San Marcos 3 - Nuevo Testamento Tzeltal de Amatenango

Jtul winik te makꞌ snik sba te skꞌabe

¹ Te Jesuse och xan bael ta sinagoga y ay jtul winik teꞌa te makꞌ snik sba te skꞌabe.

² Te genteetik la smaliyik teme ya xkoltaywan ta skꞌaalel kuxo-oꞌtan te Jesuse, y jachik ya stabeyik smul a.

³ Te Jesuse la yalbe te winik te makꞌ snik sba te skꞌabe: —Jajchan, anan ta olil —la yut.

⁴ Sok la sjojkꞌobe te yanetike: —¿Tut lek ta pasel ta skꞌaalel kuxo-oꞌtane? ¿Me jaꞌ te leke, o jaꞌ te ma lekuke? ¿Me jaꞌ lek te ay machꞌa ya xkuxuyin kuꞌuntik ae, o jaꞌ te ay machꞌa ya xcham kuꞌuntik ae? —xchi. Y maꞌyuk machꞌa la sjakꞌ.

⁵ Te Jesuse la skꞌelulanbe sit te machꞌatik joybil yuꞌune. Ilin yoꞌtan sok ay yajtal yoꞌtan yuꞌun te tutꞌil ben tulan yoꞌtanike. La yalbe tsꞌin te winike: —Jacha te akꞌabe —la yut. Te winike la xjach te skꞌabe y lek a jil.

⁶ Jich a lokꞌik bael te fariseoetike, baj snopik sok te sjoꞌtak Herodese te tut ya yut ya smilik te Jesuse.

Bayal gente ta tiꞌjaꞌ

⁷ Te Jesuse bajt ta tiꞌjaꞌ sok te jnopojeletik yuꞌune. Tsakꞌliyot bael yuꞌun bayal genteetik talemik ta Galilea.

⁸ Kꞌalal la yaꞌiyik te lom mukꞌ tutik ya spas te Jesuse, talik bayal genteetik ta Judea, sok ta jtejklum Jerusalen, sok ta Idumea, sok ta ba ay jechjaꞌ Jordan, sok ta jtejklum Tiro, sok ta jtejklum Sidon. Tal yilik te Jesuse.

⁹ Jaꞌ yuꞌun te Jesuse la yalbey te jnopojeletik yuꞌune te ya xchapik jun barko te ta tiꞌjaꞌe, yuꞌun teꞌ ya xꞌoch a teme ya xtenot yuꞌun te genteetike.

¹⁰ Batsꞌi stenten sbaik yuꞌun skꞌan spikik te Jesuse, yuꞌun bayalix te machꞌatik kolemikix ta chamel yuꞌune.

¹¹ Jaꞌ tsꞌin te pukujetike, jaꞌ nax te la yilik te Jesuse, la skejan sbaik ta skuenta y awunik. Jich a yalik: —Jaꞌat Xnichꞌanat te Diose —xchiik ta aw.

¹² Jaꞌ tsꞌin te Jesuse la skom te manchuk ya yal ta jamal te tutꞌil jaꞌ Xnichꞌan te Diose.

Jesus la stꞌuj te lajchaytul apostoletik

¹³ Patil mo bael ta wits te Jesuse, y la yikꞌ tal te machꞌa la stꞌuje. Jich a talik ta skuenta.

¹⁴ La stꞌuj ta yolilik te lajchaytul skuenta yuꞌun ya sjoyin ta beel sok yuꞌun ya stikon bael ta yalel te skꞌop Diose.

¹⁵ Sok la yaꞌbe spoderik ta slokꞌesel pukujetik.

¹⁶ Jaꞌ sbiilik te lajchaytul te la stꞌuje: jaꞌ te Simone aꞌbot sbiilin Pedro yuꞌun te Jesuse,

¹⁷ sok te Jacobo, sok te yitsꞌin te Juan sbiile, te jaꞌ yuntikil te Zebedeoe. Boanerges a aꞌbot sbiilin xchebalik yuꞌun te Jesuse, yuꞌun kꞌajkꞌal winiketik jichuk chauk.

¹⁸ Sok la stꞌuj te Andres, sok te Felipe, sok Bartolome, sok Mateo, sok Tomas, sok Jacobo te xnichꞌan Alfeoe, sok Tadeo, sok Simon te ay ta skuenta te jkananistaetike,

¹⁹ sok te Judas Iscariotee te ta patil la yakꞌ entregal te Jesuse.

Xkujchinot Jesus te yichꞌojbe spoder te pukuje

²⁰ Patil och bael Jesus ta jun na sok te jnopojeletik yuꞌune. Y la stsob sbaik xan tal bayal gente, te ni ma spas xweꞌikix yuꞌun a.

²¹ Te tut ora la yaꞌiyik te machꞌatik ay yuꞌun te Jesuse, tal stsakꞌik bael yuꞌun la yalik te ya xjowiye.

²² Jich talik ekꞌa te maestroetik yuꞌun te mantaliletike te lijkemik tal ta Jerusalen. Jich a yalik: —Jaꞌ i winik to ay ta yoꞌtan te Beelzebu te ajwalil yuꞌun te pukuj. Jaꞌ yakꞌojbey spoder yuꞌun slokꞌesel te pukujetike —xchiik.

²³ Jaꞌ yuꞌun te Jesuse la yikꞌ tal ta spisilik. La yalbey jun seña-kꞌop. Jich a yal: —¿Tut ya spas te Satanas te ya sten lokꞌel te mismo Satanase?

²⁴ Jun pais, teme ya xatꞌ sbaike sok teme ya skontrain sbaike, ma xjalajik.

²⁵ Jachik te jun nax smeꞌ statike, teme ya xatꞌ sbaike, jich ma xjuꞌ xjalajik.

²⁶ Jachik ekꞌa te pukuje teme ya xatꞌ sbaik sok ya skontrain sbaik, ma xjuꞌ te ya xjalaj. Te ya xkꞌo lajuk a.

²⁷ “Sok maꞌyuk machꞌa xjuꞌ xꞌoch a te ba sna jtul kꞌajkꞌal winik. Teme ya skꞌan yelkꞌanbe te tut ay yuꞌune, puersa me nail ya xchuk. Jich ya xjuꞌ yuꞌun ya yichꞌbey bael te tut ay yuꞌune.

²⁸ “Jamal ya kalbeyex, te Diose ya yaꞌbe perdon te winketik yuꞌun spꞌejel te smulike sok spꞌejel te ma tsaꞌamuk te ya yalike.

²⁹ Yan te machꞌa ya yixlan ta kꞌop te Chꞌul Espiritue, ma sta perdon stukel. Te skuchoj smul sbajtel kꞌinal —xchi te Jesuse.

³⁰ Jich a yal te Jesuse ta skaj te la yalik te ay pukuj ta yoꞌtane.

Te smeꞌ te Jesuse sok te yitsꞌinabe

³¹ Kꞌot te smeꞌe sok te yitsꞌinab te Jesuse. Tekꞌajtik julel ta amakꞌ sok la yakꞌik tal ta ikꞌel te Jesuse.

³² Te gente te sjoyik ta naklej te Jesuse jich a yalbeyik: —Te ameꞌe sok te awitsꞌinabe lum ayik ba amakꞌe yuꞌun ya sleat —la yutik.

³³ La yal te Jesuse: —¿Machꞌa a te jmeꞌe sok te kitsꞌinabe te ya awalike? —xchi.

³⁴ La skꞌeluy te machꞌatik sjoy ta naklej. Jich a yal to: —Jaꞌ to jaꞌ jmeꞌ sok jaꞌ kitsꞌinab ta spisilik to.

³⁵ Machꞌauk a te ya spas te tut ya skꞌan te Diose, jaꞌ kitsꞌin sok jaꞌ jmeꞌ —xchi te Jesuse.