej sok te Jesuse.

⁵ Te Pedro la yalbe tsꞌin te Jesuse: —Maestro, ben snix kaꞌiytik te liꞌ ayotike. Ya me jpastik oxwol yax-na, jun awuꞌun, jun yuꞌun Moises y jun yuꞌun Elias —xchi.

⁶ Te Pedroe ma snaꞌ tut ya yal, yuꞌun ben ayik ta xiꞌel sok te jnopojeletike.

⁷ Y teꞌ nax koj tal tokal, jul axintesek yuꞌun. Y teꞌ ta tokale ay machꞌa kꞌopoj, jich a yal: —Jaꞌ me jNichꞌan to te ben xpich ta koꞌtane. Aꞌiybeyaik me te tut ya yale —xchi.

⁸ Ora nax te la yilike maꞌyuk machꞌa sjoyinejix a. Stukel xanix a te Jesuse.

⁹ Koik tal tsꞌin ba witse, te Jesuse la yalbe mantal: —Ma me machꞌa xꞌawalbeyik te tut a te la awilike, jaꞌ to te tut kꞌaalil te ya xchaꞌkux tal te ba ay te animaetike te Nichꞌanile —xchi.

¹⁰ Te jnopojeletike la nax skꞌej ta yoꞌtanik te tut la yilike, aunke lijk sjojkꞌobe sbaik tut xyal te ya xchaꞌkux tal te ba ay te animaetike.

¹¹ La sjojkꞌobeyik te Jesuse: —¿Tuꞌun te ya yalik te maestroetik yuꞌun te mantaliletik te jaꞌ nail ya xtal te Elisae? —xchiik.

¹² La sjakꞌ tsꞌin te Jesuse: —Jich te jaꞌ nail ya xtal te Eliase, yuꞌun stukel ya xchap spisil. Y tsꞌibabil jilel skꞌoplal ta Sjun Dios te Nichꞌanile te ya xkꞌax bayal swokol y ma xkꞌanote.

¹³ Pero ya kalbeyex, xtalukix te Eliase, y la spasbeyik te tut a te la skꞌan yoꞌtanike, jich te tutꞌil tsꞌibabil jilel skꞌoplal ta Sjun Dios —xchi te Jesuse.

Jesus la slekutes jtul kerem te ochem pukuj ta yoꞌtane

¹⁴ Te kꞌalal kꞌoik te ba ay te yan xan jnopojeletike, la yilik te jumbil ta bayal genteetik. Ay maestroetik yuꞌun te mantaliletik te yipalik sok ta tulan kꞌop te jnopojeletike.

¹⁵ Kꞌalal la yilik te Jesuse, spisil te genteetike stsꞌitlajanik tal, tal spatbe yoꞌtan, yuꞌun cham a yaꞌiyik te tale.

¹⁶ Te Jesuse la sjojkꞌobe: —¿Tut a te ya awalbe abaik soke? —xchi.

¹⁷ Te jtule la yal: —Maestro, la kikꞌ tal ta akuenta te jnichꞌane yuꞌun ay pukuj ta yoꞌtan te ma xkꞌopoj yuꞌune.

¹⁸ Bayuk nax ya xꞌilbajinot yuꞌun te pukuje. Ya xbalchꞌunot ta lum yuꞌun, ya xbulan yaꞌlel stiꞌ, ya xkꞌuxuxan ye y ya xteꞌub jilel te stiꞌbalule. La kalbeyix te jnopojeletik awuꞌune te yauk slokꞌesbikon ta yoꞌtan te pukuje, pe ma juꞌ yuꞌunik slokꞌesel —xchi te mamale.

¹⁹ La sjakꞌ tsꞌin te Jesuse: —Jal jaꞌex genteetik maꞌyuk xchꞌuunel awoꞌtanik. ¿Jayeb xan kꞌaal te joyinejexe? ¿Jayeb xan kꞌaal te ya jtsikꞌbeyex te tutꞌil ayexe? Ikꞌbonik tal te kereme —xchi.

²⁰ Jich a yikꞌik tal te ba ay te Jesuse. Te pukuj la yil ta ora te Jesuse. La stupꞌesbe yikꞌ te kereme. Balchꞌo koel ta lum, xbalawet nax yuꞌun, y lijk lokꞌuk yaꞌlel stiꞌ.

²¹ Te Jesuse la sjokꞌobe tsꞌin te state: —¿Sjayebalix jabil lijk te tut aye? —xchi. La yal te state: —Ta yalalil to a.

²² Benoix a chꞌojot ochel ta kꞌajkꞌ yuꞌun te pukuje sok ta jaꞌ, yuꞌun skꞌan smil. Jaꞌ yuꞌun, teme ya xjuꞌ awuꞌune, naꞌbotik yoꞌolil jbajtik y koltayaon sok —xchi.

²³ La yal te Jesuse: —¿Tut a te ma xjuꞌ kuꞌune? Te machꞌa ya xchꞌuune spisil ya xjuꞌ ta pasel —xchi.

²⁴ Te stat te kereme awun ta kꞌop: —Ya jchꞌuun. Koltayaon ta xchꞌuunel ta mas —xchi.

²⁵ La yil te Jesus te ya stsob sbaix tal bayal genteetik. La skom te pukuje, jich a yal: —Jaꞌat pukuj, umaat sok ma xꞌawaꞌi kꞌop, ya kalbeyat te ya xlokꞌat tal ta yoꞌtan te kereme, sok ma me chaꞌochanix tal a —xchi te Jesuse.

²⁶ Awun te pukuje, y la stupꞌesbe jilel yikꞌ te kereme. Jich lokꞌ bael y la sjiles komo jchamel te kereme. Ay bayalik te la yalik te chamixe.

²⁷ Pero te Jesuse la xchechbe te skꞌabe, la xjach. Ja yuꞌun la stejkꞌan sba te kereme.

²⁸ Tsꞌin a och ta jun na te Jesuse, y te jnopojeletike la sjokꞌobeyik ta stukel nax: —¿Tuꞌun te ma juꞌ kuꞌuntik slokꞌesel li pukuj to? —xchiik.

²⁹ La yal te Jesuse: —Jaꞌ li pukujetik to jaꞌ to ya xjuꞌ ta lokꞌesel ta skuenta skꞌoponel Dios sok teme ya akom aweꞌelike —xchi.

Xchaꞌmelal ya yal Jesus te ya xchame

³⁰ Lokꞌik bael te ba ayike, kꞌaxik bael ta Galilea. Te Jesuse ma skꞌan te ay machꞌa ya yaꞌi te kꞌotix ae,

³¹ yuꞌun yipal ta spꞌijutesel a te jnopojeletik yuꞌune. La yalbe: —Te Nichꞌanile, ya me yakꞌik ta skꞌab winketik, y ya me smilik. Pero ta yoxebal kꞌaal ya me xchaꞌkux tal —xchi te Jesuse.

³² Pero te jnopojeletike ma yaꞌiybeyik sluwaril te tutꞌi altalanbote, sok la xiꞌik ta sjokꞌobeyel xan tsꞌin.

Te machꞌa a te mukꞌ ya xkꞌote

³³ Kꞌotik ta jtejklum Capernaum. Kꞌalal ayix ta na, te Jesuse la sjokꞌobey te jnopojeletike: —¿Tut a te yipalex ta yaꞌbiyanel ta bee? —xchi.

³⁴ Maꞌyuk machꞌa sjakꞌ tsꞌin, yuꞌun yipalik ta yaꞌbiyanel ta be te machꞌa ta spisilik te mukꞌ ya xkꞌote.

³⁵ Te Jesuse la snajkan sba, la yikꞌ tal te lajchaytul jnopojeletik. Jich a yalbe: —Teme ay machꞌa nail nail ya skꞌan ya xkꞌote, último me skꞌan ya yakꞌ sba, sok a me yakꞌ sba ta mantaltesel sok te sjoꞌtake —xchi.

³⁶ Y la yikꞌ tal jtul alal, la stejkꞌan ta yolilik y la skꞌech ta skꞌab. Jich a yalbe yaꞌiyik:

³⁷ —Te machꞌa ya yikꞌ ta sna ta joꞌon jbiil jich tutꞌil alal to, joꞌon me la yikꞌonix abi. Te machꞌa ya yikꞌon ta snae ma joꞌokon nax te ya yikꞌone, jaꞌ la yikꞌix ekꞌa te Machꞌa la stikonon tale —xchi te Jesuse.

Te machꞌa makꞌ skontrainotike joy jbatik sok me abi

³⁸ Te Juane la yal: —Maestro, la kiltik tul te yipal ta slokꞌesel pukuj ta abiil. Komo ma joytikuk, jaꞌ yuꞌun la kalbeytik te ya skom sbae —xchi.

³⁹ La sjakꞌ tsꞌin te Jesuse: —Ma me komik, porke te machꞌa ya spas milagro joꞌon ta jkuenta, makꞌ me yixta-kꞌoptayon tsꞌiin.

⁴⁰ Te machꞌa makꞌ skontrainotike, jaꞌ joy batik sok me abi.

⁴¹ Machꞌauk a te ya yaꞌbeyex junuk baso jaꞌ te ayex ta jkuenta te Cristoone, jamal ya kalbeyex ay me smajtꞌan ya yichꞌ —xchi.

Ma lekuk teme ya jta jmultike

⁴² Jich a yal xan te Jesuse: —Machꞌauk a te ya yakꞌ yaluk ta mulil tuluk te machꞌa pekꞌ ayik te xchꞌuunejikone, jaꞌ lek yauk yichꞌ chꞌojel ta mar sok junuk mukꞌul chaꞌ ton chukul ta snukꞌ.

⁴³ Teme akꞌab ya yakꞌat ta mulile, boja lokꞌel. Jaꞌ mas lek te mokol akꞌab te ya xkꞌo ata te akuxlejale. Jaꞌ mas ma lekuk teme xchebal akꞌab te ya xbaat sok ta kꞌajkꞌ te ma xtupꞌ sbajtel kꞌinale,

⁴⁴ te ba ma xcham sjaul te machꞌatik ya sle smulike, sok te ba kꞌajkꞌ nunka xtupꞌ sbajtel kꞌinal.

⁴⁵ O teme jaꞌ awok te ya yakꞌat ta mulile, setꞌa lokꞌel. Jaꞌ mas lek te chꞌix nax awok ya xkꞌo ata te akuxlejale. Jaꞌ mas ma lekuk teme xchebal awok te ya xbaat sok ta kꞌajkꞌ sbajtel kꞌinale

⁴⁶ te ba ma xcham te sjaule sok ma xtupꞌ te kꞌajkꞌe.

⁴⁷ O teme sbaꞌ asit te ya yakꞌat ta mulile, lokꞌesa. Jaꞌ mas lek te pꞌej nax asit ya xbaat sok te Diose. Jaꞌ mas ma lekuk te xchebal asit ya xbaat sok ta kꞌajkꞌ sbajtel kꞌinal,

⁴⁸ te ba ma xcham te sjaule sok ma xtupꞌ te kꞌajkꞌe.

⁴⁹ “Spisilik ya me yichꞌ chaptalanel ta kꞌajkꞌ kꞌoem, jich tutꞌil te ya yichꞌ chaptalanel ta atsꞌam te milbil smajtꞌan te Diose.

⁵⁰ Te atsꞌame lek ay. Pero teme chꞌay te xchiꞌile, ¿tut xan kꞌan taluk awuꞌunik te xchiꞌile? Ayuk me awatsꞌamulik, y junuk me awoꞌtan abaik jujutulex —xchi te Jesuse.