San Marcos 16 - Nuevo Testamento Tzeltal de Amatenango

Chaꞌkux tal te Jesuse

¹ Kꞌalal kꞌaxemix a te skꞌaalel kuxo-oꞌtane, bajtik ta smanel perfume te ben tsaꞌam yikꞌe te xMaria Magdalenae sok te jtul xan xMaria te smeꞌ te Jacobe, sok te Salomee, yuꞌun ya xba yaꞌbeyik te stiꞌbalul te Jesuse.

² Ta primer kꞌaal yuꞌun te semanae, sab to a bajtik te ba mujkeme. Ya to nax xlokꞌ tal kꞌaal a.

³ Jich a yalbe sbaik: —¿Machꞌa wan ya slokꞌesbotik te ton te makal stiꞌil a te ba mujkeme? —xchiik.

⁴ Pero te kꞌalal la yilike, tselbilix lokꞌel a te mam mukꞌul ton te la smakik jilel a te stiꞌile.

⁵ Kꞌalal ochik bael ta yutil te ba mujkeme, te la yilik a jtul chꞌiel kerem nakal ta sbatsꞌil te ba mujkeme. Ben najt y ben sak te skꞌuꞌ spakꞌe. Te antsetike cham a yaꞌiyik.

⁶ Pero kꞌoponlanot yuꞌun: —Ma me xiꞌanik. Te jaꞌexe yipalex ta sleel te Jesus Nazarete te la yichꞌ milel ta kruse. Pero chaꞌkuxemix bael. Ma liꞌiyukix to. Ilawilik ba yakꞌojik jilel te stiꞌbalule.

⁷ Baan, albeyaik te jnopojeletik sok euk te Pedroe te ya xnailaj bael awuꞌunik te ba Galilea te Jesuse. Teꞌ me ya xkꞌo awilik a, jich te tutꞌil la yalbeyexe —xchi.

⁸ Jaꞌ tsꞌin te antsetike lokꞌik bael te ba mujkeme, anik bael sok xmetlajanik bael ta sik yuꞌun xiꞌel. Maꞌyuk machꞌa yalbeyik ni jtuluk, yuꞌun ayik ta xiꞌel.

Te Jesuse la yakꞌ sba ta ilel yuꞌun te xMaria Magdalenae

⁹ Te kꞌalal chaꞌkuxemix tal a te Jesuse, ta ben sab ta primer kꞌaal yuꞌun te semanae, jaꞌ nail la yakꞌ sba ta ilel yuꞌun te xMaria Magdalena te lokꞌesbil jukeb pukujetik ta yoꞌtan yuꞌune.

¹⁰ Jich te xMaria ba yalbe yaꞌiyik te machꞌatik la sjoyinik ta beel te Jesuse, yuꞌun bayal ayik ta ajtal-oꞌtan sok ta okꞌel yuꞌun.

¹¹ Kꞌalal la yaꞌiyik sluwaril te tutꞌil kuxulix te Jesuse, sok te tutꞌil la yilix te xMariae, ma skꞌan xchꞌuunik.

Jesus la yakꞌ sba ta ilel yuꞌun te chaꞌtul jnopojeletike

¹² Patil te Jesuse ay yan tutꞌil la yakꞌ sba ta ilel yuꞌun te chaꞌtul yipalik bael ta beel ta stenleje.

¹³ Te chaꞌtule ba yalbe yaꞌiyik te yanetike; jaꞌ nax jich ma skꞌan xchꞌuunbeyik te skꞌopike.

Jesus la yaꞌbe jilel yaꞌtel te jnopojeletike

¹⁴ Ta patil to xan Jesus la yakꞌ sba ta ilel yuꞌun te buluchtul jnopojeletike te kꞌalal yipalik ta weꞌele. La yalbe ta jamal te maꞌyuk tut ya skꞌan xchꞌuunike sok te ben tulan yoꞌtanike, yuꞌun ma skꞌan xchꞌuumbeyik skꞌop te machꞌatik la yilikix te chaꞌkuxemix tale.

¹⁵ Sok altalanbot yuꞌun: —Baanik ta bayuk ta spꞌejel balmilal. Albeyaik spisil te genteetik te lek yachꞌil kꞌope.

¹⁶ Te machꞌa ya xchꞌuun sok ya yichꞌ jaꞌe, ya me xkol. Yan te machꞌa ma xchꞌuune ya me xꞌaꞌbot stoj smul stukel.

¹⁷ Sok ya me xchiknaj señailetik ta skuentaik te machꞌatik ya xchꞌuunike. Joꞌon ta jkuenta ay me ya slokꞌesik pukujetik, sok ay me ya xkꞌopoj ta yan kꞌopetik,

¹⁸ sok ay me ya stsak ta skꞌabik tiꞌawal chanetik, sok aunke ya yuchꞌik benenoe, ma tut ya spasbot yuꞌun. Sok ya me skajanbe skꞌabik ta sjol te jchameletike y ya xkol yuꞌunik —xchi te Jesuse.

Jesus mo bael ta chꞌulchan

¹⁹ Lajix yoꞌtan ta skꞌoponel a te jnopojeletik yuꞌune, te ikꞌot moel ta chꞌulchan te Kajwaltik Jesuse. Kꞌo nakajuk ta sbatsꞌil skꞌab te Diose.

²⁰ Te jnopojeletike lokꞌik bael ta yalel te lek yachꞌil kꞌope ta bayuk nax. Jaꞌ koltalanot ta aꞌtel yuꞌun te Kajwaltike. Sok te tut la yalike ay bayal spuersa ta skuenta te señailetik te chiknaj ta skuentaike. Jichuk.