San Lucas 23 - Nuevo Testamento Tzeltal de Amatenango

Te Jesuse tejkꞌanot ta sit te jPilatoe

¹ Spisilik a jajchik bael. La yikꞌik bael ta stojol jPilato te Jesuse.

² Teꞌ kꞌo slebeyik smul a. La yalik: —Te winik to ya slijkes kꞌop yuꞌun te jlumaltike. Ya yal te ma xjuꞌ ya jtojtik jtojemaltik yuꞌun te mukꞌul rey Cesare. Y ya yal te jaꞌ Cristo te rey stukele —xchiik.

³ Te jPilatoe la sjojkꞌobe: —¿Me jaꞌat te reyat yuꞌun te juriyoetike? —xchi. La sjakꞌ te Jesuse: —Jaꞌat te jich ya awale —xchi.

⁴ Jich te jPilatoe la yalbe te stataletik yuꞌun te saserdoteetike sok spisil te genteetike: —Ma jtabe tut smul te winik to —xchi.

⁵ Pero mas xniket lijkel ta kꞌop: —Te tut ya snojpeswan ae ya slikes kꞌop ta spisil te jtejklumetik ta Judeae. Lijk tal ta Galilea, y ta ora to jich ya spas liye —xchiik.

Te Jesuse tejkꞌanot ta sit te jHerodese

⁶ Te tutꞌil jich a yaꞌi te jPilatoe, la sjojkꞌo teme talem ta Galilea te winike.

⁷ Te kꞌalal la yalik te teꞌ talem ae, te jPilato la stikon bael ta stojol jHerodes, te jaꞌ gobierno yuꞌun a te Galileae, yuꞌun talem ta Jerusalen ae.

⁸ Te jHerodese ben kontento sujt yuꞌun te la yil te Jesuse, yuꞌun ayix kꞌaal te yoꞌtanuk ya yile. Yuꞌun yaꞌiyojbe sluwar skꞌoplal te Jesuse, y ya skꞌan te ayuk milagro ya xꞌaꞌbot yile.

⁹ Bayal tuti sjojkꞌobe, pero te Jesuse ni jpꞌaluk aꞌ sjakꞌbe.

¹⁰ Teꞌeyik ekꞌa te stataletik yuꞌun te saserdoteetike y sok te maestroetik yuꞌun te mantaliletike. Bayal tuti yalik te tut smulinej ta skꞌopik te Jesuse.

¹¹ Jich te jHerodese sok te soltaroetik yuꞌune la stseꞌlayik y la spꞌajik te Jesuse. Yuꞌun ya stseꞌlayik a te Jesuse, la slapbeyik kꞌuꞌul-pakꞌal te ben tsaꞌam ta ilel, jich tutꞌil te reye. Te nax a te jHerodese la stikon sujtel ta stojol te jPilatoe.

¹² Mismo kꞌaal a pajt yoꞌtanik te jPilato sok te jHerodese, yuꞌun te nail toe skontrainej sbaik.

Chapbot skꞌoplal ta milel te Jesuse

¹³ Te jPilatoe la stsob tal te stataletik yuꞌun te saserdoteetike sok te juꞌeletik yuꞌun te jtejklume,

¹⁴ y la yaltalanbe: —Te jaꞌexe la awikꞌbikon tal te winik to. Ya awalik te ya slijkes kꞌop te ba jtejklume. Pero la jojkꞌobeyix ta asitik y maꞌyuk a jtabe smul jich tutꞌil te ya awalik te ay smul ta akꞌopike.

¹⁵ Sok euk te jHerodese maꞌyuk smul a stabe. Jaꞌ yuꞌun la stikonix tal sujtel. Jich maꞌyuk smul te ya xjuꞌ ya yichꞌ milel yuꞌune.

¹⁶ Ya me kaꞌbe kastigo y ta patil ya me jkoles bael —xchi.

¹⁷ Te jujun kꞌine te jPilato ya spasbey te tut ya skꞌan yoꞌtan te genteetike te ya skoles bael jtul jchukel ae.

¹⁸ Pero spisil te genteetike lijk awunikuk: —Ikꞌaik bael ta milel me to. Ja xꞌakoles bael te jBarrabase —xchiik ta aw.

¹⁹ Te jBarrabase ochem ta prexo yuꞌun te la slijkes kꞌop ta jtejklume sok te milawaneme.

²⁰ Te jPilato kꞌan skoles bael te Jesuse y la yalbe xan te jtejklume.

²¹ Pero mas tulan xan a awunik: —¡Mila ta krus! ¡Mila ta krus! —xchiik.

²² Ta yoxebal buelta te jPilatoe la yaltalanbe: —¿Tut ma tsaꞌamuk spasoj? Te joꞌone maꞌyuk tut ma tsaꞌamuk a jtabe te ya xjuꞌ ya xlaj yuune. Ya me kaꞌbe kastigo y ta patil ya jkoles bael —xchi.

²³ Pero mas tulan a lijkik xan ta aw te ya skꞌanik te ya xmilot ta kruse. Te tutꞌil tulan a awunik ta skꞌanel te genteetike y te stataletik yuꞌun te saserdoteetike, jicha juꞌ yuꞌunik.

²⁴ Te jPilatoe lijk snop ta yoꞌtan te ya spasbe te tut ya skꞌanike.

²⁵ Jich a skoles bael te winik te stꞌujojik te ya xkol bale. Jaꞌ te machꞌa ay ta prexo yuꞌun te la slijkes kꞌop sok te milawane. Y la yaꞌbe entregal ta skꞌabik te Jesuse, jich te tut ya skꞌan yoꞌtanike.

Te Jesuse jojkꞌanot ta krus

²⁶ Kꞌalal la yikꞌik bael te Jesus te ba sojkꞌanik ta kruse, la stsakik jtul Cirene-winik te Simon sbiile te xkꞌotuk tal ta kꞌalkꞌaltike, y la yaꞌbeyik xkuch te kruse. Nail ay kꞌael te Jesuse.

²⁷ Bayal genteetik stsꞌakliyejik kꞌael. Ay bayal antstik ya xꞌokꞌik y xꞌawlajan yuꞌun ajtal-oꞌtan yuꞌun te Jesuse.

²⁸ Pero te Jesuse la skꞌelu sujtel y la yaltalanbe: —Antstik yuꞌun Jerusalen, ma xꞌawokꞌetayikon. Okꞌetaya aba atukelik, y sok te awuntikilike.

²⁹ Porke ya me sta skꞌaalel te jich ya xꞌalote: “Ben tsaꞌam slekil te machꞌa ma xꞌalajike, sok euk te machꞌa ma xchuꞌunbot xchuꞌike.”

³⁰ Sok jich ya xlijk yalik te gentee: “¡Aꞌ jemuk tal ta jbajtik te witstikile!” Sok jich me ya yalbeyik te chꞌin witstikile: “¡Laꞌ, nakꞌaotik!” ya me yutik.

³¹ Porke teme jich ya spasbikone te yaxal teꞌ kꞌoemone, jaꞌukix to a te jaꞌex, te takin teꞌ kꞌoemexe —xchi te Jesuse.

³² Sok yikꞌojik kꞌael cheb winketike te bayal tut ma tsaꞌamuk spasojike yuꞌun pajal ya xba jojkꞌanek ta krus sok te Jesuse.

³³ Kꞌalal a kꞌot te ba chꞌin stunle te Bakeljolol sbiile, teꞌ sjojkꞌanik ta krus a te Jesuse sok xchebal te winketik te bayal tut ma tsaꞌamuk spasojike, jtul ta sbatsꞌil kꞌab y jtul ta xkꞌexom kꞌab.

³⁴ Te Jesuse la yal: —Jtat, pasbeya perdon, porke ma snaꞌik te tut ya spasike —xchi. Te soltaroetike lijkik ta tajmal yuꞌun ya yilik te machꞌa ya xkꞌot ta skuenta te skꞌuꞌ-spakꞌ te Jesuse.

³⁵ Te genteetike teꞌeyik ekꞌa yipalik ta yilel te tut ya xkꞌot ta pasele. Y asta te juꞌeletike ya yikꞌtinik euk te Jesuse. Jich ya yalik: —La skolta te yane. Ora to aꞌ skolta sba kiltik euk, teme batsꞌik jich te jaꞌ Cristo te tꞌujbil yuꞌun te Diose —xchiik ta yikꞌtinel.

³⁶ Te soltaroetike ya yikꞌtinik euk te Jesuse. Tijilajik tal y la yaꞌbeyik yuchꞌ chꞌaal bino.

³⁷ Jich a yalbeyik: —Teme jaꞌat te reyat yuꞌun te juriyoetike, kolesa aba atukel —xchiik ta yikꞌtinel.

³⁸ Sok ay pakꞌbil jun letrero chꞌujteb ta sjol krus te tsꞌibabil ta griego-kꞌop sok ta latin-kꞌop sok ta hebreo-kꞌop: “Jaꞌto, jaꞌ te rey yuꞌun te juriyoetike”, xchi te letreroe.

³⁹ Jtul te jmulawil te bayal tut ma tsaꞌamuk spasoje, te pajal jipil sok ta krus te Jesuse, la yikꞌtin euk. Jich a yal: —Teme jaꞌat te Cristoate, kolesa aba atukel y kolesaotik euk —xyut.

⁴⁰ Pero te jtul xane la skom te sjoye, sok la yalbe: —¿Meꞌn makꞌ xiꞌat yuꞌun te Diose te tutꞌil pajal ayat ta kastigo sok te Jesuse?

⁴¹ Te joꞌotike ay rason te ayotik ta wokole, porke jaꞌ yipalotik ta stojel te tut ma tsaꞌamuk jpasojtike. Pero te winik to maꞌyuk tut ma tsaꞌamuk spasoj —xchi.

⁴² Te nax a la yalbe te Jesuse: —Jesus, naꞌaon me te tut ora ya awichꞌ awaꞌtele —xyut.

⁴³ Te Jesuse la sjakꞌbe: —Jamal ya kalbeyat, te ora to ya me joyin jbajtik ta lekilal —xchi.

Jicha cham te Jesuse

⁴⁴ Ol kꞌaal a ijkꞌub spisil te balmilale, jaꞌto ta las tres mal kꞌaal.

⁴⁵ Te kꞌajkꞌale majk bael. Y te pakꞌ te makal a te temploe chꞌiꞌ koel ta olil.

⁴⁶ Te Jesuse tulan a awun y la yal: —Jtat, ya kaꞌbeyat ta akꞌab te jchꞌulele —xchi. Y te jich a yale, lok xchꞌulel.

⁴⁷ Te kꞌalal la yil te tuti kꞌot ta pasel, te statal soltaroe ben tsaꞌam skꞌoplal a yalbe te Diose. Jich a yal: —Batsꞌi jich a nix a te winik to maꞌyuk smul —xchi.

⁴⁸ Y spisil te genteetik te talemik ta yilel te tuti kꞌot ta pasele, kꞌalal sujtik bael la smajulan kꞌa stiꞌ yoꞌtanik yuꞌun.

⁴⁹ Pero spisil te machꞌatik ya snaꞌbe sba te Jesuse y sok te antstik te stsꞌakliyejik tal kꞌalal ta Galileae, teꞌ laj jil a. Jakal yipalik ta skꞌeluyel te tuti kꞌot ta pasele.

Te Jesuse mukbot te stiꞌbalule

⁵⁰ Ay jtul winik te Jose sbiil te ben lek y toj ta winikil te ay slumal ta Arimatea jun jtejklum yuꞌun te Judeae. Sok yichꞌoj yaꞌtel yuꞌun te juriyoetike,

⁵¹ pero ma yakꞌ sba a te tuti snopik te ya spasike. Jaꞌ yipal ta smaliyel te ya xꞌoch ta ajwalil te Diose.

⁵² Jaꞌ bajt te ba ay te jPilatoe, y la skambe te stiꞌbalul te Jesuse.

⁵³ La skoes te ba kruse, sok la spots ta sakil pakꞌ. Ba yakꞌ jilel te ba jun jutbil ton te ma to ayuk machꞌa mujkem ae.

⁵⁴ Jaꞌ skꞌaalel a te ya xchap sbaik yuꞌun te skꞌaalel kuxo-oꞌtane te ya xlijkixe.

⁵⁵ Te antstik te sjoyinejik tal te Jesuse kꞌalal ta Galilea, ba yilik te chꞌene. La yilik te tutꞌil aꞌbil jilel te stiꞌbalul te Jesuse.

⁵⁶ Kꞌalal laj sujt bael ta nae, la xchapbeyik xpoxil stiꞌbalul te ben tsaꞌam yikꞌe. Te antstike la xkux yoꞌtanik ta skꞌaalel kuxo-oꞌtan jich tut ya yal te mantale.