San Marcos 7 - Nuevo Testamento Tzeltal de Amatenango

Te tutꞌil ma tsaꞌamuk yax kꞌootik ta skuenta Dios yuꞌun

¹ Ay a talik kꞌalal ta Jerusalen fariseoetik sok maestroetik yuꞌun te mantaliletike. La stsob sbaik te ba ay te Jesuse.

² La yilik te ma pokoluk skꞌabik ta skuenta Dios te ochik ta weꞌel chaꞌox-tul te jnopojeletik yuꞌun te Jesuse, yuꞌun ma jichuk la spok skꞌabik te tutꞌil albil skꞌoplale. Jich a lijk yalik te ma lekuk te tut ya spasike.

³ Jich spisil te judioetik xchꞌuunejik spasel te kostumbre te lijkem ta pasel yuꞌun te antiboetike, te ma xweꞌik teme ma nailuk ya spok skꞌabik te tutꞌil albil skꞌoplale. Jaꞌ bayal skꞌoplal ta pasel ta skꞌopik te fariseoetike.

⁴ Jaꞌ nax jich te kꞌalal ya sujtik tal ta merkadoe, makꞌ xweꞌik teme ma nailuk ya spokik te skꞌabike. Ay yuꞌunik yanetik skostumbreik, jich tutꞌil ay ta sapel basoetik, xaruetik, takꞌin pꞌinetik sok wayibaletik.

⁵ Jaꞌ sluwar te lijk sjojkꞌobeyik Jesus te fariseoetik sok te maestroetik yuꞌun te mantaliletike: —¿Tuꞌun te jnopojeletik awuꞌun te makꞌ xchꞌuunik te kostumbreetik yuꞌun te antiboetike, te ma spokojuk skꞌabik ta skuenta Dios ya xweꞌik ya kil? —xchiik.

⁶ Te Jesus la yalbe: —Jich a nix a te ma tsaꞌamuk awoꞌtanik jaꞌexe, jich te tutꞌil la yalbeyex akꞌoplalik ta namey te jꞌalwanej Isaiase, te la stsꞌibaye: “Te jtejklum to ya nax yalik te ya xchꞌuunonik ta skꞌopike, yan te yoꞌtanike jakal ay ta jkuenta.

⁷ Lom nax te ya xtal xchꞌuunonike. Skꞌop nax gente te mantal ya yakꞌik ta nopele”, te xchie.

⁸ Jich te jaꞌexe jilix awuꞌunik te smantal te Diose. Jaꞌ baem awoꞌtanik ta spasel te tutꞌil kostumbreetik yuꞌun te genteetike, jaꞌ te tutꞌil ay skꞌoplal ta sapel awuꞌunik xaruetik sok basoetik sok te tutꞌil xan bayal skꞌoplal ta pasel awuꞌunike —xchi te Jesuse.

⁹ Sok la yalbe xan: —Te jaꞌexe ya ajiles ta apatik te smantal Diose, skuenta yuꞌun jich ya xjuꞌ ta pasel a te kostumbreetik awuꞌunike.

¹⁰ La yal te Moisese: “Akꞌa ta jkuenta te ameꞌ atate” te xchie, sok la yal xan: “Te machꞌa ya sbolkꞌoptay te state o jaꞌ te smeꞌe, ya me xcham”, te xchie.

¹¹ Yan te jaꞌexe jich ya awalik: “Teme ay machꞌa ya yalbey te state o jaꞌ te smeꞌe: ‘Ma xjuꞌ kuꞌun te ya jkoltayate, porke spisil te tut ay kuꞌune jaꞌ Corban’, teme ya yute,

¹² libre ayix, ma puersauk ya skoltay te smeꞌstate”, te xaꞌexe. (Te Corban te xchie, smajtꞌan Dios xchi kꞌoem).

¹³ Jich ta skuenta te kostumbreetik te jilem ta akuentaik maꞌyuk skꞌoplal ya xkꞌot ta chꞌuunel awuꞌunik te tutꞌil yaloj ta mantal te Diose. Sok ay bayal tut ya apasik te pajal soke —xchi te Jesuse.

¹⁴ Te Jesuse la yikꞌ tal ta skuenta te genteetike, jich a yalbe: —Aꞌiyaikon apꞌejelik sok a kꞌotuk ta awoꞌtanik te tut ya kalbeyexe:

¹⁵ Ma jaꞌuk ma tsaꞌamuk ya xkꞌoex ta skuenta te tut ya aweꞌike. Jaꞌ ma tsaꞌamuk ya xkꞌoex ta skuenta Dios yuꞌun te tut ya xlokꞌ tal ta awoꞌtanike.

¹⁶ Teme ay achikinike, aꞌiyaik me lek sluwaril —xchi te Jesuse.

¹⁷ Te kꞌalal jil yuꞌun a te genteetike sok ayix ta na a te Jesuse, te jnopojeletike la sjojkꞌobey te kꞌop a yale.

¹⁸ Jich a yal te Jesuse: —¿Meꞌn ma kꞌot ta awoꞌtanik ekꞌa te jaꞌexe? ¿Yuꞌun wan ma xkꞌot ta awoꞌtanik te ma jaꞌuk ma tsaꞌamuk ya xkꞌoex ta skuenta Dios yuꞌun te tut ya aweꞌike?

¹⁹ Yuꞌun ma ta awoꞌtanikuk ya xꞌoch bael te aweꞌelike, ta achꞌujtik nax ya xꞌoch. Patil ya xlokꞌ bael ta atiꞌbalulik —xchi te Jesuse. Jich la yakꞌ ta naꞌel te lek sluwaril yuꞌun Dios spisil te weꞌeliletike.

²⁰ Sok la yal xan: —Te tut ya xlokꞌ tal ta awoꞌtanik, jaꞌ ma tsaꞌamuk ya xkꞌoex ta skuenta Dios yuꞌun stukel.

²¹ Jich ta yutil awoꞌtanik ya anopik spisil te tut ma tsaꞌamuke. Teꞌ ya xlokꞌ tal a te ya apasik antsiwejele, sok te elekꞌe, sok milaw,

²² sok mulil, sok kꞌupinwane, sok utawane, sok loꞌlawane, sok te tut ma tsaꞌamuk ta pasel te kꞌupinbil sbae, sok pꞌajawane, sok aꞌabiyej, sok toybajel, sok maꞌ tsaꞌamuk-oꞌtanil.

²³ Spisil tutik ma tsaꞌamuk, ta yutil awoꞌtanik ya xlokꞌ tal. Jaꞌ ma tsaꞌamuk ya xkꞌoex ta skuenta Dios yuꞌun —xchi te Jesuse.

²⁴ Lokꞌ bael teꞌ a te Jesuse, bajt ta jtejklum Tiro sok jtejklum Sidon. Och ta na te a te Jesuse. Ma skꞌan te ay machꞌa ya yaꞌi te ba aye, pero ma juꞌ yuꞌun te la snakꞌ sbae.

²⁵ Ay tul ants te ay pukuj ta yoꞌtan te yantsil-ale, la yaꞌibe skꞌoplal ta ora te Jesuse. Jich a tal skejan sba ta yok te Jesuse.

²⁶ Ma juriouk te antse, jaꞌ slumal Sirofenicia. Tal skꞌanbe te Jesus te yauk slokꞌesbe te pukuj te ay ta yoꞌtan te yantsil-ale.

²⁷ Te Jesuse la yalbe: —A weꞌuk nail te untike, porke ma spas teme ya jpojbeytik yot te untike te ya kaꞌbeytik sweꞌ te tsꞌiꞌetike —xchi te Jesuse.

²⁸ La sjakꞌ te antse: —Jich a nix a Kajwal. Pero te tsꞌiꞌetik te ay ta yanil mexae ya me sweꞌbe te stsꞌubil yot ya xchꞌay koel yuꞌun te untike —xchi.

²⁹ Te Jesuse la yalbe: —Lek te tut la awale. Ya spas ya xbaat. Te pukuje lokꞌix bael ta yoꞌtan te awachꞌixe —xchi.

³⁰ Te kꞌalal kꞌot ta sna te antse, kꞌo sta ta swayib te achꞌixe, pero te pukuje lokꞌemix bael ta yoꞌtan.

Jesus la slekutes jtul winik te max yaꞌi kꞌop y ma xlokꞌ skꞌop

³¹ Te Jesus lokꞌ bael ta slumal te jtejklum Tiro. Kꞌax bael ta jtejklum Sidon sok ta slumal Decapolis. Kꞌot ta tiꞌjaꞌ yuꞌun Galilea.

³² Tey la yikꞌik tal jtul winik te ma xyaꞌi kꞌop sok ma xlokꞌ skꞌop. La skꞌanbeyik te yauk skajanbe skꞌab ta sjole.

³³ Te Jesus la yikꞌ bael ta jejch te winike, la sjiles chꞌinuk te genteetike. Tey la yotsesbe ochel yal skꞌab ta xchikin te winike, y la stubutay skꞌab sok la spikbe yakꞌ a te winike.

³⁴ Yo la skꞌeluy ta chꞌulchan te Jesuse sok la sjikꞌ yoꞌtan. Jich a yal: —Efata —xchi. Jaꞌ bi, “Jamuk”, xchi kꞌoem.

³⁵ Ora jam xchikin te winike, sok lekub te yakꞌe. Jich a kꞌopoj ta lek.

³⁶ Jesus la yalbe mantal te genteetik te ma me machꞌa ya yalbeyik ni tuluk. Manchuk me jich a spasulan ta mantal, mas a spukbeyik skꞌoplal.

³⁷ Cham a yaꞌiyik te tut a kꞌot ta pasel. Jich la yalik: —Spisil tsaꞌam te tut ya spase. Asta te machꞌa ma xyaꞌi kꞌope, ya yaꞌi kꞌop yuꞌun. Sok te machꞌa ma xlokꞌ skꞌope, ya xkꞌopoj yuꞌun —xchiik.