San Lucas 6 - Nuevo Testamento Tzeltal de Amatenango

Te jnopojeletike la skꞌastalanik jol triwu ta skꞌaalel kuxo-oꞌtan

¹ Ta skꞌaalel kuxo-oꞌtan te Jesuse been kꞌaxel ta triwualtik. Te jnopojeletik yuꞌune lijk skꞌokbeyik sjol te triwue. La skꞌut ta skꞌabik yuꞌun ya xkꞌuxbeyik te sbakꞌe.

² Te fariseoetike la sjojkꞌobeyik: —¿Tuꞌun ya apasik te jaꞌexe te tut ma lek ta pasel ta skꞌaalel te kuxo-oꞌtane? —xchiik.

³ Te Jesuse la sjakꞌtalanbe: —¿Me yuꞌun ma awilojikuk ta Sjun Dios te tuti spas te jDavide jun buelta kꞌalal wiꞌnaj sok te sjoꞌtake?

⁴ Jicha och bael ta templo yuꞌun te Diose, sok la stsak y la sweꞌ te chꞌul pan te pajchanbil ta stojol te Diose, sok la yaꞌbey ekꞌa te sjoꞌtake. Yuꞌun jaꞌ nax ya sweꞌ te saserdoteetik te pane —xchi.

⁵ Y la yalbe xan: —Te Nichꞌanile, jaꞌ ajwalil yuꞌun te skꞌaalel kuxo-oꞌtane —xchi te Jesuse.

Te winik te jmel makꞌ snik sba te skꞌabe

⁶ Ta yan skꞌaalel kuxo-oꞌtan te Jesuse och bael ta sinagoga. Teꞌ lijk nojpeswanuk a. Ay jtul winik teꞌa te jmel makꞌ snik sba te sbatsꞌil skaꞌbe.

⁷ Te maestroetik yuꞌun te mantaliletik sok te fariseoetike yipalik ta smaliyel me ya slekutes a te ta skꞌaalel kuxo-oꞌtane, yuꞌun jich ya xjuꞌ ya slebeyik smul ta skꞌopik a te Jesuse.

⁸ Pero te Jesuse snaꞌoj te jich ay te yoꞌtanike. La yalbe te winik te mel makꞌ snik sba te skꞌabe: —Jajchan, tekꞌlan te ba olile —xchi. Te winike jajch, la stejkꞌan sba.

⁹ Te Jesuse la yalbe te yanetike: —Ay tut ya jojkꞌobeyex: ¿Tut a te lek ta pasel ta skꞌaalel te kuxo-oꞌtane? ¿Me jaꞌ te tut leke, o jaꞌ te tut ma lekuke? ¿Me jaꞌ lek te ay machꞌa ya xkuxuyine, o jaꞌ lek te ay machꞌa ya xchame? —xchi.

¹⁰ Te Jesuse la skꞌelulambe sitik te machꞌatik stsoboj sbaike, y la yalbe te winike: —Jacha moel te akꞌabe —xchi. Te winike jich a spas te tuti albote. Jicha lekub te skꞌabe.

¹¹ Te machꞌatik teꞌey ae beno laj ilinik yuꞌun. Lijk sjojkꞌobe sbaik te tut ya yutik te Jesuse.

Te Jesuse la stsa te lajchaytul te jpuk-kꞌopetik yuꞌune

¹² Jaꞌ skꞌaalel a te ba skꞌopon Dios ta wits te Jesuse; spꞌejel ajkꞌubal la skꞌopon Dios teꞌa.

¹³ Kꞌalal sakubix a te kꞌinale la yikꞌtalan tal te jnopojeletik yuꞌune. La stsa lajchaytul, sok la yaꞌbe yaꞌtel ta jpuk-kꞌopetik.

¹⁴ Jich ay te sbiilike: Jaꞌ te Simon te jPedro a aꞌbot sbiil yuꞌun te Jesuse, sok te jꞌAndres te yijtsꞌin te Simone, sok Jacobo, sok Juan, sok jFelipe sok jBartolome,

¹⁵ sok jMateo, sok jTomas, sok Jacobo te xnichꞌan Alfeoe, sok te Simon te ay ta skuenta te jkananistaetike,

¹⁶ sok Judas te yijtsꞌin Jacoboe, sok te Judas Iscariote te la yakꞌ entregal ta patil te Jesuse.

Te Jesuse la spꞌijutes bayal genteetik

¹⁷ Te Jesuse kojtal te ba wits sok te jnopojeletik yuꞌune, tekꞌel julel ta slomle. Teꞌ stsoboj sbaik bayal a te machꞌatik tsꞌaklibil yuꞌune, sok bayal genteetik te talemik ta estado yuꞌun Judea, sok ta Jerusalen, sok ta jtejklum Tiro sok ta jtejklum Sidon te ayik ta tiꞌmare. Yuꞌun tal yaꞌibeyik sluwaril skꞌop te Jesuse sok tal yakꞌ ta lekutesel te xchamelike.

¹⁸ Te machꞌatik ayik ta wokol yuꞌun te pukuje laj lekubik ekꞌa.

¹⁹ Spisil te genteetike yoꞌtanuk ya spikik te Jesuse, jich a slekutes ta spoder spisil te jchameletike.

Te machꞌatik ya staik bujtsꞌan kꞌinal, sok te machꞌatik ya yilik wokol

²⁰ Te Jesuse la skꞌeluy te jnopojeletik yuꞌune, jich a yaltalanbe: —Ben me tsaꞌam alekilik jaꞌex te meꞌbaꞌexe, porke jaꞌ ajwalilix awuꞌunik te Diose.

²¹ Ben me tsaꞌam alekilik jaꞌex te ayex ta wiꞌnal te ora to, ben jun awoꞌtanik ya smakꞌlinelex. Ben me tsaꞌam alekilik jaꞌex te yipalex ta okꞌel te ora to, ta patil ya me stseꞌnex.

²² Ben me tsaꞌam alekilik jaꞌex teme ayex ta ilintayel yuꞌun te genteetike, sok teme ya stenex lokꞌele, sok teme ya sbol-kꞌoptayexe, sok teme ya spꞌajex te tutꞌil ma tsaꞌamukex ta skꞌopike teme jaꞌ ta skaj te Nichꞌanile.

²³ Benuk me jun awoꞌtanik te kꞌalal ya xkꞌot ta pasel ta atojolike. Ben bujtsꞌanuk me kꞌinal ya awaꞌiyik yuꞌun. Porke ya me xkꞌo awichꞌik amajtanik ta chꞌulchan yuꞌun. Yuꞌun te antibo smeꞌ-statik te genteetik to jicha spasbeyik te jꞌalwanejetik yuꞌun te Diose.

²⁴ Yan te jaꞌex te jkꞌulejexe oꞌol me abaik yuꞌun ben butsꞌan kꞌinal ya awaꞌiyik ta atukelik nax.

²⁵ Oꞌol me abaik jaꞌex te nojel achꞌujtꞌik te ora to yuꞌun ya me awilik wiꞌnal. Oꞌol me abaik jaꞌex te ya stseꞌnex te ora to, yuꞌun ya me xba okꞌanik yuꞌun te ajtal-oꞌtane.

²⁶ Oꞌol me abaik jaꞌex te lek akꞌoplalik yuꞌun spisil te genteetike, yuꞌun te antibo smeꞌstatik te genteetik to jich lek skꞌoplal a yalbeyik euk te jlot-alwanejetike.

Kꞌux me xꞌawaꞌiy te akontraike

²⁷ Yan te jaꞌex te ya awaꞌibikon sluwar te jkꞌope ya kalbeyex: Kꞌux me xꞌawaꞌiyik te machꞌatik ya skontrainexe sok pasbeyaik te tut lek te machꞌatik ya spꞌajexe.

²⁸ Sok lek skꞌoplal xꞌawalbeyik te machꞌatik ma tsaꞌamuk akꞌoplal ya yalbeyexe. Sok kꞌoponbeyaik Dios te machꞌatik ya sbolkꞌoptayexe.

²⁹ Teme ay machꞌa ya smajbeyat te jmejch achoe, aꞌbeya smaj te jmejch xane. Sok teme ay machꞌa ya spojbeyat te akotone, a me yichꞌ bael euk ta akamixe, ma me tuti awal yuꞌun.

³⁰ Machꞌauk a teme ay tut ya skꞌanbeyexe, aꞌbeyaik. Sok teme ay machꞌa ya spojbeyex te tut ay awuꞌunike, ma me akꞌambeyik sujtel.

³¹ Te tut ya skꞌan awoꞌtanik te ya spasbelex yuꞌun te yane, jich me xꞌapasbeyik euk.

³² Teme jaꞌ nax kꞌux ya awaꞌiyik te machꞌatik kꞌux ya yaꞌiyexe, ¿machꞌa ya yalbeyex lek akꞌoplalik yuꞌun? Asta te machꞌatik ma snaꞌbeyik sba te Diose jich ya spasbe sbaik euk.

³³ Teme jaꞌ nax ay tut lek ya apasbeyik te machꞌatik tut lek ya spasbeyexe, ¿machꞌa ya yalbeyex lek akꞌoplalik yuꞌun? Asta te machꞌatik ma snaꞌbeyik sba te Diose jich ya spasbe sbaik euk.

³⁴ Sok teme jaꞌ nax ay tut ya awaꞌbeyik smajan te machꞌatik ay tut ya yaꞌbeyat ta majanele, ¿machꞌa ya yalbeyex lek akꞌoplalik yuꞌun? Jich te machꞌatik ma snaꞌbeyik sba te Diose jich ya smajanbe sbaik euk te tut ay yuꞌunike, yuꞌun ya snaꞌ te tsꞌakal ya sujtesbot sjelol yuꞌune.

³⁵ Yan te jaꞌexe kꞌux me xꞌawaꞌiyik ta awoꞌtanik te machꞌatik ya skontrainexe. Pasbeyaik te tut leke, sok aꞌbeyaik smajan te tut ay awuꞌunike. Ma me akꞌambeyik sjelol. Jich me bayal amajtanik ya awichꞌik yuꞌun, sok yal-xnichꞌanex ya xkꞌoex te Chꞌul Dios te ay ta chꞌulchane. Porke Dios kꞌux ta yoꞌtan te machꞌatik ma snaꞌik yalel kola yale sok te machꞌatik ma tsaꞌamuk yoꞌtanike.

³⁶ Jich yuꞌun te jaꞌexe kꞌuxutaywananik me euk, jich tutꞌil ya xkꞌuxutaywan te Atatike.

Ma me xꞌawichꞌbe jkuenta yaꞌtel te yane

³⁷ Ma me xꞌawichꞌbe jkuenta yaꞌtel te yane. Jich me makꞌ yichꞌbeyex jkuenta euk te Diose. Ma me xꞌalebe smul te yane. Jich me makꞌ stabeyat amul euk te Diose. Akꞌaik perdon. Jich me ya yaꞌbeyex perdon euk te Diose.

³⁸ Aꞌbeyaik te tut maꞌyuk yuꞌun te yane. Jich me ya yaꞌbeyex euk te Diose te lek pꞌisbil, te lek tembil ta nojesel, te yukꞌilanbil, kꞌeba nax me koel te ba yawile. Te Diose jich me ya spꞌisbeyex ta mismo pꞌisil te tut ya apꞌisike —xchi te Jesuse.

³⁹ Te Jesuse la spaj sok te seña-kꞌop to: —¿Me ya wan xjuꞌ yuꞌun te ya xchech sbaik ta beel te machꞌa pajal chokike? ¿Me makꞌ wan xchꞌay koel ta chꞌen xchebalik?

⁴⁰ Sok ni jtuluk eskuelero te ya xkꞌaxintay te yaj-nopeswaneje. Jaꞌ to pajal ya xkꞌot sok teme juꞌ yuꞌun te lek pꞌijutesele.

⁴¹ ¿Tuꞌun te jaꞌ ya awil te chꞌin kꞌaꞌpal te ay ta sit te awermanoe? Yan te mukꞌul troso te kꞌatal ta asite, makꞌ ya awil stukel.

⁴² Tutꞌil ya xjuꞌ awuꞌun te ya awalbe te awermanoe: “Hermano, aꞌbon jlokꞌes te chꞌin kꞌaꞌpal te ay ta asite, teme ya awute. ¿Meꞌn makꞌ anaꞌ te ay mukꞌul troso te kꞌatal ta asite? Te jaꞌexe ma tsaꞌamuk awoꞌtanik. Lokꞌesa nailuk te mukꞌul troso te kꞌatal ta asite. Jich ya xjuꞌ awuꞌun yilel lek te chꞌin kꞌaꞌpal ya alokꞌesbe ta sit te awermanoe.

Te teꞌe ya xnaꞌbot sba te site

⁴³ Maꞌyuk lekil teꞌ te ma tsaꞌamuk sit ya yakꞌe, sok maꞌyuk ma tsaꞌamuk teꞌ te tsaꞌam sit ya yakꞌe.

⁴⁴ Te juju-pejt teꞌe ya xnaꞌbot sba a tut yilel te site. Jich tutꞌil maꞌyuk ya jtajtik ta kꞌokel ikux te ba chꞌixtikile, sok maꞌyuk ya jkꞌoktik tsꞌusub ta yolil te makumaltike.

⁴⁵ Te winik te lek yoꞌtane lek te tut ya yal lokꞌel ta stiꞌe, yuꞌun lek te tut ay ta yoꞌtane. Yan te winik te ma tsaꞌamuk yoꞌtane, ma lekuk te tut ya yal lokꞌel ta stiꞌe, yuꞌun ma tsaꞌamuk te tut ay ta yoꞌtane. Jich ta jkꞌoptik ya xchiknaj te tut ma tsaꞌamuk ay ta koꞌtantike.

Te cheb yiptajib te nae

⁴⁶ ¿Tuꞌun te “Kajwal, Kajwal”, ya awutikone y makꞌ ya apasik te tut ya kalbeyexe?

⁴⁷ Ya kalbeyex awaꞌiyik te tut yilel kꞌoem te machꞌa ya xtal yaꞌibon sluwar te jkꞌope sok ya spas te tut ya kale.

⁴⁸ Jich kꞌoem te tutꞌil jtul winik te la spas snae. Toyol a sjokꞌbe koel te xchꞌenale, jaꞌ to te la sta te limlim tone. Teꞌ stsꞌun tal moel a te yipajib snae. Kꞌalal tal te nojel jaꞌe, te xwilawet kꞌaxel a te ba snae, ma nijk yuꞌun, yuꞌun ipajem lek sok te limlim tone.

⁴⁹ Yan te machꞌa ya yaꞌibon sluwar te jkꞌope, teme makꞌ spas te tut ya kale, jaꞌ pajal kꞌoem sok tutꞌil jtul winik te ta ba lum nax a spas te snae te maꞌyuk yipajibe. Kꞌalal tal te nojel jaꞌe, xwilawet kꞌaxel teꞌa te ba spasoj te snae. Butkꞌej yuꞌun, jmel a jim ta nae —xchi te Jesuse.