San Marcos 2 - Nuevo Testamento Tzeltal de Amatenango

Te Jesuse la slekutes jtul te machꞌa makꞌ snik sbaix stiꞌbalule

¹ Cheb oxeb kꞌaal a ta patil te Jesuse kꞌot xan ta jtejklum Capernaum. Kꞌalal aiyot te ayix ta nae,

² ora nax bayal genteetik la stsob sbaik tal. Jich ma xꞌochikix a te ba puertae. Te Jesuse la yalbe te skꞌop Diose.

³ Jich talik chantul winketik skꞌechojik tal jtul winik te jmel nax makꞌ xnijkix te stiꞌbalule.

⁴ Komo ben bayal te gentee, ma spas a kꞌaxik bael te ba ay te Jesuse. Jich a moik bael ta sba te nae, sok la stochbeyik sba te nae. Y komo jeꞌelix a, la skoesik bael sok swayib te jchamele te ba ay te Jesuse.

⁵ Te Jesus la yil te ay xchꞌuunel yoꞌtanike te ya xkoltaywane, jich la yalbe te jchamele: —Jnichꞌan, te amule pasbilix perdon —xchi.

⁶ Teꞌ nakajtik ay chaꞌoxtul te maestroetik yuꞌun te mantaliletike. Jich a yal ta yoꞌtanik:

⁷ “¿Tuꞌun te jich ya yale? Te skꞌope ya nax stoy sba ta stojol Dios. Uniko te Diose ya yakꞌ perdon yuꞌun mulil”, xchiik ta yoꞌtanik.

⁸ Te Jesuse ora snaꞌ ta yoꞌtan te ay tut yipalik ta yalel ta yoꞌtanike. Y la sjokꞌobe: —¿Tuꞌun te jich ya awal ta awoꞌtanike?

⁹ ¿Tut a te ma wokoluk ta albeyel te jchamele? ¿Me jaꞌ te “chꞌaybilix amul”, te ya kute? ¿O jaꞌ ma wokoluk ya awaꞌi te: “Jajchan, ichꞌa te awayibe, baan”, te ya kute?

¹⁰ Pues, ya me kaꞌbeyex awilik te tutꞌil tulan yaꞌtel yichꞌoj ta xchꞌayel mulil ta balmilal te Nichꞌanile —xchi te Jesuse. Jich a yalbe te winik te makꞌ xnijkix te stiꞌbalule:

¹¹ —Ya kalbeyat te jaꞌate: Jajchan. Ichꞌa bael te awayibe, baan ta ana —la yut.

¹² Jich a jajch te machꞌa ay ta chamele. La xach bael te swayibe. Lokꞌ bael te ba tsobolike. Kꞌelajtik jilel sitik ta spisilik. Bayal aꞌabiyan yoꞌtanik yuꞌun, sok la yalbeyik kola yal Dios yuꞌun. La yalike: —Maꞌyuk ba kilojtik tutꞌil to —xchiik.

Jesus la yikꞌ te Levie

¹³ Te genteetike tijilaj tal te ba aye. Te Jesuse la spꞌijuteslan xan.

¹⁴ Te kꞌalal yipal ta beel te Jesuse, la yil te Levie, xnichꞌan te Alfeoe, te nakal ba ay xkꞌambot stojemal tutik yuꞌun Roma. Jesus la yalbe: —Laꞌ tsꞌakliyaon —la yut. Jajch te Levie, la stsꞌakli bael.

¹⁵ Jich te Jesuse yipal ta weꞌel ta sna Levi. La sjoyin ta weꞌel bayal jkꞌan-tojemaletik sok yan gente mulawiletik, y teꞌ nakajtik ekꞌa ba mexae. Sok teꞌ ayik ekꞌa te jnopojeletik yuꞌun te Jesuse, yuꞌun ben bayal te machꞌatik la stsꞌakliyik baele.

¹⁶ Te maestroetik yuꞌun te mantaliletike te ayik ta skuenta te fariseoetike la yilik te yipal ta weꞌel sok te jkꞌan-tojemaletike y sok te jmulawiletike te Jesuse. La sjokꞌobey te jnopojeletike: —¿Tutꞌil ay te maestro awuꞌunike te ya sjoyin ta weꞌel te jkꞌan-tojemaletike sok te jmulawiletike? —xchiik.

¹⁷ La yaꞌi tsꞌin to te Jesuse, jich la yalbe: —Te machꞌatik lek ayike maꞌyuk nesesidad yuꞌun te jloktore; jaꞌ nax te machꞌatik ayik ta chamele puersa yuꞌun te jloktore. Ma jaꞌuk tal kikꞌ machꞌatik lekike, jaꞌ a tal kikꞌ te jmulawiletike —xchi te Jesuse.

Tut sluwar te skomel weꞌelile

¹⁸ Ay machꞌatik a tal sjojkꞌobeyik te Jesuse: —Te jnopojeletik yuꞌun te Juane y sok te fariseoetike ya skom te sweꞌelik. ¿Tuꞌun ma skom sweꞌelik te jnopojeletik awuꞌune? —xchiik.

¹⁹ Te Jesus la sjojkꞌobey: —¿Me ya wan spas skom sweꞌelik te jꞌil-nujpuneletike teme sjoyinej to sba te machꞌa ya xnujpune? Mientras teꞌ to ay a te jnujpunele, ma spas ya skom sweꞌelik.

²⁰ Pero ya me sta yorail te ya xꞌikꞌot bael te jnujpunele, jaꞌ to me ya skom sweꞌelik a.

²¹ “Te pakꞌ te kꞌaꞌixe maꞌyuk machꞌa ya spakꞌan ta achꞌ pakꞌ, porke te achꞌ pakꞌe ya stsꞌuj. Jich ya xchꞌiꞌ xan te kꞌaꞌ pakꞌe, y ya xmukꞌub xan a te xchꞌiꞌemale.

²² Ni ma spas ta pulel te achꞌ bino ta nujkul te kꞌaꞌixe, porke te achꞌ bino ya me xchꞌiꞌ te nujkule. Jich ya me xchꞌay te binoe sok te nujkule. Por eso ya skꞌan te achꞌ nujkul ya yichꞌ pulel a te achꞌ binoe —xchi te Jesuse.

Te jnopojeletike ya stuyik trigo ta skꞌaalel kuxo-oꞌtan

²³ Ta skꞌaalel kuxo-oꞌtan, te Jesuse been bael ta triwualtik, y te jnopojeletik yuꞌune lijk skꞌokbeyik sjol triwu te kꞌalal yipalik ta beel tey a.

²⁴ Te fariseoetike la sjojkꞌobeyik: —Ilawil, ¿tuꞌun ya spasik te jnopojeletik awuꞌune te tut ma lekuk ta pasel ta skꞌaalel kuxo-oꞌtan? —xchiik.

²⁵ La yal te Jesuse: —¿Me yuꞌun ma awilojuk ta Sjun Dios te tut la spas te Davide? Ay jun buelta stukel la yaꞌi wiꞌnal sok te sjoꞌtake.

²⁶ Jich a och bael ta chꞌulna yuꞌun Dios. Teꞌ ay te statal saserdote te Abiatare. Te Davide la sweꞌ te waj te chꞌultesbil yuꞌun te Diose, te jaꞌ nax ya xjuꞌ ya sweꞌik te saserdoteetike, sok la yaꞌbe ekꞌa te sjoꞌtake —xchi te Jesuse.

²⁷ Sok Jesus la yalbe: —Jaꞌ sluwar te ay skꞌaalel te kuxooꞌtane jich ya xkuxik yoꞌtanik te genteetike. Ma jaꞌuk sluwar te ya xkꞌax swokolik ta skanantayele.

²⁸ Jaꞌ yuꞌun te Nichꞌanile jaꞌ ajwalil yuꞌun te skꞌaalel kuxo-oꞌtane —xchi te Jesuse.