San Lucas 5 - Nuevo Testamento Tzeltal de Amatenango

Tsakot bayal chay ta spoder Dios

¹ Ay jun buelta te ay ta tiꞌmar Genesaret sbiil te Jesuse. Teꞌ kꞌo stsob sbaik a te bayal genteetike. Kꞌan skujik te Jesuse yuꞌun ya skꞌan yaꞌiyik sluwar te skꞌop Diose.

² Te Jesuse la yil te ay cheb jojchol barkoetik ta tiꞌjaꞌ, jochajtik yuꞌun koemik bael te yajwale, te yipalik ta sapel te stsajkil xchayike.

³ Jicha kꞌo mouk a te Jesuse. Jaꞌ sbarko te Simone. La yalbey yauk yochyochtes ochel te ba jaꞌe. Jich a snajkan sba ta yutil barko te Jesuse. Lijk spꞌijutes te genteetike.

⁴ Kꞌalal laj yoꞌtan ta kꞌope, jich a yalbe te Simone: —Wetꞌa ochel te abarko te ba toyol te jaꞌe. Teꞌ me ya achꞌojik ochel a te stsajkil achayike —xchi.

⁵ La sjakꞌ te Simone: —Ma wan, Maestro. Yuꞌun spꞌejel ajkꞌubal a aꞌtejotikix, ni jkojtuk a jtajtik. Pero yuꞌun te jaꞌat ya awale, ya me xba jchꞌoj ochel abi —xchi.

⁶ Te kꞌalal la xchꞌojik ochele, bayal chay a stsakik, asta kꞌan tuchꞌuk yuꞌun te stsajkil-xchayike.

⁷ Jich a xbechkꞌabta tal te sjoꞌtak te aylan ta yan barkoe te yauk xta koltayek yuꞌune. Jicha laj talik y noj xchebal te barkoetik yuꞌun te chaye. Kꞌan mulek ta jaꞌ yuꞌun te yalale.

⁸ Kꞌalal la yil te Simon Pedro te jicha kꞌot ta pasel, la skejan sba ta stojol te Jesuse. Jich a yal: —Kajwal, ma spas ya joyinat, yuꞌun jmulawilon —xchi.

⁹ Yuꞌun te Simone sok te sjoꞌtake la xiꞌ yuꞌun te bayal chay a stsakike.

¹⁰ Jich ekꞌa te Jacobe sok te Juane te xnichꞌnab Zebedeoe te sjoy sbaik ta aꞌtel sok te Simone. Pero te Jesuse la yalbe te Simone: —Ma me xiꞌan. Te ora to jaꞌ awaꞌtelik ya xkꞌot te ya awikꞌ tal te genteetike —xchi.

¹¹ Jicha lokꞌik tal ta juera sok te sbarkoike, la sjilesik spisil, y bajtik sok te Jesuse.

Te Jesuse la slekutes jtul jkꞌaꞌel-chamel

¹² Ay jun kꞌaal laj kꞌot ta jun jtejkꞌum te Jesuse, tal jtul winik ta stojol te skojtol yichꞌoj kꞌaꞌel-chamele. Kꞌalal la yil te Jesuse, te winike jul skejan sba ta stojol. Lijk skꞌambe pawor: —Kajwal, te jichuk skꞌan awoꞌtan ya alekutesbon te jchamele —xchi.

¹³ Te Jesuse la skajambe skꞌab ta sjol, jich a yalbe: —Jichuk. Ya xlekub te achamele —xchi. Tsꞌina chꞌay bael te skꞌaꞌel-chamel te winike.

¹⁴ Te Jesuse la yalbe bael: —Ma me ayuk machꞌa xꞌawalbe yaꞌi. Uniko baan, ban akꞌa aba ta ilel yuꞌun te saserdotee. Sok aꞌbeya smajtan Dios jich tutꞌil yaloj te jMoisese te tutꞌil lekubatixe. Jich me ya snaꞌbe sluwar te genteetik te lekubix te achamele —xchi te Jesuse.

¹⁵ Jicha pujk ta mas skꞌoplal te Jesuse. Bayal genteetik a laj tal yaꞌibeyik te skꞌope, sok la yakꞌik ta lekutesel te xchamelike.

¹⁶ Pero te Jesuse la spit sba bael ta skꞌoponel Dios te ba jochol te luware.

Te Jesuse la slekutes jtul te machꞌa kꞌolbil xchial yok-skꞌabe

¹⁷ Jun kꞌaal te Jesuse yipal ta pꞌijuteswane, teꞌ nakajtik ekꞌa te fariseoetike sok te maestroetik yuꞌun te mantaliletike. Teꞌ talemik ta jtejklumetik ta estado Galilea, sok ta estado Judea, sok ta jtejklum Jerusalen. Te spoder te Diose ya xchiknaj ta skuenta te Jesuse te ya slekutes te jchameletike.

¹⁸ Jicha laj kꞌot cheꞌoxeb winketik xchꞌoyojik tal ta kꞌabalteꞌ jtul te machꞌa kꞌolbil xchial yok-skꞌabe. Kꞌan yikꞌik ochel ta yut na te ba ay te Jesuse,

¹⁹ pero ma staik ba ya xꞌochik yuꞌun ben bayal te genteetike. Jicha laj mo bael ta sba te nae. La sjambeyik te xtexaule, sok la slijkanik koel te jchamele sok te skꞌabalteꞌe ta yolil te genteetike te ba ay te Jesuse.

²⁰ Kꞌalal la yil te Jesuse te tutꞌil xchꞌuunej yoꞌtanik te ya xlekuteswane, jich a yalbe te jchamele: —Winik, pasbil perdon te amule —xchi.

²¹ Jich te maestroetik yuꞌun te mantaliletike sok te fariseoetike lijk yal ta yoꞌtanik: “¿Machꞌa me winikil to te yipal ta xkꞌaxintayel te skꞌop te Diose? Jaꞌ nax stukel te Dios te ya spas perdon yuꞌun te mulile”, xchiik.

²² Pero te Jesuse la snaꞌ te tut yipalik ta yalel ta yoꞌtanike, y la sjojkꞌolanbe: —¿Tut yuꞌun te jich ya awal ta awoꞌtanike?

²³ ¿Tut a te pasil ta alel ta stojol te jchamele? ¿Meꞌn jaꞌ pasil ta alel te “Pasbil perdon te amul”, ya kute? ¿O jaꞌ lek ya awaꞌiy te “Jajchan, beenan”, te ya kute?

²⁴ Pero ya me kaꞌbeyex awilik te tutꞌil tulan yaꞌtel yichꞌoj te Nichꞌanil ta spasel perdon yuꞌun mulil ta balmilal —xchi. Jich a yalbe te machꞌa kꞌolbil xchial yok-skꞌabe: —Ya kalbeyat te jaꞌate, jajchan, ichꞌa bael te akꞌabalteꞌale. Baan ta ana —xyut.

²⁵ Ora nax a jajch te machꞌa kꞌolbil xchial yok-skꞌabe te ba yolil te genteetike. La xchoy jajchel te skꞌabalteꞌal te wayal tal ae, y bajt ta sna. Ya yalbe kꞌael kola yal te Diose.

²⁶ Spisil te genteetike lom cham a yaꞌiyik. La yalbeyik kola yal Dios yuꞌun, y xiꞌik yuꞌun. Jich a yalik: —Ora to la kiltik te tut ben tulan a kꞌot ta pasele —xchiik.

Te Jesuse la yikꞌ te jLevie

²⁷ Ta patil te Jesuse lokꞌ bael. La yil jtul jkꞌan-tojemal te jLevi sbiile nakal te ba ya xtojot stojemal te tutike. Te Jesuse la yalbe: —Laꞌ tsꞌakliyaon —xyut.

²⁸ Jich te jLevie la stejkꞌan sba jajchel, la sjileslan spisil, sok la stsꞌakli bael te Jesuse.

²⁹ Patil la spas mukꞌul kꞌin ta skuenta te Jesuse. Jich a yikꞌ tal ta weꞌel ta sna bayal jkꞌan-tojemaletik sok yan genteetik te pajal nakajtik ta mesa sok te Jesuse.

³⁰ Pero te fariseoetike sok te maestroetik yuꞌun te mantaliletike lijk yaꞌabiyanik te jnopojeletik yuꞌun te Jesuse. Jich a yalbeyik: —¿Tuꞌun te ya ajoyinik ta weꞌel-uchꞌajel te jkꞌan-tojemaletike sok te jmulawiletike? —xchiik.

³¹ Te Jesuse la sjakꞌtalanbe: —Te machꞌatik lek bujtsꞌan kꞌinal ya yaꞌiyik sok te stibalulike ma puersauk yuꞌunik te jloktore. Jaꞌ nax puersa yuꞌunik jloktor te machꞌatik ayik ta chamele.

³² Ma jaꞌuka tal kikꞌ te machꞌatik lek ayik ta skꞌopike. Jaꞌa tal kikꞌ te jmulawiletike yuꞌun ya sujtes yoꞌtanik yuꞌun te smulike —xchi.

Jojkꞌobot te Jesuse tut yuꞌun te makꞌ skom sweꞌelik te jnopojeletike

³³ La yalbeyik xan te Jesuse: —Te jnopojeletik yuꞌun te Juane talel bael ya skomilan sweꞌelik ta skꞌoponel te Diose, y jich euk te jnopojeletik yuꞌun te fariseoetike. Pero te jnopojeletik awuꞌune ya xweꞌ-xꞌuchꞌajik ya kiltik —xchiik.

³⁴ Te Jesuse la sjakꞌtalanbe: —¿Me ya wan spas ya awaꞌbe skom sweꞌelik te machꞌatik majanbil ta nujpunele te sjoyinej to te machꞌa ya xnujpune?

³⁵ Pero ya me sta yorail te ya xꞌikꞌot lokꞌel te machꞌa nujpunixe. Jaꞌto me ya xlijk skomilan sweꞌelik a —xchi.

³⁶ Sok lijk yalbe seña-kꞌop: —Maꞌyuk machꞌa ya xchꞌiꞌ lokꞌel xejtꞌuk achꞌ tsekel yuꞌun ya spakꞌan a te kꞌaꞌ tsekele. Teme jich ya spase ya yakꞌ ixtaꞌajuk te achꞌ tsekele. Jich mismo euk te xejtꞌelel achꞌ pakꞌe ma snujpꞌuk xkꞌot te kꞌaꞌ tsekele.

³⁷ Ni ma spas ta pulel te achꞌ bino ta nujkul te kꞌaꞌixe, porke te achꞌ binoe ya me xchꞌiꞌ te nujkule. Jich me ya xchꞌay te binoe sok te nujkule.

³⁸ Por eso ya skꞌan te achꞌ nujkul ya yichꞌ pulel a te achꞌ binoe. Jich me ya xtuun ta xchebal a.

³⁹ Te machꞌa kꞌayem ta yuchꞌel te bino nameyix pasbile, ma xyuchꞌix a te achꞌ binoe. Yuꞌun ya yal te jaꞌ bujtsꞌan te bino nameyix pasbile —xchi te Jesuse.