San Lucas 20 - Nuevo Testamento Tzeltal de Amatenango

Te tut yaꞌtel yichꞌoj te Jesuse

¹ Ay jun kꞌaal te Jesuse yipal ta spꞌijutesel genteetik ta templo, y jaꞌ yipal ta yalbeyel sluwar te lek achꞌ kꞌop yuꞌun te kolele. Laj kꞌot te statal saserdoteetike y sok te maestroetik yuꞌun te mantaliletike sok euk te moletik yuꞌun te jtejklume,

² y la yalbeyik: —¿Tuti awaꞌtel awichꞌoj ta spasel tsꞌin to? ¿Machꞌa yaꞌbeyat awaꞌtel? —xchiik.

³ Te Jesuse la sjakꞌ: —Jichon euk ay tut ya jojkꞌobeyex. Ya me sujtesbikon te jkꞌope.

⁴ ¿Machꞌa stikon tal ta yakꞌel ichꞌjaꞌ te Juane? ¿Me jaꞌ te Diose o jaꞌ te winketike? —xchi.

⁵ Lijk snopik y lijk sjojkꞌobe sbaik: —Teme ya kaltik te Dios a stikon tale, ya xba yalbotik: “¿Tuꞌun te ma la achꞌuunik te tut a yalte?” ya me yutotik.

⁶ Y ma spas ya kalbetik teme jaꞌ winketik a stikon tale, porke te genteetike ya me smilotik ta chꞌojel ta ton, yuꞌun spisilik jich xchꞌuunejik te jaꞌ jꞌalwanej yuꞌun Dios te Juane —xchiik ta yaꞌbiyanel.

⁷ Jich a ba yalbeyik te Jesuse te ma snaꞌik te machꞌa tikonot tal yuꞌun te Juane.

⁸ Jich te Jesuse la sjakꞌtalanbe: —Jichon euk, ma xkalbeyex te tut kaꞌtel kichꞌoj ta spasel tsꞌin to —xchi.

Seña-kꞌop te jꞌaꞌteletik te ma tsaꞌamuk yoꞌtanike

⁹ Te Jesuse lijk yalbe te genteetike te seña-kꞌop to: —Ay jtul winik te ba stsꞌun ubailtik y la yakꞌ jilel ta kanantayel yuꞌun jꞌaꞌteletik, y jakal a bajt ta beel, y jalaj teꞌa.

¹⁰ Kꞌalal la sta yorail te ya skꞌan kꞌokel sit te yubae, la stikon bael jtul yaj-aꞌtel yuꞌun ya xba skꞌanbe te jꞌaꞌteletik te jayeb ya xkꞌot ta skuenta te skosechae. Pero te jꞌaꞌteletike la smajik te jmantale, y jich smeyoj skꞌab a sujt bael.

¹¹ Jich te yajwal ubailtike la stikon xan yan yaj-aꞌtel. Jaꞌ nax jich ma yakꞌik ta jkuenta. La smajik, y jich smeyoj skꞌab a yakꞌik bael.

¹² Y la stikon xan yan, pero te jꞌaꞌteletike la yejchꞌentesik y la xchꞌojik lokꞌel ta jwera.

¹³ “Jich te yajwal ubailtike la snop ta yoꞌtan: “¿Tut lek ya jpas? Jaꞌ lek ya jtikon bael te jnichꞌan te lom kꞌux ta koꞌtane. Repente jaꞌ ya yakꞌik ta jkuenta te kꞌalal ya yilike”, xchi.

¹⁴ Pero te kꞌalal la yilik te jꞌaꞌteletike, jich a lijk yalbe sbaik: “Jaꞌ to jaꞌ te machꞌa ya xjil ta skuenta te lume. Jaꞌ lek ya jmiltik, yuꞌun me joꞌotik ya xjil ta jkuentatik a te lume”, xchiik.

¹⁵ Jich yuꞌun la slokꞌesik bael ta ba ubailtike y la smilik. “¿Tut me ya xjul pasbek ya awaꞌiyik yuꞌun te yajwal ubailtike?

¹⁶ Ya me xtal smil jilel te jꞌaꞌteletike, y ya me yakꞌ ta kanantayel ta yan te ubailtik yuꞌune —xchi te Jesuse. Te machꞌatik la yaꞌiyike la yalik: —Ma wan jichuk ya skꞌan te Diose —xchiik.

¹⁷ Pero te Jesuse la skelulanbe sit y jich a yal: —¿Tut a te tsꞌibabil jilel ta Sjun te Diose: “Te ton te ma tsaꞌamuk a yilik te jꞌalwaniletike, jaꞌ yipajib na a kꞌot stukel”, xchi me?

¹⁸ Spisil te machꞌa ya xtꞌuxaj ta sba te tone ya me xpꞌuy teꞌa. Yan teme ya xtenot yuꞌun te tone, mel nax me polvo ya xjil yuꞌun —xchi te Jesuse.

¹⁹ Te statal saserdoteetike sok te maestroetik yuꞌun te mantaliletike ora nax kꞌan stsakik te Jesuse, yuꞌun la snaꞌik te jaꞌ skꞌoplalik te seña-kꞌop te la yal te Jesuse. Pero ya xiꞌik yuꞌun te genteetike.

Tutꞌil ay skꞌoplal te tojemaletike

²⁰ Jaꞌ yuꞌun la stikonik jꞌilawetik te skuyoj sbaik te lek yoꞌtanik ta ilel ta stojol te Jesuse, yuꞌun jich me ya yaꞌbeyik yal a te tut ma lekuke. Jich me ya xba yakꞌik entregal ta stojol te gobiernoe.

²¹ Jaꞌ a sjojkꞌobeyik to te Jesuse: —Maestro, jnaꞌojtik te toj te tut ya awale y te ya snojpeswanate. Ma tꞌujbiluk nax awuꞌun te machꞌa ya awakꞌ ta jkuentae. Jich ya snojpeswanat te tut ya yal ta mantal te Diose.

²² ¿Me lek te ya jtojtik te jtojemaltik yuꞌun te Cesare o ma lekuk? —xchiik.

²³ Te Jesuse la snaꞌbe sluwar te ma tsaꞌamuk yoꞌtanik te tuti ba yalike. La yaltalanbe: —¿Tut yuꞌun te ya awilbikon koꞌtane?

²⁴ Aꞌbikon sejpuk te takꞌine. ¿Machꞌa slokꞌol te ya awilik ae, sok machꞌa sbiil te liꞌ tsꞌibabile? —xchi. La sjakꞌik: —Jaꞌ te mukꞌul rey Cesare —xchiik.

²⁵ Te Jesuse la yaltalanbe: —Te tut yuꞌun te Cesare, aꞌbeyaik; y te tut yuꞌun te Diose, aꞌbeyaik euk —xchi te Jesuse.

²⁶ Jich ma juꞌ yuꞌunik te tut kꞌan yaꞌbeyik yal te tut ma tsaꞌamuk ta stojol te genteetike. Lom yajtal yoꞌtanik yuꞌun te tutiꞌ sujtesbot skꞌopik yuꞌun te Jesuse. Jich ma tutiꞌ yalikix a.

Te Jesuse jojkꞌobot tutꞌil ay te chaꞌkuxele

²⁷ Patil ay chaꞌoxtul saduseoetik ba yilik te Jesuse. Te saduseoetike ma xchꞌuunik te ya xchaꞌkux tal te animaetike. Jaꞌ yuꞌun la sjojkꞌobeyik te Jesuse:

²⁸ —Maestro, te jMoisese la stsibabotik jilel: “Teme ay jtul winik nujpunem te ya xchame, teme maꞌyuk jilel yuntikil sok te yiname, te yijtsꞌin te animae jaꞌ me aꞌ yikꞌ yinamin te meꞌbaꞌ antse. Jich me ay stsꞌumbal ya xkꞌot te anima sbankile”, xchi me.

²⁹ Yuꞌun ay juktul winketik te jun nax smeꞌ-statike. Te bankilale jnujpun sok jtul ants, pero cham, y maꞌyuk jil yuntikil.

³⁰ Jich te xchebal ijtsꞌinale la yinamin te meꞌbaꞌ antse, pero cham euk, sok maꞌyuk jilel xnichꞌan.

³¹ Sok jich euk te yoxebal ijtsꞌinale, la yinamin xan te antse. Y jich a spasik euk te yane ta sjuktululik laj cham y maꞌyuk jil yuntikilik.

³² Ta patil cham euk te antse.

³³ Jaꞌ yuꞌun, ¿machꞌa yinam ya xkꞌot te kꞌalal ya xchaꞌkuxik tal te animaetike? Si ta sjuktululik la yinaminik te antse —xchiik.

³⁴ Te Jesuse la sjakꞌtalanbe: —Li ba balmilal to te winketik sok te antstike ya xnujpunik.

³⁵ Pero te machꞌatik lek ya xꞌilot yuꞌun Dios te ya xjuꞌ ya xkꞌoik te ba lekil lum te ya xchiknaj ta patile te kꞌalal ya xchaꞌkux tal te winketike o te antstike, makꞌ me xnujpunikix a,

³⁶ sok makꞌ me xchamikix a. Yuꞌun jich me kꞌoemikix te tutꞌil chꞌul angeletike. Yal-xnichꞌan Dios kꞌoemikix te tutꞌil chaꞌkuxemikixe.

³⁷ Hasta mismo te jMoisese jich a yal te kꞌalal la yalbe sluwaril te jpejt chꞌix-teꞌ te yipal ta tilele, la yaꞌbotik jnaꞌtik te ya xchaꞌkux tale te animaetike. Teꞌ yal a te Kajwaltik Dios te jaꞌ Dios yuꞌun te jꞌAbrahame te jꞌIsaake sok te Jacobe.

³⁸ Te Diose ma jaꞌuk Dios yuꞌun te machꞌa chamenike. Jaꞌ Dios yuꞌun te machꞌa kuxajtike, yuꞌun ta sit te Diose spisil kuxajtik —xchi te Jesuse.

³⁹ Ay chaꞌoxtul maestroetik yuꞌun te mantaliletike jich a yalbeyik: —Ben tsaꞌam te tut la awale, Maestro —xchiik.

⁴⁰ Y jich te saduseoetike la xiꞌik te ya to sjojkꞌojbeyik xan ae.

¿Machꞌa stsꞌumbal te Cristoe?

⁴¹ Te Jesuse la sjojkꞌolambe: —¿Tuꞌun te ya yalik te jaꞌ stsꞌumbal jDavid te Cristoe?

⁴² Yuꞌun mismo te jDavide la stsꞌibaj jilel ta salmoetik te jich ya yale: “Te Kajwaltike la yalbe te Kajwale: ‘Naklan ta sbatsꞌil

⁴³ jkꞌab jaꞌ to teme la kaꞌbeyat apuchꞌ ta tekꞌel te akontrae,’ xchi te Diose”, xchi me.

⁴⁴ ¿Tutꞌil ay te jaꞌ stsꞌumbal jDavid te Cristoe? Yuꞌun mismo te jDavide la yalbe: “Kajwal”, xchi —xyut te Jesuse.

Te Jesuse jamal a yalbe smul te maestroetik yuꞌun te mantaliletike

⁴⁵ Spisil te genteetike yipalik ta yaꞌiyel sluwaril. Te Jesuse la yalbe te jnopojeletik yuꞌune:

⁴⁶ —Ila me abaik yuꞌun te maestroetik yuꞌun te mantaliletike. Yuꞌun ya skꞌupinik te ya slapik ta beel te najtꞌil kꞌuꞌul-pakꞌale, y ya skꞌanik te ya xpatbot yoꞌtanik ta sitil komon ta parkee. Y ya sleik te primero naktajibal ba sinagogae yuꞌun ya skꞌanik akꞌel ta jkuenta. Sok ya smakik ta ora te primero naktajibal yuꞌun te ba ya stsꞌob sbaik ta weꞌele.

⁴⁷ Sok ya spojbeyik sna sok stutik yuꞌun te meꞌbaꞌ antstike. Y lom jal ya skꞌoponik Dios ta sitik komon yuꞌun ya skꞌanik kꞌupinel. Jaꞌ me mas tulan kastigo ya xꞌakꞌtalanbot —xchi te Jesuse.