San Lucas 24 - Nuevo Testamento Tzeltal de Amatenango

Jicha chaꞌkux tal te Jesuse

¹ Te primero kꞌaal yuꞌun te semanae, te antstike ben sab a laj bajtik te ba chꞌene. Yichꞌojik kꞌael te pox te xchapojike. Sok ay yan antstik te sjoyinejik kꞌale.

² Tselbilix lokꞌel a kꞌo staik te ton te makbil a te tiꞌil chꞌene.

³ Ochik bael, pero ma stabeyik te stiꞌbalul te Kajwaltik Jesuse.

⁴ Ben xlaj xiꞌ yuꞌun, ni ma snaꞌ tut ya spasik. Toj nax la yilik teꞌa cheb winketik te tekꞌajtik ta stsꞌeelike. Te skꞌuꞌ-spakꞌe xlemlajet nax.

⁵ Te antstike la skejan sbaik ta lum yuꞌun xiꞌel. Pero te winketike altalanbot yuꞌun: —¿Tuꞌun ya aleik te ba animaetik te machꞌa kuxulixe?

⁶ Ma liꞌiyukix to, yuꞌun chaꞌkuxix bael. Naꞌaik me te tuti yalbeyex te kꞌalal ajoyinejik to ta Galilea ae,

⁷ te la yal: “Te Nichꞌanile puersa me ya xꞌakꞌot entregal ta skꞌab te jmulawiletike, ya me sjojkꞌanik ta krus y ta yoxebal kꞌaal ya xchaꞌkux tal”, xchi me —xchiik.

⁸ Jich te antstike la snaꞌik te tut altalanbil yuꞌun te Jesuse.

⁹ Sujtik bael te ba chꞌene, kꞌo yalbeyik te tuti yilik te buluchtul apostoletike y sok spisil te yane.

¹⁰ Te antstik te machꞌa ba yalbeyik te apostoletike jaꞌ te xMaria Magdalenae, sok te xJuanae, sok te xMaria te smeꞌ te Jacoboe, y sok te yan xan antstike.

¹¹ Pero te apostoletike la skuyik te jowil kꞌop te ya yalike, y ma skꞌan xchꞌuunik.

¹² Pero te jPedroe jajch xyalet bael te ba ay te chꞌene, y kꞌalal kꞌo yilbe te yutile, jaꞌ xanix a yil te sakil pakꞌ te potsbil ae. Jicha sujt bael ta na. Toj yajtal yoꞌtan kꞌael yuꞌun te tut kꞌoemix ta pasele.

Ta sbelel jtejklum Emaus

¹³ Jaꞌ mismo kꞌaal a, cheb jnopojeletik yipalik kꞌael ta beel ta sbelel jun jtejklum Emaus sbiil, te ay wan cheb lewa yiloj sba sok te Jerusalene.

¹⁴ Yipalik kꞌael ta yalel spisil te tut kꞌoemix ta pasele.

¹⁵ Te tutꞌil yipalik kꞌael ta yaꞌbiyanel ae, te Jesuse tijilaj tal y lijk sjoyinik bael ta beel.

¹⁶ Pero manchuk me ya yilik, ni ma snaꞌbeyik sba machꞌa a.

¹⁷ Te Jesuse la sjojkꞌolambe: —¿Tut a te ya awalik kꞌael ta bee? ¿Tuꞌun te lom tristeexe? —xchi.

¹⁸ La sjakꞌ te jtul te jCleofas sbiile: —¿Me yuꞌun jakal talemat ta Jerusalen te ma anaꞌojuk te tuti kꞌot ta pasel te ayix cheꞌoxeꞌ kꞌaale? —xchi.

¹⁹ Te Jesuse la sjojkꞌolambe: —¿Tut a te kꞌoem ta pasele? —xchi. La yalik: —Jaꞌ te tuti kꞌot ta pasel ta stojol te Jesus Nazarete. Jaꞌ jtul jꞌalwanej yuꞌun Dios te spisil tut ya xjuꞌ yuꞌun spasel, sok ay spoder te skꞌop ta stojol Dios sok ta stojol spisil te jtejklume.

²⁰ Te stataletik yuꞌun te saserdoteetike y sok te kaj-juꞌeltike la yakꞌik entregal ta milel. Jaꞌ yuꞌun la yichꞌ jojkꞌanel ta krus.

²¹ Te joꞌotike la jkuytik te jaꞌ ya yaꞌbotik ta libre te jlumaltik Israele. Pero ayix yoxebal kꞌaal te jicha akꞌot ta milele.

²² Pero ay chaꞌoxtul antstik te joy jbatik soke te la yakꞌ aꞌabiyanuk koꞌtantik, yuꞌun ben sab xkꞌotikuk te ba xchꞌenale,

²³ y ma kꞌo stabeyik te stiꞌbalule. Sujt bael ta na, y la yalbotik te ay chꞌul angeletik a yilik te jicha altalanbot te chaꞌkuxemix te Jesuse.

²⁴ Ay chaꞌoxtul te joꞌtaktik te ora laj bajt te ba xchꞌenale, y jich a kꞌo staik te tutꞌil la yal te antstike, pero ma staik ta ilel te Jesuse —xchiik.

²⁵ Jicha altalanbot yuꞌun te Jesuse: —Wokol ya xkꞌot ta awoꞌtanik te jaꞌexe. ¿Tut to ora ya xchꞌuun awoꞌtanik spisil te tut yaloj jilel te jꞌalwanejetik yuꞌun te Diose?

²⁶ ¿Me ma wan puersauk nail ya xkꞌax swokol te Cristoe, antes te ya xꞌoch te ba lekilale? —xchi.

²⁷ Te nax a lijk yalbe sluwar spisil te tut tsꞌibabil jilel te Sjun te Diose te tutꞌ ay skꞌoplal te Cristoe. Lijk kꞌalal ta sjun jMoises jaꞌ to kꞌalal ta sjun spisil te jꞌalwanejetik yuꞌun te Diose.

²⁸ Laj kꞌot te ba jtejklum ba ya xbajtike. Te Jesuse jich yilel te kꞌan soluk bale.

²⁹ Pero la yalbeyik ta puersa te yauk xkome. Jich a yalik: —Joyinaotik. Porke malix kꞌaal yuꞌun ya xꞌochix ajkꞌubal —xchiik. Te Jesuse och bael ba sjoyinlan.

³⁰ Te kꞌalal ayikix ta mexa ae la stsak ta skꞌab te waje y la yalbe kola yal Dios yuꞌun. La xetꞌ y la yaꞌbe.

³¹ Mismo tiempo a, laj jam sitik y la snaꞌbeyik sba te Jesuse. Te nax a te Jesuse chꞌay bael ta sitik.

³² Jaꞌ yuꞌun lijk yalbe sbaik: —Jaꞌ mejtik sluwar ben tsꞌaam a kaꞌitik ta koꞌtantik te kꞌalal yipalotik tal ta aꞌabiyej ta bee, sok te ya yalbotik tal sluwaril te skꞌop Diose —xchiik.

³³ Ma jalajikix a, sujtik bael ta ora nax ta Jerusalen. Teꞌ kꞌo staik a te buluchtul apostoletik sok te sjoꞌtake te ba stsob sbaike.

³⁴ Y ora altalanbot: —Batsꞌi jich te chaꞌkuxix te Kajwaltike, la yilix euk te Simone —xꞌutalanot.

³⁵ Jich lijk yalik euk te chaꞌtule te tuti kꞌot ta pasel ta bee, sok te tutꞌil la snaꞌbeyik sba te Jesuse te kꞌalal la xetꞌ te waje.

Te Jesuse la yakꞌ sba ta ilel ta stojol te jnopojeletike

³⁶ Yipalik to ta yaꞌbiyanel a te tuti kꞌot ta pasele, te Jesuse xtekꞌloj kꞌoel ta yolilik, y la spatalanbe yoꞌtan: —Bujtsꞌanuk me kꞌinal ya awaꞌiyik —xchi.

³⁷ Toj cham a yaꞌiyik yuꞌun. La skuyik te chꞌulelal te la yilike.

³⁸ Pero te Jesuse la yaltalanbe: —¿Tuꞌun te ya xiꞌexe? ¿Tuꞌun te wokol ya xchꞌuun awoꞌtanike?

³⁹ Ilawilik te jkꞌabe sok te koke. Joꞌon mismo. Pikaikon y ila awilik. Te jtul chꞌulelale maꞌyuk stiꞌbalul ni sbakel jich te tutꞌil ya awilikone —xchi.

⁴⁰ Laj yaltalanbe tsꞌin to, la yakꞌtalanbe yil te skꞌabe sok te yoke.

⁴¹ Pero te to nax ma xchꞌuunik lek a ta skaj te ben bayal sbujts yoꞌtanik yuꞌune sok te yipal ta aꞌabiyej te yoꞌtanike. Jaꞌ yuꞌun te Jesuse la sjojkꞌolanbe: —¿Me ay tut ya aweꞌik chꞌinuk liye? —xchi.

⁴² La yaꞌbeyik xejtꞌ wobil chay sok sejt chab.

⁴³ La stsak te Jesuse, la sweꞌ ta sitil komon.

⁴⁴ Te nax a la yaltalanbe: —Te tuti kꞌot ta pasel ta jkuentae, jaꞌ te la kalbeyex ta kꞌalal joyinejex to ae. Te puersa jich ya xkꞌot ta pasel spisil te tut tsꞌibabil jilel ta mantaliletik yuꞌun te jMoisese sok ta sjun te jꞌalwanejetik yuꞌun te Diose sok ta salmoetik —xchi.

⁴⁵ Jich la yaꞌbey snaꞌ sluwar te tut tsꞌibabil jilel ta Sjun te Diose.

⁴⁶ Y la yaltalanbe: —Jich tsꞌibabil jilel te puersa ya xkꞌax jwokol joꞌon te Cristoone, y ya xchaꞌkuxon tal ta yoxebal kꞌaal.

⁴⁷ Sok te joꞌon ta jkuenta te ya xlijk ta alel kꞌalal ta Jerusalen sok ta spisil nasionetik te ya sujtes yoꞌtanik ta stojol Diose, yuꞌun jich me ya spasbot perdon yuꞌun a te smulike.

⁴⁸ Te jaꞌexe jaꞌ testigoex yuꞌun te tuti kꞌotix ta pasele.

⁴⁹ Joꞌon ya jtikonbeyex tal te tut yaloj te Jtate. Pero te jaꞌexe liꞌ nax anex to liꞌ ba Jerusalene jaꞌ to teme jul ta atojolik te spoder Dios te ya xtal ta chꞌulchane —xchi te Jesuse.

Te Jesuse mo bael ta chꞌulchan

⁵⁰ Te nax a te Jesuse la yikꞌ bael te jnopojeletik yuꞌune, lokꞌik bael te ba jtejklume. Bajtik ta nopol Betania. Y la stoy moel te skꞌabe y la yakꞌtalanbe jil bendision.

⁵¹ Yipal to ta yaꞌbeyel bendision a la sjileslan. Ikꞌot moel ta chꞌulchan.

⁵² Patil te kꞌalal laj yoꞌtanik ta yalbeyel kola yale, ben kontentoik a la sujt bael ta Jerusalen.

⁵³ Jujun kꞌaal ayik ta templo ta yalbeyel kola yal te Diose. Jichuk.