San Marcos 15 - Nuevo Testamento Tzeltal de Amatenango

Jesus tejkꞌanot ta sit te Pilatoe

¹ Sakubix tal kꞌinal a tal stsob sbaik ta xchapel skꞌopik te statal-saserdoteetike sok te moletike sok te maestroetik yuꞌun te mantaliletike sok taspisil te machꞌatik yichꞌojik yaꞌtelike. Jich la xchukik bael te Jesuse. Ba yaꞌbeyik ta skꞌab te Pilatoe.

² Te Pilatoe la sjojkꞌobe te Jesuse: —¿Me jaꞌat te Mukꞌul Reyat yuꞌun te Juriyoetike? —xchi. La yal te Jesuse: —Jaꞌat te jich ya awale —xchi.

³ Te statal-saserdoteetike bayal te tut la yalik te tut smulinej ta skꞌopike.

⁴ Jaꞌ yuꞌun te Pilato la yal xan tsꞌin: —¿Tut la apas te ma xꞌajakꞌe? ¿Meꞌn ma xꞌawaꞌiy te jayeb tut yipalik ta yalel ta akuentae? —xchi.

⁵ Te Jesuse ni pꞌaluk a sjakꞌ. Jich bayal aꞌabiyan yoꞌtan yuꞌun te Pilatoe.

Chapbot skꞌoplal ta milel te Jesuse

⁶ Te Pilatoe kꞌayem ta skoltayel jtul chukel ta jujun kꞌin Pascua. Chikan te genteetik te machꞌa ya yichꞌ koltayel yuꞌune.

⁷ Ay ta prexo jtul winik Barrabas sbiil, te jun nax ay ta prexo sok yan xan te milawanemikixe y skontrainejik te ajwalile.

⁸ Jich tal te genteetike, lijk skꞌanbeyik te Pilatoe te tut la kꞌayem ta spasel jujun jaꞌbil ta yorail te kꞌin Pascuae.

⁹ Jaꞌ tsꞌin te Pilatoe la sjojkꞌobe: —¿Me ya wan akꞌanik te jaꞌ ya jkoles bael te mam rey yuꞌun te juriyoetike? —xchi.

¹⁰ Yuꞌun la snaꞌbe sluwar te Pilato te ben slaꞌ yoꞌtanik te Jesuse, te jaꞌ sluwaril te akꞌot ta kꞌabal yuꞌun te statal-saserdoteetike.

¹¹ Pero te saserdoteetik la yalbe konsejo te genteetik te jaꞌuk ya skꞌanik te ya slokꞌes bael ta prexo te Barrabase.

¹² Y tsꞌin te Pilato la sjojkꞌobe xan te genteetike: —Jal tsꞌin te machꞌa mam rey yuꞌun te juriyoetik ya awalike, ¿tut ya jpasbe? —xchi.

¹³ Xꞌawlajanik ta yalel: —¡Mila ta krus! —xchiik.

¹⁴ La yal te Pilatoe: —¿Tut yuꞌun? ¿Meꞌn ay tut ma tsaꞌamuk spasoj? —xchi. Mas tulan a awunik xan: —¡Mila ta krus! —xchiik.

¹⁵ Jaꞌ yuꞌun te Pilatoe la skoles bael te Barrabase, yuꞌun ya xpajt yoꞌtan te lekuk yoꞌtanik te genteetik yuꞌune. Sok la yal mantal te ya xlijk ta majel ta nujkul te Jesuse sok te ya xba milek ta krus.

¹⁶ Jich tsꞌin te soltaroetike la yikꞌik ochel te Jesus ta yutil yamakꞌul te palasioe, sok la stsobik tal ta stijkꞌil te soltaroetike.

¹⁷ La slapbeyik tsajal kꞌuꞌul sok ta yaꞌbey skoronain xotbil chꞌix ta sjol.

¹⁸ Y lijk yawutayik: —Mero mam reyat yuꞌun te judioetike —xchiik ta yikꞌtinel.

¹⁹ La smajbeyik yaxal teꞌ ta sjol, sok la stubutayik. Sok la skejan sbaik ta stsꞌeel yuꞌun ya yakꞌik ta kuenta ta skꞌopik.

²⁰ Kꞌalal laj yoꞌtanik ta yikꞌtinel te Jesuse, la slokꞌesbeyik te tsajal kꞌuꞌile, sok la xchaꞌlapbeyik xan te xkamixe. La yikꞌik lokꞌel tsꞌin sok ba smilik ta krus.

Jojkꞌanot ta krus te Jesuse

²¹ La stsakik ta xkuchel bael skrus Jesus tul winik te yipal ta kꞌaxel bael te xkꞌotuk ta kꞌalkꞌaltike. Te winike Simon sbiil, jaꞌ te stat te Alejandro sok Rufoe te Cirene sbiil te slumale.

²² La yikꞌik bael tsꞌin te Jesuse te ba jun luwar Gólgota sbiil te Yawil Bakeljolol xchi kꞌoeme.

²³ La yaꞌbe yuchꞌ bino te kapal sok mirra, jaꞌ tsꞌin to ma la skꞌan yuchꞌ.

²⁴ Yo la sjojkꞌanik ta krus. Te soltaroetik lijk yakꞌik ta suerte tajmal yuꞌun ya yilik machꞌa ya xkꞌot ta skuenta jujutul yuꞌun te skꞌuꞌ spakꞌe.

²⁵ Baluneb ora a ta spatajelul te la yichꞌ jokꞌanel ta krus te Jesuse.

²⁶ Sok la yakꞌik letrero chꞌujteb ta sjol kruse te tsꞌibabil a te tut sluwaril te akꞌot ta lajele. “Jaꞌ te mam Rey yuꞌun Juriyoetik”, xchi te tsꞌibabile.

²⁷ Sok ay cheb elekꞌetik te la yichꞌik jokꞌanel ta krus soke, jtul ta sbatsꞌil sok jtul ta xkꞌexom.

²⁸ Jich a kꞌot ta pasel te tut tsꞌibabil ta Sjun Diose te “Ya me sjoyin ta ajtayel te chꞌay-mantaliletike”, te xchie.

²⁹ Te machꞌatik yipalik ta kꞌaxel baele la sutilan sjolik ta yikꞌtinel: —Ilawil, jaꞌat te la awal te ya ajim te templo sok ta yoxebal kꞌaal ya achaꞌ-apas xan ta akꞌope,

³⁰ koltaya aba y koan tal te ba kruse —xchiik.

³¹ Jaꞌ nax jich la yikꞌtinik Jesus euk te statal-saserdoteetike sok te maestroetik yuꞌun te mantaliletike. Jich la yalbe sbaik: —La skolta te yanetike, jaꞌ tsꞌin to ma xjuꞌ ya skolta sba stukel.

³² Teme batsꞌil jaꞌ Cristo te mam rey kuꞌuntik joꞌotik te israelotike, koꞌuk tal ta krus ta ora kiltik. Jich me ya jchꞌuuntik tsꞌiin —xchiik. Sok te Jesuse ikꞌtinot yuꞌun te machꞌatik pajal jokꞌajtik ta krus soke.

Cham te Jesuse

³³ Olkꞌaal a ijkꞌub kꞌinal ta spꞌejel balmilal, jaꞌ to ta las tres malkꞌaal.

³⁴ Ta las tres malkꞌaal tulan kꞌopoj te Jesuse: —“Eloi, Eloi, ¿lama sabaktani? —xchi. Ya yal te kꞌop abi: “Dios kuꞌun, Dios kuꞌun, ¿tuꞌun te la ajilesone?”

³⁵ Ay la yaꞌiybeyik sluwar te machꞌatik te ayik ae, y la yalik: —Aꞌiyaik, jaꞌ ya yikꞌ tal te Elias te jꞌalwanej yuꞌun te Diose —xchiik.

³⁶ Ay jtul te animal a ba smul ta chaꞌal bino te esponjae. La xchuk ta jalal sok la slujtan moel yuꞌun ya yuchꞌ te Jesuse. Jich la yalbe te yanetike: —Ya jmalitik me jaꞌ ya xtal skoes ta krus yuꞌun te Eliase —xchi.

³⁷ Te Jesus tulan a awun, y cham.

³⁸ Jich ora chꞌiꞌ koel te pakꞌ makbil a te templo kꞌal ta sba y kꞌal ta yetꞌal.

³⁹ Te statal-soltaro te tekꞌel a ba jokꞌol te Jesuse, te kꞌalal la yil te tutꞌil chamixe, jich a yal: —Batsꞌi jich a nix a te jaꞌ Xnichꞌan Dios te winik to —xchi.

⁴⁰ Ay antsetik te jakal nax ya yilike. Teꞌa ekꞌa te xMaria Magdalenae sok xMaria te smeꞌ te ijtsꞌinal Jacobe sok te Josee, sok xan te Salomee.

⁴¹ Jaꞌ antsetik to jaꞌ te la sjoyinik ta beel te Jesuse te kꞌalal ay to ta Galilea, sok la yakꞌ sbaik ta abatinel yuꞌun. Sok ay xan bayal antsetik te sjoinejik moel ta Jerusalen.

La yichꞌ mukel te Jesuse

⁴² Jaꞌ skꞌaalel te ya xchap sbaik te Judioetik te tutꞌil pajel xanix te skꞌaalel kuxo-oꞌtan yuꞌunike, sok malix kꞌaal a.

⁴³ Ay tul winik Jose sbiil te lijkem tal ta chꞌin jtejklum Arimatea te yichꞌoj yaꞌtel yuꞌun te lume, sok aꞌbil ta kuenta yuꞌune. Te Jose yipal ta smaliyel te ya xlijkix ta mantal te mukꞌ ajwalil te Diose. Jaꞌ ba skꞌopon te Pilatoe. Ma xiꞌ yuꞌun te ya skꞌanbe te stiꞌbalul te Jesuse.

⁴⁴ Te Pilatoe kꞌal ta yoꞌtan yuꞌun te chamenixe. Jich la yikꞌ tal te statal-soltaroe yuꞌun ya sjojkꞌobe me batsꞌi jich te chamenixe.

⁴⁵ Jaꞌ to te albot yuꞌun te soltaro te batsꞌi jiche, jich te Pilato la yalbe tsꞌin te Josee te ya yichꞌbe bael te stiꞌbalule.

⁴⁶ La sman sabana pakꞌ tsꞌin te Josee, la skoesbe te stiꞌbalule sok la spotsbe ta pakꞌ. Jich ba smukbe jilel ta jun mam ton jutbil ochel, sok la smakbe jilel stiꞌil ta mukꞌul ton.

⁴⁷ Te xMaria Magdalena sok te xMaria te smeꞌ te Josee la yilik te ba mukul jilele.